Kailan puputok ang madlang galit?

KAILAN PUPUTOK ANG MADLANG GALIT?

ni Gregorio V. Bituin Jr.

11 pantig bawat taludtod

lampas sa apat na sulok ng silid

ang mga kaalamang walang patid

pati na damdaming tila minanhid

ng lipunang ang sistema'y kaykitid

hindi ba't patuloy na bumabaon

sa ating diwa ang bayang nilamon

ng sistemang sa tubo nagugumon

ito ba yaong pamana ng ngayon

mahirap nating sa diwa'y malimot

yaong mga danas na dumalirot

sa sambayanang sa puso'y may takot

at madlang may ikinukubling poot

kailan puputok ang madlang galit

nang sila'y lumaya sa pagkapiit

sa sistemang inayunan ng langit

nang dukha'y apihing paulit-ulit

halina't bigwasan nating kaytindi

ang sistemang pinupuri ng gabi

ginagawa lamang tayong pulubi

nitong mga berdugong nakakubli

Lugmok pa ang ngayon

LUGMOK PA ANG NGAYON

ni Gregorio V. Bituin Jr.

7 pantig bawat taludtod

lugmok pa rin ang ngayong

bumati sa kahapon

bukas ay nakabaon

sa pusod ng pagbangon

kailangang umalpas

sa hirap na dinanas

kailangang mag-aklas

nang magbago ang bukas

nagdidildil ng asin

ang salat sa pagkain

hindi natin maangkin

kahit na gawa natin

paano mamumulat

ang dukhang nagsasalat

gayong ang lahat-lahat

ay sa sistemang bundat

kung ngayon man ay lugmok

ang kahapon ay dagok

bagong bukas ang alok

nitong pakikihamok

tayo'y makipaglabang

baguhin ang lipunan

nasa palad ng bayan

itong kinabukasan

Payo sa isang dilag

PAYO SA ISANG DILAG

ni Gregorio V. Bituin Jr.

9 pantig bawat taludtod

maganda mong ngiti'y nawala

balong sa pisngi'y pawang luha

di maipinta ang 'yong mukha

naglaho ang buo mong sigla

siya'y nasa ibang kandungan

at tuluyan ka nang iniwan

ikaw ba sa kanya'y nagkulang

ikaw ba'y sadyang di lalaban

hindi tugon sa problema mo

ang pagkawala mo sa mundo

huwag kang maghiwa ng pulso

umiyak ka sa balikat ko

di ka dapat magpakamatay

sa mga natatamong lumbay

sa iyong bawat pagkapilay

ituring akong iyong saklay

Inukit ko sa dilim

INUKIT KO SA DILIM

ni Gregorio V. Bituin Jr.

7 pantig bawat taludtod

inukit ko sa dilim

ang aking kapanglawan

piniit ng mga impit

ang bawat kong kawalan

ako ba'y nagdurusa

sa aking kakulangan

wala na bang halaga

ang aking katapatan

inukit ko sa dilim

ang tinagong pangarap

nagbabakasakali

makita ko sa ulap

matanaw ko man lamang

ang nasa alapaap

ang loob na'y gagaan

kung puso ko'y tinanggap

inukit ko sa dilim

ang iyong kagandahan

ikaw ang mutyang dilim

ng aking katauhan

kung magniniig kita

sa laot ng karimlan

tayo'y magiging isa

doon sa kalawakan

Pagniniig

PAGNINIIG

ni Gregorio V. Bituin Jr.

5 pantig bawat taludtod

kaysarap hagkan

ng iyong labi

kaysarap hagkan

ng iyong batok

kaysarap hagkan

ng iyong utong

kaysarap hagkan

ng buong ikaw

nagyayakapan

ang ating diwa

nagpipingkian

ang ating dila

kitang dalawa

ay nagdiriwang

sa pagniniig

nitong katawan

Diyosa kang tinangay ako

DIYOSA KANG TINANGAY AKO

ni Gregorio V. Bituin Jr.

9 pantig bawat taludtod

diyosa kang tinangay ako

simbilis ka ng ipuipo

puso ko'y dagling inangkin mo

at ako'y naging iyung-iyo

diyosa kang napakaganda

ngiti'y tulad kay Ara Mina

marapat lang alayan kita

ng buong pagsisikap, sinta

di sapat pulos pagniniig

di sapat mangusap sa titig

pagsinta'y di sapat marinig

dapat magsikap sa pag-ibig

Katugmaan

KATUGMAAN

ni Gregorio V. Bituin Jr.

