Kung tuwid na daan ay patungong impyerno

KUNG TUWID NA DAAN AY PATUNGONG IMPYERNO
ni Gregorio V. Bituin Jr.
13 pantig bawat taludtod

kung tuwid na daan ay patungong impyerno
ingat sa pinunong tinatangay ka rito
pagkat ito'y tungo sa kapahamakan mo
sa disgrasyang mapangwasak sa pagkatao

sa pagkalunod sa kaybagsik na delubyo
sa kamatayang sadyang nakapanlulumo
wala kang aasahan sa lipunang ito
dapat lang palitan ang namumuno rito

kung sa tuwid na daan, tayo'y magluluksa
mabuti pang daan ay baku-bako't sira
basta't ang tatahaki'y daang nasa tama
tamang direksyon ang tinatahak ng madla

direksyong makatarungan at mapayapa
landas na ang tao'y patungo sa ginhawa
walang inaapi, walang kinakawawa
lipunang ang tao'y di na nagdaralita

Pagsintang taimtim

PAGSINTANG TAIMTIM
ni Gregorio V. Bituin Jr.
13 pantig bawat taludtod

sinasamba ba kita dahil diwata ka?
o diwata ka dahil sinasamba kita?
ikaw ang pag-ibig ng pusong dumirinig
dinirinig ka ng puso kong umiibig

iniibig ba kita dahil maganda ka?
o maganda ka dahil iniibig kita?
ang iwi mong kariktan ay nakasasabik
sabik akong rikit mo'y gawaran ng halik

isa kang diwata pag ako'y nahihimbing
sa panaginip ko'y diwata kang kapiling
ako'y nagigising sa iyong paglalambing
ang lambing mo ang sa puso ko'y gumigising

ang bawat iyong ngiti'y tunay ngang kaytamis
sadyang lunas sa aking pusong tumatangis
kaysarap mong mahalin nang buong taimtim
kaya taimtim kitang pakamamahalin

Pag-iisa

PAG-IISA
ni Gregorio V. Bituin Jr.
13 pantig bawat taludtod

mag-isa, mag-isa, lagi na lang mag-isa
at sa pag-iisa'y walang nakikiisa
tila walang dahilan upang magkaisa
para sa isang taong laging nag-iisa
buti na lang, wala sa kanyang nang-iisa

ngunit maiging lagi siyang may kasama
dalawa silang tatagal ang pagsasama
mabuti ang dalawang ulong pinagsama
problema'y malulutas nilang magkasama
di masamang may pinagsamahan, kasama

mag-isa, mag-isa, lagi na lang mag-isa
sa mundong ito'y di ka dapat nag-iisa
dapat sa ating kapwa tayo'y makiisa
hanapin natin kung paano magkaisa
upang walang nang-iisa sa bawat isa

Polyeto

POLYETO
ni Gregorio V. Bituin Jr.
13 pantig bawat taludtod

saksi ako sa pinaglamayan mong akda
upang imulat sa nangyayari sa bansa
ang madla, lalo na ang uring manggagawa
isiniwalat mo ang tiwali't masama

masakit sa loob ang iyong mga ulat
makabagbag-damdamin ang iyong sinulat
dukha'y nagugutom, mga anak na'y payat
habang namumuno'y sagana't laging bundat

saksi ako sa pinaglamayan mong tindig
upang ang taumbayan ay magkapitbisig
pagkat namumuno'y di marunong makinig
hinaing ng dukha'y di nito dinirinig

hiyaw mo: "bulok na sistema’y palitan na!"
"dapat nang wakasan ang pagsasamantala!"
isinigaw mo: "manggagawa, magkaisa!"
na pag naunawa’y kikilos ang bumasa

Tinig man sa ilang

TINIG MAN SA ILANG
ni Gregorio V. Bituin Jr.
13 pantig bawat taludtod

hustisya sosyal, katarungang panlipunan
sino sa ating aayaw na kamtin iyan?
mabuhay ng may dangal, ito'y salalayan
pati na ang asam nating kapayapaan

pinuno'y aking nais tawagan ng pansin
ang maging makatao ba'y nakahihirin?
bakit laging hirap ang mamamayan natin?
bakit lipunang ito'y di ka man lang dinggin?

