CONGRATS, GOLDEN CAÑEDO, KAMPYON SA PAG-AWIT
akala ko noong una'y si Sarah Geronimo
ako nga'y mali, siya pala'y si Golden Cañedo
kampyon ng The Clash Season 1, ako'y sumasaludo
kampyon sa kantahan, kaygandang tinig at idolo
napanood ko sa telebisyon, Sarah talaga
ang tinig niya'y nanghahatak, animo'y mahika
deja vu, tulad niya'y kampyon din noon si Sarah
na siya ngang tuntungan sa larangan ng musika
pambato ng Cebu, talagang golden voice si Golden
animnapu't dalawa'y naglaban, siya'y nagningning
nanguna, nagkampyon, tinig niya ang tumaginting
napabalikwas ako sa boses niyang kaygaling
sa iyo, Golden, ang tinig mo'y tunay na marikit
nagbunga ang lahat ng iyong pagpapakasakit
nawa'y magtagumpay ka pa sa mundo ng pag-awit
at kagandahang asal pa rin ay iyong mabitbit
- gregoriovbituinjr.
* kuha ng makatang gala sa replay ng The Clash, na paligsahan sa pag-awit ng GMA 7
Walang komento:
Mag-post ng isang Komento