Kuyom ang kaliwang kamao

KUYOM ANG KALIWANG KAMAO

tingnan mo't kuyom ang kanilang kaliwang kamao

tandang patuloy nilang pinaglalabang totoo

ang panlipunang hustisya't karapatang pantao

itama ang mga mali, iwasto ang proseso

kaliwang kamao para sa obrero't hustisya

di sila makakanang kampi sa trapo't burgesya

sila'y mga karaniwang taong lingkod ng masa

may simpleng pamumuhay, puspusang nakikibaka

kuyom ang kaliwang kamao, tapat manindigan

upang karapatang pantao'y talagang igalang

pawang matatalas magsuri sa isyung pambayan

para sa kagalingan ng mayoryang mamamayan

sa darating na halalan, may prinsipyo'y iboto

tandaan sina Leody de Guzman, Walden Bello

para sa pagkapangulo't ikalawang pangulo

senador: Espiritu, Cabonegro, D'Angelo

halina't magbigkis, kaliwang kamao'y itaas

upang durugin ang mapagsamantala't marahas

ito'y tanda ng katatagan at pagkapangahas

upang itayo ang pangarap na lipunang patas

upang itatag ang pangarap na magandang bukas

- gregoriovbituinjr.

03.09.2022

Kaunlarang may hustisyang panlipunan

KAUNLARANG MAY HUSTISYANG PANLIPUNAN

nais kong kaunlaran ng bayan

ay ang may hustisyang panlipunan

at di nang-api ng kababayan

o nagsamantala sa sinuman

nais kong pag-unlad ay kasama

ang manggagawa't mayoryang masa

di pag-unlad lang ng elitista

di kaunlaran lang ng burgesya

pag-unlad bang kayraming tinayo

tulay na mahaba't malalayo

gusaling matatayog sa luho

subalit tao'y naghihingalo

dahil sa kahirapan ng buhay

buti pa ang pag-unlad ng tulay

kalakal ay nahatid na tunay

habang mga tao'y naglupasay

dahil sa gutom, karalitaan

iyan ba ang tamang kaunlaran

pag-unlad lang sa ilang mayaman

at dusa sa mayorya ng bayan

walang maiiwan kahit dukha

sa nais na pag-unlad ng bansa

kasama kahit na walang-wala

at may panlipunang hustisya nga

wastong pag-unlad, lahat kasama

tao muna ang dapat sistema

di negosyo lang at bahala na

sa buhay mong pulos pagdurusa

di makasariling kaunlaran

ang nais natin sa buong bayan

pagkat ang tunay na kaunlaran

ay ang may hustisyang panlipunan

- gregoriovbituinjr.

03.09.2022

Ang landas na nais kong matahak

ANG LANDAS NA NAIS KONG MATAHAK

kung sakali mang ako'y apihin

ng sinumang gago'y didibdibin

sila'y tiyak kong kakalabanin

madugong landas man ang tahakin

dahil nais ko'y kapanatagan

ng isipan at ng kalooban

subalit akin nang nakagisnan

ang kabulukan sa ating bayan

ayos daw ang kontraktwalisasyon

para sa kapitalistang miron

ngunit sa obrero'y salot iyon

na dapat lang wakasan na ngayon

ayos lang daw yumaman ang trapo

malaki raw ang sahod ng tuso

ngunit walang pagpapakatao

serbisyo'y ginawa nang negosyo

ayos lang daw maapi ang dukha

kaya dapat daw silang mawala

basura raw sa mata ng madla

pangmamata na nila'y malala

karapatang pantao'y nawasak

tao'y pinagagapang sa lusak

kaya landas kong nais matahak

sistemang bulok ay maibagsak

- gregoriovbituinjr.

03.09.2022

Si David D'Angelo noong Women's Day

SI DAVID D'ANGELO NOONG WOMEN'S DAY

makakalikasang pambato natin sa Senado

sa Araw ng Kababaihan kasamang dumalo

nagtalumpati sa Oriang si David D'Angelo

sa isyu ng klima'y nagpaliwanag pang totoo

sigaw niya: Mabuhay ang mga kababaihan!

binanggit ang magiting na si Gabriela Silang

nabanggit din si Bonifacio ngunit di si Oriang

tila di kilala, Lakambini ng Katipunan

gayunman, talumpati niya sa klima'y matindi

pag-init ng mundo'y baka umabot ng two degree

sa loob ng walong taon, na pag ito'y nangyari

pagtaas ng tubig-alat, tayo'y magiging saksi

nakadaupangpalad sa unang pagkakataon

kaya sa kanya ako'y nag-selfie rin naman doon

si David D'Angelo, senador nating may misyon

ating ipanalo sa Senado, magandang layon

- gregoriovbituinjr.

03.09.2022

* litratong kuha ng makatang gala sa nilahukang rali, Marso 8, 2022

Tayo Naman

TAYO NAMAN

"Pulitika ng mamamayan, hindi ng iilan!"

prinsipyadong adhikaing tangan ng mamamayan

"Bagong Botante, Bagong Pulitika! Tayo Naman!"

panawagang may buong tapat na paninindigan

wakasan ang PULITIKANG BUNTOT sa mga trapo

kung saan sasayaw lang sila'y agad mananalo

pati dinastiyang pulitikal, wakasan ito

serbisyong bayan ay di na dapat maging negosyo

wakasan ang lipas nang panahon ng paghahari

nitong trapo, elitista, burgesya, hari't pari

bulok na sistema nila'y di dapat manatili

uring manggagawa naman ang ating ipagwagi

"Manggagawa Naman!", "Tayo Naman" yaong mamuno

sa ating bansang ang hustisya'y dinilig ng dugo

sa tunggalian ng uri ay di tayo susuko!

tayo'y prinsipyado, basagin man ang ating bungo!

- gregoriovbituinjr.

03.09.2022

* litratong kuha ng makatang gala sa dinaluhang rali noong Women's Day