Ang sining

ANG SINING

halina magpatuloy tayong gumawa ng ingay

laban sa mga kurakot na korapsyon na'y gamay

lagi't lagi, sining ng pagtula'y isinasabay

sa bawat rali, nang kurakot panaguting tunay

kumilos tayo! at huwag manahimik na lamang!

magalit tayo! singilin ang kurakot na iyan!

lumabas tayo! karapatan nati'y ipaglaban!

maningil tayo! panagutin ang mga kawatan!

ang sining ay di lang upang aliwin ang sarili

kundi ito'y isa sa palagi nating kakampi

sa paglikha ng kasaysayan, tagos ang mensahe

sa sambayanang kaytagal nang nagdurusa't api

baguhin na ang sistema! hiyaw ng taumbayan!

mga trapo't dinastiyang pulitikal, wakasan!

lahat ng mga kurakot ay dapat parusahan!

ikulong na 'yang mga kurakot! sigaw ng bayan!

- gregoriovbituinjr.

01.19.2026

Seremonyas

SEREMONYAS

kadalasan, bago umalis ng umaga

may seremonyas ng pagtulâ sa kusina;

makakain, nakatha'y agad ititipa

at sa ere iyon ay palulutangin na

maliligo, pag may nanilay at nawatas

may seremonyas ng pagtulâ sa kasilyas

habang nadarama'y kaysarap mailabas

ng naisip, naligo, nagbanlaw, nagpunas

pag nakagayak na'y lalabas ng tahanan

lalakarin ang kilo-kilometrong daan;

may seremonyas ng pagtulâ sa lansangan

alisto nang di madapa't masagasaan

mag-ingat pagkat baka may bukas na manhole

mahirap nang mabalian at magkabukol;

may seremonyas ng pagtulâ ng pagtutol

laban sa mga kurakot sa ghost flood control

- gregoriovbituinjr.

01.19.2026