Sawikain sa Hayop at Kahayupan

SAWIKAIN SA HAYOP AT KAHAYUPAN
ni Greg Bituin Jr.
8 pantig

Sa aking pananaliksik
Mata'y napako sa titik
Ng sawikaing matarik
Na sa diwa ko'y bumikig.

Kaya't sa inyo'y pambungad
Itong sawikaing hangad
At ang aking ilalahad
Ay yaong sa hayop tulad.

Samo ko'y inyong basahin
At inyong pakasuriin
Itong mga sawikain
Na kaysarap ngang papakin.

Kung ang kabayo'y patay na
Ang kumpay ay aanhin pa?
Ang kalimitan sa isda
Nahuhuli sa bunganga.

Di mawiwili ang aso
Kung di bibigyan ng buto.
Ang kabayo pag tumakbo
Huwag pigili't hindi iyo.

Ang daga'y hindi iiyak
Pag di nahuli sa bitag.
Ang bulo mang anong ilap
Umaamo rin sa himas.

Kung matsing man ay marunong
Lalo't higit itong pagong.
Yaong hipong natutulog
Ang tinatangay ng agos.

Ang inahing mapagkupkop
Di man anak isusukop.
Ang buriko'y maganda rin
Kung buriko ang titingin.

Ang bahay na may asukal
Puntahan ng mga langgam.
Ang mag-alila ng uwak
Ang mata ang binubulag.

Bakit may pinunong ungas
At asal-hayop sa labas?
Kung bawat gubat, may ahas
Sa gobyerno ba'y may hudas?

Mag-ingat sa mga hangal
At makahayop na asal
Upang hindi ka mabuwal
At sa mundo ay magtagal.

Tayo'y may natututunan
Sa sawikain ng bayan
Na mula sinapupunan
Ng diwa't kinabukasan.

Pagmumuni sa Pangulo't Bansa

PAGMUMUNI SA PANGULO'T BANSA
ni Greg Bituin Jr.
9 pantig

Nasa pwesto pa rin si Gloria
Na maraming sala sa masa
Nag-Hello Garci ng balota
Nagnais bilisan ang ChaCha
Nang sa termino'y tumagal pa.

Di baleng lahat ay magdusa
Basta't nakapwesto ang reyna
Bansa pa'y pilit binebenta
O kaya'y ipamimigay na
Sa dayuhang kapitalista.

Kahit daw bato ang iluha
Ng masang binabalewala
Kahit marami'y bumulagta
Di raw siya mapapababa
Ng masa't uring manggagawa.

Siyang-siya naman ang reyna
Nakangisi't tatawa-tawa
Wala raw magawa ang masa
Kaya't siya'y nasa trono pa.
Sa ganito ba'y papayag ka?

Magkaugnay

MAGKAUGNAY
ni Greg Bituin Jr.
11 pantig

May isang paham na nagpapatunay
Na magkaugnay ang lahat ng bagay
May bagay na di maihihiwalay
Sa iba pang pangyayari at bagay.

Pag walang hangin, tao'y mamamatay
Pag walang saya, tayo'y malulumbay
Pag kaibiga'y nawalan ng buhay
Tayo'y tiyak agad makikiramay.

Sa tubig isda'y iyong ihiwalay
Pitasin mo ang bulaklak sa tangkay
Maralita'y tanggalan mo ng bahay
Isa-isa mo silang pinapatay.

Patunay itong sa ati’y may saysay
Na sa ating diwa ri'y gumagabay
Kaya't ating pakatandaang tunay
Ang lahat ng bagay ay magkaugnay.

Malay

MALAY
ni Greg Bituin Jr.
11 pantig

Kung ikaw'y naniniwalang tama ka
Sa iyong mga pinaninindigan
Dapat lang ito'y iyong ipaglaban
Pagkat ito'y sadya mong karapatan.
Gawin mo ang lahat ng nalalaman
Sa iba't iba mong pamamaraan
Nang layuni'y maisakatuparan.
Kung hindi bukas ang iyong isipan
Yaong bibig mo'y huwag mo nang buksan.
Tanging mga patay na isda lamang
O yaong mga lumuksong alamang
Ang natatangay ng agos sa twina.

Ang Pumipigil sa Pagsulong

ANG PUMIPIGIL SA PAGSULONG
ni Greg Bituin Jr.
8 pantig

Baka kasi, baka, baka
E kasi, e kasi, kasi
Paano kung, paano kung
Sana naman, sana naman
Mga ito'y pumipigil
Sa ating ikasusulong
At tila mga hilahil
Na sa ati'y lumalason.

Di Dapat Magtiis

DI DAPAT MAGTIIS
(Nilikha sa text)
ni Greg Bituin Jr.
10 pantig

Manggagawa'y di dapat magtiis
Sa ilalim ng sistemang burgis
Pagkilos ay dapat walang mintis
Hanggang kapitalismo'y matiris.

