Ako'y Putik sa Matabang Lupa ng Rebolusyon

AKO'Y PUTIK SA MATABANG LUPA NG REBOLUSYON
ni Gregorio V. Bituin Jr.
11 pantig bawat taludtod

ako ma'y isang hampaslupang putik
sa matabang lupa ng rebolusyon
hampaslupa akong naghihimagsik
laban sa sistemang dapat ibaon

sistemang dapat ilibing sa putik
sistemang sa atin ay lumalamon
ang pagbabago'y kaytagal nang hibik
ng masa't ito ang sa ati'y hamon

sa matabang lupa'y ating ihasik
yaong binhi ng ating rebolusyon
na mula sa diwang mapanghimagsik
upang magbago ang ating sitwasyon

ako ma'y putik sa matabang lupa
ng rebolusyong adhika ng tanan
putik akong pinatatag ng sigwa
ng maraming isyu ng sambayanan

Pag binigyan mo ng sigla ang iba

PAG BINIGYAN MO NG SIGLA ANG IBA
ni Gregorio V. Bituin Jr.
11 pantig bawat taludtod

pag binigyan mo ng sigla ang iba
sarili mo ang binibigyang sigla
kaya ang mang-aawit pag kumanta
ramdam ng masa ang tonong may luha
kaya ang makata pag bumigkas na
ramdam ng masa ang kanyang tinula
kaya bigyang sigla natin ang iba
upang tayo rin ay maging masigla

Ang Buhay ay Litrato

ANG BUHAY AY LITRATO
ni Gregorio V. Bituin Jr.
11 pantig bawat taludtod

Life is like posing for pictures, we pose the way we want to be seen by others, but stolen shots are better. They capture who we really are.

okey, wan-tu-tri, ismayl en sey chiz, klik

ang buhay ay tulad din ng litrato
pinupustura natin kung paano
nais natin na makilala tayo
ng ating kapwa at ng ibang tao

okey, wan-tu-tri, ismayl en sey chiz, klik

tulad ng litrato ang buhay natin
mag-aayos sa harap ng salamin
bago tumahak doon sa landasin
nang di mapahiya ang pusong angkin

klik, klik, klik, wala nang paalam, klik, klik

ngunit mas mabuti ang stolen shot
nakaw man ang pag-klik, ang kuha'y sapat
dito'y tiyak makikita kang tapat
kung ano ka ba talaga sa lahat

ito'y mga nakaw na kuha, klik, klik

bawat litrato ay katotohanan
sino nga ba tayo'y masisilayan
kung may itatago'y agad iwasan
pagkat klik ng litrato'y katunayan

Katha ng haraya

KATHA NG HARAYA
ni Gregorio V. Bituin Jr.
10 pantig bawat taludtod

naglalambing pa rin ang haraya
hanap ang magagandang kataga
na punung-puno ng talinghaga
nang malikha ang mga salita
ngunit kadalasan ang may-akda
naroong nakapangalumbaba
habang ang salita'y hinihiwa
kaya nagdurugo yaong katha
habang nangangasim pati dila
ayaw ng makatang mabutata
kaya sa wika'y nakikidigma
nang malikha'y tula ng paglaya

* haraya - salitang Tagalog sa "imahinasyon"

Sa Pagdaing

SA PAGDAING
ni Gregorio V. Bituin Jr.
13 pantig bawat taludtod

pag tayo'y dumaing, ayaw ng may balakid
tulong sa atin ay nais agad mahatid

ngunit pag dinaingan, kamay nati'y pinid
ayaw bigyan ang kapwa't laging nauumid

ang ganito ba'y salamin ng pagkaganid?
at sa pagkatao'y nagsisilbing salabid?

