Soneto sa tanawin

SONETO SA TANAWIN

nakasasabik pagmasdan ang magandang tanawin

na kung isa ka lang agila'y nais mong liparin

at pitong bundok na matatarik ay lampasan din

nakasasabik tanawin ang kaygandang pagmasdan

habang nakatambay sa bagong pinturang bakuran

kayputi ng alapaap, bughaw ang kalangitan

kaygandang pagmasdan ng tanawin, nakasasabik

na bibig ay parang asukal na namumutiktik

na tamis na nalalasap sa puso'y natititik

masdan mo't nakasasabik ang tanawing kayganda

lalo't iyong katabi ang tangi mong sinisinta

pagkat timyas ng pag-ibig ang pawang nadarama

anong ganda ng pagkakaukit ng panginorin

kaya nakasasabik pag minasdan ang tanawin

- gregoriovbituinjr.

10.06.2021

* mula sa karaniwang sonetong may taludturang 4-4-4-2 tulad ng Shakespearean at Petrarchian sonnet, ang nilikha ko'y may taludturang 3-3-3-3-2

* ang soneto ay tulang may labing-apat (14) na taludtod

Soneto kay Muning

SONETO KAY MUNING

nakasilip si Muning, tila may inaabatan

daga ba o pagbabalik ko ang inaabangan

siyang madalas kasabay ko sa pananghalian

kumusta na siya? kaytagal naming di nagkita

tila siya'y nangungulila sa aking presensya

siyang kasama kong natutulog sa opisina

alam ko, balang araw, magkikita kaming muli

ng kaibigang si Muning, sabay manananghali

ah, kaytagal na rin niyang sa opis nanatili

sabay muli kaming kakain ng pritong galunggong,

bangus, daing, dilis, habang pinapapak ko'y tutong

at may gulay din, kamatis, petsay, talbos, balatong

mabuhay ka, Muning! hintay lang, aking kaibigan

magkikita rin tayo't ako'y nagpapagaling lang

- gregoriovbituinjr.

10.06.2021

* mula sa karaniwang sonetong may taludturang 4-4-4-2 tulad ng Shakespearean at Petrarchian sonnet, ang nilikha ko'y may taludturang 3-3-3-3-2

* ang soneto ay tulang may labing-apat (14) na taludtod

Maligayang Araw ng mga Guro

MALIGAYANG ARAW NG MGA GURO

sa lahat po ng guro, taasnoong pagpupugay

sa paglaki namin, guro'y sandigan at patnubay

bukod sa aming magulang ay guro ang nagpanday

ng isip at asal ng estudyante, naging gabay

ang mahal kong ina ang talagang una kong guro

ang aking ama naman ay kayrami ring tinuro

upang kaming mga anak ay sadyang mapanuto

silang nagturo't gumabay ng may buong pagsuyo

salamat sa guro ng kinder at elementarya

tunay kayong sa aming puso't diwa'y mahalaga

di lang itinuro'y wika, agham, matematika

kundi good manners and right conduct, wastong disiplina

sa mga guro ko ng hayskul, nagpupugay ako

di rin malimot ang mga guro sa kolehiyo

sa lahat ng aming naging guro, mabuhay kayo!

sa lahat ng guro, kami'y taasnoong saludo!

- gregoriovbituinjr.

10.05.2021

* litratong kuha ng makata noong 2016

Pagtula para sa kalikasan

PAGTULA PARA SA KALIKASAN

patuloy akong tutula para sa kalikasan

dahil ito'y niyakap kong prinsipyo't tinanganan

ibabahagi sa kapwa anumang natutunan

upang kalikasan ay kanila ring alagaan

halimbawa ng mga tinula'y natipong plastik

bakit at paano ba ginagawa ang ekobrik

sa walang lamang bote'y matiyagang nagsisiksik

aba'y isama pa natin ang proyektong yosibrik

magtanim ng gulay sa paso kung nasa lungsod ka

nang balang araw, may mapitas pag ito'y namunga

magtanim ng puno pag ikaw ay nasa probinsya

tulad ng niyog, kalumpit, lipote, saging, mangga

sa kalikasan pa lang, samu't sari na ang isyu

may batas tulad ng Clean Air Act, Clean Water Act tayo

Solid Waste Management Act na dapat sundin ng tao

may Green Climate Fund pa, paano ba nagamit ito?

