Magkaibang daigdig

MAGKAIBANG DAIGDIG
ni Gregorio V. Bituin Jr.
15 pantig bawat taludtod

tulad ng agilang lumilipad sa papawirin
na naghahanap ng masisila at dadagitin
kapara niya'y burgesyang naghahangad mang-angkin
ng pagtutubuan, gaya ng makina’t lupain

naroon sa laot ang tulad nating mga isda
na nais dagitin ng mga agilang kuhila
tulad niya'y burgesyang sa tubo'y napakasiba
dadagitin tayo hanggang bukas nati'y mawala

mga agilang mananagpang ay nais maghari
pagkat nasa taas akala'y may basbas ng pari
nasa ibaba'y aapihin, sila'y walang budhi
gayong ang ibon at isda'y magkaiba ng uri

di ba't agila't isda'y magkaiba ng daigdig
at sa sarili lang nilang uri sila sasandig
alam ba ng agilang lumangoy, isda'y madaig
alam ba ng isdang lumipad, agila'y malupig

gayon din, iba ang kapitalista't manggagawa
mabubuhay ang mundo kapitalista ma'y wala
at di uusad ang mundo pag walang manggagawa
upang matapos ang digma, isa'y dapat mawala

palayain ang mga nagpapatulo ng pawis
at durugin ang nangabundat sa mais at langis
manggagawa'y di dapat madurog na tila ipis
ng burgesyang ang pagkahayok ay walang kaparis

Karatula sa punò

KARATULA SA PUNÒ

may sadyang lugar na itinalaga
upang doon kayo magsipagbuga
ng usok na tila isang kasama
o kalaguyong laging sinisinta
sa punò, ipinako’y karatula
nang makapagsunog kayo ng baga

sunog-baga, punò ang tagasalo
niyang usok na ibinubuga nyo
kawawang punò, punò kasi ito
at di minamahalaga ng tao
mapunô kaya ang punò sa inyo?
ang usok ba'y aanhin nyo sa dulo?

- litrato’t katha ni gregbituinjr.

Mga upos sa pasô

MGA UPOS SA PASÔ

ang pasô ba ng halaman ay tapunan ng upos?
dahil walang basurahan, isip na'y kinakapos?
paano bang sa kalinisan ay makararaos?
kung simpleng upos ay di maitapon nang maayos?

- litrato't katha ni gregbituinjr.

Never Again sa Batas-Militar

NEVER AGAIN SA BATAS-MILITAR
ni Gregorio V. Bituin Jr.
15 pantig bawat taludtod

huwag kalilimutan ang marahas na panahon
na karapatang pantao'y niyurak at nilulon
ng batas-militar kaya masa'y nasa linggatong
ng kaba't poot, kayraming nawala, ikinulong

huwag kalilimutan ang sama-samang pagkilos
upang panahong marahas ay mag-iba ng agos
hinarap ng taumbayan ang rumagasang unos
hanggang mapatalsik ang lintik na nambubusabos

mabuhay ang lahat ng nagsakripisyo't lumaban
sa diktaduryang dahas, yumurak sa karangalan
ngunit bagong elit ang kumubkob sa pamunuan
bagong burgesyang tadtad din ng mga kabulukan

Isang lakas tayo

ISANG LAKAS TAYO

isang lakas tayong nakikibaka
magkakapitbisig, nagkakaisa
sama-samang ipagtanggol ang masa
upang kamtin ang hangad na hustisya

Sanlakas tayong hindi pagagapi
sa sinumang mga mapang-aglahi
ibabagsak natin sinumang hari
at itataguyod ang ating uri

Sanlakas tayong hindi patatalo
sa sinumang tiwaling pulitiko
lilinisin yaong basahang trapo
tiwali'y dapat magdusa ng todo

Sanlakas tayong hindi madudurog
ng sinumang kapitalistang hambog
mang-aapi'y tiyaking malalamog
tutupdin ang pangarap na kaytayog

Sanlakas na hangad ay pagbabago
sa puso't diwa'y subok ang prinsipyo
sa labanan ay hindi tumatakbo
laging handa sa pagtulong sa tao

- gregbituinjr.

