Ang Pagpapasya

ANG PAGPAPASYA
ni Gregorio V. Bituin Jr.
15 pantig bawat taludtod

paano nga ba nagpasya ang isang aktibista
upang taluntunin ang landas ng pakikisangkot
paano ba tayong nagpasyang maging aktibista
at suungin ang pakikibaka ng walang takot

nagpasya akong makisangkot at maging kaisa
dahil sa maraming katanungang hindi masagot
tanong bakit api ang manggagawa't magsasaka
gayong kaysisipag, sa dusa sila'y nababalot

nagpasya akong makisangkot, naging aktibista
dahil sa gobyerno'y kayrami ng mga balakyot
dahil inadhika nating makatulong sa masa
dahil nais nating ituwid ang sistemang buktot

dahil walang pag-aaring lupa ang magsasaka
dahil pati sahod ng obrero'y kinukurakot
dahil maraming pulitikong sadyang walang kwenta
dahil sa labang ito'y di dapat palambot-lambot

ikaw naman, kasama ko, paano ka nagpasya
dahil ba sa isang rali'y isa ka sa hinakot
tambay lang, o nais mo ring baguhin ang sistema
nais naming marinig ang mga kwento mo't sagot

gayunman, salamat sa iyong tamang pagpapasya
makibaka na't magpatuloy sa pakikisangkot
walang iwanan, patuloy tayong mag-organisa
ituwid natin ang sistema't lipunang baluktot