sumama rin noon sa Lakad Laban sa Laiban Dam

at kaisa sa kampanya laban sa Kaliwa Dam

at naglakad din mula Luneta hanggang Tacloban

sa malamig na Pransya'y sumama rin sa lakaran

at itinula ang mga karanasan at isyu

inilathala't ipinabatid sa kapwa tao

climate justice, climate emergency, ano ba ito

at bakit nag-uusap sa COP ang mga gobyerno

bagamat di lamang sa pisikal kundi sa diwa

ang paraan kong makiisa sa lahat ng madla

upang masagip ang mundong tahanan nating pawa

para sa kalikasan ay patuloy na tutula

- gregoriovbituinjr.

10.05.2021

* ang litrato ay kopya ng dalawang pampletong inilathala ng makata

Lumalalang klima

LUMALALANG KLIMA

ang editoryal ng dyaryong Inquirer, Oktubre Tres,

sa puso't isipan ko nga animo'y tumitiris

"The future is frightening," pamagat nga'y anong bangis

basahin mong buo, ikaw kaya'y makatitiis

sa mga katotohanang inilahad, inulat

hinggil sa klimang pabago-bago, anong marapat

nakakatakot daw ang kinabukasang kaharap

ng mundo, at mga bansa'y dapat pa ring mag-usap

lulubog ang Manila Bay, ang marami pang isla

siyam na taon na lang, anang mga siyentista

magbawas na ng emisyon o lalong lumala pa

ang lagay ng daigdig, ang pabagu-bagong klima

itigil ang plantang coal, mag-renewable energy

nananawagan din sila ng climate emergency

sana, mga gobyerno'y di bulag, pipi, o bingi

sa nagaganap at ulat ng U.N.F.C.C.C.

dapat magkaisa, halina't manawagan tayo

mag-usap at kumilos ang iba't ibang gobyerno

magbawas ng emisyon, magsikilos din ang tao

baka masagip pa ang nag-iisa nating mundo

- gregoriovbituinjr.

10.05.2021

* litrato at datos mula sa kawing na https://www.google.com/amp/s/opinion.inquirer.net/144844/the-future-is-frightening/amp

* U.N.F.C.C.C. - United Nations Framework Convention on Climate Change

Saging, mansanas at lemon

SAGING, MANSANAS AT LEMON

saging, mansanas at lemon

pampalakas, pampalusog

meryenda kaninang hapon

na sadyang nakabubusog

ito lamang ang kainin

kahit iulam sa kanin

aba'y anong sarap na rin

sulit na sulit ang kain

sa saging ay nakatatlo

at nabusog ngang totoo

lalo't may potasyum ito

na sadyang kailangan ko

pampalusog ang mansanas

sa doktor nakakaiwas

sisigla ka na't lalakas

sa sakit, magandang lunas

lemon naman ay hatiin

at sa baso mo'y pigain

lagyan ng tubig, haluin

pampalakas pag inumin

mga meryendang nalasap

ng makatang nangangarap

tara, tikmang may paglingap

mabubusog ka ring ganap

- gregoriovbituinjr.

10.04.2021

Kung bobo...'to

KUNG BOBO...'TO

may mga mahilig gumamit ng pwersa

pagkat tingin, makapangyarihan sila

na ang katwiran ay katwiran ng pera

tauhan ay susubuan lang ng kwarta

ganyan katindi ang kanilang sistema

tulad din ng trapo kapag may halalan

tumakbo dahil mayroong kayamanan

masang gutom ay kanilang babayaran

iboto lang sila sa kapangyarihan

pobre'y papayag na lang sa limangdaan

bobo ba kung tinanggap nila ang pera

at inihalal ang nagbigay ng kwarta

ah, basta may bigas para sa pamilya!

kung boboto, ihalal ma'y walang pera

subalit iyon ang nais ng konsensya!

ano ba ang limang daang pisong iyon

kung sa isang araw, sila'y nakaahon

kaysa nga naman sa utang ay mabaon

muli mang makawawa ng tatlong taon

pinagpalit ma'y kinabukasan doon

maging matalino sana sa pagboto

subalit anong klase ang iboboto?

katanungang dapat saguting totoo

bansa ba'y patakbuhing parang negosyo?

o pagsisilbihang totoo ang tao?

subukang iboto yaong maglulupa

kauri ng magsasaka't manggagawa

di basta sikat na artista't kuhila

kundi prinsipyo'y panig sa kapwa't dukha

sadyang tunay na magsisilbi sa madla

- gregoriovbituinjr.