Ilublob sa kanal iyang trapo

ILUBLOB SA KANAL IYANG TRAPO

kampanyahan na naman, muli'y nangangako
ang trapong kayraming kulay, kulay hunyango
mga trapo silang salita ang pamato
animo'y walang laman ang kanilang bungo
kundi pulbura, na ang hangad lagi'y tubo

tulad nilang trapo'y dapat lamang ilublob
sa kanal ng kahihiyang nakakubakob
nangangako sila'y wala naman sa loob
dapat ibagsak ng masang sadyang marubdob
na sistema ng trapo'y tuluyang itaob

- gregbituinjr.

Lungagi

LUNGAGI
ni Gregorio V. Bituin Jr.
13 pantig bawat taludtod

di maawat sa daldal ang taong lungagi
na minsan man sa atin ay nagpapangiti
datapwat pulos yabang ang namumutawi
ay saglit din namang problema'y napapawi

lasing na kaya ang tindera'y kinukulit
pinangangakuang ibibigay ang langit
mapungay ang matang animo'y nang-aakit
kahit pawang kayabangan ang sinasambit

* lungagi - lasing na tamang kulit (mula sa UP Diksyunaryong Filipino)

Ang babae daw ngayon

ANG BABAE DAW NGAYON
ni Gregorio V. Bituin Jr.
13 pantig bawat taludtod

may isang nagsabing ang kababaihan daw ngayon
ay di singhusay ng nanay nila sa pagluluto
ngunit singhusay ng kanilang ama sa pag-inom
tunay ba ang kanyang puna't iba na nga ang turo?
kung may pagbabago sa bawat paghampas ng alon
sa asal ng tao'y may naglalaho't nabubuo

Kung papatayin mo lang ang manggagawa

KUNG PAPATAYIN MO LANG ANG MANGGAGAWA
ni Gregorio V. Bituin Jr.
15 pantig bawat taludtod

kandidato ka ba ng kapitalistang kuhila
kaya pati sa nag-unyon, ikaw ay nagbabanta
wika mo, papatayin mo ang mga manggagawa
pag nanggulo't sa mga kapitalista'y may hidwa
lampa ka pala, este lumpen pala, utak-biya

kung sa problema'y pagpaslang ang alam mong solusyon
anong klaseng hayop ka't magpapangulo ng nasyon
obrero ba'y kriminal, nahan ang sentido komon
pag pinaglaban ang karapatan, krimen na iyon?
tila sa kapangyarihan, ikaw na'y nagugumon

sayang ka, kung ang alam mo lang lagi ay pumatay
kung karapatang pantao'y yuyurakan mong tunay
kung pagkatao ng kapwa'y iyo lang maluluray
kung alam mo lang maghilera't magbilang ng bangkay
buting huwag tumakbo't wala kang bukangliwayway

manggagawa pala sa iyo'y walang mapapala
kundi sa karapatan nila'y pagbabalahura
kapitalista pala ang amo mong dalahira
balang araw, ibabagsak ka rin ng manggagawa
pangako iyan, ibabagsak ka ng manggagawa

Ang salapi

ANG SALAPI
ni Gregorio V. Bituin Jr.
15 pantig bawat taludtod

papel lamang kung tingnan ngunit kaylakas mang-akit
tila diyos, sinasamba ng matatanda't paslit
kung sinong marami niyan animo'y nasa langit
tinitingala kahit asal niya't mukha'y pangit

dahil sa salapi, kapwa niya'y minamaliit
dahil sa salapi, kayrami sa'yong lumalapit
dahil sa salapi, nagiging agila ang pipit
dahil sa salapi, tunggalian ay hanggang langit

kapangyarihan nito'y matatanong mo kung bakit
kaya nitong bayaran ang kahit kaninong singit
ng mga bayarang ibinubuyangyang ang langit
para lang sa salaping may mahikang anong lupit

sa ipinagbiling dangal, salapi ang kapalit
labanan sa husgado'y salapi rin ang pang-akit
sa mapera, laksa ang 'kaibigang' humihirit
nang dahil sa kwarta, tahanan mo'y kayang mailit

o, salapi, ikaw na diyos ng bata't may-edad
ano't pinaiikot mo kami sa iyong palad?
sa mundo ang masalapi'y karaniwang mapalad
habang ang walang-wala't api'y karaniwang hubad

