Temptasyon

TEMPTASYON
ni Gregorio V. Bituin Jr.
13 pantig sa bawat taludtod

may dyablo sa loob kong nais kang mayakap
magkakasala ba ako, dilag kong hanap
isa itong temptasyong dapat hinaharap
pag-ibig kitang lagi kong nasa hinagap

habang gumagala ang anino sa loob
pagnanasa sa iyo'y tila ba kayrubdob
tila dyablo sa akin ay nakakubakob
parang ako'y mandirigmang nais lumusob

ngunit nirerespeto kita, aking pag-ibig
kahit nais kong hagkan ka sa pisngi't bibig
ay di ko ginawa baka ako'y mausig
kaya dyablo sa loob, pilit kong dinaig

mahal ko, ayokong sa iyo'y magkasala
at akong umiibig ay handang masala
mahal, ayokong ikaw sa aki'y mawala
sa puso nga't buhay ko'y tangi kang diwata