Ang Ibubulong Ko sa Iyo

ANG IBUBULONG KO SA IYO
ni Greg Bituin Jr.
14 pantig

Maari kong isigaw sa mundong mahal kita
Ngunit baka ako'y balewalain lang nila.
Ang pag-ibig ko'y ibubulong na lang sa iyo
Pagkat tiyak kong ako'y mauunawaan mo.

Ako ang Bato

AKO ANG BATO
(Ako at ang bayaning Rusong sniper na si Vassily Zaitsev, mula sa pelikulang “Enemy at the Gates”)
ni Greg Bituin Jr.

Tangan ng Rusong sniper na si Vassily Zaitsev,
Habang nakasipat sa largabista,
Ang kanyang ripleng Mosin Nagnat.
At hinihintay ng ilang minuto,
Ilang oras, o marahil ilang araw
Na ang target na ulo’y lumitaw
Habang inuusal sa sarili:
“Ako’y bato, at di gumagalaw!
Dahan-dahan, isinusubo ko ang nyebe
upang di maamoy ng kaaway ang aking kinaroroonan.
Di ako nagmamadali, at pinalalapit ko siya.
May isa lamang akong bala.
Maginoo kong kinalabit ang gatilyo.
Di ako nanginginig. Di ako natatakot,
Dahil isa akong sniper,
Na naglilingkod ng tapat
Upang ipagtanggol ang bayan ko."

At tulad ni Vassily, target ng aking pluma
Ang mga diwang walang diwa upang magkadiwa
Inaasinta ng aking pluma ang mga
Diwang walang kaluluwa
Inaasinta ng matang apoy
Ang mga halang ang kaluluwa.
Tulad ni Vassily, isa rin akong bato
Di natitinag ng mga balikong prinsipyo.

Talinghaga ng Makata

TALINGHAGA NG MAKATA
ni Gregorio V. Bituin Jr.
11 pantig

Bawat makata’y isang talinghaga
Sa mundong itong puno ng hiwaga
Sinasambit ay malalim na diwa
Na nagmula sa kanyang tuwa’t luha.

May mga makatang sadyang kaiba
Nililikha nila’y di nalalanta
Ang inihasik nila’y magaganda
Na pag tumubo’y ginto yaong bunga.

Makata yaong matalinong pantas
Na inaakda’y makabagong landas
Tungo sa sabanang puno ng peras
Na lunas sa tuso’t may diwang ungas.

Makata’y tulad ng matinong paham
Pananalinghaga’y may pang-uuyam
Ipinakikitang may pakialam
Sa lipunang sa dusa’y nilalanggam.

Nariyan si Balagtas na bayani
Na atin namang ipinagbubunyi
Florante at Laura’y kathang may silbi
Sa ating bansang pinipintakasi.

Nariyan din si Batuteng batikan
Na ang epiko’y walang kamatayan
Pinamagatang “Sa Dakong Silangan”
Na kwento nitong ating kasaysayan.

Magagandang tula’y nangaglipana
Sa mga aklat ng literatura
Tula ng modernistang Rio Alma
At ng “Ako ang Daigdig” ni Aga.

Sila’y ilan lamang sa manunula
Na humahabi ng ligaya’t tuwa
Sa bunying panitikan nitong bansa
At gumagabay sa diwa ng madla.

Nais kong sila’y aking matularan
Sa pagtula ko’y sila ang huwaran
Na ang itinanim sa panitikan
Ang binunga’y bagong diwa ng bayan.

Kaytindi ng kanilang ipinunla
Sa mayabong na bukid nitong diwa
Habang sa pagtula ko'y tinutudla
Ay pagbabago ng lipuna’t bansa.

Matagal Na Akong Patay

MATAGAL NA AKONG PATAY
ni Greg Bituin Jr.

Matagal na akong patay
Matagal na akong pinatay ng mga babaeng aking minahal
Kaylaon na nilang pinaslang ang puso kong nagmamahal
Bumangon lang akong muli sa hukay dahil sa pag-ibig sa iyo
Ngunit bakit ba tila nais mo ring pigtasin ang buhay ko
Bakit nais mong paslangin din ang puso kong nalulumbay
Hindi ka ba naaawa’t muli akong mamamatay?
Iisa na lang ang aking pangarap sa muli kong pagkabuhay
At ito’y sa kandungan mo sana ako tuluyang malagutan
Ng iwi kong buhay.

Ang Makatang Walang Dila

ANG MAKATANG WALANG DILA
ni Gregorio V. Bituin Jr.
14 pantig bawat taludtod sa I at II
12 pantig bawat taludtod sa III

I
Sino ang iibig sa makatang walang dila
Kung ang laging kausap ay mga tula’t pluma?
Bulag ba’y iibig sa makatang walang dila
Gayong di nila mawatasan ang isa’t isa?
Kung bingi’y iibig sa makatang walang dila
Marahil nama'y magkakaunawaan sila.

II
Naputulan ng dila itong bunying makata
Pagkat tinortyur ng mga sundalo ng reyna
Reyna’y nainis sa pagtuligsa’t mga puna
Kaya’t pinahuli niya ang makatang aba.

Ayaw pala ng reynang siya’y tinutuligsa
Ng abang makatang tila siya sinusumpa
Sa mga mali’t palpak niyang pamamahala
Kaya’t ito’y pinaputulan niya ng dila.

III
Naputulan man ang makata ng dila
Di pa rin naman nabawasan ang diwa
Ng kanyang plumang patuloy sa tuligsa
Sa mga pinunong kapara ay linta.

Suliranin ngayon ng abang makata
Paano siya iibigin ng sinta
Naiisip niyang magpatiwakal na
Nang maibsan ang nararamdamang dusa.

Ngunit siya pa rin nama’y umaasa
Na siya’y iibigin ng mahal niya
Wala man ang dila’y nariyan ang pluma
Na mapagtitiisan ng kanyang sinta.

Si Danilov, ang Propagandista

SI DANILOV, ANG PROPAGANDISTA
(mula sa pelikulang “Enemy at the Gates”)
ni Gregorio V. Bituin Jr.
13 pantig bawat taludtod

1
Saksi siya sa pagpaslang sa limang Nazi
Ng kabayang Rusong asintado sa riple
Naisip niyang kaibiganin ang pobre
Pagkat pagkaasintado’y malaking silbi
Na labis naman niyang ipinagmamalaki
Ang asintadong Ruso'y tunay na bayani.

2
Ang lunsod ng Stalingrad ay pabagsak na
Dahil sa paglusob ng tropang Alemanya
Binali ni Hitler ang kasunduan nila
Sa pagitan ng bansang Alemanya’t Rusya
Kaya’y mga Ruso’y naghandang magdepensa
Laban sa mga Nazing kalaban na nila.

3
Dahil sa pangyayari’y nagdaos ng pulong
Itong hukbong Ruso, pamunuan at lupon
Si Heneral Krushev sa kanila’y nagtanong:
“Tayo’y nilusob ng mga Alemang buhong.
Nadudurog ang ating mga kawal ngayon.
Magmungkahi kayo’t huwag bubulong-bulong.”

4
Siya, si Danilov, isang propagandista
Isang beterano sa paggamit ng pluma
Ani Danilov: “Kailangan ay pag-asa!
Dapat bigyan natin ng pag-asa ang masa
Na sa labang ito, ang nananalo’y Rusya
At kaytindi ng ating depensa’t opensa.”

5
“Maglalabas tayo ng maraming polyeto
Nagbabalitang marami tayong panalo
At di nagwawagi ang Aleman sa Ruso
Na kayraming Alemang sumabog ang ulo
At pinaglaruan ng Rusong asintado
Na kalmado kung kumalabit ng gatilyo.”

6
Kaya’t ibinalita niya ang nangyari
Sa nasaksihang pagpaslang sa limang Nazi
Sa gerang iyon, may lumitaw na bayani
Si Vassily Zaitsev, maytangan ng riple
Kaya’t si Heneral Krushev ay napangisi
At ang atas kay Danilov ay pinursigi.

7
Sa bawat polyetong inilathala nila
Ang ginawa ng asintado’y pinakita
Kaya nagpalakpakan ang madla ng Rusya
Inabangan na kung ilan pang itutumba
Nitong asintadong kaysipag umasinta
Habang galit na galit itong Alemanya.

8
Kaygaling ng propagandistang si Danilov
At itong hukbong Ruso’y lumakas ang loob
Di nila hinayaang sila na’y makubkob
Ng mga kaaway na panay ang paglusob
Matindi ang aral sa atin ni Danilov
Na bawat propagandista’y dapat marubdob.

9
Si Vassily ay kinilala't inidolo
Dahil sa propa ni Danilov sa polyeto
Hanggang hukbong Aleman nagpadala rito
Ng pantapat kay Vassilyng puntirya nito
Si Major Konig ang Alemang asintado
Sa gera'y naghantingan ang dalawang ito.

10
Nag-isip si Danilov ng kanyang pangontra
Hanggang ginawa niya'y huling propaganda
Upang kalaban ni Vassily ay tumumba
Posisyon ng kalaban ilalantad niya
Ulo'y kanyang inilitaw, napatay siya
Ng Alemang isnayper na kalaban nila.

11
Posisyon ni Konig, batid na ni Vassily
Ngunit ang Aleman nama'y naging kampante
Akala'y si Vassily ang kanyang nakanti
Nang lumantad si Konig ay agad dinale
Ni Vassily't si Danilov ay iginanti
Sa kanya, si Danilov ay isang bayani.

