Pulitikong Lango

PULITIKONG LANGO

ni Gregorio V. Bituin Jr.

13 pantig bawat taludtod

wala nga bang disiplina ang mga Pinoy

tanong ito ng isang kababayang tsimoy

utak daw ng lasenggo'y tulad ng palaboy

tungga ng tungga itong tunggak na kaluoy

gaya ng pulitikong lasing sa upuan

langong-lango sa hawak na kapangyarihan

nalilimot nang siya'y isang lingkod-bayan

pabaya sa tinatanganang katungkulan

problema ng bayan imbes ayusin niya

hayun, siya'y di na mahagilap ng masa

nalasing na kasi sa papuri ng iba

akala'y di babagsak yaong tulad niya

asal niya'y gahaman, sobra siyang tuso

ang sariling kawani'y kaybaba ng sweldo

masamang halimbawa'y pakita sa tao

asal niya'y basahan, isa siyang trapo

taumbayan sa kanya'y nagbakasakali

ngunit nahawa siya sa mga tiwali

bagong pulitiko ngunit nakadidiri

hamig siya ng hamig, tila walang budhi

pag sa kapangyarihan ang trapo'y nalasing

lahat na ng anomalya'y kanyang gagawin

para bang nakadroga, siya'y napapraning

lingkod-bayang sa kabang-yaman naduduling

Ang Lingkod na Pluma

ANG LINGKOD NA PLUMA

ni Gregorio V. Bituin Jr.

14 pantig bawat taludtod

ang pluma'y dapat ipaglingkod sa aping uri

lalo sa manggagawang api ng naghahari

ilantad ng pluma ang pribadong pag-aari

na dahilan ng pagsira ng buhay at puri

ang bawat tula't kwento'y may salaysay ng hidwa

habang dinuduyan-duyan yaring puso't diwa

di toreng garing ang tibok ng bawat salita

may sigla ng himagsik ang bawat kabanata

pluma'y tagapaglingkod laban sa mga hayok

sa tubo't naghaharing tanda ng pagkabulok

sa kwento ang tiwali'y kaya nating ilugmok

habang yaong naapi'y ilalagay sa tuktok

makata, pluma'y gamitin sa gitna ng digma

upang yaong mga tiwali'y di makawala

durugin mo sa tula yaong kasumpa-sumpa

at iangat sa pedestal yaong manggagawa

Mga Kasalamuha

MGA KASALAMUHA

ni Gregorio V. Bituin Jr.

14 pantig bawat taludtod

sa araw at gabi'y kayraming kasalamuha

maaring bida't kontrabida sa kwento't tula

posibleng tauhan sa akda kong kinakatha

sila yaong bubuhay sa saknong at talata

bawat mga danas ay maaaring eksena

habang sa kwento'y lulutang ang isang persona

mga posibleng piyesa sa tula't nobela

iwasiwas ang pluma sa hapdi, kirot, saya

lilitaw tiyak ang paniwala mo't prinsipyo

sa bawat kathang kinatas sa puso mo't ulo

sinong nakasalamuha ang bida sa kwento

masa ba'y anong aral ang mahihita dito

tila nga buhay na buhay ang bawat sitwasyon

tulad din ng karakter doon sa telebisyon

salita'y kikilos sa bawat talata't saknong

ngunit tayo lamang ang dapat doong magdugtong

Tinik sa Obrero ang Kontraktwalisasyon

TINIK SA OBRERO

ANG KONTRAKTWALISASYON

ni Gregorio V. Bituin Jr.

13 pantig bawat taludtod

binobola ng kapitalistang kawatan

ngunit alinlangan pa silang maghimagsik

kung ganyan ng ganyan, anong kahihinatnan

di matatanggal ang sa manggagawa'y tinik

ang dangal ng manggagawa'y nayuyurakan

tinik sa obrero ang kontraktwalisasyon

dignidad ng paggawa'y nilalapastangan

tinik na ito'y unti-unting bumabaon

labis nang nabibikig ang mga obrero

pagkat tinik na ito'y labis kung tumusok

sa diwa't kalamnan ay sumusugat ito

sa buhay ng obrero'y sadyang umuuk-ok

maghimagsik ka, manggagawa, maghimagsik

ikaw lang ang kayang tumanggal niyang tinik

Presyo ng LPG, Ibaba!

