PRINSIPYADONG MANUNULAT
ni Gregorio V. Bituin Jr.
10 pantig bawat taludtod
Prinsipyado akong manunulat
Tungkulin ko sa masa'y mag-ulat
Bawat komentaryo'y bumabanat
Inuupakan sinumang lekat
May nagbantang ako'y mararatrat
Ngunit di na ako maaawat
Magpapatuloy akong susulat
Ng maraming akdang mapagmulat
Totoo lang ang madadalumat
Sa bawat artikulong masulat
Katotohana'y di masusukat
Ngunit masa nama'y mamumulat
Kung may isyu't balitang masilat
Tiyak ito'y agad ikakalat
Hustisya ang aming kasapakat
Upang diwang tulog ay magulat
Walang komento:
Mag-post ng isang Komento