PANTASYA ANG 7.2% GROWTH NI GLORIA
ni Gregorio V. Bituin Jr.
Pag napanood ang patalastas
Na ginawa ng pamahalaan
Bansa raw ay umunlad, tumaas
Ang porsyentong umano’y batayan
Ng pagsulong nitong Pilipinas.
Pagkat bilihin na ay tumaas
Paanong umunlad itong bayan
Kung sumirit ang presyo ng bigas
Kuryente, tubig, gaas sa kalan
Pasahe, matrikula’t sardinas.
Hindi na naisip pumarehas
Basta’t silang nasa pamunuan
Mapuri lamang kahit maghudas
Kahit alam na gutom ang bayan
Walang paki’t nambabalasubas.
Nitong sari-saring patalastas
Na pawa namang kabulaanan
Upang bulsa natin ay mabutas
Sistemang ito’y dapat wakasan
At isakdal ang sinumang hudas.
Tahakin na nati’y bagong landas
Mga hudas ay ating labanan
At itayo ay sistemang patas.
Sampaloc, Maynila