10.04.2021

* litrato mula sa google

Paggaling

PAGGALING

nagkatrangkaso si misis ng nakaraang gabi

kaya di ako nakatulog at di napakali

bumangon siya't uminom ng gamot, alas dose

nang mag-umaga, kalagayan na niya'y umigi

mabuti naman at humupa na ang kanyang lagnat

siya'y sumigla, ako nama'y natulog sa puyat

pag siya'y nagkasakit ay gagawin ko ang lahat

at kung siya'y gumaling, taospusong pasalamat

siya ang nag-alaga noong ako'y nagkasakit

ako ang mag-aalaga ngayong siya'y maysakit

ganyan ang tulungan, bawat isa'y magmalasakit

upang malutas ang anumang problema't pasakit

ang pagkakasakit niya'y tila isang bangungot

sa kanyang paggaling, laking saya ang idinulot

tila baga tinik sa lalamunan ko'y nabunot

mabuti na lang at maraming nakatagong gamot

ngayon, maaga akong gumising upang magsaing

di siya dapat mapagod kahit nagpapagaling

din ako sa tumamang covid na nakakapraning

buti, lagnat niya'y nawala, siya na'y magaling

- gregoriovbituinjr.

10.04.2021

* litrato kuha sa labas ng bahay habang nagpapainit sa araw at matapos mag-ehersisyo

Nagbulalo muli

NAGBULALO MULI

di pa ubos ang bulalo ng nakaraang gabi

na sa kaarawan ko'y handog, walang pagsisisi

bagamat vegetarian, ano pa  bang masasabi

lalo't sa pagkakasakit ko'y tanging piping saksi

ako nga'y nagulat sa komento ng kasamahan

dahil nag-vegetarian ay nanghina ang katawan

marahil nga, marahil hindi, ngunit di ko alam

biro ko sa sarili, bulalo ang kasagutan

dahil baka katawan ko'y kulang na sa protina

at kailangan nito'y mineral at bitamina

bulalo pala'y may mga benepisyong talaga

pampatibay ng buto, panlaban sa leukemia

panlaban din sa diabetes, boosting immune system

panlaban sa kanser, improve cardiovascular system

panlaban sa osteoporosis, nang makatikim

ng bulalo, pagpapalakas ko'y naging taimtim

tunay ngang dapat pasiglahin ang ating katawan

kumain ng isda, prutas, gulay, mag-vegetarian

ngunit magbulalo pa rin kahit paminsan-minsan

salamat, bulalo, sa tulong mo sa kalusugan

- gregoriovbituinjr.

10.03.2021

Pinaghalawan ng ilang datos:

http://ph.news.yahoo.com/bulalo-day-keep-ailments-away-125418391.html

https://drhealthbenefits.com/food-bevarages/meats/benefits-of-eating-bulalo-soup

Ka Bien

KA BIEN

minsan ko lang nakaharap si Ka Bien Lumbera

doon sa Diliman, matapos ang isang programa

na pinakilala sa akin ni Ka Apo Chua

buti si Apo'y may kamera't kami'y nagpakuha

subalit wala akong kopya ng litratong iyon

na patunay sana ng pagdalo kong iyon doon

na nakadaupang palad ko si Ka Bien noon

na respetadong National Artist ng ating nasyon

tanging nabiling aklat niya ang mayroon ako

aklat na kayamanan na ng makatang tulad ko

pamagat ay SURI pagkat pagsusuring totoo

hinggil sa panitikan, inakda niya't kinwento

may sinulat sa sariling wika, at may sa Ingles

malalasahan mo kung akda niya'y anong tamis

o mapait pa sa apdo ang indayog at bigkis

iyong mauunawaan, malalim man ang bihis

salamat, Ka Bien, sa ambag mo sa panitikan

ang makadaupang palad ka'y isang karangalan

taaskamaong pagpupugay yaring panambitan

sa Pambansang Alagad ng Sining sa Panitikan

- gregoriovbituinjr.