Pagsipat sa Bantayog

PAGSIPAT SA BANTAYOG
ni Gregorio V. Bituin Jr.
13 pantig bawat taludtod

kayraming pangalan nila ang nakatala
sa malawak na pader ng mga bayani
sa batas-militar ay nakibakang sadya
pilit nilabanan ang diktadurang imbi

pagkat sila'y di dapat ibaon sa limot
sa Bantayog ng mga Bayani'y naroon
silang nangarap ayusin ang mga gusot
at maituwid ang binaluktot na nasyon

pag sinipat-sipat natin yaong bantayog
at malalaman natin ang kanilang kasaysayan
mahihiya sa kasalukuyang pag-inog
pinangarap nila'y di pa pala nakamtan

kayhirap mabuhay ng gising sa bangungot
dapat tanggalin ang mga agiw sa sulok
ang mga damong ligaw ay dapat mabunot
dapat kalusin pag umapaw na ang salop

bayani ang mga pangalang nakatala
kaya di sila dapat malimot ng madla

Kapara niya'y ngiting Ara Mina

KAPARA NIYA'Y NGITING ARA MINA
ni Gregorio V. Bituin Jr.
15 pantig bawat taludtod

ninasa ng maraming binata ang ngiting yaon
na sa kanilang puso'y tunay na nakahalina
sa bawat lakbayon ay tangan nilang inspirasyon
ang ngiti ng dilag na animo'y si Ara Mina

nagbibigay sigla't liwanag ang kaygandang ngiti
siya ang diwatang hinahangaan ng kayrami
animo'y maryaklarang kaysarap hagkan ang labi
at di mo aasaming mawalay sa kanyang tabi

sino ba namang binatang aayaw sa ganito
na ngiti pa lang ay nagpapatibok na ng puso
kayanin kaya niyang araw-gabing titigan ko
ngunit baka siya'y mangalay at ako'y mabigo

ngiti lang niya ang sa sawing puso ko'y gumising
siyang nagpabangon sa matagal kong pagkahimbing

Kailangan ba ng isang tagapagligtas

KAILANGAN BA NG ISANG TAGAPAGLIGTAS?
ni Gregorio V. Bituin Jr.
15 pantig bawat taludtod

kailangan ba ng tagapagligtas itong dukha
tulad nina Batman, Robin, Mesiyas, o Bathala
anong dapat upang sa sistemang bulok lumaya
nang makaalpas ang tao sa kahirapang sumpa
at makamtan sa buhay ang mailap na ginhawa

o sa haba na ng tinakbo nitong kasaysayan
may tagapagligtas noong unang panahon lamang
batay sa mga kwentong animo'y kababalaghan
kung kailan ang populasyon ay kaunti pa lang
ngunit wala nang tulad niyon sa kasalukuyan

tulad ng kwento nina Zorro't Superman sa sine
bayan-bayan iniligtas, tinuring na bayani
ngunit sa mga kathang isip lang sila nagsilbi
kaya walang tulad nila diyan sa tabi-tabi
kaya paano natin sila ipagmamalaki

sinong magliligtas sa atin sa maraming hangal
laban sa pulitikong tambay sa mabahong kural
laban sa panunuyo ng nagkukunwaring banal
laban sa gawain ng kapitalistang pusakal
kaya ba ng isang Mesiyas ang tusong kapital

huwag tayong umasang may isang tagapagligtas
na sasagip sa atin sa tiwali, dusa't dahas
iangat natin ang ating kamalayan at antas
ang ating aasahan upang mundo'y maging patas
ay ang sama-sama nating pagkilos nang parehas

