Mabuhay ka, Ka Andy

MABUHAY KA, KA ANDY

(tula para kay Ka Andres Bonifacio)
ni Gregorio V. Bituin Jr.
11 pantig, soneto

mabuhay ka, Ka Andy, mabuhay ka
pagkat ipinaglaban mo ang masa
tuloy pa ang iyong pakikibaka
pagkat marami kaming narito pa

kami sa iyo’y totoong saludo
tunay kang bayani ng bansang ito
dakila ka sa mga ginawa mo
kaya kami ngayon ay taas noo

di pa tapos ang iyong rebolusyon
himagsik mo'y amin pang sinusulong
krisis pa rin ang bansa tulad noon
kaya tuloy ang himagsikan ngayon

pamana mo'y aming sinasariwa
pagkat ikaw'y magandang halimbawa