8 pantig bawat taludtod

di na tayo mga bata

sa pakikisalamuha

may prinsipyo ang wika

habang tayo'y tumatanda

kaya dapat laging tugma

ang ating salita't gawa

pagkat ang gagawing tama

ay dapat sa ating kapwa

Di Amanos

DI AMANOS

ni Gregorio V. Bituin Jr.

11 pantig bawat taludtod

ikaw nagtanim, sila ang nanalbos

ikaw nagbayo, ikaw ang kinapos

ikaw bumili, sila ang umubos

ito'y may aral pag iyong tinantos

mauunawang ito'y di amanos

ang ganitong sistema'y maling lubos

dapat baguhin nang maging maayos

ang mundong kaytagal nang naghikahos

Huwag mong hanapin ang wala sa akin

HUWAG MONG HANAPIN ANG WALA SA AKIN

ni Gregorio V. Bituin Jr.

10 pantig bawat taludtod

maraming wala sa akin, sinta

na kaya mong hanapin sa iba

ngunit maraming wala sa kanya

na sa akin mo lang makikita

may pagtatangi ang bawat tao

iba siya at iba rin ako

sa pag-ibig, nagkaisa tayo

pag-ibig ko'y para lang sa iyo

kaya, sinta, huwag mong hanapin

ang anupamang wala sa akin

hindi ba't ako'y tinanggap mo rin

sapat ko't kulang ay inibig din

minahal mo'y ang kabuuan ko

inibig ko'y ang kabuuan mo

ang ako'y ikaw din, o, sinta ko

pagkat iisa na lamang tayo

Hinggil sa Kadakilaan

HINGGIL SA KADAKILAAN

ni Gregorio V. Bituin Jr.

14 pantig bawat taludtod

wala na yatang hihigit pang kadakilaan

kaysa pag-alay ng buhay sa sangkatauhan

kaya ang paglaban sa isang pamahalaang

hindi tunay na nagsisilbi sa sambayanan

ay dapat lang ibagsak ng kanyang mamamayan

tumpak nga si Bonifacio sa kanyang tinuran

wala nang hihigit pa sa pag-ibig sa bayan

dahil ang bayan ay yaon ding sangkatauhan

hindi isang bansang may iisang lahi lamang

kundi tinutukoy niya'y lahat na ng bayan

Kasamang Hugo Chavez, Paalam sa Iyo!

KASAMANG HUGO CHAVEZ, PAALAM SA IYO

ni Gregorio V. Bituin Jr.
13 pantig bawat taludtod

ngayon sa ikadalawampu’t isang siglo
itinaguyod mo ang diwang sosyalismo
O,  Ka Hugo Chavez, bayani kang totoo!
hindi ka mamamatay sa puso ng tao

paalam, kasamang Hugo Chavez, paalam
sa pagkawala'y labis kaming nagdaramdam
gayunman, halimbawa mo'y di mapaparam
at panawagan mong sosyalismo'y kay-inam

nawala ka man, di ka nawala sa laban
nag-aalab pa ring baguhin ang lipunan
tuloy pa ang pagbaka ng mga samahan
tuloy ang paglaban ng obrero't ng bayan

kasamang Hugo Chavez, paalam sa iyo
itutuloy namin iyang nasimulan mo
tuloy ang ating laban tungong sosyalismo
hanggang sa tagumpay, ipagwawagi ito

Ang paglilingkod ay di korporasyon

ANG PAGLILINGKOD AY DI KORPORASYON

ni Gregorio V. Bituin Jr.

11 pantig bawat taludtod

ang paglilingkod ay di korporasyon

sabi ng kandidatong si Dick Penson

dapat isa lang sa bawat pamilya

ang magsisilbi sa kanilang kapwa

sapagkat di kalakal ang serbisyo

sapagkat ang serbisyo'y di negosyo

ibagsak ang political dynasties

upang bayan ay di na magtitiis

sa palakad niyong trapong pamilya

na di naman maasahan ng masa

di korporasyon ang paglilingkod

kaya ang masa'y di dapat malunod

sa mga trapong lagi nang nangangako

ngunit wala sa puso't napapako

Budhing Sing-Itim ng Puwit ng Kawali

BUDHING SING-ITIM NG PUWIT NG KAWALI

ni Gregorio V. Bituin Jr.

