BABAE ANG MAPAGPASYA
ni Gregorio V. Bituin Jr.14 pantig bawat taludtod
babae ang mapagpasya sa katawan niya
kung nais makialam, magpaalam ka muna
huwag siyang pwersahin, baka makasuhan ka
habambuhay, kundi bitay, ang iyong sentensya
pag napatunayang ikaw nga'y nanamantala
kung nais ang babae, siya muna'y suyuin
maningalang pugad ka't siya'y pakaibigin
pagkat di kusang ibibigay ang puring angkin
ito'y laan lang sa kanyang pakamamahalin
pagkat yaman itong ang kapara'y toreng garing
katas man nila'y sariwa't pawis ay kaybango
mahirap makialam sa kanilang pribado
baka kaladkarin ka riyang kapara'y aso
kung di ka mapatay, tiyak ikaw'y kalaboso
kaya pasya ng babae'y ating irespeto
Walang komento:
Mag-post ng isang Komento