KUNG PAANO AKO DAPAT MAMATAY
ni Gregorio V. Bituin Jr.
11 pantig bawat taludtod
walang sinumang makapagsasabi
kung paano ba tayo mamamatay
kung mamamatay ba akong may silbi
o bubulagta lang ng walang malay
tutumba ba ako sa isang punglo
o tatadtarin ang aking katawan
tutumba ba dahil pinagkanulo
ng sinumang tarantado't gahaman
mamamatay ba akong busog, bundat
o mamamatay na mata ko'y dilat
mamamatay ba ako habang bata
o mamamatay na lang sa pagtanda
kung paghiling ay maaari lamang
kung paano ako dapat mamatay
huwag pahirapan, isang bala lang
itong tatapos sa iwi kong buhay
tandang pinagsilbihan ang obrero
kahit buhay ko sa dalita'y sidhi
ginampanang husay ang aktibismo
nang lumang sistema'y di manatili
Walang komento:
Mag-post ng isang Komento