10 pantig bawat taludtod

pag prinsipyo'y nagkabali-bali

pulitiko'y nagiging tiwali

nasisilaw sila sa salapi

binebenta ang sa bayang puri

sa nasakuna'y di magbahagi

sa elitista'y nananaghili

sa bayan nagtetengang-kawali

sa batas malimit magkamali

buong bayan na ang nasasawi

ang batas binubutas mag-uli

kaypangit ng ganitong ugali

asal-hayop na nakadidiri

kahit pa magpabango'y kaypanghi

tila ba nahulog sa pusali

ang ganito'y nakakaunsyami

dapat baguhin ang ganitong gawi

tulad nila'y kay-itim ng budhi

sing-itim ng puwit ng kawali

Ahas na ang dating bulati

AHAS NA ANG DATING BULATI

ni Gregorio V. Bituin Jr.

13 pantig bawat taludtod

maraming dating bulati, ngayon, ahas na

tulad ng pulitikong asta'y makamasa

kunwari'y mabait nang ito'y bagito pa

nang lumaki ang ulo, balasubas pala

nagmamayabang na ito sa kanyang kapwa

maraming dating bulati, ngayon na'y trapo

mismong ang madla'y inaahas nilang todo

kawawang na ang sambayanang Pilipino

kung lingkod-bayan silang di nagseserbisyo

dahil paglilingkod nila'y astang negosyo

mga dating bulati, ngayo'y nagsilaki

ngayong ahas na'y ganito ang nangyayari

tumaba ang bulsa, utak pa'y nangamote

binalisawsaw pati kanilang kukote

sa masa'y di talaga sila nagsisilbi

Pag Kwarta ang Kumilos

PAG KWARTA ANG KUMILOS

ni Gregorio V. Bituin Jr.

13 pantig bawat taludtod

pag kwarta ang kumilos, inutil ang batas

tuloy nahahalata ang malaking butas

ng batas na nababayaran nitong hudas

dahil sa kwarta, batas na'y nabalasubas

patas daw ang batas sa bansa nating ito

parehas daw ang batas sa lipunang ito

ang dukha'y kaydaling ipiit kaysa trapo

at nakakalusot ang mayamang demonyo

may sinasanto ang batas, ito'y salapi

kumakampi lamang ito sa iisang uri

batas ay paglalaruan ng naghahari

ang dukha kahit tama'y laging nagagapi

inutil ang batas pag kumilos ang pera

binibili pati puri mo't kaluluwa

kung magpapatuloy ang ganitong sistema

kawawa ang dukha, kawawa ang hustisya

dapat itong baguhin, halina't kumilos

maghanda tayo sa matinding pagtutuos

kasama ang manggagawa'y baguhing lubos

ang bulok na sistemang dapat lang makalos

Pulutgata

PULUTGATA

ni Gregorio V. Bituin Jr.

13 pantig bawat taludtod

matagal na panahon din kitang minahal

di mo pinansin, nais kong magpatiwakal

ngunit di ko nagawa, ayaw kong mawaglit

ang ganda mong sa alaala ko'y kayrikit

ngayon nga, kitang dalawa na'y ikakasal

inibig akong sa iyo'y nagpakahangal

magandang rosas ka ng aking panaginip

paruparo akong sa iyo'y nakahagip

sa ating pagtatalingpuso, aking mahal

pupunta kita sa kay Kupidong pedestal

kawagasan ng pag-ibig ang halukipkip

salamat, sa pagsinta ko'y di ka nainip

rosas kitang dadalhin sa aking kuta

upang damhin yaong tamis ng pulutgata

Nais ko'y limang anak

NAIS KO'Y LIMANG ANAK

ni Gregorio V. Bituin Jr.

7 pantig bawat taludtod

iyo akong tinanong

ilan bang binubugtong

ang pangarap sa ngayon?

sagot kong mahinahon:

nais ko'y limang anak

o, mahal kong kabiyak

planuhin itong balak

nang umayos ang gayak

aalagaan kita

mahal kong sinisinta

pagkat kitang dalawa

ang buod ng pamilya

pawis may ay tagaktak

di gagapang sa lusak

ako'y napapalatak

sa sarap ng nilupak

kung anak nati'y lima

ang hiling ko lang sana

tatlong lalaki, sinta

at babae'y dalawa

pag ikaw na'y nagbuntis

kakayod akong labis

lahat ay matitiis

pag anak ang ninais

Iyang pag-aasawa'y di biro

IYANG PAG-AASAWA'Y DI BIRO

ni Gregorio V. Bituin Jr.

