PUSO MA’Y DI NA PUMINTIG
ni Gregorio V. Bituin Jr.
10 pantig
Saan nga ba ako nagkukulang
Hindi naman ako salawahan
Ang pagmamahal ko’y tunay lamang
Ngunit binatbat ng kasawian.
Gusto kong makaulayaw kita
Nais kitang laging makasama
Hangad kong ikaw’y mapaligaya
Ibig kong lagi tayong masaya.
Ano naman ang nais mo, sinta
Upang kita nama’y lumigaya?
O sa pag-ibig ko’y ayaw mo na
At ako’y pinahihirapan pa?
Ang puso ko ma’y di na pumintig
Ikaw pa ri’y aking iniibig.
Walang komento:
Mag-post ng isang Komento