10.03.2021

* nabili ko ang aklat na Suri: Pag-arok sa Likhang Panitik, ni Bienvenido Lumbera (Abril 11, 1932 - Setyembre 28, 2021), na may 286 pahina, may sukat na 5" X 8", sa halagang P650, noong Hunyo 3, 2021, sa Solidaridad Bookshop sa Ermita, Maynila

Pintig

PINTIG

ramdam sa buto ang nilalaman ng mga pintig

upang magsidaloy sa ugat at puso'y maantig

araw mamaya'y titirik sa aking pagkatitig

habang dama pa niring binti yaong pamimitig

ganyan sa wari ko ang sasalubong na umaga

sa salamisim ay tila pupugto ng hininga

ngunit dapat maging masigla kasama ng musa

upang sabay na magsibangon ng malalakas na

natitigan ko ang kalamansing laan sa pansit

ah, madaling araw pa lang, ang gabi pa'y pusikit

pag pumutok na ang araw makikita ang langit

pati na maybahay kong may ngiting kaakit-akit

mula kisame'y sa sahig naman napatunganga

dapat kumilos ng maaga't huwag matulala

magsaing para sa pamilya'y gawaing dakila

sisikat na ang araw at mawawala ang tala

- gregoriovbituinjr.

10.03.2021

Bulalo

BULALO

niyakap maging vegetarian ngunit nagbulalo?

aba, eh, minsan lang naman ito't kaarawan ko!

anong sarap muling tikman ng dating paborito

na talagang inihanda sa kaarawang ito

ayokong mag-cake sa aking birthday, noon at ngayon

di ako bumibili ng cake sa aking okasyon

red horse at limang barbecue lang, katalo na noon

subalit walang red horse, nagpapagaling pa ngayon

datapwat sa ilang panahon ay nag-vegetarian

pagkat kaisa sa kilusang maka-kalikasan

subalit ngayon ay nagpapalakas ng kalamnan

dahil nagka-covid itong katawang vegetarian

nais kong mapatunayang lalakas akong muli

kalusugan ko'y mapasigla sa bawat sandali

subalit nagbulalo lang ngayon upang magbunyi

matapos ang okasyon, magbe-vegetarian uli

kaysarap ng bulalo, sumasagad hanggang buto

ah, kay-init ng sabaw na pumaso sa nguso ko

maraming salamat sa pa-birthday na alay ninyo!

taospusong pasasalamat sa nagpabulalo!

- gregoriovbituinjr.

10.02.2021

Paghahanap ng paksa

PAGHAHANAP NG PAKSA

pansin ni misis, bagot na ako't tula ng tula

nabo-boring na raw ako kaya katha ng katha

subalit ang totoo'y wala rin kasing magawa

kaysa sa kwarto'y nakaupo lang o nakahiga

dahil di basta makalabas, babalik sa kwarto

matapos magsaing, kumain, maglinis ng plato

titingin sa paligid, hanap ng maikukwento

titingala sa kisame, at may paksa na ako

ah, ganyan ang buhay ng nagka-covid na makata

habang nagpapagaling, may umuugit sa diwa

mula sa karaniwang bagay, may naitutula

paksa'y inilalarawan sa mumunting salita

tulad ng namungang tanim malapit sa pintuan

na paksa na sa tula't kinunan ko ng larawan

pagkat pag nahinog na ito'y aming mauulam

at di na bibili ng gulay, pipitasin na lang

tula muna ng tula habang mahina pang sukat

at sa aking kwadernong itim ay sulat ng sulat

sa nagbabasa ng tula ko'y maraming salamat

kahit paano'y gumaan ang ramdam kong mabigat

- gregoriovbituinjr.

10.02.2021

Datos

DATOS

kain, tulog, tae, ihi, tunganga sa kisame

ilang araw din akong ginagawa ko'y ganire

at ngayong nagpapagaling na'y may ibang diskarte

magluto ng kanin, tirik ng kandila sa gabi

subalit huwag pa ring basta lalabas ng bahay

malakas ang delta't baka may iba pang madamay

mga manok na may kuto'y patakbo-takbong tunay

lagi pa ring mag-face mask at may alkohol na taglay

ayon sa contact tracer na kausap ng misis ko

nasa isandaan tatlumpu't limang bagong kaso

ng pasyenteng nagka-covid ang naitala rito

sa munting bayan, at noong isang araw lang ito

hipag at biyenan ko'y nawala nitong Setyembre

tila ba itong covid ay matakaw na buwitre

na sa pusod ng daigdig ay napakasalbahe

ang bagong datos ba'y bakit lumaki't nangyayari?

nakakapangamba, kaya ako'y sa kwarto muna

inuubo pa rin, at walang labasan talaga

ah, kailan ba matatapos ang pananalasa

ng salot na covid, sana pandemya'y magwakas na

- gregoriovbituinjr.

