WALANG MAISULAT
wala pa akong maisulat
habang dito'y nakamulagat
tila utak ay inaalat
gayong malayo pa sa dagat
ah, wala pang paksang malambat
paksa sa ulo'y kalat-kalat
di ba ito nakabibinat
kung ikaw ay galing sa lagnat
bolpen lamang ay nakabakat
sa kwadernong aking nabuklat
buti pa kaya'y magbulatlat
ng nariritong dyaryo't aklat
mesang kahoy na'y nagkalamat
wala pang makathang alamat
ng kalumpit, duryan at duhat
bakit dugo'y di pa maampat
budhi ba'y may isinusumbat
sa pusong tila sumusugat
sana, mamaya'y makasulat
upang di na nakamulagat
- gregoriovbituinjr.
05.06.2023
Walang komento:
Mag-post ng isang Komento