Bakas ng mga Hunyango

BAKAS NG MGA HUNYANGO
ni Gregorio V. Bituin Jr.
10 pantig bawat taludtod

nang maupo ang bagong pangulo
agad naglipatan ng partido
ang mga hunyango sa kongreso
sa senado't sa ehekutibo

matagal nang halata ng masa
mga pulitiko'y hunyango pala
anong mapapala sa kanila
kundi bayang laging nagdurusa

ang kanila bang paninindigan
pati katapatan ay nasaan
kung saan sila makikinabang
ay doon sila magpupuntahan

palipat-lipat, papalit-palit
sa masa'y nagmamalaking pilit
hindi kaya sila nanliliit
sa pagkahunyangong walang bait

(ang hunyangong nasa larawan ay mula sa
http://world.mongabay.com/tagalog/travel/07_11_17/p19665p.html)