10.01.2021

Ilang nalilirip

ILANG NALILIRIP

kayraming kuto ng manok, madalas kumakapit

di lang sa alaga kundi sa suot naming damit

ito ang angal ni misis, pinepeste nang malimit

ang mga manok, may kuto na rin sa aking singit

nilalaro ko ang mga salitang matatalas

na maaaring makasugat sa puso ng hudas

o di kaya'y makapagpalugmok sa talipandas

na mismong bayan nati'y kanilang binalasubas

tulad ng langit kung aking pagmasdan ang kisame

tinititigan ding kapara'y magandang babae

langit at paralumang ginagawan ng diskarte

dahil sa pagsintang puso ang pupukawin dine

"Anak" ni Freddie Aguilar ay aking pinakinggan

pinakiramdaman ko kung ako ba'y tinamaan

ah, di ako iyon, malapit man sa karanasan

habang patuloy ako sa paglirip sa di alam

- gregoriovbituinjr.

10.01.2021

Sa nakaraang araw ng puso

SA NAKARAANG ARAW NG PUSO

araw ng mga puso'y di lang Pebrero Katorse

kundi pati rin tuwing Setyembre Bente-Nuwebe

una'y tungkol sa pag-ibig ng lalaki't babae

ikalawa, ang puso bilang mahalagang parte

ng ating buhay at ating buong pangangatawan

kaya iwing puso'y dapat laging pangalagaan

lagi ring matulog ng pito o walong oras man

upang gumanda ang puso't sakit ay maiwasan

kumain ka rin ng mga masustansyang pagkain

"galaw-galaw nang di ma-stroke", kasabihan na rin

maglakad din ng madalas, huwag balewalain

ang kalusugan ng puso't pangangatawan natin

puso't katawan ay dapat may sapat na pahinga

kapag malusog ang puso, malayo sa disgrasya

kapag walang nagkakasakit, pamilya'y masaya

habang patuloy ang buhay na puspos ng pag-asa

- gregoriovbituinjr.

10.01.2021

* litrato mula sa google

* ilang pinaghalawan ng datos:

https://world-heart-federation.org/world-heart-day/

https://blogs.biomarking.com/blogs/news/5-paraan-para-mapanatili-maging-malusog-ang-iyong-puso

Ka Ipe

KA IPE

Taasnoong pagpupugay, Ka Ipe Faeldona!

Lider-manggagawa, bayani, sadyang makamasa

Isang magaling na edukador at aktibista

Isang ganap na rebolusyonaryo't sosyalista

Madalas kong makasama sa pulong ng B.M.P.

Lalo't ako'y minutero sa pulong na nasabi

Matututo ka sa kanya, sa bayan ay nagsilbi

Payo niya'y mananatili sa isip maigi

Isa kang moog ng uring nagbigay halimbawa

Mahusay na organisador, tila walang sawa

Bise presidente ng SUPER, matalas ang diwa

Tunay na kasama ng manggagawa tungong paglaya

Mga aral at karanasan mo'y dapat mapagnilay

Ng mga manggagawang iwing buhay mo'y inalay

Ka Ipe, isa pong taaskamaong pagpupugay

Tunay kaming sumasaludo, mabuhay! Mabuhay!

- gregoriovbituinjr.

09.30.2021

* binasa sa luksang parangal kay Ka Ipe Faeldona, gabi ng 09.30.2021 sa zoom

* litrato mula sa fb page ng BMP

Pagngata ng hilaw ng bawang

PAGNGATA NG HILAW NA BAWANG

isa itong gamot na pampalusog ng katawan
na aking natutunan sa mahahabang lakaran
na pampalakas ng kalamnan, nitong kalusugan
na talagang nakatulong sa puso ko't isipan

at nang ako'y nagka-covid ay muli ngang ngumata
ng hilaw na bawang, na halamang gamot ng madla,
na payo ng mga kapatid kong nababahala
na para sa kalusugan ay sinunod kong sadya

sa mga saliksik, halamang gamot na magaling
ang bawang, di lang sa lutuin, kundi kung nguyain
altapresyon, ubo, rayuma, sadyang ngangatain
katas ng dinikdik na bawang sa mga hikain

bawang na allium sativum ang pangalang pang-agham
panglinis ng sugat ang katas ng sariwang bawang
pati na rin sa impeksyon ng mikrobyo sa tiyan
sa daluyan ng pagkain ay panglinis din naman

pagngata ng bawang ay malaking tulong sa akin
upang covid ay malabanan, malunasan na rin
di man maganda ang lasa, ito lang ay tiisin
basta para sa kalusugan, bawang ay ngatain