nais kong manawagan sa lahat ng uri
sa kapitalista't haring mapang-aglahi
sa magsasaka't manggagawang magkabati
sa tunggalian ninyo'y sinong magwawagi

ang magwawagi'y kung sinong makatarungan
at magbabahagi ng yaman ng lipunan
sino ang makataong pinuno ng bayan
at magdadala ng ginhawa't kaunlaran

dapat mapawi ang pribadong pag-aari
ng gamit sa produksyon, walang naghahari
dapat proletaryo ang mamumunong uri
upang sosyalistang sistema'y ipagwagi

tinig man sa ilang ang panawagang ito
sinasabi lang namin ang aming prinsipyo
anumang mangyari, mga kababayan ko
alam n'yo bakit kami nagsasakripisyo

Ang ahas at ang mga kawatan

ANG AHAS AT ANG MGA KAWATAN
ni Gregorio V. Bituin Jr.
10 pantig bawat taludtod

anang ahas, nataboy ang tao
naiwan siya sa paraiso
tulad din ng mga pulitiko
na namamayagpag sa gobyerno
dukha'y itinaboy nilang todo
pagkat sa lunsod daw ay perwisyo

aba'y ahas pa'y nagmamayabang
Eden ang kanyang naging tahanan
nang tinaboy sina Eba't Adan
tulad din ng ilang lingkod-bayan
na nagpasasa sa kabang-yaman
gobyerno'y Eden nilang kawatan

Mga trapo sa santo

MGA TRAPO SA SANTO
ni Gregorio V. Bituin Jr.
10 pantig bawat taludtod

ikinulong na ang mga trapo
na kabangbayan ang dinispalko
tinawag nila lahat ng santo
tutulungan kaya sila nito?

Huwag magpalusot ang mga kurakot

HUWAG MAGPALUSOT ANG MGA KURAKOT
ni greg bituin jr.
6 na pantig bawat taludtod

huwag magpalusot
ang mga kurakot
sa pork barrel sangkot
ang bayan na'y yamot
di makalilimot
sa gawang baluktot
dapat nang managot
ang lahat ng buktot

Pilat nila'y labi ng pakikibaka

PILAT NILA'Y LABI NG PAKIKIBAKA
ni Gregorio V. Bituin Jr.
15 pantig bawat taludtod

naroon sa pilat na iyon ng bawat kasama
ay mamamasdan mo ang labi ng pakikibaka
silang kaagapay sa laban ng uri't ng masa
batikan sa digma upang baguhin ang sistema

lipunang bago'y pamumunuan ng manggagawa
iwawaksi bawat dahilan ng pagdaralita
prinsipyong makatao'y nasa puso nila’t diwa
na siyang tinanganan sa kinaharap na digma

marami silang sa pakikibaka'y nagkapilat
di lang sa balat, maging diwa't puso'y nagkasugat
may kasamang hinuli, tinortyur, nawalang sukat
digma'y nag-iwan ng danas at gunitang kaybigat

napuno ang salop, sistemang bulok na'y kinalos
nagkasugat sa labanan upang di mabusabos
ang lahi't ang uring sa karukhaan na'y nilubos
sugat na nagpilat, sa kaibuturan ay tagos

hinarap ng taas-noo ang bagsik ng kahapon
at hinawan ang landas ng pakikibaka ngayon
di nila ikinahiya bawat pilat na iyon
pagkat yao’y tandang tapat sila sa nasa't layon

Sa iyo nakatitig ang mga mata ng langit

SA IYO NAKATITIG ANG MGA MATA NG LANGIT
ni Gregorio V. Bituin Jr.
15 pantig bawat taludtod

sa iyo nakatitig ang mga mata ng langit
tila binabantayan ka, di ko alam kung bakit
may maganda kayang tadhanang sa iyo’y sasapit
kaya ginawa mo ang dapat at nagpakasakit

yabag mo'y lumalangitngit sa gubat ng kawalan
ano't minamata ka pa rin ng mga gahaman
iyang kalderong walang laman ay dapat mong punan
pamilya mo’y ayaw manatili sa karukhaan

ano bang salang nagawa mo't kaytalim ng titig
ng langit sa iyo’t wala kang marinig na tinig
tanging sa puso'y may indayog ang lambing ng himig
tila ba nais kang makita't kulungin sa bisig

naglalakbay sa kawalan ang pusong nalulumbay
nasaan yaring langit, bakit ka napahiwalay
kung ang mata ng langit sa iyo nakasubaybay
marahil hinahamon kang manatili sa buhay