12
Stalingrad ay di nakubkob ng kalaban
Pagkat ilang linggo’t buwan pa ang nagdaan
Mga mananakop sa Rusya'y nagsilisan
Dahil talo’t suko na ang hukbong Aleman
Natapos na ang milyun-milyong kamatayan
Noong Ikalawang Daigdigang Digmaan.

Banyaga Man ang Kaisipan

BANYAGA MAN ANG KAISIPAN
ni Greg Bituin Jr.
13 pantig

Sosyalismo raw ay banyagang kaisipan
At bakit daw natin ito pag-aaralan
Ang marapat daw tayo’y maging makabayan
Imbes na kaisipa’y mula sa dayuhan.

Hindi ba’t kristyanismo’y banyaga rin naman
Ngunit natanggap na ngayon sa ating bayan
Espada’t kurus ang ginamit ng dayuhan
Upang magapi itong ating kababayan.

Ang dapat gawi’y pag-aralan ang lipunan
Kung bakit maraming mahirap at mayaman
Ang dahilan ba nito’y ito lang dayuhan
Di ba’t pati rin itong ating kababayan?

Kaya’t tigilan na ang dahilang dayuhan
Dayuhan ang nagdulot nitong kahirapan
Dayuhan itong nagpapahirap sa bayan
Gayong nagpapahirap din ay kababayan.

Umuunlad na itong ating kabihasnan
Ngunit kayrami pa rin ang nahihirapan
Sagot ba rito’y maging makabayan lamang
At dapat palayasin sinumang dayuhan?

Dahil nagkataong sila’y mga dayuhan
Na sumirang-puri sa ating kabihasnan
At nagsipagdambong ng ating likas-yaman
Kaya tugon dapat ay pagkamakabayan.

Pagsulpot ng uri ng tao sa lipunan
At pribadong pag-aari itong dahilan
Kung bakit mayroong mahirap at mayaman
Dapat na baguhin ang kalagayang iyan.

Kung pakasusuriin natin ang lipunan
Mababago lang natin itong kalagayan
Kung magrerebolusyon na ang taumbayan
Laban dito sa kapitalismong gahaman.

Nais nati’y pantay itong sangkatauhan
Di pribadong pag-aari ang kagamitan
Sa produksyon para makakain ang bayan
Sosyalismo ang ipalit nating lipunan

Kung kristyanismo’y natanggap sa ating bayan
Ang sosyalismo’y dapat matanggap din naman
Kahit sa proseso ng apoy ay dumaan
O kaya nama’y sa madugong himagsikan.

Di na mahalaga kung galing sa dayuhan
Itong makabagong kaisipan ng bayan
Ang mahalaga’y may prosesong dinaanan
At malaking tulong sa ating kababayan.

Itong sosyalismo ang ating bagong daan
Di lang pambayan kundi pangsangkatauhan
Ito ang handog natin sa kinabukasan
Sosyalismo’y pag-ibig ang alay sa bayan.

Dapat Laging Handa

DAPAT LAGING HANDA
ni Greg Bituin Jr.

Dapat lagi tayong handa sa papasuking anumang larangan.
Kapag pumasok ka sa kulungan ng leyon, dapat handa kang makagat.
Kapag pumasok ka sa pagsusugal, dapat handa kang mawalan ng salapi.
Kapag pumasok ka sa larangan ng pag-ibig, dapat handa kang mabigo.
Kapag pumasok ka sa pag-aasawa, dapat handa kang magsakripisyo’t magbigay.
Kapag pumasok ka sa pagrerebolusyon, dapat handa kang mamatay.

Nauto ang Magsasaka

NAUTO ANG MAGSASAKA
ni Gregorio V. Bituin Jr.
11 pantig

Isang ginoo’t isang magsasaka
Yaong napaligaw sa isang isla
Tao doo’y sila lamang dalawa
Doon na sila ngayon napatira.

“Ako itong bumubuhay sa iyo!”
Sabi sa magsasaka ng ginoo
Na tinugon ng “O, panginoon ko,
Salamat po at naririyan kayo!”

Ang magsasaka’y nanilbihan naman
Sa ginoo ng buong katapatan
Tila kalabaw doon sa sakahan
Habang ginoo’y nagpapasarap lang.

Laging alay ng magsasakang ungas
Sa kanyang panginoong balasubas
Yaong mga naani niyang prutas
Tulad ng saging, pinya, mangga’t ubas.

Araw-araw ay palaging ganoon
Tila siya inalipin ng maton
Hanggang sa mamatay ang panginoon
Magsasaka’y mag-isa na lang ngayon.

Nang mapag-isa na ang magsasaka
Ay labis naman siyang nagtataka
Mas kumakain siya ng sagana
At hindi siya gaanong hirap pa.