- gregoriovbituinjr.
09.30.2021

Pinaghalawan ng ilang datos:
https://en.wikipedia.org/wiki/Garlic
https://ph.theasianparent.com/benepisyo-ng-bawang

Sabaw ng buko

SABAW NG BUKO

at muli akong nakainom ng sabaw ng buko

upang linisin ang bituka't tumibay ang buto

anila, pinipigil nito ang sakit sa bato

may kalsyum, magnesyum, potasyum, posporus pa ito

itinuring ang sabaw nitong inuming pangmasa

mula sa puno ng niyog na napakahalaga

sa kalusugan ng mamamayan, ng iyong sinta

salitang agham ng niyog ay cocos nucifera

pag naubos ang sabaw ng buko'y may makakain

pang masarap na puting laman, iyong kakayurin

sa loob ng matigas na bao bago namnamin

sabaw ng buko pa'y gata sa maraming lutuin

tara, at kita'y magsihigop ng sabaw ng niyog

o buko upang pangangatawan nati'y lumusog

sabaw ng buko'y mula puno ng buhay, O, irog!

ang inumin ng masa habang mundo'y umiinog

- gregoriovbituinjr.

09.30.2021

Ang gubat na katabi

ANG GUBAT NA KATABI

pinayagan akong lumabas upang magpainit

kung dati'y pulos kisame, nasilayan ko'y langit

mabuti raw ang init ng araw sa nagkasakit

na bitamina sa katawan kahit man lang saglit

at natitigan kong muli ang gubat na katabi

nitong bahay sa bundok, talagang nakawiwili

wala kasi sa kinalakhang lungsod ang ganiri

mapuno, tila ba mga Mulawin ay narini

nais kong puntahan ang madawag na kagubatan

subalit mag-ingat dahil baka may ahas diyan

na baka iyong maapakan, tuklawin ka niyan

tulad din ng ahas sa lungsod na dapat ilagan

kaysarap masdan ng punong hinahagkan ng ulap

na tila baga kakamtin mo ang pinapangarap

gubat na tahanan ng hayop at ibong mailap

may mga diwata rin kaya roong nangungusap?

- gregoriovbituinjr.

09.29.2021

Unang luto

UNANG LUTO

kayrami nang ginagawa ni misis sa maghapon

siya pa rin bang magluluto ng pagkain ngayon?

maglilinis, maglalaba, patutukain yaong

alagang higit sa apatnapung manok na iyon

oo, nais kong tulungan si misis sa gawaing

bahay, huwag lang mabinat habang nagpapagaling

kanina, sardinas ay sinubukan kong gisahin

sapul magka-covid, iyon ang una kong lutuin

alam kong pagod lagi si misis mag-asikaso

dalawang pamangkin pa'y nasa ospital, hay naku!

kaya pinalalakas ko naman ang sarili ko

basta bilin niya, mag-face mask, alkohol, sundin ko

sa kusina, ginayat ko ang sibuyas at bawang

binuksan ang lata ng sardinas na walang anghang

iginisa ko naman sa kawali, tama namang

iyon ang una kong luto't huli ring gas sa kalan

ginisang sardinas nga'y inulam namin kanina

tapos na rin ang katorse araw kong kwarantina 

datapwat walang swab test na ako'y negatibo na

subalit dapat pa ring mag-ingat, inuubo pa

- gregoriovbituinjr.