Ayaw kong mapaso sa sariling apoy

AYAW KONG MAPASO SA SARILING APOY
ni Gregorio V. Bituin Jr.
15 pantig bawat taludtod

humahalakhak man ang langit sa kinasapitan
di ko madalumat ang naranasang kasawian
inuugoy ng alon sa pagtahak sa kawalan
habang niyuyugyog ng hangin ang buong katawan

mahapdi sa balat ang matinding sikat ng araw
apoy sa loob ko'y sumulak, ako'y natutunaw
napapaso ang buong ako, parang hinahataw
ng kung anong imaheng animo'y isang halimaw

di ko gagawin yaong sa kapwa'y manliligalig
nais ko'y patas, prinsipyado't nasa tamang tindig
sa sinumang nambubusabos ay di palulupig
habang lahat ng manggagawa'y magkakapitbisig

ayaw kong mapaso sa sariling apoy ng dusta
bagamat labas sa aking pagkaako ang saya
nais ko lang maging kaisa sa danas ng masa
at sama-sama naming lalandasin ang pag-asa

Kapara ko'y inihagis sa malalim na dagat

kapara ko'y inihagis sa malalim na dagat
at pinabayaang lumangoy mag-isa sa alat
ang bawat hampas ng alon sa dibdib ko'y kaybigat
naulila doong ang bukas ay di madalumat
- gregbituinjr. (pakiramdam nang mawalan ng opis ang BMP)

Paglisan

PAGLISAN
13 pantig bawat taludtod

sa pagkatuliro'y nanalasa ang lumbay
di inaasahang bigla akong mamatay
ngayon, umpisa na ng aking paglalakbay
ngunit di malaman ang tutunguhing tunay

tila ba hinehele sa pagkakaidlip
ang nagdaang buhay ay di sukat malirip
nakipagbuno sa lipunang anong sikip
at dumidilang apoy yaong nakahagip

dinuduyan ng hanging biglang bumulusok
biglaan, iniwan na ang lipunang bulok
inanay na haligi'y tuluyang nagapok
at nilisan na ang sistemang di malunok

sino ang papalit ngayong ako'y lumisan
ah, marami pang tibak na handang lumaban
sila ang uugit ng bagong pamayanan
isang lipunang patas at makatarungan

- gregbituinjr.

mamamatay na lang ba akong...

mamamatay na lang ba akong
walang laman ang mga tula
kundi pawang himutok, luha
panimdim, at pangungulila

ako ba'y mamamatay na lang
nang di tuluyang naaangkin
ang inaasam kong diwata
na anghel ang kariktang angkin

ako lang ba ay mamamatay
na yapos ay sanlaksang lumbay
pagkat di napapagtagumpay
ang mga pangarap na tunay

sana naman, mamatay akong
nagisnan ang bagong umaga
at di nasidlak sa kadimlan
ng kawalan ng katarungan

- gregbituinjr

Plastik na trapo

PLASTIK NA TRAPO
ni Gregorio V. Bituin Jr.
10 pantig bawat taludtod

lulutang-lutang sa karagatan
ang mga plastik ng kahihiyan
malinis na tubig ay dinumhan
ng mga nagtatapon kung saan

lulutang-lutang sa kampanyahan
ang pulitikong tuso't gahaman
ang trapong plastik ng kahihiyan
na pinandidirihan ng bayan

plastik na trapo'y lulutang-lutang
kayrumi nilang mga basahan
sa dagat kaya'y malilinisan
o dapat malunod nang tuluyan

ang trapong ubod ng kaplastikan
ay dapat mawala nang tuluyan
sa pagkalutang sa karagatan
at lalong-lalo na sa lipunan

Huwag sayangin ang buhay

HUWAG SAYANGIN ANG BUHAY
ni Gregorio V. Bituin Jr.
15 pantig bawat taludtod

nakakasuka ang buhay na walang adhikain
walang kwenta, kamatayang ikaw ay yayapusin
ano bang saysay ng buhay na walang simulain
walang kasiyahan, ano bang marapat mithiin
tayo ba'y nabuhay lang sa mundo upang kumain

hindi, ayaw ko nang gayong buhay, nakatunganga
sayang lang ang buhay pag walang anumang adhika
sayang lang ang buhay pag lagi nang nakatulala
sayang lang ang buhay pag wala namang ginagawa
kundi magpalaki ng bayag, tumitig sa wala