10 pantig bawat taludtod

I

iyang pag-aasawa'y di biro

na kapagka iyong isinubo

iluluwa agad pag napaso

tila baga kaning iniluto

II

pag-aasawa'y di kaning lamig

ang isa't isa'y dapat makinig

ang pusong patuloy sa pagpintig

siyang tanda ng inyong pag-ibig

pag-aasawa'y di kaning tutong

kani'y di hinayaan sa pugon

dapat isa'y di lamon ng lamon

magbigayan, maging mahinahon

pag-aasawa'y di isang mumo

na pawang nangalaglag sa plato

mag-asawa'y panay sakripisyo

dapat lang magbigayang totoo

III

ang pag-aasawa'y parang palay

ito'y aalagaan mong tunay

patuloy din kayong magsikhay

nang dumami pa ang mga uhay

ang pag-aasawa'y parang bigas

tumutubong pag-ibig ay wagas

sadyang kapag puso ang nag-atas

dalawa'y magpapasya ng patas

ang pag-aasawa'y parang kanin

bantayang maigi ang sinaing

pag kumulo'y agad iniin-in

huwag magtutong ang laging bilin

IV

hindi biro ang pag-aasawa

pinag-isa na kayong dalawa

kabiyak ng dibdib bawat isa

di dapat magmaliw ang pagsinta

kung mag-asawa'y may suliranin

magtulong silang ito'y lutasin

makapito nilang iisipin

ang mga tugon nilang gagawin

pagkat ang pagsasama'y maluwat

kung bawat isa'y magiging tapat

mula noon sa pakindat-kindat

sa pagsulong ng araw na'y mulat

Langaylangayan akong sumisinta

LANGAYLANGAYAN AKONG SUMISINTA

ni Gregorio V. Bituin Jr.

11 pantig bawat taludtod

langaylangayan akong sumisinta

sa isang rosas na sadyang kayganda

palipad-lipad, palipat-lipat pa

ng sanga upang rosas ay makita

rosas, ako'y iyong langaylangayan

sumasamba sa iyong kagandahan

sinta ko, nais kitang alagaan

at sa araw-araw, kita'y diligan

ikaw ang aking inspirasyong wagas

di ka dapat mawala, sintang rosas

gumaganda ka sa bawat lumipas

na araw sa paghahanda sa bukas

langaylangayan akong umiibig

o, rosas, nais kitang makaniig

Anong Silbi ng Tula?

ANONG SILBI NG TULA?

ni Gregorio V. Bituin Jr.

7 pantig bawat taludtod

anong silbi ng tula

sa makatang tulala

laging nakatingala

ang diwang nasa gala

kumakatha ng buwan

sa ating kamalayan

kinakatha ang bayan 

sa nasang kalayaan

sa diwa'y may tunggali

sa lipunan at uri

sa puso'y walang hari

kundi masang may puri

itutula ang tama

karapatan ng madla

adhika ng paggawa

pangarap na paglaya

Barya Lang sa Tibuyô

BARYA LANG SA TIBUYÔ

ni Gregorio V. Bituin Jr.

9 pantig bawat taludtod

may tibuyong bigay si ama

noong kami'y maliliit pa

huhulugan namin ng barya

hanggang sa ito'y mapuno na

may tibuyong yaring kawayan
mayroong yaring bao naman
pag napuno na ang lagakan
ito'y bibiyaking tuluyan

"mabuti nang kayo'y may ipon"

siyang turo ni ama noon

"tibuyo'y kakampi mo't tugon

pag kailangan mo'y mayroon"

kayhirap pag walang makapa

walang ipon, nakatunganga

sa gutom ay matutulala

sa bawat problema'y balisa

saka mo ngayon naalala

tama pala noon si ama

tibuyô pala'y mahalaga

para sa bukas na kayganda

* tibuyô - salitang Tagalog sa Kastilang "alkansya"

mga litrato mula sa google

Ako'y Kapoy

AKO'Y KAPOY

ni Gregorio V. Bituin Jr.