Napagtanto niyang siya’y nabuhay
Dahil sa pagpapawis niyang tunay
Ang kanya palang mapagpalang kamay
Ang nagpataba sa among namatay.

Nasuri niya ngayon ang nangyari
Ang amo niya’y wala palang silbi
Kaya’t nasambit niya sa sarili:
“Nagpauto pala ako’t naapi!”

Dignidad ng Pulubi

DIGNIDAD NG PULUBI
ni Gregorio V. Bituin Jr.
12 pantig

Maraming pulubi sa mga lansangan
Na ang hinihingi’y kaunting barya lang
Ngunit yaong iba, sila’y aasikan
Para bang di tao ang nasa harapan.

Maraming pulubi pagkat naghihirap
Nabiktima ng sistemang mapagpanggap
Maging pulubi’y di nila pinangarap
At dignidad nila bilang tao’y hanap.

Katiting man yaong dignidad na tangan
Ipagtatanggol nila iyon saanman
Kaya kapag namalimos sa lansangan
Itong pulubi’y huwag mong aasikan.

Sila’y igalang pagkat tao rin sila
Kung wala kang barya, ngiti ay okey na.

Tanggalin ang E-VAT sa Langis

TANGGALIN ANG E-VAT SA LANGIS
(expanded value added tax)
ni Gregorio V. Bituin Jr.
13 pantig

O, bayan, kaya pa ba nating bumungisngis
Sa tuwinang pagtaas ng presyo ng langis
Ang tulad ko’y hindi na’t sadyang naiinis
Pagkat tayo’y laging kinukupitang labis
Nitong mga gahamang kumpanyang kaybangis.

Sa buong mundo ngayo’y laganap ang krisis
Pagkat presyo ng langis ay humahagibis
Sa pagtaas kaya’t bayan ay naaamis
Lagi nang nagmamahal ang bawat bariles
Ito’y kapansin-pansin pagdating ng Byernes.

Ang gobyerno ba nati’y sadyang walang boses
Upang bayan nati’y makaalpas sa krisis
O baya’y sadyang kanilang pinalilingkis
Sa kapitalista’t kanilang alipores
Pagkat parehong tubo ang kanilang nais.

O, bayan, di tayo dapat laging magtiis
May paraan pa upang maibsan ang krisis
Halina’t magsama-sama’t magbigkis-bigkis
Ating ipanawagan sa gobyernong burgis:
“Tanggalin nyo na ang dose-porsyentong buwis!”

Puso Ma'y Di Na Pumintig

PUSO MA’Y DI NA PUMINTIG
ni Gregorio V. Bituin Jr.
10 pantig

Saan nga ba ako nagkukulang
Hindi naman ako salawahan
Ang pagmamahal ko’y tunay lamang
Ngunit binatbat ng kasawian.

Gusto kong makaulayaw kita
Nais kitang laging makasama
Hangad kong ikaw’y mapaligaya
Ibig kong lagi tayong masaya.

Ano naman ang nais mo, sinta
Upang kita nama’y lumigaya?
O sa pag-ibig ko’y ayaw mo na
At ako’y pinahihirapan pa?

Ang puso ko ma’y di na pumintig
Ikaw pa ri’y aking iniibig.

Nabigo sa Estilong Bulok

NABIGO SA ESTILONG BULOK
ni Gregorio V. Bituin Jr.
11 pantig

Ako’y dinalaw nitong kaibigan
Napili niya akong pagsabihan
Nitong kanyang mga problemang tangan
At ito ang sa aki’y kanyang turan:

“Paano kaya ako iibigin
Ng babaeng sadyang mahal sa akin
Estilo ko ba’y aking babaguhin
Upang lumapat sa kanyang naisin?”

“May sinabi siyang di ko maarok
Na sa pag-ibig ako raw ay bugok
Pagkat ito raw estilo ko’y bulok
Paratang na ito’y di ko malunok.”

“Mabuti pa yatang ako’y mamatay
Nang itong aking pag-ibig na taglay
Ay kasama kong mabaon sa hukay.
Iibig na lang sa kabilang buhay.”

Ito ang tangi kong payo sa kanya:
Ang dapat sumaya’y kayong dalawa
Ngunit kung isa lang itong masaya
Mabuti pang humanap na ng iba.

Itong pag-ibig ay pagbibigayan
Ng dalawang pusong nagsusuyuan
Ngunit kung magbibigay ay isa lang
Di ito tunay na pagmamahalan.

Sa Aking Magiging Kabiyak

SA AKING MAGIGING KABIYAK
ni Gregorio V. Bituin Jr.
13 pantig bawat taludtod

Disyerto ang puso ko dahil wala ka pa
Ngunit saang pabrika kita makikita
Ikaw ba ang diwata sa lupang pantasya
Ngunit pantasya'y di ko kailangan, sinta

Kailangan ko'y ikaw, ang totoong ikaw
Ang ganda mo'y lagi sa aking balintataw
Gandang Ara Mina ang aking natatanaw
Na sa pangarap ko'y laging sasayaw-sayaw

Ngunit, sinta, saan kita matatagpuan
Marahil ikaw yaong ginto sa putikan
At ako ang iyong minero sa latian
Nagpapakahirap matagpuan ka lamang

Di ka lang dapat hanggang sa aking pangarap
Ikaw, sinta ko'y akin ding mahahagilap.

