Ang mga prinsesang api

ANG MGA PRINSESANG API
ni Gregorio V. Bituin Jr.
12 pantig bawat taludtod

laging sinasagip ng isang prinsipe
ang kanyang prinsesang laging inaapi
sa kamay ng bruhang laging nanggugulpi
prinsesa'y kayganda, bruha'y pangit kasi

siya'y nakakulong sa may toreng garing
tulad ng kudyaping nalagot ang bagting
asam ng prinsesang tulong ay dumating
mailigtas siya ng kanyang Prince Charming

sa ganyan uminog ang maraming kwento
nang kabataan ko, at ngayon pa'y uso
tila di mamatay ang kwentong ganito
na pawang may aral sa bata sa mundo

sa kwento nga'y api ang mga prinsesa
sa modernong mundo, sila'y astang reyna
di sila maapi, lagi pang may gwardya
anumang iutos ay susundin sila

hanggang kwento lamang ang sila'y apihin
na ang hanap lagi'y kanilang Prince Charming
ngunit ang totoo, reyna kung ituring
di ba't sila'y bruha sa modernong tingin

o, prinsesang api sa kwentong pambayan
kaiba ang iyong uring pinanggalingan
sa totoong buhay, ikaw'y manlilinlang
ang masa'y luluhod sa iyong harapan