PRESYO NG LPG, IBABA!

ni Greg Bituin Jr.

9 pantig bawat taludtod

kayrami nang natutulala

bilihin ay kaytaas na nga

ito'y abot na sa kusina

tagos pa sa bulsa't sikmura

pambili'y nagsasalat na nga

pagtaas ng presyo ng langis

ay sadya ngang nakakainis

buhay namin ay numinipis

sa pagtaas na labis-labis

kartel nga'y dapat nang matiris

presyo ng el-pi-dyi (LPG), ibaba

pagtaas nito'y isawata

pagkat kawawa kaming dukha

hirap na, hirap pa'y lulubha

ang buhay na'y kasumpa-sumpa

pag lalo pang tumaas ito

aba'y baka na magkagulo

tiyak na ang gutom ng tao

kaya ibaba na ang presyo

nitong el-pi-dyi at petrolyo

Nakikita'y Tugma, Kulang sa Sukat

NAKIKITA'Y TUGMA, KULANG SA SUKAT

ni Gregorio V. Bituin Jr.

14 pantig bawat taludtod

kayrami nilang mga lumilikha ng tula

kulang sa sukat, bagamat seryoso sa tugma

di naman malayang taludturan ang kinatha

tila kaalaman sa tugma't sukat ay wala

basta't kakatha na lang yaong bagong makata

sa tula kasi'y tugma ang agad namamalas

tulad ng obra ng ating makatang Balagtas

di pansing ang bilang ng pantigan ay parehas

kaya dapat iturong sa pagtula'y may batas

na sa tulang may tugma, may sukat na kapatas

minsan meron pa silang sesurang binibilang

na sa bawat taludtod ay hati ng pantigan

halimbawa'y Florante na labindalawahan

sa ikaanim na pantig, may paghinto naman

ganyan itong ating katutubong panulaan

makata noon pa'y ganito kadisiplina

pantig sa bawat taludtod ay binibilang pa

sa tanaga, dalit, gansal at iba pang obra

kaya di lang tugma ang ating dapat makita

kundi batas ng tugma't sukat, maunawa pa

Pag-ibig mo sinta'y nakilala ng puso

Pag-ibig mo sinta'y nakilala ng puso
Ikaw lamang ang tangi nitong sinusuyo
Ang iwi kong pag-ibig ay di maglalaho
Mula sa kawalan, ako'y iyong hinango

Oo, buong-buo mo akong maaangkin
Ngayon at kailanman, pakamamahalin
Tutuparin ko, sinta, ang sumpaan natin
Ako'y iyong-iyo na't isa mong alipin

Lagablab ka sa diwa kong animo'y hangal
Bilib ako sa Kupido mong tinatanghal
Alab mo'y tila pusong nagpapatiwakal
Ningas ka sa pusong naritong nagmamahal

- gregbituinjr.

Wikang Ingles ang Wika ng Dating Panginoon

WIKANG INGLES ANG WIKA NG DATING PANGINOON

ni Gregorio V. Bituin Jr.

14 pantig bawat taludtod

"Malaya na ang ating bayan at huwag kausapin sa wika ng dating panginoon." - mula sa pahina 293 ng nobelang Mga Ibong Mandaragit, ni Ka Amado V. Hernandez

Wikang Ingles ang wika ng dating panginoon
Ito pa rin ang wika ng mga Pinoy ngayon
Wikang Filipino'y nilalait, tinatapon
Tanda raw ng kawalang-aral at pagkagunggong

Ang Wikang Filipino raw ay pandukha lamang
Di dapat salitain ng may pinag-aralan
At di dapat pag-aralan ng mga mayaman
Kaysakit naman nitong kanilang pang-uuyam

Wikang Filipino raw ay wika ng alipin
Wika raw ng mga maralitang palamunin
Wika rin daw ng mga manggagawang waldasin
Aba, wikang ito'y dapat ipagtanggol natin

Ingles ang wika ng gustong pinapanginoon
At wika ng imperyalismo't globalisasyon
Filipino'y wika ng inaalipin ngayon
Pangmaralita, pangdukha, pantambay, pangmaton

Kung wala tayong gagawin, lalaitin tayo
Kung tayo'y tutunganga lang, tayo nama'y ano
Wikang Filipino'y wika nina Bonifacio
Jacinto, Balagtas, Batute, Quezon, at Rio

Wikang Filipino'y wika ng pagkakaisa
At dito rin nagkakaunawaan ang masa
Ito'y wika ng bayani't wika ng pag-asa
Na dapat ipagtanggol sa harap ng balana

Pag kaharap mo kami, bakit ka mag-iingles?

