NAWALA NA ANG BOOK SALE SA MC SQUARE
sa Malabon City Square, ang Book Sale na'y nawala
nagsara na ang kaytagal kong pinuntahang sadya
dahil sa mga aklat doong sadyang pambihira
nalugi na ba? paano ang mga manggagawa?
matapos manggaling sa S.M.-ZOTO sa Tomana
dalawang kilometrong lakad ay sisimulan na
di muna uuwi, sa Book Sale ay tatambay muna
at baka may mabiling librong kursunada't mura
subalit nagsara na ang Book Sale na naroroon
na para bang may dambuhalang sa kanya'y lumamon
at mga aklat ay nginata at sadyang nilulon
nakahihinayang ang doo'y danas na kahapon
gayunman, may iba pang Book Sale na sangay ng aklat
sa Cubao ay may dalawang madadalaw kong sukat
O, Book Sale, sa iyo'y taospusong pasasalamat
nagsara man doon, sa iyo'y may nabiling aklat
- gregoriovbituinjr.
03.22.2024
Walang komento:
Mag-post ng isang Komento