HINDI NATUTULOG ANG GABI
ni Greg Bituin Jr.
habang tayo’y nahihimbing
sa kailaliman ng gabi
ang mga bampira’y gising
nagpaplano ng maitim
sa paghahasik ng lagim
upang buhay ng masa’y
tuluyang kumulimlim
kaya makiramdam ka
hindi natutulog ang gabi
nagpaplano silang maigi
… kung paano ka mabibigti
… ng sanlaksang kahirapan
… kung paano madadapurak
… ang iyong dangal
… kung paano mababarat
… ang lakas-paggawa
… kung paano idedemolis
… ang tahanan ng maralita
kaya maghanda ka, kasama
hindi natutulog ang gabi
upang sa pagdatal ng umaga’y
plantsado na ang mga balak nila
magkaisa tayong durugin sila
Walang komento:
Mag-post ng isang Komento