PAG KAHARAP MO KAMI, BAKIT KA MAG-IINGLES?

ni Gregorio V. Bituin Jr.

14 pantig bawat taludtod

Sige, mag-Ingles ka pa, ikaw na sosyalera

Sige, sa kapwa Filipino'y mag-Ingles ka pa

Wika mong sarili'y pinandidirihan mo na

Mas gusto mo pa'y wika ng mapagsamantala

Sana'y mabulunan ka't matanggalan ng dila

Ikaw na mapanlait sa sarili mong wika

Sige, wikang Filipino'y ilubog mo pa nga

Sana'y masama ka sa pagkalubog sa lupa

Pag kaharap mo'y kami, bakit ka magi-Ingles?

Para ba sabihing balyena ka't kami'y dilis?

Sabihing matalino ka't dukha'y utak-ipis?

Wala ka palang pinag-iba sa kaning panis!

Pag kami'y kaharap, dapat kang mag-Filipino

Ito ang tamang lohikang dapat lang gawin mo

Tagarito ka't sariling wika natin ito

Ikaw dapat ang unang tagapagtanggol nito

Kapatiran nga ba'y ganito?

KAPATIRAN NGA BA'Y GANITO?

ni Greg Bituin Jr.

12 pantig bawat taludtod

(hinggil sa pagkamatay na naman ng isang estudyante dahil sa hazing sa fraternity)

nirekrut nila ang magiging kapatid

ngunit bakit ang buhay nito'y pinatid

ang utak ba nila'y sadyang makikitid

ang katotohanan pa'y nais ilingid

at ang hustisya'y tinuring na balakid

mga saksi'y di dapat na lang maumid

sabihin ang totoo't huwag umismid

upang ang mga maysala'y mabilibid

ang kapatiran ba'y anong adhikain

di ba't mga kasapi'y pagkaisahin

di ba't kapatid ang sa kasapi'y turing

di ba't isang diwa sa isang layunin

ngunit bakit ang buhay pa'y papatirin

ang pagluluksa ng naulila'y damhin

katarungan sa biktima'y dapat dinggin

dapat ikulong ang sinumang salarin

Dumulog ang aking isip sa panagimpan

Dumulog ang aking isip sa panagimpan
Ikaw ang aking nasulyapang dinuduyan
Tuwing umaga't malamig pa ang amihan
At maaliwalas pa yaong kalangitan
Sigaw ng puso ko'y ikaw, O, binibini
Ramdam ko'y narito ka lang sa aking tabi
Espesyal ka sa akin sa araw at gabi
Puso ko'y kinukuyumos mong anong tindi
Uuwi akong sa kawalan nakatitig
Yamang sa paghimbing ko puso'y naaantig
At pag nagising, wala na ba ang pag-ibig
Nais kong tayo'y tuluyan nang magkaniig

- gregbituinjr.

Kontrabidang Kongresman

KONTRABIDANG KONGRESMAN

ni Gregorio V. Bituin Jr.

13 pantig bawat taludtod

(Hinggil sa House Resolution 2140 ni Congressman Aurelio “Dong” Gonzales Jr. ng Pampanga na nagsasaad na itigil na ang paggawa ng mga pelikulang naglalarawan sa tulad nilang “honorable” na kongresista bilang mga kontrabida.)

laging kontrabida sa mga pelikula
ang papel ng “honorable” na kongresista
ito'y patunay ba kung anong klase sila?
sa totoong buhay ba'y totoong buwaya?

kongresista'y kontrabida, bida ang masa
sa pelikulang Pinoy ay gasgas na tema
gasgas man ang tema'y katotohanan pala
ang inilalarawan nitong pelikula

sa Kongreso man, ang kongresista'y kuhila
isang panig lang ang batas na nagagawa
bihira ang batas sa mga manggagawa
at bihira rin ang batas sa mga dukha

kung may batas man sa mga dukha't obrero
ito'y kaylupit, di maitaas ang sweldo
mga batas ay batay sa kapitalismo
di sa kagalingan ng karaniwang tao

bagamat may ilang kongresmang matitino
mayorya ng kongresista'y para sa tubo
batas sa pabahay nga'y nakapanlulumo
batas sa manggagawa'y di mo nga makuro

kaya tama lang ang mga paglalarawan
na kontrabida ng bayan itong kongresman
kung nais nilang ito'y mabagong tuluyan
magpakatino sila't maglingkod sa bayan

