ni Gregorio V. Bituin Jr.
10 pantig bawat taludtod
"Horror factory. Ito ang naging reaksyon ng isang mambabatas ng Valenzuela City sa sunog na naganap sa Kentex Manufacturing Corporation, isang pabrika ng rubber at plastic-made footwear sa nasabing siyudad kung saan 72 na factory workers na ang kinumpirmang nasawi." ~ pahayagang Abante Tonite, Mayo 15, 2015
ayon sa iba't ibang balita
yaong agad namatay sa sunog
na sa pabrika nila'y pumupog
apoy ay di agad naapula
maraming pamilya'y nangaluha
nasunog yaong kanilang irog
pati pangarap nilang kaytayog
ang buong bayan ay natulala
di makilala, bangkay at mukha
yaon sa puso'y nakadudurog
tunay ba ito o bungangtulog
sana'y isang panaginip lamang
subalit ito'y katotohanan
ano nga bang nararapat gawin
sinong dapat nating panagutin
halos kontraktwal ang karamihan
kaybabang sahod na di mainam
ngunit kinailangang tiisin
nang pamilya nila'y makakain
sa sunog, sinong may kasalanan
ang hustisya kaya'y makakamtan
nangyari sa kanila'y rimarim
hustisyang asam kaya'y diringgin
Walang komento:
Mag-post ng isang Komento