Ang unyon ay dapat kapara ng leyon

ANG UNYON AY DAPAT KAPARA NG LEYON
ni Gregorio V. Bituin Jr.
15 pantig bawat taludtod

pag tulad ng leyon ang isang matatag na unyon
mangingilag din ang buwitreng matakaw lumamon
kung kapitalista'y hari, manggagawa'y di piyon
unyon nila'y binuo sa nagkakaisang layon

katatatag pa lang, bubuwagin na ng kalaban
ang unyong animo'y isang leyong handang managpang
layon lang nilang karapatan ay ipagsanggalang
laban sa buwaya't buwitreng may bitukang halang

sa kontraktwalisasyong salot, karapata'y wala
benepisyong dapat sa kanila'y binalewala
tila kapitalismo'y nakakatakot na sumpa
at karima-rimarim sa buhay ng manggagawa

unyunista'y di tupa, manggagawa'y di kordero
na tango lang ng tango, sunud-sunuran sa amo
manggagawa'y may dignidad, marangal ang obrero
kapara'y leyong kantiin mo'y lalabang totoo

unyon ay dapat sintatag at simbangis ng leyon
mapanuri, at sa sistema'y di nagpapalamon
di lang hanggang pabrika, bayan din ay tinutunton
hanggang mag-organisa rin sa iba't ibang nasyon

unyunista'y di dapat hanggang unyon manatili
baka leyon ay maging tupa sa hawla ng hari
dapat angkinin ng unyunista'y laban ng uri
tulad ng leyong sa maraming laban ay nagwagi

Iwaksi ang kamalayang palaasa

IWAKSI ANG KAMALAYANG PALAASA

ni Gregorio V. Bituin Jr.

15 pantig bawat taludtod

bayan tayong may sariling talento, di busabos

pagkat di tayo pulubing umaasa sa limos

bayan ng mga mandirigmang sa dangal ay puspos

na diwa ng kalayaan sa puso'y tumatagos

dumating ang dayo, nakipagkaibigan sila

magaling daw sila't abante sa teknolohiya

pinangakuan tayong pauunlarin daw nila

ngunit tinuro pala'y kamalayang palaasa

kasalukuyan nga’y mahirap pa rin tayong bansa

mayorya ng populasyon ay pawang mga dukha

sariling atin nga'y kabayan pa ang kumawawa

sa dayo'y magagaling, ang atin ay balewala

bakit tiwala sa ating sarili'y wala tayo?

dahil ba kayraming tiwali sa ating gobyerno?

dahil ba sumisira sa atin ay tayo mismo?

dahil di tayo magaling at magaling ang dayo?

kamalayang palaasa ang tinuro sa atin

ng mga dayo habang mga likas-yaman natin

ay ninanakaw nila sa bayan at inaangkin

upang sa bansa nila'y paunlarin at gamitin

bayan tayong nagsisikap at may talentong ganap

bakit tayo umaasa sa dayong mapagpanggap?

magtiwala sa sarili, tayo'y muling mangarap

na tayo'y uunlad din sa sariling pagsisikap

Sa paggawa'y proteksyunismo

SA PAGGAWA'Y PROTEKSYONISMO
9 pantig bawat taludtod

repormahin ang mekanismo
sa pagtatakda nitong sweldo
isabatas ang "Living Wage Law!"
sa paggawa'y proteksyonismo

- gregbituinjr, 063014

Huwag paslangin ang mga puno

HUWAG PASLANGIN ANG MGA PUNO
ni Gregorio V. Bituin Jr.
15 pantig bawat taludtod

bakit papaslangin ang mga puno sa Makiling?
bakit punong walang sala'y kanilang papatayin?
mga punong tahanan ng ibon, na animo'y hardin
dugtong-buhay at salalayan ng sariwang hangin

tatlong-daang higit na puno'y mawawalang-buhay
na para sa ekoturismo'y tatanggaling tunay
patakaran bang ito'y wasto o talagang sablay?
na para sa ekoturismo, puno'y pinapatay!