09.29.2021

Kinakapos ng hininga

KINAKAPOS NG HININGA

nag-positibo sa covid at nagpapagaling na

ngunit madalas pa ring kinakapos ng hininga

marahil baka kulang pa rin ako sa pahinga

at baka oksiheno ko'y di pa sapat, kulang pa

bago matulog sa gabi'y madalas maramdaman

inom munang tubig hanggang ito'y makatulugan

datapwat sa umaga'y di ko naman ito ramdam

basta lang may handang tubig sa tabi ng higaan

sa oxymeter, higit nobenta ang oksiheno

panay pa rin ang ginagawang pagsusuob dito

biskwit, isda, gulay at prutas ang kinakain ko

umaasa pa ring lalakas at gagaling ako

pampalusog na ulam at masarap pa ang kanin

upang lumakas at ang hininga'y di na kapusin

may talbos ng sayote, kamote, at petsay na rin

o kaya'y isda para sa protina nitong angkin

panay pa rin ang inom ng gamot at bitamina

mag-inhale, mag-exhale, mag-ehersisyo sa umaga

at higit sa lahat, huwag gutumin ang bituka

asam kong di na ako kapusin pa ng hininga

- gregoriovbituinjr.

09.29.2021

Kisame

KISAME

pansin ko, kayrami ko palang tula sa kisame

kung di nakatingala ay nakahiga lang dine

nang dahil sa covid ay talagang di mapakali

tila ba kisame sa pagkakasakit ko'y saksi

pagkamulat sa umaga'y tatambad ang kisame

at nakatitig pa rin doong pipikit sa gabi

habang inaasam na kalagayan ay umigi

nang dahil sa covid, nakatunganga't panay muni

napagtanto kong samutsari ang mga kisame

na may iba't ibang disenyo, hugis, kulay, arte

tila ba ako'y saksi sa maraming pangyayari

kung di butiking salbahe, langgam na nagdebate

tabing sa gabing anong lamig ang abang kisame

at dingding na kahoy habang dama'y di maiwaksi

sa tag-ulan, bubong at kisame'y kaylaking silbi

panatag ka, nang musa'y dumalaw sa guniguni

- gregoriovbituinjr.

09.28.2021

Pipino't kamatis

PIPINO'T KAMATIS

pampalusog muli itong paalmusal ni misis

aba'y kaysarap na ulam ng pipino't kamatis

pampalakas na, aba'y pampakinis pa ng kutis

mga pagkain itong pagsinta'y di nagmimintis

pipino'y cucumis sativus ang ngalang pang-agham

na mataas sa nutrient, isang anti-oxidant

siyamnapu't limang porsyento'y tubig yaong laman

pampalusog din ng bato, sa kanser ay panlaban

ang kamatis naman ay solanum lycopersicum

may taglay na vitamin C at K, folate, potasyum

matagal ko ring nakasama lalo't nagugutom

at malaking tulong sa saliksik ko't paglalagom

kaya pipino't kamatis ay kaygandang almusal

pampatibay ng kalamnan, di ka basta hihingal

malinaw ang pananaw sa lipunang umiiral

sa anumang problema'y pag-asa ang niluluwal

- gregoriovbituinjr.

09.28.2021

Paglipat ng silid

PAGLIPAT NG SILID

Mabuhay! sa swab test, si misis ay nag-negatibo

kaya napagpasyahang magpa-disinfect ng kwarto

ngayong araw, lumipat akong silid, obligado

nang buong kabahayan ay ma-disinfect ng todo

pinalabas ako't sa ibang bahay pinalipat

pansamantala habang pinapausukang sukat

ang buong bahay, at bagong silid ay sinisipat

datapwat sa naroong kisame'y napamulagat

sa loob ng bagong kwarto'y tila may pagkasabik

tinitigan ko ang kisame, anong natititik

anong talinghaga ang naroroong nakaukit

piping dilat akong sa haraya'y may nakapagkit

tila nakikinita ko'y langit na anong puti

datapwat damang tatagal pa ang buhay kong iwi

habang pinagpapatuloy ang pagtula ko't mithi

habang ipinagtatanggol ang mga inaglahi

- gregoriovbituinjr.

09.27.2021

Kayganda ng umaga

KAYGANDA NG UMAGA

kayganda ng umagang sumilang sa niloloob

habang nagpapatuloy pa kami sa pagsusuob

bangis ng virus ay dapat madurog at makubkob

at mabubuting selula ang dito'y magsilusob

salubunging masigabo ang umagang kayganda

sapagkat tanda ng pag-asam ng bagong pag-asa

lalo't dumila ang init ng araw sa balana

naninilay na wala na sanang magka-covid pa

inhale, exhale pa rin, mag-ehersisyo ng katawan

bagamat bawal pang lumabas sa abang higaan

huwag laging nakatunganga't kisame'y pagmasdan

kundi igalaw-galaw rin ang tuhod at katawan

O, kayganda ng umagang ang salubong ay ngiti

at pasasalamat ang sa labi mamumutawi

salamat sa buhay at naritong nananatili

upang ipagpatuloy ang adhikain at mithi

- gregoriovbituinjr.

