Dila'y Gamiting Tama

DILA'Y GAMITING TAMA
ni Gregorio V. Bituin Jr.
8 pantig bawat taludtod

ang paa na ang madulas
ang dila lamang ang huwag
pagkat ang dila'y matalas
sa atin nga'y nanunuwag

dila'y tagos hanggang buto
di tulad ng ating paa
kahit madulas man tayo
tayo'y tiyak tindig pa

ang dila ang winawasak
ay ang ating pagkatao
tayo'y kanilang hinamak
at agarang nilulumpo

dila'y gamitin mong tama
upang tayo'y di isumpa