bawat puno'y nilagyan ng numerong kulay pula
palatandaang yaon na ang kanilang sentensya
ang plano ng pamahalaan sa daigdig nila
higit limang kilometrong lumapad ang kalsada

mga puno'y tahimik na kinitil isa-isa
puno ang biniktima, kaya tao'y nagprotesta
anang madla, "sagipin ang puno! sagipin sila!
huwag hayaang paslangin ang angking buhay nila!"

nagkaisa ang taumbayan sa Bundok Makiling
hindi nila hinayaang mga puno'y kitilin
ang puno'y may buhay, punong tila kapatid natin
dapat itong sagipin laban sa mga salarin!

* Salamat sa ulat at litrato ng kasamang Victor Vargas, at may balita sa http://www.rappler.com/move-ph/ispeak/60830-murder-makiling-trees

Titig ng buwitre

TITIG NG BUWITREni Gregorio V. Bituin Jr.
12 pantig bawat taludtod

mga matang mapagbintang, mapagbanta
sila ba ang papaslang sa angking diwa?
kahit na wala kang nagagawang sala
ang ugali nila'y pawang mapanira
mga matang nanunubok, nagbabanta
tulad ng angkin ng buwitre't kuhila
nais nilang sagpangin ang angking diwa
aayaw gumitna, nais kumaliwa
paano titigil ang walang magawa?
mapagkanulo ang mata ng kuhila
buto'y maiitim, mukha’y tila suka
buwitre ba silang mga isinumpa?
napakahahaba ng kanilang dila
laging hinahasa ang kanilang tuka
na sa pagtuklaw ay laging nakahanda
tila kulang na lang, sagpangin ang madla
sa bawat kilos mo, tuka nila'y handa
mag-ingat ka kahit sila ang maysala
nangyari sa iyo'y sila ang maylikha
isang piyon ka lang na kanilang gawa
piyon ka lang ng tulad nilang kuhila
isa ka lang piyon, sila'y tuwang-tuwa

* piyon - isang piyesa sa ahedres, sa ingles ay "pawn"

Mike Tyson at Luis Suarez, nangagat ng katunggali

MIKE TYSON AT LUIS SUAREZ,
NANGAGAT NG KATUNGGALI
ni Gregorio V. Bituin Jr.
13 pantig bawat taludtod

boksingerong sikat, football player na sikat
naasar at sa kalaban nila'y nangagat
tainga ng boksingerong Hollyfield, nawarat
at si Chiellini, kinagat sa balikat

ngipin sa ngipin, may kasabihan nga noon
ganito pa rin ba sa modernong panahon?
bihirang atleta'y sa ganito nagumon
ngunit bakit nangagat ang dalawang iyon?

marahil nga'y sa laro nagulumihanan
isip ba'y inulap o asar sa salpukan?
kung kagatan na ngayon ang mga labanan
aba'y tiyak nang kampyon ang dalawang iyan

gayunman, hindi ganito ang tamang laro
tiradang pikon ng atletang mabibigo
kung sakaling panalo'y tuluyang maglaho
dapat isport lang, tanggapin ang pagkagupo

*  On June 28, 1997, Mike Tyson bites Evander Holyfield's ear in the third round of their heavyweight rematch.

* On June 24, 2014, Giorgio Chiellini, 29, who plays for Italian champions Juventus, was bitten on the shoulder by Suarez about 10 minutes before the end of Uruguay's 1-0 win over Italy in Natal.

