Martes, Enero 19, 2016

mamamatay na lang ba akong...

mamamatay na lang ba akong
walang laman ang mga tula
kundi pawang himutok, luha
panimdim, at pangungulila

ako ba'y mamamatay na lang
nang di tuluyang naaangkin
ang inaasam kong diwata
na anghel ang kariktang angkin

ako lang ba ay mamamatay
na yapos ay sanlaksang lumbay
pagkat di napapagtagumpay
ang mga pangarap na tunay

sana naman, mamatay akong
nagisnan ang bagong umaga
at di nasidlak sa kadimlan
ng kawalan ng katarungan

- gregbituinjr

Walang komento: