Pagninilay ng isang dukha sa Kalye Mayaman

PAGNINILAY NG ISANG DUKHA SA KALYE MAYAMAN

bakit sa bayan ko'y kayrami nang naghihikahos
umunlad ang iilan, mayorya'y buhay-busabos
may pagkakataon bang guminhawa't makaraos
ang dukhang nagdurusa, sawi’t laging kinakapos

bakit turing ng marami, iyang dukha'y pusakal
habang sa iba, tila banal ang trapong kriminal
bakit asal ng ilan, mabaho pa sa imburnal
at sa iba pagpapakatao’y dapat na asal

bakit di binabayarang tama ang manggagawa
kaybaba ng presyo ng kanilang lakas-paggawa
bakit tinatanggalan ng bahay ang mga dukha
pinapalayas sa lungsod na tila baga daga

dama mong sistemang bulok ay tigib ng pasakit
kailangang mag-aklas kahit nais mong pumikit
upang pansamantalang di masilayan ang lupit
ng sistemang kayraming ginhawang ipinagkait

- tula’t litrato ni gregbituinjr.

Sa sinisinta kong sangre

SA SINISINTA KONG SANGRE

inaabangan kang lagi sa aking panaginip
upang sambahin ka, Danaya, ng puso ko't isip
kung bakit ikaw ang inibig ay di ko malirip
ngunit ligaya kita't puso'y ikaw ang nahagip

hanga ako sa iyong galing sa pakikidigma
sa arnis, kalaban ay tiyak kakain ng lupa
sadyang kaytamis ng ngiti mo, magandang diwata
habang tunay akong naakit sa iyong pagtudla

pagkat sa pagtudla mo puso ko ang tinamaan
habang iwing ganda mo'y ano't di ko maiwasan
magkaiba man tayo ng mundong kinalalagyan
hangad kong makaisang-dibdib ka, diwatang hirang

ilang bundok ma'y tatawirin ko, Sangre Danaya
dagat man ay lalanguyin ko, makita lang kita
iwing buhay ko man ay tigib ng siphayo't dusa
gagawin ang lahat pagkat ikaw ang aking musa

- gregbituinjr.

Tarabangan kitang gabos, tulungan tayong lahat

TARABANGAN KITANG GABOS, TULUNGAN TAYONG LAHAT

doon sa Kabikulan ay dumatal yaong unos
kapaskuhan pa noon nang unos ay nanghambalos
nanalasa ang bagyong Nina, kayraming pinulbos
tulad ng bahay nila’t pananim, sila’y kinapos
tulungan tayong lahat, tarabangan kitang gabos

kabuhayan ay nasira, bahay at puso'y warat
pinagkukunan ng pagkain ay nadaleng lahat
si Nina'y kaylupit, ngitngit niya'y di madalumat
kaya marapat lang na tayo’y sumaklolong sukat
tarabangan kitang gabos, tulungan tayong lahat

habang nakatitig sa kawalan ang tagaroon
naisip kong kalagayan nila'y saan hahantong
sila'y matatag, alam nila paano susulong
silang sinalanta ni Nina'y tiyak na babangon
tarabangan kitang gabos, lahat tayo'y magtulong

sa mga nangyari, luha mo'y tiyak mangingilid
tila di mawari kung bughaw pa ang himpapawid
dapat tayong magtulungan bilang magkakapatid
sa pagkakaisa'y malalagpasan ang balakid
at sa kanila panibagong pag-asa'y ihatid

- gregbituinjr.

Malago na naman ang aking mga kuko

MALAGO NA NAMAN ANG AKING MGA KUKO

malago na naman ang aking mga kuko
nawawala ang nailcutter, hanap-hanap ko
dapat nang putulin, habang-haba na ako
baka kuko'y maging singhaba ng martilyo!

sa nawawalang nailcutter ay nahahapis
nahan na? ako'y tuliro't naghihinagpis
putulin na't nag-aalala akong labis
at baka kuko'y maging singhaba ng lapis!

saan napalagay ang nailcutter at wala
ang nanghiram kaya'y manggagawa o dukha?
pagkawala ba nito'y isa kayang sumpa?
sapagkat may-ari ng kuko'y hampaslupa?

nagdaramdam na ang aking mga daliri
di ko raw pansin ang kanilang mga hikbi
kukong mahaba'y ayaw nilang manatili
"putulin ito" ang sa labi'y namutawi

"Inay, Inay, ang nailcutter ba'y nasaan?
Sapagkat aking kuko po'y naghahabaan."
"Naku, anak, tiis muna't nasa hiraman
Bukas pa raw ibabalik ng iyong pinsan!"

ang agam-agam ko'y nilunod sa lambanog
nang mata'y napagod agad na nakatulog
pinanaginipan ang adhikang kaytayog
bumalikwas nang may nailcutter na nahulog

- gregbituinjr.

Nilay sa paglalakbay

NILAY SA PAGLALAKBAY
ni Gregorio V. Bituin Jr.
15 pantig bawat taludtod

sa pangingibang-bansa'y sumakay ng salipawpaw
sa unang sakay aking ligaya'y di magkamayaw
sabik sa kalangitan, ulap ay katabi't tanaw
ang tulin ng sasakyan ay di ramdam ang paghataw

sa bansa ng sakang ay nakaanim akong buwan
upang doon ay magdalubaral ng dagisikan
nangibang-bansa muli dalawang siglong nagdaan
para daluhan ang kumperensya sa dating Siam

bumalik roon tatlong taon pa ang nakalipas
dalawang linggo sa Mae Sot, sa Burma'y isang oras
apat kaming doon sa salipawpaw nagsiangkas
at nakipag-ugnayan sa ang nasa'y bansang patas

tatlong taong nakalipas, muli akong lumipad
dumalo sa Roma hanggang Paris na paglalakad
mula Lyon sumama, doon prinsipyo'y tumingkad
nangyari sa Yolanda, sa Paris ay inilahad

di ko alam kung makapangingibang-bansa muli
subalit gawain ay pinag-iigihang sidhi
nagsisikap at tigib ng pagbabakasakali
nang makasama sa proyektong may mabuting sanhi

* salipawpaw - Tagalog sa Kinastilang eroplano
* dalubaral - Tagalog sa Ingles na scholarship
* dagisikan - Tagalog sa Kinastilang elektronika

Tula

TULA

kay Balagtas ang "Florante at Laura"
kay Amado V. Hernandez ang "Masa"
"Ako ang Daigdig" kay Abadilla
"modernismo" naman kay Rio Alma
kay Bituin naman ay "sosyalista"

- gregbituinjr.

Sa magsisipagtapos sa Speakers Training Workshop

SA MAGSISIPAGTAPOS SA SPEAKERS TRAINING WORKSHOP
ni Gregorio V. Bituin Jr.
15 pantig bawat taludtod

Pagpupugay sa magsisipagtapos sa palihan
Hinggil sa pagtatalumpati sa harap ng bayan
Hinggil sa pagbabahagi ng inyong kaisipan
At magtalumpati hinggil sa isyung panlipunan

Maraming salamat din po sa inyong naging guro
Na nagbigay-kaalaman, mabisang pagtuturo
Nadama man sa talumpati'y saya o siphayo
Sa harap ng madla'y di na nanginginig o dungo

Galit man, malinaw na nakikipagtalastasan
Masaya't malungkot man, nakatindig ng mataman
Di naliligaw, nakapokus sa tema't usapan
Tiyak magiging orador sa buong sambayanan

Ang diwa ng uring manggagawa'y bigyan ng diin
Sa pagtatalumpati'y anong paksang sasabihin
Pagtatanggol sa manggagawa'y unang isisipin
Habang nasa diwa, obrero'y pagkakaisahin

Mabuhay kayong sa palihang ito'y magtatapos
Busog na sa kaalaman, di kayo kinakapos
Tandaan lamang na huwag kalimutang pumokus
Nang talumpati nyo sa puso ng madla'y tumagos.

- binigkas sa pagtatapos ng tatlong araw na Speakers Training Workshop para sa mga lider-manggagawa at kasapi ng unyon, Enero 15, 2017

Nang pumutok ang tingga

nang pumutok ang tingga
tinamaan ang bata
na agad bumulagta
ang ina'y lumuluha
sa puso'y kinakapa
may hustisya pa kaya

- gregbituinjr.

Isang tula hinggil sa bagong kalendaryo

sa lumang kalendaryo'y nakatunganga

bagong taon, bagong kalendaryo'y wala

hanggang sa aking maisipang lumikha

ng isang kalendaryong pangmanggagawa

kaya disenyong ito'y agad ginawa

- gregbituinjr.

Ang aso sa Oro

nagprotesta sila pagkat pinaslang daw ay aso
kaya ipinagbawal na ang pelikulang "Oro"
nagprotesta kaya sila nang pinaslang na'y tao?
kaya ipagbawal din ang nag-utos na pangulo?

pelikulang Oro'y di raw magandang halimbawa
pagkat pumatay ng isang asong kaawa-awa
ang panonokhang ba'y isang mabuting halimbawa
gayong pinapaslang na'y ang mga dukhang kawawa

asong pinaslang sa pelikula'y anong kaibhan
sa taong pinaslang, itinapon kung saan-saan
totoo namang aso'y may karapatan din naman
lalo na ang bawat taong sadyang may karapatan

nang aso'y pinaslang, pelikulang Oro'y sinara!
nang tao'y pinaslang, Malakanyang ba'y napasara?

- gregbituinjr.

Tinokbang na ang kawawa

itinuloy na ang banta
tinokbang na ang kawawa
umalingawngaw ang tingga
toktok, bang!bang! bumulagta

saksi maging mga pusa
sa pagtimbuwang sa lupa
ng mga biktimang dukha
lupang tigang ay nabasa

dukha na'y inupasala
dangal pa'y binalewala
buhay pa nila'y winala
sa prosesong di na tugma

ang mga ina’y lumuha
at kayraming natulala
kaya ang tanong ng madla
hustisya'y kamtin pa kaya

- gregbituinjr.

Natapos din ang putukan sa Bagong Taon

nag-Bagong Taon na't natapos na rin ang putukan
habang putukan ay lipana ng anim na buwan
nakaraang tigib ng dahas, lungkot at patayan
tila pumapaslang lang ng daga sa talahiban

ilan kaya’y nagsikatha ng bagong resolusyon
na karapatang pantao'y igagalang din ngayon
na kikilos lang ayon sa mabuting puso’t layon
at tiyak tatangging masagpang ng pangil ng leyon

tulad ng langay-langayan doon sa himpapawid
na di papayag na madagit ng agilang ganid
malayang lumilipad sa amihan habang batid
na may kalutasan bawat sulirani’t balakid

irespeto ang karapatang mabuhay ng tao
kung may pagkakasala ay idaan sa proseso
huwag mamimihasang paslang doon, paslang dito
di tayo mga barbaro kundi sibilisado

sumapit ang Bagong Taon, ang dala'y bagong bukas
nawa'y taon ito na lahat ay pumaparehas
subalit kung kinakailangang tayo'y mag-aklas
gawin natin kung sa lahat ito'y magiging patas

- gregbituinjr.

Malungkot ang Pasko ng pamilyang tinokbang

MALUNGKOT ANG PASKO NG PAMILYANG TINOKBANG

biktima sila ng anong lupit na karanasan

sapagkat pamilya'y dinaluhong ng karahasan

mahal sa buhay ay wala sa prosesong pinaslang

kinatok sa bahay, imbitasyon ay naging tambang

operasyong tokhang ay naging tokbang: "tok, tok, bang! bang!"

ngayong Pasko, wala na ang mahal nila sa buhay

malungkot ang kapaskuhan sa kinagisnang bahay

ganun-ganon lang, mahal nila'y basta lang pinatay

walang managot, collateral damage daw ang bangkay

sa digmaang parang ipis kung tirisin ang buhay

at ngayong Pasko, halina't magnilay-nilay tayo

paano bang buhay ay kanilang irerespeto?

igalang pa kaya itong karapatang pantao?

sa sunod na Pasko ba'y asahan pa ring ganito?

mga biktima ba'y may hustisya pang matatamo?

kung tugon nila sa problema'y shortcut, pamamaslang

kung solusyon nila'y pananakot at pananambang

di matalino ang pinuno, isa siyang hunghang

problema'y di kayang malutas, kaya shortcut na lang

kung ganyan ang lider mo, kaluluwa niya'y halang

- tula't litrato ni gregbituinjr.,/122516

Paskung-pasko, kayraming pulubi

PASKONG-PASKO, KAYRAMING PULUBI

naglakad-lakad ako ngayong Kapaskuhan

na dapat dama kahit munting kasiyahan

ngunit kayrami pa ring pulubi sa daan

para bagang ang Pasko'y walang pakialam

gula-gulanit pa rin ang damit ng bata

marusing pa rin ang suot na tila basa

para bagang Pasko'y dinaanan ng sigwa

Paskung-Pasko'y marami pa rin ang kawawa

maglakad-lakad ka ri't maging piping saksi

kahit na kapaskuhan, kayraming pulubi

kagutuman sa bayan ay sadyang kayrami

bakit ganito ang bayan, tanong sa sarili

ang sistemang ito'y mapangyurak sa tao

na serbisyo'y negosyo sa kapitalismo

naglipana ang pulubi kahit na Pasko

kaya dapat palitan ang lipunang ito

Pasko'y isang araw ba ng pananahimik?

