LUHÀ
ang kinakain ko'y / mapait na luhà
sapagkat ang sinta'y / kay-agang nawalâ
ang tinatagay ko'y / luhang timbâ-timbâ
na buhay kong ito'y / tila isinumpâ
pasasaan kayâ / ako patutungò
kung yaring sarili'y / tila di mahangò
hinahayaan lang / na ako'y igupò
ng palad at buhay / na di ko mabuô
tanging sa pagkathâ / na lang binubuhos
ang buong panahon / ng makatang kapos
bagamat patuloy / pa rin sa pagkilos
kasama ng masa't / obrerong hikahos
napakatahimik / pa rin nitong gabi
kahit may nakuro / ay walang masabi
nakatitig pa rin / ako sa kisame
habang sa hinagpis / pa rin ay sakbibi
- gregoriovbituinjr.
01.05.2026
Walang komento:
Mag-post ng isang Komento