9 pantig bawat taludtod

ako'y kapoy, lambot na lambot

katatapos lamang magbunot

ng sahig at ng damong lukot

kinapoy sa bawat pagkislot

malalata bawat kalamnan

tila ba bungkos ng kawayan

ay isang kilometrong pasan

kapoy na ang buong katawan

kumbaga sa tanim, naluoy

kaya pakiramdam ay kapoy

babad sa tubig, walang apoy

walang sigla't nasa kumunoy

kailangan kong magpalakas

di dapat kapoy hanggang bukas

tulad ng masisiglang limbas

aba'y inom muna ng gatas

di dapat kapoy sa tuwina

dapat masigla sa umaga

dapat kitang magbitamina

upang ginhawa ang madama

* kapoy - lumang Tagalog (salitang Batangas" * kapoy - salita sa Batangas na nangangahulugang panlalata ng katawan)

Ginahasa ng Imperyalismo

GINAHASA NG IMPERYALISMO

ni Gregorio V. Bituin Jr.

10 pantig bawat taludtod

ginahasa ng imperyalismo

ang buong kaangkinan ng bayan

yaong kabundukan ay kinalbo

minina ng mga tampalasan

pinayagan ng mismong gobyerno

na ating bansa'y yurak-yurakan

ang mga katutubo'y ginulo

upang buong lupa'y pagtubuan

imperyalismo ang gumahasa

at dumurog sa ating kalamnan

dinusta ang mga manggagawa

magsasaka'y ginawang gatasan

pigang-piga ang lakas-paggawa

obrero'y nagsilbing parausan

ang imperyalismo'y tuwang-tuwa

tulo-laway sa pagkagahaman

paggahasa ng imperyalismo'y

sadyang dapat lang nating pigilin

ang mga galamay sa gobyerno'y

hulihin at marapat putulin

mga tuta nito sa husgado'y

ikulong at hustisya'y angkinin

gawing lider ang mga obrero't

kapangyarihan nila'y lubusin

magkaisa kayo, manggagawa

tungkulin ninyong magrebolusyon

putulin ang gintong tanikala

ng kaalipinang nagpagutom

kayo ang hukbong mapagpalaya

na siyang dudurog sa paglamon

ng imperyalismong nanggahasa

sa bayang nagmistulang kabaong

Akala'y Paraiso

AKALA'Y PARAISO

ni Gregorio V. Bituin Jr.

15 pantig bawat taludtod

dumagsa sila sa lungsod, akala'y paraiso

aalwan daw ang iyong buhay, kayraming trabaho

tila ba lupang pangako sa mga dumarayo

ngunit kabalintunaan ang nagigisnan dito

nagdagsaan sa lungsod, akala'y lupang pangako

dito raw matatagpuan ang mailap na ginto

nang nasa lungsod na, ang naapuhap nila't tanso

pulos pala dusa sa lupang pangako'y pinako

Mabuting Maging Pango Kaysa Maging Pinokyo

MABUTING MAGING PANGO KAYSA MAGING PINOKYO

ni Gregorio V. Bituin Jr.

7 pantig bawat taludtod

mabuting maging pango

kaysa maging Pinokyo

tulad niya'y hunyango

sinungaling na't lilo

pag humaba ang ilong

utak na'y urong-sulong

salitang dugtong-dugtong

nangangamoy kabaong

kay Pinokyo'y mag-ingat

wika niya'y di tapat

ang isip mo'y imulat

at baka ka masilat

ah, mabuti pang pango

kaysa isang Pinokyo

Dapat bang may Bonifacio versus Rizal?

DAPAT BANG MAY BONIFACIO VERSUS RIZAL?

ni Gregorio V. Bituin Jr.

13 pantig bawat taludtod

dapat nga bang may Rizal versus Bonifacio

na pinangangalandakan ng ilang tao

kinilala si Rizal dahil sa panulat

na ang mga nobela'y totoong nagmulat

kinilala ng marami si Bonifacio

dahil sa Katipunan at kanyang talino

sa pagiging bayani'y magkaiba sila

magkaiba ng panahon, kinikilala

halimbawa si Rizal ng kahinahunan

at si Bonifacio'y madugong labanan

bakit kailangang isa lang ang bayani

pwede namang kilalanin silang kayrami

dalawang bayani'y walang kamalay-malay

na ang Pinoy ngayon, sila'y pinag-aaway

ang bawat isa raw sa kanila'y ehemplo

kung paanong ang lipunan ay mababago

dapat nga bang may Bonifacio versus Rizal

gayong pareho silang sa bayan nagmahal

hindi, sa paraan man sila'y magkaiba

sa pagmamahal sa bayan ay magkaisa

bawat isa sa kanila'y may kontribusyon

upang maganap ang ningas ng rebolusyon

kaya huwag nating pag-awayan kung sino

tandaan natin, bayani silang pareho

(pagninilay matapos ang isang panayam hinggil kay Bonifacio bilang isang intelektwal, Pebrero 20, 2013, 1-5n.h. sa Silid 520 ng Tower 2, RCBC sa Makati)

Salompas sa Sugat ng Bayan

SALOMPAS SA SUGAT NG BAYAN

ni Gregorio V. Bituin Jr.

