ni Gregorio V. Bituin Jr.
15 pantig bawat taludtod
ikaw ang tangi kong musa nitong mga pangarap
na inaalayan ng mabubunying pangungusap
ang bawat talata'y pinag-iisipan nang ganap
ang mga saknong sa tula'y bunga ng pagsisikap
ako yaong mga katagang sa iyo'y yayakap.
ikaw ang diwata sa gubat ng aking panimdim
nadarama mo ba ang pighati niring damdamin
tila ba pag wala ka ako'y laging nasa dilim
pinuputakti ng kung ano yaong salamisim
O, diwata, kailan kita muling maaangkin?
lagi kitang kayapos sa pangarap at lansangan
kita'y malimit magkita sa bawat panagimpan
magkalapit nga tayo ngunit magkalayo naman
dahil ba ako'y kataga lamang? ngunit tandaan:
ako'y kakatha pa rin maging doon sa libingan.
Walang komento:
Mag-post ng isang Komento