IBA ANG MAHAL
ni Gregorio V. Bituin Jr.
13 pantig bawat taludtod
may isang dalagang umibig sa akin
ngunit siya nama'y di ko iniibig
umaasang siyang aking mamahalin
gayong ako nama'y may ibang pag-ibig
anong gagawin ko dito sa problema
ginigiit niyang ako'y kanyang mahal
gayong pintuho ko'y iba pang dalaga
sa pagpilit niya ako'y tila sakal
palay na raw siyang lumapit sa manok
kaygandang dalagang ayaw kong tukain
ngunit para siyang sa ulo ko'y dagok
gagawin daw lahat para ako'y angkinin
di ko sasabihin anumang masama
hinggil sa dalagang itong namimilit
tila pag-ibig nga ang dumadakila
sa kanya kaya nga sa akin lumapit
pagkat tulad ko rin, pinipilit ko rin
na ibigin ako ng dilag kong ibig
umaasang ako'y kanyang mamahalin
gayong siya nama'y may ibang pag-ibig
Walang komento:
Mag-post ng isang Komento