ang katotohanang ito'y di na nga lingid
sa ating kababayan at mga kapatid

Dila'y Gamiting Tama

DILA'Y GAMITING TAMA
ni Gregorio V. Bituin Jr.
8 pantig bawat taludtod

ang paa na ang madulas
ang dila lamang ang huwag
pagkat ang dila'y matalas
sa atin nga'y nanunuwag

dila'y tagos hanggang buto
di tulad ng ating paa
kahit madulas man tayo
tayo'y tiyak tindig pa

ang dila ang winawasak
ay ang ating pagkatao
tayo'y kanilang hinamak
at agarang nilulumpo

dila'y gamitin mong tama
upang tayo'y di isumpa

Makakasilat Din Tayo

MAKAKASILAT DIN TAYO
ni Gregorio V. Bituin Jr.
9 pantig bawat taludtod

ang pagkatalo ay palagi
at ang panalo ay sakali
tumaya ka na kaysa hindi
at baka makamit ang mithi

pagkarami man nating talo
ay makakasilat din tayo
malay mo, manalo sa lotto
o ang ibinoto'y panalo

ganito sa buhay na iwi
laging pagbabaka-sakali
sa pagsuko ikaw'y humindi
at balang araw magwawagi

kung ngayon ikaw ay tuliro
dapat loob mo pa ri'y buo
walang puwang ang pagkadungo
kaya di ka dapat sumuko

Salita'y Panunumpa

SALITA'Y PANUNUMPA
ni Gregorio V. Bituin Jr.
11 pantig bawat taludtod

(batay sa Kartilya ng Katipunan nina Jacinto't Bonifacio)

akibat ng salita'y pagkatao
dapat mong tuparin pag sinabi mo

panindigan natin ang sinalita
pagkat bawat salita'y panunumpa

pagkain ay di baleng malimutan
kaysa masira sa pinag-usapan

huwag lang kalimutan ang pangako
upang yaong tiwala'y di maglaho

huwag tutularan ang pulitiko
na laging nangangako't nanloloko

di bale nang kumakalam ang tiyan
huwag lamang masira sa usapan

salita’y sumpa sa taong may hiya
singhalaga ng dangal ang salita

kaya tupdin ang anumang usapan
pagkat nakataya ay karangalan

Huwag Tumulad sa Asong Bahag ang Buntot

HUWAG TUMULAD SA ASONG BAHAG ANG BUNTOT
ni Gregorio V. Bituin Jr.
13 pantig bawat taludtod

hindi tayo uto-uto, may isip tayo
ngunit ang marami'y sumasamba sa trapo
tagapagligtas ba ang mga pulitiko
kaya marami'y bahag ang buntot sa amo

lumaban tayo pag tayo na'y hinahamak
at pagkaapi'y huwag daanin sa iyak
pagkatao'y di dapat malublob sa lusak
at kung kinakailangan tayo'y rumesbak

di tayo tulad ng asong bahag ang buntot
na sa mga pulitiko'y susunod-sunod
tayo'y mga taong marangal at di takot
at sa mga buktot ay di dapat maglingkod

hindi tayo uto-uto, may isip tayo
ipaglaban natin ang ating pagkatao

E, ano, kung ako ay pula

E, ANO, KUNG AKO AY PULA
ni Gregorio V. Bituin Jr,
9 pantig bawat taludtod

e, ano, kung ako ay pula
ito'y karapatan ko naman
kaysa tulad nilang malansa
ang kamay sa katiwalian

e, ano, kung ako ay pula
at aktibistang lumalaban
kaysa naman maging pasista
na puso'y pawang katakawan

e, ano, kung ako ay pula
di tumulad sa iba riyan
na prinsipyo'y ibinebenta
imbis na ito'y ipaglaban

e, ano, kung pulahan ako
nais ko lang ay pagbabago
ng sistemang binulok ninyo
at ginagahasang totoo

dahil ba pula ako'y dapat
na lang nilang pagmalupitan
gayong utak nila'y kaykunat
na nasa isip sarili lang

dahil ba pula ako'y dapat
nang durugin ang karapatan
at katawan ko pa'y maratrat
ng kanilang baril na tangan

ako'y pula at pula ako
kaya dapat lang irespeto
tao rin ako tulad ninyo
na tangan lagi ang prinsipyo

ako'y pula at pula ako
lalabang tunay hanggang dulo
kahit kapalit pa'y buhay ko
para sa masa't pagbabago

Ilang Kataga sa Namumuno

ILANG KATAGA SA NAMUMUNO
ni Gregorio V. Bituin Jr.
8 pantig bawat taludtod

kung yaong amo'y masungit
ganuon din yaong kabig
kung batas nila'y mahigpit
dahil mahigpit ang salig
kung anong kulay ng langit
siya ring kulay ng tubig

kung ano ang nasa taas
siya ring nasa ibaba
kung yaong pinuno'y ungas
ang mga tao'y kawawa
ngunit kung pinuno'y pantas
kaygandang bukas ng madla

Ang Talunan

ANG TALUNAN
ni Gregorio V. Bituin Jr.
8 pantig bawat taludtod

"Being defeated is often a temporary condition. Giving up is what makes it permanent." (Marilyn vos Savant)

kung matalo ka mang minsan
ito'y temporaryo lamang
kung pagganti'y nais naman
ikaw pa'y may babalikan

kung nagpasya kang ayawan
tiyak wala ka nang laban
tinanggap mo nang tuluyan
na ikaw nga ay talunan

Gamit Huwag Iwanan Kung Saan

GAMIT HUWAG IWANAN KUNG SAAN
ni Gregorio V. Bituin Jr.
11 pantig bawat taludtod

huwag mong iwanan kung saan-saan
ang gamit mo'y dapat lang pag-ingatan
lalo na kung ikaw'y nasa simbahan
taimtim ang dasal sa'yong isipan
pagkat kayrami umanong kawatan
na namumugad sa lugar na iyan

pagkat alam nilang kayraming tao
nagsisipagsimba lalo na't Linggo

nagdarasal din ang mga kawatan
tugon sa problema'y inaasahan
nararapat lamang iyong tandaan
na kapag gamit mo'y iyong iniwan
aakalaing nilang kasagutan
yaon sa tindi nilang kahirapan

sa paligid mo'y huwag nagtiwala
pag nawalan ka'y ikaw ang maysala

Isang Payo Lamang

ISANG PAYO LAMANG
ni Gregorio V. Bituin Jr.
11 pantig bawat taludtod

bakit nga ba nagdidilim ang isip
habang ikaw ay nakahalukipkip
bakit ba ang dibdib mo'y nagsisikip
dahil ba may problemang di malirip

bakit ba ikaw'y tila nanginginig
at sa problema'y tila walang sandig
bakit nga ba kaylupit ng daigdig
at tayo'y tila nito nilulupig

kaibigan, ito'y isang payo lamang
bawat suliranin may kasagutan
suriin mo ang iyong kalagayan
at pag-aralan mo rin ang lipunan

pagkat naririyan lamang ang tugon
sa problemang sa iyo'y lumalamon

Patuloy na Makibaka

PATULOY NA MAKIBAKA

ni greg bituin jr.

9 pantig bawat taludtod

patuloy tayong makibaka

upang mapalaya ang masa

mula sa mapagsamantala

at kabulukan ng sistema

Ang Nais Kong Lider

ANG NAIS KONG LIDER

ni Gregorio V. Bituin Jr.

15 pantig bawat taludtod

ang nais kong lider ay di yaong umaastang boss

na ang turing sa mga tauhan niya'y alipin

ang nais kong lider ay di yaong nambubusabos

na ang turing sa alagad ay walang diwang angkin

ang nais kong lider ay di pabalang kung mag-utos

kundi may malasakit sa bawat isa sa atin

ang nais kong lider ay 'yung sa ideya'y di kapos

at ang kanyang mamamayan ay di pagtitiisin

ang nais kong lider ay may programang nilulubos

at ang plataporma't plano niya'y di nabibitin

ang nais kong lider ay yaong pinunong di bastos

at ang bata't babae'y kanilang rerespetuhin

ang nais kong lider, sa bawat plano'y may panustos

para sa mga kailangan, gamit at pagkain

ang nais kong lider ay yaong marunong kumalos

sa pagmamalabis ng mga tauhang mahangin

ang nais kong lider ay matino't di pumapaltos

at nagagampanang husay yaong kanyang tungkulin

ang nais kong lider ay matatag, di ninenerbyos

sa harap ng panganib, kapwa niya'y sasagipin

ang nais kong lider, kung magsalita ay malamyos

alam niyang bawat tao'y kanyang dapat galangin

ang nais kong lider, mapanuri ng mga datos

bawat sitwasyon ay matamang pinag-aralan din

ang nais kong lider, sa pasya'y di padalus-dalos

kapakanan ng pinamumunua'y pangunahin

ang nais kong lider, kayang humarap sa batikos

nalulusutan ang akusasyon, di madiin-diin

ang nais kong lider, mahihina'y di pinapatos

may paninindigan, anumang sa kanya'y sabihin

ang nais kong lider, sa trabaho'y laging makilos

kasama sa laban, di nakatunganga sa hardin

ang nais kong lider ay maalam ding manghambalos

kaya tao niya'y marunong sumunod sa bilin

ang nais kong lider ay matapang makipagtuos

at para sa hustisya, sinuman ay babanggain

ang nais kong lider ay di mukhang naghihikahos

mga alagad niya'y di pawang sundalong kanin

ang nais kong lider ay di gusgusin kung mag-ayos

mahusay manamit, di man humarap sa salamin

ang nais kong lider, sa pinag-aralan di kapos

sinusuring mataman ang anumang suliranin

ang nais kong lider, problema'y agad tinatapos

di umaatras, anumang problemang kaharapin

ang nais kong lider, di nag-aastang manunubos

na bawat problema ng tao'y kanyang aakuin

ang nais kong lider, sinasamba kong parang diyos

at kanang kamay nya akong mahusay sa gawain

Nasa Kaysa Kaharian

NASA KAYSA KAHARIAN
ni Gregorio V. Bituin Jr.
10 pantig bawat taludtod

"My kingdom for an ounce of willpower."
- mula sa facebook ni kaibigang Dianne

ang pinaksa mo'y sadyang kayrikit
kaya tula'y ginawa kong pilit
kaharian mo'y ipagpapalit
sa hangarin mo kahit maliit

sadyang ganito'y kahanga-hanga
hangad mo sana'y matamong pala
at pag natamo'y di ka lumuha
bagkus sana'y ikaw ay matuwa

Iboto ang nais ng budhi

IBOTO ANG NAIS NG BUDHI
ni Gregorio V. Bituin Jr.
13 pantig bawat taludtod

nalalapit na itong pambansang halalan
ngunit tayo ba'y sadyang may pagpipilian
mga kumakandidato'y pawang mayaman
na nangangakong muli ng kaginhawaan

ihahalal ba natin yaong mga trapo
o baka naman sayang lang ang ating boto
lalo't kurakot ang maupo sa gobyerno
pagkat walang mapiling matino ang tao

mas mainam ihalal ang bulong ng budhi
bakasakaling umayos ang bayang iwi
kaysa iboto'y sikat ngunit walang budhi
paano pa tayo nila makakandili

iboto ang nais ng budhi, di ang sikat
nang sa gayon naman ay di tayo masilat

Nanunuyo

NANUNUYO
ni Gregorio V. Bituin Jr.
7 pantig bawat taludtod (tanaga)

Ang taong nanunuyo
Dala-dala'y bukayo
Upang saguting buo
Ng sintang sinusuyo

Bakit Mahapdi ang Halik ng Umaga

BAKIT MAHAPDI ANG HALIK NG UMAGA
ni Gregorio V. Bituin Jr.
14 pantig bawat taludtod

bakit nga ba mahapdi ang halik ng umaga
ng araw na iyong ang pakiramdam ko'y dusa
dahil ba ang Haring Araw ay nagtatampo na
o dahil sa problema tayo'y natataranta

o, kayhapdi ng halik ng umaga sa pisngi
kaya hanggang ngayon nga tayo'y di mapakali
marahil dahil wala pa ang sinta sa tabi
nasa malayo pa't marahil ay atubili

kailan ba tatamis ang halik ng umaga
na siyang magpapawi sa anumang pangamba
kailan ba daratal ang tunay na ligaya
tuwing umaga ba'y may bago tayong pag-asa

kung mahapdi ang halik ng umaga paggising
isiping si Haring Araw lang ay naglalambing

Kakaibang Barungbarong

KAKAIBANG BARUNG-BARONG
ni Gregorio V. Bituin Jr.
na pagmumuni sa larawan sa itaas
11 pantig bawat taludtod

barungbarong ay pugad ng pag-ibig
ng dalawang pusong nagkakaniig
upang hibik ng puso'y isatinig
at di pawang daing ang maririnig

silang minsan sa gutom nanginginig
habang sa barung-barong ay kaylamig
ngunit sa hirap di sila padaig
sa barungbarong pa rin nila ibig

Trapong Bosing

TRAPONG BOSING
ni Gregorio V. Bituin Jr.
10 pantig bawat taludtod

kung umasta iyang trapo'y bosing
akala mo'y kung sinong magaling
gayong kayrami nilang balimbing
puso nila'y talagang marusing

trapong bosing ay sadyang kayhangin
tingin sa kapwa'y sundalong kanin
trato sa dukha'y pawang alipin
na laging aamot ng pagkain

kung iyang hustisya'y nakapiring
sa kasalanan ng trapong bosing
ang tangi ko lamang mahihiling
tulad nila'y dapat lang ilibing

Wala Sanang Bumoto sa Trapo

WALA SANANG BUMOTO SA TRAPO
ni Gregorio V. Bituin Jr.
isang pagmumuni sa larawan sa itaas
10 pantig bawat taludtod

wala sanang bumoto sa trapo
anang bata doon sa litrato
naisip yata ng batang ito
na mga trapo'y sakit sa ulo

mga trapo kasi'y nangangako
ng kadalasan nilang ipako
sa kampanyahan ay kaytitino
ngunit pag nanalo'y naglalaho

naglalaho sa harap ng madla
gayong nangako sa maralita
"di na kayo magiging dukha
pag nanalo'y di kayo luluha!"

tama ang bata sa kanyang hibik
huwag iboto ang trapong lintik
dahil hirap lang ang ihahasik
trapo'y dapat lamang mapatalsik

Trapo'y Perwisyo at Di Serbisyo

TRAPO'Y PERWISYO, AT DI SERBISYO
ni Gregorio V. Bituin Jr.
11 pantig bawat taludtod

bakit ayaw namin sa mga trapo
lalo na't ito'y trapong kandidato
silang imbis sa bayan magserbisyo
ginagawa nila'y sadyang perwisyo

sila'y pulos na lang katiwalian
pag nakuha na nila ang upuan
sa kanila'y uso ang kurakutan
at binababoy ating karapatan

sa mga trapo ba'y may mapapala
gayong ang ugali nila'y kuhila
mga sakim sa tubo't palamara
na dulot sa bayan ay dusa't luha

kaya bakit trapo ang iboboto
at iluluklok sila sa gobyerno
bakit ihahalal silang perwisyo
wala na nga bang iba kundi trapo

ang mga trapo'y dapat lang sumbatan
pagkat di nagseserbisyo sa bayan
sa trapo'y negosyo ang katungkulan
na dapat lang nilang pagkakitaan

Sa Mga Kandidatong Bulag

SA MGA KANDIDATONG BULAG
ni Gregorio V. Bituin Jr.
15 pantig bawat taludtod

Ginagamit na naman nyo kaming mga dukha
sa inyong kampanya upang kayo lang ay mahalal
Gayong di nyo pansin itong buhay ng maralita
gamit pala namin sa inyo'y boto, mga hangal

Sa aming mga dukha'y lagi kayong nangangako
nangangako ng kung anu-ano, maboto lamang
Ngunit pag nakapwesto na, pangako'y pinapako
pinapako sa dingding ng kawalang katarungan!

Kayong kandidato'y dilat nga ngunit sadyang bulag
nasa harapan na ang problema'y di pa makita
Kayong pag nakapwesto'y unang-unang lumalabag
ang mismong batas imbes na paglingkuran ang masa

Ang dapat sa tulad nyo'y pagsisipain sa mukha
dilat nga kayo ngunit kandidato palang bulag
Dukha'y hirap na nga ngunit kayo'y walang magawa
kaharap na ang problema'y di kayo mabagabag

Milyong Gastos sa Libong Sahod

MILYONG GASTOS SA LIBONG SAHOD
ni Gregorio V. Bituin Jr.
11 pantig bawat taludtod

kayrami nilang ang gusto'y tumakbo
upang makapagsilbi sa gobyerno
kahit kakarampot ang sahod dito
basta't sila raw ay magseserbisyo

marami ang nais kumandidato
at gagastos ng milyon-milyong piso
sa tatanggaping sweldong libo-libo
pag napwesto na'y babawiin ito

kaya ang pagtakbo'y parang negosyo
malaking puhunan para maboto
malaking lugi pag siya'y natalo
malaking saya pag siya'y nanalo

malaking gastos sa pagkandidato
malaking kakabigin pag napwesto
kaya nga negosyo itong pagtakbo
babawi muna imbes magserbisyo

Temptasyon

TEMPTASYON
ni Gregorio V. Bituin Jr.
13 pantig sa bawat taludtod

may dyablo sa loob kong nais kang mayakap
magkakasala ba ako, dilag kong hanap
isa itong temptasyong dapat hinaharap
pag-ibig kitang lagi kong nasa hinagap

habang gumagala ang anino sa loob
pagnanasa sa iyo'y tila ba kayrubdob
tila dyablo sa akin ay nakakubakob
parang ako'y mandirigmang nais lumusob

ngunit nirerespeto kita, aking pag-ibig
kahit nais kong hagkan ka sa pisngi't bibig
ay di ko ginawa baka ako'y mausig
kaya dyablo sa loob, pilit kong dinaig

mahal ko, ayokong sa iyo'y magkasala
at akong umiibig ay handang masala
mahal, ayokong ikaw sa aki'y mawala
sa puso nga't buhay ko'y tangi kang diwata

Nang dahil sa lansones

NANG DAHIL SA LANSONES

ni Gregorio V. Bituin Jr.

14 pantig bawat taludtod

sabik akong binili'y isang kilong lansones

upang aking ihandog sa sinisintang labis

araw ng mga puso'y lansones na matamis

ngunit bakit ganoon, naramdaman ko'y hapis

ibinigay ko iyon sa isang binibini

na itinuturing ko'y musa ko't lakambini

anang dilag, huwag na akong bili ng bili

sa lansones nga siya'y tila nag-atubili

masama ang loob ko't labis akong nagdamdam

pagtanggi sa lansones ako'y tila naparam

ginawa niyang yao'y isang pagpaparamdam

sa puso ko'y pagtanggi't isang pagpapaalam

kinagabihang iyon, ako'y agad naglasing

tinungga ko'y kayrami, para akong napraning

niluha ang sinapit kong sadyang takipsilim

nilunod ko sa alak ang bawat kong panimdim

ilang araw-gabi ring sa sarili'y nawala

nilalakong lansones ng mga maralita

na alam kong kaytamis, sa wari ko'y mapakla

tila ito dinilig ng mapait kong luha

nang dahil sa lansones, ang puso ko'y nagdugo

tila ang pinadama'y sangkaterbang siphayo

ngunit danas kong yaon, kahit ako'y nabigo

na magmamahal pa rin itong iwi kong puso

Sa isang kilong lansones binigo

SA ISANG KILONG LANSONES BINIGO

ni Gregorio V. Bituin Jr.

7 pantig bawat taludtod

sa lansones nagdugo

ang pag-ibig kong buo

sa sinta ako'y bigo

di ito isang biro

lansones ba'y mapakla

hindi, masarap pa nga

sadya kang matutuwa

pag natikman mong kusa

siya pa ang nagalit

sa lansones kong bitbit

sabi niyang may ngitngit

huwag akong uulit

ang bigay kong lansones

sa inibig kong labis

ay sakdal pagkatamis

ngunit ako'y naamis

akala ko'y gaganda

ang araw ko sa saya

dilag yata'y sawa na

sa handog ko sa kanya

di ito isang biro

sa lansones nagdugo

itong aking pagsuyo

ulo ko'y naging bungo

Ang makata sa kanyang barungbarong

ANG MAKATA SA KANYANG BARUNGBARONG
ni Gregorio V. Bituin Jr.
13 pantig bawat taludtod

akala nila'y wala akong ginagawa
pagkat nakikita nilang ako'y tulala
may pluma't papel, tila dinaanang sigwa
kanina lang, may tatlo akong likhang tula
kasama sa trabaho yaong pagtunganga
doon sa kawalan laging nakatingala
at pinaglalaruan ang mga salita
upang mga ito'y maging ganap na diwa

minsan, kinukwento'y pawang mga pasakit
inilalarawan ang lipunang kaylupit
itinutula ang kapalarang sinapit
iniuulat ang patakarang mahigpit
ipinahahayag ang saya, gulo't alit
tinutugunan ang mga tanong na bakit
taludtod at saknong ay may tamis at pait
may pangungusap na malamya, may makulit

nasa kawalan, para bang lulugo-lugo
animo'y kaylungkot, mundo'y tila kaygulo
mamaya'y ngingiti, diwa'y lulukso-lukso
parang nakakita ng diyosa't payaso
nagkakape'y biglang magtataas-kamao
at pagkatapos biglang kakamot sa ulo
hinahanap na piyesa'y di pa makuro
makasubo muna't baka gutom lang ito