09.26.2021

Meryendang mansanas

MERYENDANG MANSANAS

bata pa noon nang marinig ko ang kasabihang:

"An apple a day keeps the doctor away," tunay namang

kasabihang ito'y tumagos sa puso't isipan

lalo't nagkasakit, sawikaing ayaw bitiwan

naririnig ko lang noon ngunit di nababatid

ang kabutihang dulot ng mansanas sa maysakit

ika nga, kumain ka nito't gaganda ang kutis, 

lulusog ang katawan, pampalusog din ng isip

nang minsang nagdala si tatay ng isang mansanas

ito'y hinati sa magkakapatid ng parehas

lahat kami'y pantay sa pasalubong na madalas

tila turo ni tatay, sa hatian dapat patas

at ngayong ako'y may covid ay binigyan ni misis

nitong mansanas habang sa kisame'y nakamasid

pasasalamat kay misis na mahusay mag-isip

upang ako'y gumaling sa covid na anong lupit

- gregoriovbituinjr.

09.25.2021

Bartolina

BARTOLINA

tila ba ako'y nakabartolinang walang rehas

sa isang kwartong mapanglaw bagamat may liwanag

nasa silid lang, di basta maaaring lumabas

dahil sa covid, baka maimpeksyon, di panatag

maliit na kwartong tahanan ng maraming araw

tahimik man doon subalit sadyang namamanglaw

dahil sa covid, kinabukasan ay di matanaw

lalo't hipag at biyenan sa covid na'y pumanaw

kaya ako'y damhin mo, talagang di mapakali

lalo na't sa salot na sakit ay sadyang sakbibi

aba'y saulo ko na nga ang hugis ng kisame

pagkat doon nakatitig sa bawat pagmumuni

sana'y gumaling na't makawala sa bartolina

ng bangungot ng covid at hawla ng pagdurusa

balang araw, lalabas ako ritong malaya na

pagkat gumaling na't kaharap ay bagong umaga

- gregoriovbituinjr.

09.24.2021

Kwadernong itim

KWADERNONG ITIM

di ko tanda kanino galing ang kwadernong itim

na binigay marahil sa akin ng gurong lihim

nakakatakot ba sakaling lamunin ng dilim?

may kapayapaan nga ba sa baligtad na talim?

Kampilan ni Lapulapu'y matalas at kaiba

Excalibur ni Arturo'y matalim ding espada

Katana'y baligtad ang talim ni Kenshin Himura

upang pumayapa ang mundo sa panahon nila

di mawawala ang dilim na muling bumabalik

tulad din ng tanghaling ang araw ay tumitirik

tulad ng saknong na may talinghagang natititik

tulad sa katahimikang minsan dapat umimik

kung kulay ng kwaderno ko'y itim, eh, ano naman

kung sinusulat ko rito'y mithing kapayapaan

habang nagpapagaling, pinapanday kong mataman

ang tugma't sukat, ang puso, diwa't pangangatawan

upang sa muling pakikihamok ay maging handa

upang muling hasain ang sandata ng makata

upang maging katuwang ng manggagawa't dalita

tungo sa lipunang magpakatao ang salita

- gregoriovbituinjr.

09.23.2021

Ang tula

ANG TULA

ang tula ay di kapara ng tubig na mainit

na basta mo kakapehin pag may sumang malagkit

lagyan mo ng asukal pag barako'y anong pait

upang saknong at taludtod ay umayon nang rikit

sinusubukan kong laging makalikha ng tula

bawat araw, maipakitang ako'y sumisigla

positibo man sa covid na nakakatulala

kakatha habang nasa kisame nakatingala

datapwat minsan pag nagsasalita'y inuubo

sinusunod ang payo ng doktor at ng misis ko

upang gumaling, upang lumakas, upang magbago

ang katawan tungo sa malusog na pagkatao

talaga kong kathain ang anumang nalilirip

gayunman, di man makatula'y huwag ikainip

mahalaga'y magpahinga, di gaanong mag-isip

saknong at taludtod naman sa puso'y halukipkip

- gregoriovbituinjr.

09.22.2021