Talambuhay ng Buryong at ng Praning

TALAMBUHAY NG BURYONG AT NG PRANING
ni Greg Bituin Jr.
12 pantig

1
Minsan sa kulungan ng Presinto Kwatro
Malapit sa riles at daang Prudencio
Ay napiit itong dalawang sanggano
Sila’y magkasabay na nakalaboso.
2
Ang isa’y naburyong dahil sa problema
Wala nang makain ang kanyang pamilya
Nagpasyang magnakaw upang magkapera
At isang sanglaan ang hinoldap niya.
3
Ang isa’y napraning nang dahil sa droga
Laging nasa langit ang ramdam tuwina
Pag walang pandroga’y nababato siya
Hanggang sa manloob ng bahay ng iba.
4
Ang naburyong nama’y agad nasakote
Parak na butete itong nakadale
Mga tanod naman yaong nakahuli
Sa praning na ngayon ay natuturete.
5
At doon sa hoyo’y nagkaharap sila
Tila kapwa bangag sa kanilang selda
Di ubos-maisip ang mga problema
At tanging nagawa’y magbuntong-hininga.
6
Sila’y kapwa agad na idinemanda
Ng kani-kanilang mga biniktima
Bagamat nabawi yaong ari nila
Kaso’y tuloy naman doon sa dalawa.
7
Sila’y napatungan ng iba pang kaso
Na ikinabigla ng dalawang ito
Pagkat marami pa palang nagreklamo
Sila pala’y pawang kayraming atraso.
8
Dumaan ang araw at maraming linggo
Nanatili silang nasa kalaboso
Laya’y hinihintay, nag-isip magbago
Kayhirap daw pala ng buhay ng preso.
9
Naisip ng buryong, “Paano na ako
Paano na kaya yaong pamilya ko
Di ako tatagal sa kulungang ito
Kaya kailangang tumakas na rito!”
10
Naisip ng praning, “Nanginginig ako
At di ako bagay sa piitang ito
Kailangan ko nang tumikim ng bato
Dapat nang pumuga sa impyernong ito!”
11
Ang dalawang preso’y nag-usap pagdaka
Nagsabihan sila ng mga problema
Nagkumustahan na ng pami-pamilya
Hanggang ang dalawa’y naging magkakosa
12
Naliligalig na ang kanilang diwa
Naalala pati inang lumuluha
Naisipan nilang sila na’y pumuga
Kahit mga parak ay makasagupa.
13
Ano bang gagawin nila pagkalabas
Kapag nagtagumpay silang makatakas
Sila bang dalawa’y handang pumarehas
Sapagkat ayaw nang humimas ng rehas
14
Ngunit ang pagpuga'y dagdag na sentensya
Pag muling natiklo sila ng pulisya
At ang mas matindi’y pag upakan sila
Tuluyang madedo itong magkakosa.
15
May pagkakataon para ba magbago
Itong mga presong nasa kalaboso?
O sila’y biktima ng lipunang ito
Na ang una’y tubo kaysa kapwa tao?
16
Bakit mga dukha’y nakakalaboso?
At malaya itong mga pulitiko
Na nangungurakot doon sa gobyerno.
Bakit malalaki’y hindi maipreso?
17
Gayunman, sa aking kalooba’y tanong
Bakit ba sa mundo’y may praning at buryong
Bakit ba sa droga’y maraming nalulong?
At bakit may kasong nagkapatung-patong?
18
Merong mga buryong dahil dinadaan
Sa init ng ulo ang mga paraan
Nandarahas kahit wala sa katwiran
Upang maibsan lang ang kalam ng tiyan.
19
Praning nama’y nais na makalimutan
Ang hirap at gutom na nararanasan
Solusyon ay bato’t nagtutulak naman
Nais lagi nilang nasa kalangitan.
20
Itong kaburyungan at ang kapraningan
Ay tiyak namang di nila kagustuhan
Sadya nga epekto nitong kahirapan
Na laganap naman sa ating lipunan.
21
Ano bang dahilan ng buhay sa mundo
Kung dahil sa hirap nakakalaboso
Paano ba itong pagpapakatao
Sa lipunang ito, sa baya’t gobyerno.
22
Hangga’t dumarami itong naghihirap
Ang krimen ay baka lalong lumaganap
Dapat bawat isa’y tapunan ng lingap
Hustisya sa lahat ang dapat malasap.