at matapos ito'y muling manghihimagsik?!

pangarap na pagbabago'y ating ihasik

hanggang lipunang komunal ay maibalik

- gregbituinjr.,/122516

Nasa pagkakaisa ng manggagawa ang pag-asa

nasa pagkakaisa nitong manggagawa
yaring pag-asa ng buong sangkatauhan
paniwalang ito'y tagos sa puso't diwa
upang kamtin ang pagbabago ng lipunan

panahon man ngayon ng hinagpis at sigwa
dahil sa kabuktutan ng lilong puhunan
ang Pasko'y araw na dapat ding ikatuwa
pagkat may isang araw na dusa'y naibsan

lipunang kapitalista'y kasumpa-sumpa
na yumurak sa dangal nati't katauhan
kaya dapat kamtin ang lipunang malaya
sa salpukan ng makauring tunggalian

uring manggagawa, hukbong mapagpalaya
magbigkis muli't patuloy tayong lumaban
ipanalo natin ang lipunang adhika
ito'y muling panata ngayong kapaskuhan

- gregbituinjr./122516

(nasa larawan ang anyo ng Christmas Card na ipinamamahagi ng Bukluran ng Manggagawang Pilipino)

Huwag kang makikipag-away ngayong Pasko

huwag kang makikipag-away ngayong Pasko
lalo na't ang katunggali mo'y walang modo
dahil baka magkasakitan lamang kayo
magpasensya ka't wala pang sakit ng ulo

ngayong Pasko'y huwag kang makikipag-alit
at baka isa sa inyo'y makapanakit
unawain mo na lang, huwag magagalit
at baka pa makapatay ang iyong ngitngit

ngayong Pasko'y pagpasensyahan na lang sila
baka kaya nang-away, kayraming problema
baka ang pasko nila'y tuyo't walang pera
di na nila alam kung paano sumaya

ngayong Pasko'y panahon ng pagbibigayan
kahit na ang buong taon ay kahirapan
isang araw man ay damhin ang kasiyahan
kahit isang araw lang, walang kaalitan

- gregbituinjr./122516

Paano bang tumula kung loob ko'y pulos galit

paano bang tumula kung loob ko'y pulos galit
makatula pa kaya kung pulos poot ang dibdib
paano ba ilalarawan ang sanlaksang lupit
na halos magpasabog na sa pusong sinibasib
ng paglinlang, pagpaslang, sa inosente'y pagligpit

paano itula ang mga nagkalat na bangkay
lalo't malalaman mong yaong biktima'y hinalay
di lamang katawan kundi pagkatao'y niluray
di na iginagalang ang karapatang mabuhay
ang pinaggagawa nila'y pumatay nang pumatay

paano itula ang nararanasang pagyurak
sa dignidad ng tao't mga dukha'y hinahamak
di na nag-isip, basta sundin ang pangulong utak
sa ngalan daw ng seguridad, kalsada'y tinigmak
ng dugo, animo'y naglaway sa dugo ang parak

paano bang tumula kung dibdib ko'y pulos poot
dahil di malutas ang mga krimen at sigalot
pagpaslang lang ang kayang gawin ng ngayon ay salot
sa mga pagpaslang, paano na sila lulusot
sa nangyayari'y mayroon ka bang maisasagot

- gregbituinjr.

Pagdurog sa durugista

PAGDUROG SA DURUGISTA

Philippine President Rodrigo Duterte: "My campaign against drugs will not stop until the end of my term... until the last pusher and the last drug lord (is killed)." 

ramdam ng mamamayan ang takot

sa panahong ligalig ang dulot

dahil sa polisiyang nakasaklot

sa kalsada'y lagim ang bumalot

napakarami nang napapaslang

na kabataan, na mamamayan

dahil nais ng pamahalaan

durugista'y mawalang tuluyan

pangulo mismo ang nagdidikta

hanggang sa kanyang huling hininga

paslangin lahat ng durugista

para sa kaligtasan ng masa?

ngunit ano ang tamang proseso?

sugurin sa pinugaran nito?

pagbabarilin ang mga ito?

ang ganyan ba ang prosesong wasto?

balang araw, hustisya'y hihingin

gobyerno'y kanilang sisingilin

katarungan sana'y maihain

sa pamilya ng gawang rimarim

- gregbituinjr.

