anong kasong pulitikal ang aking aakuin
upang makabalik sa lungsod at sa'king tungkulin
bakasakaling ako'y muli rin nilang kulungin
upang sa pagsilbi sa bayan ay makabalik din
aakuin ko bang ako'y isang propagandista
ng kilusang masang patuloy na nakikibaka
aakuin ko bang masugid akong aktibista
upang kamtin ng masa ang panlipunang hustisya
aakuin ko bang sa heneral na mapaniil
na napatay noon ay isa ako sa bumaril
aakuin ko bang sa mapang-abusong koronel
ang naghiganti para sa dukhang kanyang kinitil
aakuin ko ba pati sugat ng katarungan
upang makabalik lang sa paglilingkod sa bayan
ayokong ituring na sa laban ay nang-iwan
ako na'y makulong o gawaran ng kamatayan
- gregoriovbituinjr.