"Ama" Raw ng Demokrasya

“AMA” RAW NG DEMOKRASYA
ni Greg Bituin Jr.
12 pantig

1
Sina George Washington at Thomas Jefferson
Ang tinuring na “ama” ng demokrasya
Dahil tinatag nila ang mga Unyon
Ng mga estado nitong Amerika.
2
Ginawa nilang iyon ay naging huwaran
Ng demokrasya sa iba’t ibang bansa
Ngunit marami ang nagtataka naman
Dahil ito’y hindi ganap na paglaya
3
Bakit kaya di nila idineklara
Yaong kalayaan ng aliping Itim
Kasabay ng kasarinlan sa Britanya
Sila ba’ng pumalit sa pang-aalipin.
4
Sila’y nagdeklara ng pagkakapantay
Ng tao sa lipunang may kasarinlan
Demokrasya pala nila’y hindi lantay
Mga Itim ay alipin pa rin naman.
5
Kaya di sila “ama” ng demokrasya
Kundi sila’y ama lamang ng iilan
Sila’y ama lamang nitong Amerika
At di ng mga demokratikong bayan.
6
Dumaan pa ang ilang dekada’t taon
Bago mapawi itong pang-aalipin
Kinakailangan pa ng isang Lincoln
Upang lumayang ganap ang mga Itim.
7
Kung demokrasya’y totoong umiiral
Dapat walang taong kinakaligtaan
Di inaalipin ng sinumang hangal
At may paggalang sa bawat karapatan.

Sampaloc, Maynila
Agosto 19, 2008

Pagninilay ng Isang Bruskong Haragan

PAGNINILAY NG ISANG
BRUSKONG HARAGAN
ni Greg Bituin Jr.
9 pantig

1
Siya’y di makabasag-pinggan
Sa kanyang gawi’t kahinhinan
Dapat ko ba siyang ligawan
Kahit ako’y bruskong haragan.
2
Kung pag-ibig ko’y iginiit
Baka naman siya’y magalit
Sasabihang ako’y makulit
Hinhin niya’y mawalang pilit.

Basagin ko kaya ang pinggan
Upang siya’y makatuluyan
Ngunit pag-ibig ay di ganyan
At pagsinta’y di sapilitan.
4
Haharap akong taas-noo
Nang wala nitong pagkabrusko
Sasabihing siya’y mahal ko
Mamula man ang mukhang ito.
5
Pag tinanggap ang iwing puso
Ng minamahal ko’t kasuyo
Ay aking ipinapangako
Puso niya’y di magdurugo.
6
Sakaling mang ako’y nabigo
At puso’y tuluyang nagdugo
Itututok ko na ang punglo
Na tatagos sa aking bungo.
7
Ngunit pag sinagot ng dilag
Puso ko’y magiging panatag
Kaya’t ako na’y magsisipag
Para sa aking nililiyag.
8
Kaya’t nakitang aral dito
Na napagnilayan ng brusko:
Pag-ibig pala’y bumabago
Ng buhay nati’t pagkatao.

Sampaloc, Maynila
Agosto 17, 2008

Ang Nais Kong Makaniig

ANG NAIS KONG MAKANIIG
ni Greg Bituin Jr.
11 pantig

Mahal na mahal kita, aking liyag
Ikaw na sa aki’y nagpapatatag
At dahilan ng puso kong panatag.

Iniibig kita, o aking sinta
Pinangarap kong maging katuwang ka
At ikaw ay aking maging asawa.

Sinasamba kita, o aking mahal
Pag di tinanggap ang puso kong hangal
Itarak sa puso ko itong punyal.

Ikaw lang ang nais kong makaniig
Tanggapin mo na ang aking pag-ibig.

Sampaloc, Maynila
Agosto 17, 2008

Kamatayan ng Ama at Anak, ayon kay Croesus

Kamatayan ng Ama at Anak, ayon kay Croesus

ni Greg Bituin Jr.

10 pantig

Sadya ngang iba ang kalagayan

Sa digmaan at kapayapaan

May kaguluhan kapag may digma

Gulo ang isip, puso at diwa

At meron ding kabalintunaan

Sa relasyon ng ama at anak

At ito nga’y isinalarawan

Nitong Haring Croesus ng Lydia

Na sinabing may katalinuhan:

“Sa panahon ng kapayapaan

Inililibing ng mga anak

Ang mga ama nilang pumanaw.

Ngunit sa panahon ng digmaan

Ang nangyayari’y kabaligtaran:

Mga ama itong lumuluha

At siya rin namang naglilibing

Sa mga pumanaw nilang anak."

Mina

MINA

ni Greg Bituin Jr.

9 pantig bawat taludtod

May dala nga bang kaunlaran

Ang pagmimina sa lipunan

O ang dala nito sa bayan

Ay nasira nang kalikasan

At pagtaboy sa mamamayang

Doo’y nagsisipanirahan

Kaya’t kanilang karapatan

Ay nilalabag ng tuluyan.

