Samyo ng Amihan

SAMYO NG AMIHAN
ni Gregorio V. Bituin Jr.
10 pantig bawat taludtod

sumasamyo ang hanging amihan
tila ako'y kanyang hinahagkan
problema'y parang nalulunasan
para bang sagot sa kahirapan
ng natitigang na kalooban
dahil pulos pasakit ang ramdam
ng masang wala bang pakialam
sa mga nagaganap sa bayan

dumadampi ang hangin sa pisngi
habang ginugunita ang kasi
pati lipunan ay minumuni
bakit bayan ay walang masabi
bakit kapwa'y parang walang paki
sa sistemang dapat lang masisi
sapagkat ito'y bulag at bingi
tulad ng gobyernong walang silbi