9 pantig bawat taludtod

nakitang may naknak ang laman

nagnana ang kaibuturan

ng bayang nagulumihanan

dahil sa sistemang gahaman

bakit kayraming mga tuso

sa kapitalistang gobyerno

kinakawawa ang obrero

lakas-paggawa'y pigang todo

sa ekonomya'y pulitika

ang masa'y di isinasama

ang nagpapasya'y elitista

sa kapalaran nitong masa

ang tugon ng pamahalaan

salompas sa sugat ng bayan

bahala raw ang kapalaran

sa bukas nitong sambayanan

salompas ba'y sapat sa sugat

mga mata'y ating idilat

diwa'y agad nating imulat

anong lunas ang nararapat

kailangan ng himagsikan

upang baguhin ang lipunan

pagbabago ang kalunasan

sa nagnanaknak na lipunan

pagbabagong para sa tao

di lang elitista't gobyerno

pagbabagong may pagrespeto

sa dangal ng masa't obrero

patalsikin ang mga halang

sipain yaong tampalasan

ibagsak ang mga gahaman

itayo ang bagong lipunan

Payong Pag-ibig

PAYONG PAG-IBIG

ni Gregorio V. Bituin Jr.

9 pantig bawat taludtod

walang mangyayari sa titig

kung di ibubuka ang bibig

simulang ikilos ang bisig

kapag dibdib na ang kumabig

bibigkasin na ang pag-ibig

Paraiso Ba Ang Lungsod?

PARAISO BA ANG LUNGSOD?

ni Gregorio V. Bituin Jr.

15 pantig bawat taludtod

paraiso ba ang lungsod na puno ng iskwater?
paraiso ba ang nagtatayugan nitong pader?
paraiso ba kung halang ang pinuno sa poder?
kung kahirapan ay di matugunan nitong lider?

paraiso ba ang lungsod ng mga batang gutom?
paraiso ba kung bibig ng namumuno'y tikom?
paraiso ba kung maraming kamao ang kuyom?
paraiso ba kung pangako'y pawang alimuom?

paraiso ba ang lungsod na kayraming dinukot?
di makita ng mga mahal na ngayo'y kaylungkot?
paraiso ba kung namumuno'y pulos kurakot?
at sa mga katiwalian laging nasasangkot?

paraiso ba kung dinudusta ang manggagawa?
kung lakas-paggawa'y di nababayarang tama?
paraiso ba ang lungsod kung kayrami ng dukha?
na pagkatao'y dinusta ng sistemang kuhila?

sa paraiso'y nagtutulungan ang bawat tao
sa bawat karapatan, ang lahat ay may respeto
binabayarang tama ang trabaho ng obrero
wala nang dukha't guminhawa na ang buhay nito

walang naiiwan sa kangkungan ng kasaysayan
lahat tayo'y may dignidad na di niyuyurakan
bawat isa'y pantay ang pagkatao't kalagayan
paraiso ang lungsod na walang mga gahaman

Tungo sa Hayahay na Bukas

TUNGO SA HAYAHAY NA BUKAS

ni Gregorio V. Bituin Jr.

9 pantig bawat taludtod

mahayahay ang ating bukas

kung ang lipunan ay parehas

kalagayan ng masa'y patas

bagong sistema'y nilalandas

kung ginhawa'y matatamasa

nitong naghihirap na masa

bawat isa'y tiyak sasaya

gagaan ang loob ng kapwa

sa mga dukha'y mababakas

ang hirap, dusa, pandarahas

ngunit problema'y malulutas

kung sa dusa, tayo'y aalpas

masa'y dapat nating mulatin

upang kaapiha'y tapusin

magkaisa tayo't durugin

ang sistemang mapang-alipin

ang lipunang luma'y lilipas

sistemang bulok maaagnas

tahakin na ang bagong landas

tungo sa hayahay na bukas