Kabilugan ng buwang

KABILUGAN NG BUWANG

saksi ang bayan sa kayraming nagsipagtimbuwang
laksang sugapa ang inasinta't pinagpapaslang
at pinapula sa dugo ang dukha't lupang tigang
kayraming tokhang ang naging tokbang, toktoktok, bangbang!

sa utak ng pinuno'y lagi raw umuukilkil
ang "ginintuang" layunin at katagang "Kill! Kill! Kill!"
proseso't karapatang pantao'y sadyang sinikil
parang pumapatay lang ng ipis ang mga sutil

iyon daw ang panahon ng kabilugan ng buwang
binilog ng pinuno ang ulo ng mga hibang
masa'y nilinlang at naging tagapanood lamang
kahit pagpaslang sa araw at gabi'y walang patlang

dapat alpasan ng bayan ang hipnosis na ito
nang mabigyang pansin ang bawat buhay, bawat tao

- gregbituinjr.

Pagkalugmok

PAGKALUGMOK

Umaalingasaw ang paligid
Nag-amoy dugo ang lansangan
Pinapaslang ka na'y di batid
Kayhapdi ng hanging amihan

Paano kung walang proseso
Tinanggalan ng karapatan
Ang biniktima'y kapatid mo
O di kaya'y malayong pinsan

Laksa'y naging tagapanood
May pakiramdam ba ang bayan?
Kayraming sa dugo nalunod
Nakiramdam lang ba ang bayan?

Sa droga'y kayraming nalulong
Sa pagpaslang daming naburyong

- gregbituinjr.

Ang saksi

ANG SAKSI

lalambi-lambitin ang unggoy sa punong mababaw
habang sa kanyang paligid ay umaalingasaw
saksi siya sa laksang binulagta ng halimaw
na animo'y hari sa mga nagpipiyestang bangaw

nabababad sa dugo ang lupa't buong paligid
dama niyang iyon ay galing sa magkakapatid
habang luha ng sumisintang ina'y nangingilid
bakit ang mga anak ang puntirya'y di nito batid

kamao'y kuyom, pinagmamasdan ang mga anak
nahan na ang proseso't sa dugo sila'y natigmak
sa paligid animo'y kayraming humahalakhak
sikat na ang araw, tuyo na ang mga pinitak

doon sa pinagbitinan, nakabitaw ang unggoy
ang nagluluksang ina'y napatingala't nanaghoy

- gregbituinjr.

#NoToSalvagings #StopTheKillings
#EJKnotOK #RespectTheRightToLife

At muling nanalasa ang mga bakulaw

AT MULING NANALASA ANG MGA BAKULAW

at muling nanalasa ang mga bakulaw
naghasik ng hilakbot sa bayang mapanglaw
unipormado ang lagim na humahataw
upang lumpuhin ang sindikato ng bangaw

nag-umulol sa galit ang mga kilabot
pagkat sa tropang iyon sila'y pawang sangkot
di nila batid kung paano mahihilot
ang pagkabali ng pakpak ng ibong pugot

sinuong nila ang samutsaring panganib
upang singilin ang may salang anong tigib
hinagilap kung saang sumuot na liblib
at pinasok ang iba't ibang lungga't yungib

di man natagpuan ang hanap na hustisya
nag-aabang pa ring lumabas ang konsensya

- gregbituinjr.