ano ka kung maangkin mo man ang buong daigdig
kung hari ka ngang inaasahan mo lang ay kabig
ano ka kung pulos salapi man ang iyong banig
ano ka kung sa isyung pambayan ay walang tindig
ano ka kung panaghoy ng kapwa'y di dinirinig

mas maigi ang buhay na may magandang adhika
kaharapin man ay timba-timbang agos ng luha
nasa loob ay magpakatao't makipagpagkapwa
sa puso't isip ay kabutihan at pagpapala
at buhay na ito'y matitigib ng ligaya't tuwa

tula sa gintong panahon ng aking ama't ina

SA IKA-50 ANIBERSARYO NG AKING AMA'T INA
ni Gregorio V. Bituin Jr.
9 na pantig bawat taludtod

limampung taon yaong singkad
ng pagsasama ng maluwat
ginabayan ang mga anak
tungo sa kanilang pangarap
tungo sa maayos na bukas

limampung taong pagsasama
nilang butihing ama't ina
na halimbawa'y anong ganda
sa amin ay dakila sila
sa paggabay at disiplina

sa inyo pong golden anniversary
taos-puso pong bumabati kami
mahal namin kayo, Mommy at Daddy
sa gabay nyo kami'y nagpupursigi
nang kamtin din ang bukas na maigi

Pagsalubong ng hanging amihan

PAGSALUBONG NG HANGING AMIHAN

Disyembre na, kaylamig ng hanging amihan
tila tumatagos sa buo kong katawan
amihan itong tila ba isang salarin
na bawat laman ko'y nais nitong waratin
sabay sa pangingilo ng buto sa batok
habang sa hanging amihan nakikihamok
magkaibang lamig sa magkabilang dulo
ng mundo, ang katawan ko'y naninibago
para bang di na sanay sa aba kong bansa
habang tinatahak ang rumaragasang baha
tila baga tulala akong sumusuong
sa panganib na di na naisip sumilong
kaylamig ng amihang kasabay ng unos
na sa buo kong pagkatao'y tumatagos

- gregbituinjr.

Bulaklak silang di naman nalanta

BULAKLAK SILANG DI NAMAN NALANTA

bulaklak silang di naman nalanta
kundi sa unos sila'y nasalanta
ang bagyo'y patuloy sa pagbabanta
anumang saglit handang rumagasa
kayraming rosas na humahalimuyak
na kasabay kong gumapang sa lusak
rosas silang sa unos nakidigma
sa anumang panganib laging handa
tumumba ang mga rosas na pula
na alay sa magagandang dalaga
habang tuloy ang ulan sa pagbuhos
kukunin ko sa kabila ng unos
ang isang pulang rosas na nalamog
upang sa sinusuyo'y maihandog
rosas yaong sakdal ganda't may tinik
na ngalan ng dilag ay natititik
kukunin ko ulan man ay tikatik
tulad ng gintong nabaon sa putik

- gregbituinjr.

Di man nagisnan ang inaasahang niyebe

DI MAN NAGISNAN ANG INAASAHANG NIYEBE
15 pantig bawat taludtod

pangarap ko muling makita ang puting niyebe
ngunit di ko natagpuan nitong buong Nobyembre
nanatili hanggang kalagitnaan ng Disyembre
wala sa Paris ang nakita noon sa Iwate

kahit nadarama yaong lamig na bumabagtas
sa katawan pagkat panahon iyon ng taglagas
na kung di magbalabal ay maaaring mautas
ngunit di makapuputi sa pag-ibig kong wagas

ang inaasahang niyebe'y di ko na nagisnan
at marahil di na iyon muling mapagmamasdan
sasariwain na lang yaon sa mga larawan
na animo'y naroong dinarama ang kawalan

niyebe sa aking loob ay maaring malusaw
sa saliw ng indayog ng tinig mong anong gaslaw
papalitan ng alab ang katawang sakdal ginaw
habang pinapawi mo ang danas kong pamamanglaw

- gregbituinjr.

