SA AKING MUSA
ni Gregorio V. Bituin Jr.
10 pantig bawat taludtod
musa kita sa aking paningin
humihip man ang mabining hangin
habang kaygaan ng panginorin
at tangay kita sa papawirin
musa ka ng aking kabuuan
tayo'y anak nitong Silanganan
pawiin natin ang mga halang
at pairalin ang kabanalan
nakatitig ako, aking musa
sa iyo, pagkat sa puso'y sinta
ngiti mo pa lang ay pamatay na
paano pa kung mawawala ka
tutukan man ako ng balaraw
at humaba man itong tag-araw
kinalalagyan ko ma'y magunaw
ang tanging musa't sinta ko'y ikaw
bukangliwayway ka niring puso
huwag sana itong mapadugo
kung takipsilim kang maglalaho
ang buhay ko na'y dusa't siphayo
Walang komento:
Mag-post ng isang Komento