Huwag isabatas ang parusang bitay

isyung death penalty ngayon ay muling bumubukol

taumbayan muli'y ginulantang, ito ba'y ukol

sa pagbabalik ng parusang bitay tumututol

sa mga inosente kaya'y sinong magtatanggol

baka marami riyang inosenteng akusado

di kayang kumuha ng magaling na abogado

isinakdal sa krimeng ang gumawa'y ibang tao

isinakdal ay dukha gayong mga tambay sa kanto

karaniwan, isang dukha'y pinaaaming pilit

sa gawa-gawang krimen pilit na pinipilipit

hanggang di makayanan ang tortyur sa krimeng giit

hanggang inako ang krimen ng iba't ipiniit

maraming inosenteng itinuring na kriminal

gayong matinong tao'y itinuring na pusakal

kung maraming ganitong dahil dukha'y isinakdal

walang pera kaya't sa hustisya'y natitigagal

panakot nga ba sa krimen ang parusang mamatay

ano't pilit ibinabalik ng mga "mahusay"

natanggal na natin noon pa ang parusang bitay

dahil makataong hustisya ang dapat ibigay

mahusay na sistema ng hustisya'y kailangan

upang masawata iyang mga krimen sa bayan

upang mapigil ang mga krimen sa mamamayan

upang maging matiwasay yaong puso't isipan

- gregbituinjr.

(binasa sa tapat ng Kongreso ng Pilipinas, kasabay ng mobilisasyon ng mga human rights defenders na nananawagang huwag ibalik ang parusang bitay, Disyembre 13, 2016)

Pag marami raw pulubi

pag nakakita raw kayo ng pulubi sa daan
masasabi nyong sadyang bigo ang pamahalaan
na tuparin ang tungkulin nito sa mamamayan
upang buhay at dangal nito'y mapangalagaan

samutsari ang dahilan kung bakit may pulubi
dahil sa hirap at sa problema'y natuturete
walang pagkakataong sa bayan ay magkasilbi
di lang lipunan kundi sinisisi ang sarili

kaya pa kayang magbago pa ang kanilang buhay
na tila sa mundong ito'y naglalakad na bangkay
nangangarap pa rin ng gising, umaasang tunay
o kamatayan na lang ang kanilang hinihintay

pag marami raw pulubi, gobyernong ito'y bigo
dahil walang magawa nang buhay nila'y mahango

- gregbituinjr.

Kung tayo'y lalaban

KUNG TAYO'Y LALABAN
ni Gregorio V. Bituin Jr.
15 pantig bawat taludtod

"If we have to fight let us fight like men, not like dogs or rats." ~ Lean Alejandro

hinahamak na ng diktadura ang sambayanan
ang tao'y di na tao, laging pinagkakaitan
diktadurang ang idinudulot ay kamatayan
dapat ganitong sistema'y ibagsak nang tuluyan

maging mapanuri habang nagtatanong ng bakit
habang ang pamamaraan ng mga malulupit
ay di natin tutularan, di dapat ginagamit
silang ang karapatan nati'y ipinagkakait

kung makikibaka tayo, makibakang may dangal
huwag tutularan ang gaya nilang mga hangal
sa paglaban pagpapakatao ang ipairal
lumaban bilang tao, di tulad nilang animal

dukha'y katuwang, makibaka ng may dignidad
sistema'y baguhin, isama lahat sa pag-unlad

Protesta laban sa paglibing sa diktador

gigil sa pagpoprotesta ang mga kabataan
laban sa lumalapastangan sa katotohanan
pagkat alam nila kung anong nasa kasaysayan
na pilit binubura ng nasa kapangyarihan

pati na nakikibaka para sa kalikasan
ay kasama nilang nagpoprotesta sa lansangan
noon, paglikha ng saplad ng Chico'y nilabanan
pati na plantang nukleyar ay sadyang inayawan

nalibing ang diktador na hilakbot ang nilalang
sa puso ng bayang karapata'y sinalanggapang
sa panahon niya'y kayraming nawala't napaslang
buhay ng mga iskolar ng bayan ay sinayang

bagong lipunan ay naging lipunang luhaan
pilit binabago ang pagsulat ng kasaysayan
tatakpan ito ng pabango't kasinungalingan
na balang araw ay aalingasaw ring tuluyan

- gregbituinjr.

Hukayin! Hukayin

HUKAYIN! HUKAYIN!

"Hukayin! Hukayin!" ang sigaw ng grupong BlockMarcos
nang sa Libingan ng mga Bayani'y idinaos
ang paglilibing sa diktador na mapambusabos
"Hukayin! Hukayin!" kahit na sila pa'y mapaos

animo'y kawatan ang nagpalibing sa kawatan
ninakaw na libing, inilihim sa taumbayan
"Hukayin! Hukayin!" sigaw ng bayan sa Libingan
"Di bayani ang diktador!" na nang-api sa bayan

tandaan natin ang mga pangalan: Liliosa
Lorena, Lisa, Boyet, Hermon, at laksang biktima
ng batas-militar ni Marcos na dulot ay dusa
sila ang tunay na bayani sa puso ng masa

di nararapat sa Libingan ng mga Bayani
ang diktador na nanalasa sa dilim ng gabi
"Hukayin! " tinig ng kabataa'y nakaririndi
"Hukayin!" sigaw ng masang sa diktadurya'y saksi

- gregbituinjr.