Pagsalubong ni Nona

PAGSALUBONG NI NONA

galing ibang bansa'y sinalubong agad ni Nona
mula sa malamig ay ulan ngayon ang kasama
pasan ang ilang gamit ay baha na ang kalsada
kayhirap sumakay lalo't ang nasa bulsa'y barya

mabuti't sa loob ay may natitira pang lakas
naalalang baha sa lungsod ay lagi nang danas
malamig ang simoy ng hangin, sa sarili'y anas
galing sa malamig ay sa malamig din bumagtas

ah, Nona, unos kang agad sumalubong sa akin
habang pasipul-sipol pa ang malamig na hangin
kinalakhan na sa lungsod ang ganitong danasin
tulad mo'y di man iba, ako'y mag-iingat pa rin

dama ko si Nona pagkat patuloy ang pagbuhos
pati inanod na basura'y kasama sa agos
kayrami muling buhay ang naging kalunos-lunos
may katapusan pa ba itong taun-taong unos

- gregbituinjr.
15 Nobyembre 2015

Nang umibig ang makata

NANG UMIBIG ANG MAKATA
ni Gregorio V. Bituin Jr.
10 pantig bawat taludtod

umiibig ang makata ngunit
walang nagkakamaling umibig
sa makatang ulayaw ng lumbay

tanong ng dalagang sinusuyo:
"makabibili kaya ng bigas
o makagagawa ba ng bahay
ang mga hinahabi mong tula?
makata, di ba't ikaw rin yaong
nagsabing walang pera sa tula?"

ang makata'y wala nang magawa
at inunawa na lang ang mutya
nangyari'y kanya na lang tinula
at bakasakaling may maawa
at ang kanyang puso ay matudla

Pagpinta ni Ate Juliet

PAGPINTA NI ATE JULIET

sa pagpinta'y nakibahagi si Ate Juliet
sa may dingding, sa larawan ng nagngangalang Agit
ang pampintura'y buong pagmamahal niyang bitbit
sadyang aming dama ang kanyang pagmamalasakit

hinahagod ng kamay upang sining ay mabuo
habang sa dibdib ay dama ang luhang tumutulo
alaala iyong tunay ngang nakasisiphayo
pagkat ang nasa larawan, sa Yolanda'y naglaho

ngunit dapat ipinta, ang mensahe'y ipaalam
na nagbabagong klima'y tunay, di agam-agam lang
na tayo'y magsikilos, bawat isa'y makialam
pagkat tayo'y iisa, iisa't may pagdaramdam

tila bihasa, sa hagdang mataas pa'y umakyat
ang ibinahagi nyo'y sadyang dama naming sukat
sa inyo po, Ate Juliet, maraming salamat
at sa iba pang nagbahagi ng talento't lahat

- gregbituinjr.

- sa Point Ephemere, Disyembre 6, 2015, nang tapusing ipinta ni  kasamang AG Saño ang larawan ng kanyang kaibigang si Agit na namatay kasama ang buong pamilya sa Tacloban sa kasagsagan ng bagyong Yolanda noong Nobyembre 13, 2013

Ang larawan ni Agit

ANG LARAWAN NI AGIT
15 pantig bawat taludtod

pinta sa dingding, alay ng kasamang A.G. Saño
larawan iyon ng namayapang Agit Sustento
  isa sa libu-libong nangawala sa Tacloban
  dahil sa Yolandang sakdal lupit sa mamamayan
sa kaylaking pader, ipinintang dalawang araw
kayraming nagtulong-tulong, bawat isa'y humataw
  mababakas mo sa kanila ang pusong may tuwa
  kahit ang ipininta'y tunay na ikaluluha
gumigiti man ang pawis, mukha'y maaliwalas
mga pagtulong nila'y walang halagang katumbas
  kundi saya sa pusong nakatulong sa hangaring
  ipaalala sa mundo ang nangyari sa atin
na mula Tacloban hanggang Guiuan ay nanalanta
ng libu-libong pamilyang winasak ni Yolanda
  magkasama ang magkaibigang A.G. at Agit
  ilang oras bago dumatal ang unos ng lupit
naghiwalay sila pagkat maggagabi na noon
hanggang dumating yaong si Yolanda't nandaluyong
  libu-libo ang nilamon ng animo'y buwitre
  unos na lumipol, kapara'y kaylaking tsunami
buong pamilya ni Agit ay nangawalang sukat
kasama pati ang kayraming di na naiulat
  pinta sa dingding, alay ng kasamang A.G. Saño
  paggunita iyon sa nawalang Agit Sustento

- gregbituinjr.