Ano nga ba itong dahilan?

Pagkat kahit naman kailan

Mga tao’y di tinitingnang

Kasali rin sa kaunlaran.

Dapat ito’y para sa bayan

At di lang para sa iilan.

Minimina ang kalupaan

Lalo na itong kabundukan

Damay rin pati kagubatan

Kawawa na ang kalikasan.

Kailan ito titigilan

Pag marami nang namatayan

At namatay na ng tuluyan

Dahil sa’ting kapabayaan?

Halina’t pakaalagaan

Ang bayan nati’t kalikasan

Pagminina ngayo’y tigilan

Para sa'ting kinabukasan

Hikbi

HIKBI
ni Greg Bituin Jr.
13 pantig

1
Paano nga ba tayo magmamalasakit

Sa kapakanan ng ating kapwa sa mundo

Kung sa sariling bansa’y kayraming pulubi
Na nangaglilipana sa mga lansangan.

2
Sa mga mata ba mismo nati’y kaysakit
Na makitang ang kapwa natin ay tuliro
Sila’y naghihirap din at walang pambili
Ng pangunahin nilang pangangailangan.

3
Sa kalagayang ito tayo ba’y pipikit
Sa mga ginagawa ng ating gobyerno
Hanggang ngayon ba tayo’y mag-aatubili
Sa pagkilos tungo sa ating kalayaan.

4
Naririnig baga natin ang mga impit
Ng mamamayang nais na ng pagbabago
O ginagawa nati’y pawang paninisi
At iaasa sa iba ang katayuan.

5
Ngunit bakit ganito ang ating sinapit
Bigas, langis, biglang nagtaasan ang presyo
Pati na ang tubig, kuryente’t pamasahe
Tila nagpabaya na ang pamahalaan.

6
Sistema natin ngayo’y walang malasakit
Sa mamamayan, sa ating kapwa’t obrero
Sa tubo, kapitalista’y laging madali
Mayaman na nga’y lalo pang nagpapayaman.

7
Kaya’t ito ang aking nasasambit-sambit
Halina’t baguhin na ang sistemang ito
Pagkat kung laging ganito ang nangyayari
Dapat na ngang mag-aklas sa ating bayan.

8
Palitan na ang kapitalismong kaylupit
At tahakin na ang landas ng sosyalismo
Wasakin na ang pribadong pagmamay-ari
Upang makinabang lahat, at di iilan.

Kay Sophia - tula ni Joaquin Bordado

Kay Sophia

tula ni Joaquin Bordado

Sophia, O, aking Sophia

Narito ang ating anak na si Jimboy

Lagi kang hinahanap-hanap

Habang kaulayaw mo si Miguel

Na sa katotohana’y

Siya ang kapatid kong si Jerome.

Mahal kita, Sophia, mahal na mahal

Kahit pa nagpalit ka na ng pangalan

Kahit ikaw na ngayon si Carol

Si Carol na walang nakaraan

Habang si Sophia naman

Ay walang kasalukuyan.

Kahit nandyan ang magandang si Diane

Ikaw lamang ang nasa puso ko’t isipan

Alam kong darating din ang araw

Magkakasama-sama tayong muli

Mabubuo ang pamilyang nagkawalay

Dahil sa salimuot ng Silvaria.

- greg bituin jr.

Mayo 7, 2008

(Ang Joaquin Bordado ay palabas sa telebisyon na pinagbibidahan nina Robin Padilla at Iza Calsado.)

Dear Alwina

DEAR ALWINA

ni Greg Bituin Jr.

(waluhang pantig bawat taludtod)

Nais kong makaharap ka

Upang aking masilayan

Ang tamis ng iyong ngiting

Papaslang sa kalungkutan.

- Aguiluz

(Kinatha batay sa palabas na Mulawin na ang bida’y sina Alwina at Aguiluz, 2004. Ang gumanap na Alwina ay si Angel Locsin, at si Richard Gutierrez naman ang Aguiluz. Pareho silang taong ibon dito.)

Nalathala sa publikasyong Taliba ng Maralita, opisyal na publikasyon ng Kongreso ng Pagkakaisa ng Maralitang Lungsod (KPML), Tomo IX, Blg. 3, Taon 2004, p.8.

Tubo ang Itinatahol

TUBO ANG ITINATAHOL

ni Greg Bituin Jr.

(lalabing-isahing pantig bawat taludtod)

Tubo lagi itong itinatahol

Ng mga taong tila nauulol

Pag tubo’y lumiit ay nagmamaktol

At manggagawa itong hinahabol

Ang oras natin ay lubhang ginagahol

Nitong gobyernong sadya yatang bopol

Halinang kumilos, tayo’y tumutol

At ang sambayanan ay ipagtanggol

Laban sa sistemang dapat madedbol.