DUGO SA KAMAY
ni Gregorio V. Bituin Jr.
13 pantig bawat taludtod
kayrami nang mamamayan yaong pinaslang
sa ilalim ng kasalukuyang rehimen
ito'y mga buhay na kanilang inutang
at dapat pagbayarin ang mga salarin
di mapapawi ang dugo sa kamay nila
kahit sabunang maigi't sila'y maghugas
pagkat kasalanang ito'y nakatatak na
sa kasaysayan at maysala'y mga hudas
nariyan pa ang dugo sa kanilang kamay
at marahil ito'y tumagos na sa balat
mga dugong iyan ang magiging patunay
na sa mata ng lahat, hustisya ang dapat
hustisya, hustisya, nasaan ka, hustisya
ito ang sigaw ng maraming mamamayan
ibigay ang hustisya sa mga biktima
may dugo sa kamay ay dapat parusahan
Walang komento:
Mag-post ng isang Komento