- sa Point Ephemere sa Paris, Disyembre 6, 2015, nang ipinta ni kasamang AG Saño ang larawan ng kanyang kaibigang si Agit na namatay kasama ang buong pamilya sa Tacloban sa kasagsagan ng bagyong Yolanda noong Nobyembre 8, 2013

Kaylamig ng hanging amihan

KAYLAMIG NG HANGING AMIHAN

Disyembre na, kaylamig ng hanging amihan
tila tumatagos sa buo kong katawan
amihan itong tila ba isang salarin
na bawat laman ko'y nais nitong waratin
sabay sa pangingilo ng buto sa batok
habang sa hanging amihan nakikihamok
magkaibang lamig sa magkabilang dulo
ng mundo, ang katawan ko'y naninibago
para bang di na sanay sa aba kong bansa
habang tinatahak ang rumaragasang baha
tila baga tulala akong sumusuong
sa panganib na di na naisip sumilong
kaylamig ng amihang kasabay ng unos
na sa buo kong pagkatao'y tumatagos

- gregbituinjr.
- kinatha sa St. Denis bago magtungo sa Chapelle W. D. Des Anges, malapit sa istasyon ng Duroc, Disyembre 2, 2015

Kumakagat ang lamig habang kagat ang mansanas

KUMAKAGAT ANG LAMIG HABANG KAGAT ANG MANSANAS
Paa’t diwa’y humahakbang sa panahong taglagas
Kumakagat ang lamig habang kagat ang mansanas
Nanunuot sa kalamnan, tumatagos sa swelas
Ugat ay dapat gisingin ng marubdob na ningas

Ako’y sandaling tumigil at baka may kuliglig
Marahil dahil sa ginaw ay di sila marinig
O marahil sila’y sadyang wala, di maulinig
Pagkat sila’y nagsilikas na’t di angkop sa lamig

Ang tanging naririnig na’y ang himig niring puso
Kaya pang maglakad, nilalamig man yaring dugo
Ang adhikain sa puso’t diwa’y di maglalaho
Pagkat nilalakad ay para sa bayan at mundo

Nilalamig man, mansanas na kagat ay naubos
Habang sa diwa ko mga kasama’y lumalagos
Mahabang paglalakad ma’y di pa matapos-tapos
Ramdam kong adhikaing tangan ay di mauupos

- gregbituinjr, sa bayan ng Cheateau Landon sa Pransya, 23 Nobyembre 2015

Pagdama sa pintig ng puso't hininga

PAGDAMA SA PINTIG NG PUSO'T HININGA

Ating damhin, di ang bilis ng paa
Kundi ang pintig ng puso't hininga
Tumatalim ang nagbabagong klima
Klimang lumalamig at nagbabaga

Sa malayong pook kami’y napadpad
Upang mga pangyayari’y malantad
Sigwa’t unos na laging bumubungad
Trahedya nito sa iba’y malahad

Rumagasa ang Ondoy at Yolanda
Maraming bayang sinalpok ng Glenda
Sendong, Pedring, binaha ang kalsada
Kayraming namatay at nasalanta

Paano aangkop at maghahanda
Ang bayang dinadaluhong ng sigwa
Ah, kaylalim, tumatagos ngang pawa
Sa kaibuturan ng puso't diwa

Santambak na ang kuro’t mga lumot
Iba na ang timpla ng saya’t lungkot
Ngumingiti kahit nabuburaot
Di malimi kung anong masasambot

Bawat isa’y magkakasamang buo
Nagbabaga man ang sigwang bubugso
Patuloy ang lakad ng buong puso
Para sa bayan at mahal na bunso

- gregbituinjr, kinatha sa bayan ng La Charite sur Loire sa Pransya, 21 Nobyembre, 2015