Tutulong daw sa kalabaw ang agilang pilantod

TUTULONG DAW SA KALABAW ANG AGILANG PILANTOD
ni Gregorio V. Bituin Jr.
15 pantig bawat taludtod

* Ito'y isang makabagong pabula sa anyong patula. Ang pabula ay anyo ng kwentong pampanitikan na ang mga tauhan ay hayop.

bukid ng mahinahong kalabaw, anang balita
ay hangad daw na sakupin ng osong dambuhala
ang agila naman sa kalabaw ay namanata
siya'y tutulong sa pagtataboy sa osong gala
ngunit sa likod nito, ang agila'y natutuwa

sasakupin daw ng oso ang bukid ng kalabaw
habang sa likod ng kalabaw, nagyabang ang langaw
agila'y magkakapugad sa bukiring mapanglaw
kung maitataboy yaong dambuhalang halimaw
banta ng oso'y tila nakatarak na balaraw

sa oso'y lalaban ang kalabaw pag nagkagurlis
kahit kayang indahin ang mga tamang dumaplis
ipinagmayabang ng agila ang angking bagwis
kaya kalabaw daw sa banta'y di dapat magtiis
lalabanan nilang sabay sinumang magmalabis

malakas man yaong bagwis, ang agila'y pilantod
pagkat sa isang labanan, nabalian ng tuhod
pag di lumilipad sa gubat siya'y tila'y tuod
sa kalabaw at oso'y lagi na lang nakatanghod
di malaman kung kailan sa laban na'y susugod

teritoryo ng oso'y isang malawak na isla
agila'y himpapawid naman ang sinakop niya
sa maliit na bukid ang kalabaw nakatira
bukid na pinag-aagawan ng oso't agila
ngunit kalabaw ay lahing di papayagan sila

kalabaw sa bukid na iyon ay lahing bayani
bukid nilang pinagtanggol laban sa pang-aapi
pinalayas nila’y mga nanakop na buwitre
ngunit agilang nanakop din ngayon ang katabi
tutulong daw sa kalabaw habang ngingisi-ngisi

Nang nagmahal ang bawang, nagsaya ang mga aswang

NANG NAGMAHAL ANG BAWANG,
NAGSAYA ANG MGA ASWANG
ni Gregorio V. Bituin Jr.
15 pantig bawat taludtod

nang nagmahal ang bawang, nagsaya ang mga aswang
nakita ito nang bawang sa palengke'y nagkulang
presyo’y di lang nagtriple, tubong-tubo na sa bawang
aba'y mangangalakal pala iyang mga aswang

sa negosyanteng aswang, upang lumaki ang tubo
tone-toneladang bawang daw yaong itinago
naisipan nilang sipsipin ang sa masa'y dugo
sa lumolobong tubo, aswang silang langong-lango

negosyanteng aswang, produktong bawang ang nakita
alam nilang ang bawang ay kailangan ng masa
kaunting bawang, mahal na presyo, laki ng kita
nag-epektong domino, pati bigas nagmahal na

akala namin noon, takot sa bawang ang aswang
ngunit aswang pala silang nangalakal ng bawang
para sa tubo, kanilang bituka'y naging halang
munting kita ng dukha’y kanila pang sinasagpang

Ad Astra Per Aspera

AD ASTRA PER ASPERA
ni Gregorio V. Bituin Jr.
11 pantig bawat taludtod

kakamtin natin ang pinapangarap
sa pamamagitan ng pagsisikap
upang marating yaong alapaap
kabiguan ma't siphayo'y malasap

madawag na gubat man ang tahakin
sakripisyo't hirap ang lalandasin
tiyaga't sipag pa rin ang gagawin
na pagmumulan ng ating kakanin

patuloy pa ring magpapakatao
habang kapwa'y di inaagrabyado
pangarap ay makakamtang totoo
nang may dangal, sa kapwa'y taas-noo

dapat ay laging magsikap tuwina
diwang sa pagkatao’y laging dala
kasabihang "ad astra per aspera"
sa pagsisikap kakamtin ang nasa

* Ad astra per aspera is a Latin phrase which means any of the following: "Through hardships to the stars", "A rough road leads to the stars", "to the stars by hard ways". - from wikipedia

