ni Gregorio V. Bituin Jr.
15 pantig bawat taludtod
kasingrupok ng kastilyong buhangin ang pag-ibig
kung ito'y pagkahumaling lang at hindi pa hinog
madaling guguho sa hampas ng ragasang tubig
pagkat bubot pa ang pag-ibig niyang inihandog
ang pag-ibig ay di panibugho ng isang maton
na sa sinag ng araw ay maningning palang bubog
ang pag-ibig ay di matatangay ng laksang alon
na pag tumimo sa puso'y di basta malalasog
pag-ibig ay di dapat isang kastilyong buhangin
kundi muog na di basta na lang mapalulubog
pagkat pag-ibig ay rosas sa mayabong na hardin
gaano man katinik ay pinagpalang kaytayog
Walang komento:
Mag-post ng isang Komento