SA LAMBONG NG ULAP
ni Gregorio V. Bituin Jr.
13 pantig bawat taludtod
ayoko ng ganyang dilim ng kalangitan
pagkat tulad ito ng ako'y iyong iwan
tandang may unos at baha sa kalunsuran
tulad ng iwan mong ang puso ko'y sugatan
nais ko'y isang bagong araw ang sisikat
na siyang hihilom sa nilikha mong sugat
nais ko'y bughaw yaong langit sa pagdilat
na tandang may buhay sa kabila ng pilat
kung sakali mang lumambong muli ang ulap
sa kalangitang bughaw ng mga pangarap
may bago kayang pag-ibig na malalasap
tadhana ba'y muli tayong mapapagtiyap
umulan ma’t umaraw, tuloy ang pag-ibig
na sa bawat puso'y pagmamahal ang dilig
walang makapipigil kahit nanginginig
bumaha man ng luha't tuwa'y nakikinig