Seeds to a new dawn

SEEDS TO A NEW DAWN
by Gregorio V. Bituin Jr.
13 syllables per line

in the struggle for justice, in this battlefield
working class must win this war with our growing guild
to make it happen, workers should be the one to wield
that new, better system we are determined to build

as we are raging by poverty, we felt the need
to make a better world, and now we're sowing the seed
of revolt against the system of envy and greed
a proletarian revolt that the workers should lead

as we try to win this battle wisely but frugal
the enemy class are making our world lethal
destroying our planet for profit, capital
if we don't care, this planet's wound would become fatal

we must do something, although we are fighting alone
against those elites with their richness, power, and throne
but their class should be toppled, like cobwebs to be blown
then, a new beginning we'll make towards a new dawn

Dukha laban sa pag-aaring pribado

DUKHA LABAN SA PAG-AARING PRIBADO
ni Gregorio V. Bituin Jr.
4 pantig bawat taludtod

ang pagpawi
sa pribadong
pag-aari
siguradong
ating mithi
tarantadong
naghahari
alburutong
mga pari
ang totoong
laging sanhi
ng gumulong
salinlahi
kung pribadong
pag-aari
siguradong
mapapawi
sila yaong
masasawi
dukha tayong
magwawagi

Kilo-kilometro man ang nilalakad kong lagi

KILO-KILOMETRO MAN ANG NILALAKAD KONG LAGI
ni Gregorio V. Bituin Jr.
15 pantig bawat taludtod

nasanay na akong araw-araw na lang maglakad
pudpod na ang tsinelas, ang lakad ko na'y makupad
pagkat sa ginhawa't karangyaan, tulad ko'y hubad
ang karukhaan ko, sa aking kapwa'y nalalantad

lagi ko mang nilalakad ay kilo-kilometro
mabuti na kaysa di magbayad sa pagsakay ko
sa patutunguhan ay makararating din ako
kahit patang-pata, basta't walang inagrabyado

kinagiliwan ko na ang maglakad ng malayo
huwag lang mandaya sa kapwa sa aking pagtungo
sa isang pook ng taas-noo't di nakatungo
naglalakad ng may dangal kahit nasisiphayo

dapat listo sa paglalakad upang di mabangga
bagamat sa isip, patuloy pa rin ang pagkatha
may danas at nakikitang maaaring maakda
masaya, malungkot, lunggati, uyam, luha't tuwa

kilo-kilometro man ang nilalakad kong lagi
ito'y ayos lamang, pagod naman ay mapapawi
nakasanayan na, init ng araw ma'y mahapdi
ngunit may kwento, sanaysay at tulang nahahabi

Di sila namatay na bigo

DI SILA NAMATAY NA BIGO

ni Gregorio V. Bituin Jr.

13 pantig bawat taludtod

"They never fail who die in a great cause." Lord Byron

di bigo ang sinumang nag-alay ng buhay
para sa uri, buong buhay ang inalay
bundok ang bigat ng kanilang pagkamatay
sa puso ng mga kasama'y lumalatay
mga nagmamahal ay sakbibi ng lumbay

inilaban ang karapatan ng marami
para sa uri'y di sila nag-atubili
umaraw, umulan, bumaha o kumati
marubdob na hangad nila'y makapagsilbi
sa uri, bayan. at kapwa, sila'y bayani

tangan ang dakilang misyon at adhikain
at nasa puso'y prinsipyadong simulain
nang sa lipunan ay walang inaalipin
nang bulok na sistema'y tuluyang baguhin
at isang lipunang makatao ang kamtin

sila'y bayani't di nangamatay na bigo
pagkat may magtutuloy ng kanilang turo
silang prinsipyo't adhika'y di itinago
nilaan ang oras, talino, pawis, dugo
upang sa sistemang bulok, tayo'y mahango

Ang sugat ng puso ko'y kaylalim

ANG SUGAT NG PUSO KO'Y KAYLALIM
ni Gregorio V. Bituin Jr.
10 pantig bawat taludtod

ang sugat ng puso ko'y kaylalim
tila binalot ako ng lagim
tila ako'y naroon sa dilim
ng aking sangkaterbang panimdim

kaylalim ng sugat ng puso ko
sugat sa damdaming inukit mo
sa puso'y nanahan ka na rito
ngunit bakit nilayuan ako

simula nang ikaw ay lumayo
sugat-sugat na ang iwing puso
kaylalim, patuloy sa pagdugo
ngunit pagsinta ko'y di naglaho

saan ka man naroroon, sinta
laging nasa puso't isip kita
kung sugat ko ma'y maghihilom pa
di ko alam, ako'y umaasa

Anti-pork barrel nga, pro-kontraktwalisasyon naman!

