Martes, Marso 21, 2017

Pagpupugay sa mga makata

HAPPY WORLD POETRY DAY 2017

PAGPUPUGAY SA MGA MAKATA
ni Gregorio V. Bituin Jr.
15 pantig bawa taludtod

habang kaysaya ng mga ibong nagliliparan
at nanginginain ang kalabaw sa araruhan
taos kong pagbati sa mga makata ng bayan
sa ngayong Pandaigdigang Araw ng Panulaan

isang tagay sa lahat ng makata sa daigdig
mga tula nyo'y di ko man nabasa o narinig
marahil taludtod nyo'y punumpuno ng pag-ibig
o mga saknong sa laman ko'y makapanginginig

di lahat ng tula'y hulog mula sa toreng garing
pagkat may mga tulang mula sa masa nanggaling
inilalarawan ang kulay ng trapo't balimbing
o sa manggagawa'y nananawagang magsigising

ngayong World Poetry Day, taos-pusong pagpupugay
habang sa aking lungga'y patuloy na nagninilay

21 Marso 2017

Walang komento: