TAKOT AKONG MAWALA KA, SINTA
ni Gregorio V. Bituin Jr.
15 pantig bawat taludtod
bakit kayhirap mong mawala sa aking paningin
gayong sinta ko'y hindi ka pa naman naging akin
inalay man sa paanan mo ang mga bituin
subalit di mo pa rin akong magawang sagutin
walang forever, ikamo, walang magpakaylanman
marami pang babaeng higit pa sa iyo riyan
ngunit ikaw ang diyosa ng pusong kainaman
na pag nakita'y lulukso-lukso sa kasiyahan
kaya di ko madalumat pag ikaw na'y nawalay
tila daigdig ko'y pinalibutan na ng lumbay
malakas man ang katawan ko'y tila nakaratay
sa banig ng karamdamang iwing puso'y may latay
takot akong tuluyan kang mawala, aking sinta
ikaw ang aking paraisong laging nadarama
mananatili ka lang bang pangarap ko tuwina
o nadarama ko'y papalitan mo ng ligaya
Walang komento:
Mag-post ng isang Komento