ANTI-PORK BARREL NGA, PRO-KONTRAKTWALISASYON NAMAN!
ni Gregorio V. Bituin Jr.
15 pantig bawat taludtod

"tanggalin na ang pork barrel" ang kanilang hiyawan
akala mo sila'y tunay na makamamamayan
na iniisip lagi'y ang kapakanan ng bayan
anti-pork barrel nga, pro-kontraktwalisasyon naman!

kontraktwalisasyon ay iskemang anti-obrero
tinatanggal nito ang sa obrero'y benepisyo
sa kontraktwalisasyon, obrero'y laging dehado
pagkat wala silang kasiguruhan sa trabaho

pag natapos ang kontrata, obrero’y maghahanap
saan magtatrabaho upang tupdin ang pangarap
minsan lang may trabaho, bukas ay di mahagilap
buhay nila'y di tiyak, nalalambungan ng ulap

nililimitahan pa nitong kontraktwalisasyon
na karapatang obrero'y ipagtanggol ng unyon
binaba ang kalidad ng benepisyo't proteksyon
at pinapatay ng kontraktwalisasyon ang unyon

silang mga anti-pork barrel, pusong makamasa
ngunit pagdating sa manggagawa, nasaan sila?
elitistang anti-pork barrel, ating kakampi ba?
kung sila'y anti-manggagawa, pro-kapitalista?

aba'y iba kasi ang uri nilang pinagmulan
bagamat seryoso silang makatulong sa bayan
hinggil sa obrero'y dapat silang paliwanagan
na di sapat mapalitan lang ang nanunungkulan

dapat matanto nilang ang pag-aaring pribado
ng mga gamit sa produksyon ang sanhi ng gulo
na ito'y pawiin, itatag ang lipunang bago
sistemang para sa lahat, lipunang makatao

Tatlong batas ng mosyon ni Newton

TATLONG BATAS NG MOSYON NI NEWTON
ni Gregorio V. Bituin Jr.
15 pantig bawat taludtod

mananatiling nakatigil ang anumang bagay
hangga't walang anumang pwersang dito'y magpagalaw
tulad ng kilos ng mga sanga, dahon at palay
na sa hampas ng hangin ay animo'y nagsasayaw

matinding pwersa'y dapat magpatinag sa mabigat
kasama na ang bagal at bilis sa anumang agwat
kaysa nararapat sa magaan ay magpatinag
magkaagwat man, iba ang pwersang dapat ilapat

sa bawat galaw, ito'y may salungat at pantay ding
galaw ng bagay, anumang bagay ito sa atin
tulad ng paglipad ng agila sa papawirin
na pinapaspas yaong hanging itulak-kabigin

naroon ang hangin sa bawat paghampas ng alon
ang pwersa'y masang pinalaki ng akselerasyon
naghahari'y nanggagalaiti sa rebolusyon
pag-unlad itong tatlong batas ng mosyon ni Newton

Basta't gawin natin ang mabuti

BASTA'T GAWIN NATIN ANG MABUTI
ni Gregorio V. Bituin Jr.
15 pantig bawat taludtod

kaaway silang naniniwala sa sabi-sabi
mga mapangwasak silang ang kapara'y buwitre
mapanira sa kapwa, sakim, at makasarili
masaya silang ang iba'y kanilang binibigti

sila'y mga buwitreng walang katiting na bait
silang nabubuhay sa yabang, katakawan, inggit
sarili nilang ginhawa ang laging ginigiit
habang karapatan ng iba yaong ginigipit

huwag tayong tumulad sa kanilang pang-aapi
basta't gawin nating lagi kung ano ang mabuti
dukha man, may dangal tayong maipagmamalaki
pakikipagkapwa't pagpapakatao'y maigi

mula sa sariling pawis ang ating kakainin
mula sa sariling kayod bawat ating dadamtin
mula sa sariling sikap anumang palad natin
mula sa sariling sipag ang anumang kakamtin

tayo'y may dangal, sikaping may bait sa sarili
di nang-aagrabyado ng kapwa't di nang-aapi
nagpapakatao, masaya sa buhay, may silbi
nasa gawa't isip sa lahat ay makabubuti

