SANDALING PAGKAWALAY
ni Gregorio V. Bituin Jr.
13 pantig bawat taludtod
sandali lang tayong nagkawalay, mahal ko
pagkat may kanya-kanyang pinuntahan tayo
sa paglalakbay mo'y ingat ka, aking mahal
habang ako'y sa ibang dako pa daratal
aking hihintayin ang iyong pagbabalik
sa ngiti mo't presensya'y lagi akong sabik
at patuloy ako sa malayong lakbayin
kukunin ang alay ko sa iyong bituin
isang talang sa iyo'y aking ikukwintas
ikaw na sa aking sugatang puso'y lunas
mahal ko, ikaw lamang hanggang kamatayan
sabay nating itayo ang bagong lipunan
Walang komento:
Mag-post ng isang Komento