Gaya ni Gat Andres, at di ni Makoy, ang bayani

GAYA NI GAT ANDRES, AT DI NI MAKOY, ANG BAYANI

gaya ni Gat Andres, at di ni Makoy, ang bayani
katotohanang dapat pagnilayan ng mabuti
si Gat Andres yaong bayani para sa marami
di tulad ni Makoy na “pagkabayani’y” marumi

Gat Andres Bonifacio’y namuno sa Katipunan
nakibaka tungo sa pangarap na kalayaan
mula sa kuko ng dayuhan, pangil ng gahaman
upang kamtin ang inaasam na bagong lipunan

mabuhay ka, Gat Andres, sa iyong dakilang araw
bantayog mo sa mga bayan-bayan ay dinalaw
di gaya ng diktador na bayang ito'y pumusyaw
sa puslit na paglilibing, masa'y muling pinukaw

anang bayan, di bayani ang diktador, No Hero
anila, si Makoy ang diktador numero uno
may bangkay si Marcos, di makita ang sa Supremo
ngunit bayani'y si Gat Andres, ang unang pangulo

- gregbituinjr., 30 Nobyembre 2016

Pagpupugay kay Kumandante Fidel Castro

PAGPUPUGAY KAY KUMANDANTE FIDEL

Tunay kang inspirasyon sa pagbabago, Ka Fidel
Lalo’t nilabanan ang diktaduryang manunupil
Pinabagsak ang pamumuno ng Batistang sutil
Bagong sistema'y tinatag laban sa paniniil

Ipinagtagumpay nyo ang rebolusyong Cubano
Kasama si Doktor Che Guevara'y ipinanalo
Pasistang rehimeng Batista'y tuluyang tumakbo
At isinabansa nyo ang industriya't komersyo

Bakas ng rehimeng Batista'y tuluyang nilansag
Sadyang pagyakap sa sosyalismo'y ipinahayag
Sari-saring lathalaing sosyalista'y nilimbag
Sa embargo man ng Amerika'y naging matatag

Apatnapu't siyam na taong pinamahalaan
Ang sosyalistang Cuba ng buong puso't isipan
Nakaligtas sa samutsaring anyo ng pananambang
Matalinong di napaslang ng mga salanggapang

Kayraming dinulot ng tagumpay ng rebolusyon
Kahit inembargo'y hinarap ang anumang hamon
Sariling sikap ng bayan, pinaunlad ang nasyon
Lalo ang sistemang kalusugan at edukasyon

O, Ka Fidel, idolo ka’t mabuting halimbawa
Sosyalistang lider na humarap sa maraming sigwa
Tunay kang inspirasyon ng mga bansang dinukha
Ng imperyalismong sa daigdig ay nanagasa

Prinsipyo't halimbawa mo'y aral na sumisilay
Sa mga kilusang nakikibaka pa ring tunay
Isa kang dakilang lider-sosyalistang kayhusay
Kumandante Fidel, taas-kamaong pagpupugay!

- gregbituinjr.

* Comandante Fidel Castro (Agosto 13, 1926 - Nobyembre 25, 2016)

Ka Roger, Lider-Maralita

KA ROGER, LIDER-MARALITA

batikang lider-maralita
idolo ng maraming dukha
  taktisyan sa mga labanan
  kayraming napanalong laban
nilabanan ang demolisyon
dukha'y dala sa relokasyon
  patuloy siyang nakibaka
  alang-alang sa laksang masa
sa mga dukha'y tagapayo
laksang aral ay mahahango
  lider ng maralitang lungsod
  mahirap man, di napaluhod
ng sinupamang nasa poder
sinagupa sinumang pader
  ganyan si Ka Roger, magiting
  isang muog kung iisipin
prinsipyo'y di basta matibag
sa labana'y laging matatag
  limang dekadang nakibaka
  maralita'y laging kasama
lider, taktisyan, matalino
sosyalista at prinsipyado
  Ka Roger, sa iyong paghimlay
  taas-kamaong pagpupugay

- gregbituinjr.