Pagsintang ginipit

PAGSINTANG GINIPIT
ni Gregorio V. Bituin Jr.
13 pantig bawat taludtod

diwatang sinasamba, ako'y nilalait
dahil isa lang akong aktibistang yagit
totoo naman, ako'y laging nasa gipit
sapat ba iyon upang siya'y magmalupit?
marahil nga, pagkat pinangarap ko'y langit
diyosang ang pangalan ay lagi kong sambit

ako'y dukha, walang anumang pag-aari
may pag-aari man ay mayroong kahati
walang sambuo, kundi kala-kalahati
iba'y hiram, iba'y bigay, kundi man hingi
ngunit nagsisipag ako't nagpupunyagi
bakasakaling pagsinta'y maipagwagi

dapat kayang ang iwing pagtingin sa kanya
na aking sinisinta'y ibaling sa iba?
ngunit ganoon kaya'y aking makakaya?
siya lamang ang nasa isip ko tuwina
siya lamang ang sa puso ko'y nakatira
siya, tanging siya lamang ang sinisinta

diwatang sinasamba'y di ko pinipilit
gaano man katapat ang pusong lumapit
sawing kapalaran ba'y aking masasapit?
o kapalaran kong siya'y aking madagit?
kung may pag-asa, pagsinta ko'y igigiit
kung wala, lalayo ako't di na hihirit

Ang buhay ko'y sa kilusan na nakalaan

ANG BUHAY KO'Y SA KILUSAN NA NAKALAAN
ni Gregorio V. Bituin Jr.
15 pantig bawat taludtod

ang iwing buhay ko'y sa kilusan na nakalaan
nasa kamay na nila ang buhay ko't kamatayan
pagkat ako'y aktibistang pagbabago'y adhika
nasa diwa'y paglilingkod sa uring manggagawa
tanging prinsipyong niyakap ang pinalalaganap
saanma't kailan upang matupad ang pangarap
na lipunang walang anumang pagsasamantala
ng tao sa tao't wala nang elit at burgesya
kilusan ang kapiling sa maghapon at magdamag
at sa pakikibaka'y nananatiling matatag
patuloy na sinusunod ang disiplinang bakal
ng kilusan bilang akda ng buhay na may dangal
sadyang dito na ako sa kilusan mamamatay
pagkat dito na nakalaan ang iwi kong buhay

Ikulong lahat ng maysala!

IKULONG LAHAT NG MAYSALA!
ni Gregorio V. Bituin Jr.
13 pantig bawat taludtod

"beyond reasonable doubt" upang maikulong
ang mga trapong sa pagnanakaw nalulong
di lang sina Sexy, Tanda't Poging kuratong
pati liberal at oposisyong nandambong

ikulong lahat, senador o kongresista
na sa kabang bayan ay kawatang talaga
walang dapat santuhin kung maysala sila
dapat mamugot ang palakol ng hustisya

kaiba ito kapag isang kilong tuyo
ang ninakaw ng dukhang ramdam na'y siphayo
bugbog, kulong agad, dangal pa'y dinuduro
walang "beyond reasonable doubt" sa damuho

di dapat sa tsismis, bulungan o masmidya
na pagkatao nila'y agad ginigisa
suspek lamang kung walang anumang pruweba
di gaya sa dukhang di patas ang hustisya

sila'y dalhin sa tamang proseso ng batas
na dapat din sa dukhang kinulong ng paspas
batas sa dukha't mayaman, dapat pahehas
sa "beyond reasonable doubt" dapat ay patas

lahat ng pagkakataon ay bigyan sila
upang makapagtanggol, makapagdepensa
di gaya sa dukhang di patas ang hustisya
wala silang kawala kung may ebidensya

kaya sinumang napatunayang kawatan
pag "beyond reasonable doubt" na ang saligan
dapat kulong, dukha, mayaman o trapo man
ang hustisya'y dapat walang kinikilingan