PITONG TANAGÀ KAY KASAMANG WOWIE
1
di ka malilimutan
sa ngiting panambitan
adhikang katarungan
nawa'y iyong makamtan
2
pagtangan ng bandila
para sa manggagawa
ay sadya mong ginawa
o, kaygandang adhika!
3
sa anumang labanan
iyong pinaglingkuran
ng buong katapatan
ang obrero't kilusan
4
hinanap ka sa SONA
ng maraming kasama
subalit wala ka na
o, dakilang kasama!
5
anak ka ng Bukluran
sa bawat nitong hakbang
nagsilbi ka sa bayan
obrero'y sinamahan
6
ikaw'y aming kauri
at kaysaya mo lagi
ang matamis mong ngiti
saya ngayong kayhapdi
7
hustisyang hinahanap
ay dapat mahagilap
nawa'y kamtin mong ganap
ang hustisyang pangarap
* tanagà - katutubong tulang may tugmaan na binubuo ng isang saknong na may apat na taludtod at pitong pantig bawat taludtod
Walang komento:
Mag-post ng isang Komento