Bababa rin sa akin ang isang diyosa

BABABA RIN SA AKIN 

ANG ISANG DIYOSA

ni Gregorio V. Bituin Jr.

bababa rin sa akin ang isang diyosa

dahil sa wakas napaibig ko rin siya

kung kailan man iyon, ako'y umaasa

isang magandang diyosa'y magiging sinta

ito'y isa sa matagal kong pinangarap

na diyosa'y madulutan ako ng lingap

ang karilagan niya'y akin lang masulyap

tiyak ako'y hinehele sa alapaap

nasa panagimpan ko’y kaygandang diyosa

na sa matagal na panahon ay sininta

darating ang panahon, kami'y magkikita

mahahaplos ko siya't magkakaniig na

huwag lamang akong mawalan ng pag-asa

bababa rin sa akin ang aking diyosa

(FHM model and beautiful goddess Regine Angeles)

Kalikasan ng Pag-ibig

KALIKASAN NG PAG-IBIG

ni Gregorio V. Bituin Jr.

10 pantig bawat taludtod

bakit ba dagat ay umaalon?

pag-ibig ba ang dahilan niyon?

bakit gumaganda ang panahon?

dahil ba ngiti mo'y naaayon?

bakit ba hangin ay umiihip?

dahil lagi kitang nasa isip?

ang langit ba'y ating malilirip

habang tayo'y kapwa naiidlip?

bakit ba minsan ay bumabagyo?

dahil ba wala ka sa tabi ko?

bakit ba itong mundo'y matao?

saksi sa pag-ibig ko sa iyo?

bakit ba may rosas na bulaklak?

dahil ba puso ko'y iyong hawak?

bakit ba may daang lubak-lubak?

dahil may problemang tinatahak?

bakit ba ang lupa'y nagpuputik?

dahil ba tayo'y humahagikhik?

bakit ba ang bundok ay matarik?

dahil matamis ang iyong halik?

bakit ba araw ay umiinit?

dahil puso nati'y magkadikit?

bakit panahon ay nagsusungit?

dahil ba ikaw ay nagagalit?

bakit lumalago ang pananim?

dahil ba pag-ibig ko'y kaylalim?

bakit bulaklak kang sinisimsim?

ang pag-ibig ba'y tamis at asim?

puso ko ba'y iyong naririnig?

nais kitang kulungin sa bisig!

bakit nais kitang makaniig?

dahil ikaw ang aking pag-ibig!

Panunuyo

PANUNUYO

ni Gregorio V. Bituin Jr.
13 pantig bawat taludtod

nanunuyo ang lalamunan ng binata
habang nanunuyo sa magandang dalaga
tila di maapuhap ang tamang salita
na iparirinig sa kanyang sinisinta

patuloy ang kanyang panunuyo sa dilag
kahit na walang bulaklak at tsokolate
upang puso niya'y di manunuyo't hungkag
kaya hinuhusayan niya ang diskarte

lilitaw rin sa dila ang tamang bigkasin
habang mula sa puso'y sambit ang pag-ibig
upang sa dulo ang dilag siya'y sagutin
hanggang silang dalawa'y tuluyang magniig

ngunit tila nanunuyo na ang binata
habang nanunuyo sa magandang dalaga
konting tiyaga pa't di tuyo ang salita
sa wakas, sumagot din ang sinuyong sinta

Inday Wil Olweys Lab Yu

INDAY WIL OLWEYS LAB YU

(alay kay Whitney Houston - Agosto 9, 1963 - Pebrero 11, 2012)

ni Gregorio V. Bituin Jr.

mahal ni Inday Whitney ang kanyang tagahanga

na mga kinakanta nya'y awiting dakila

inaaliw ang mayayaman at mararangya

inaaliw din kahit na dukha't hampaslupa

may pinagmanahan ang kanyang mga pagbirit

anak siya ng inang premyadong mang-aawit

pinsan ni Dionne Warwick, kaya di sumasabit

ang tinig nyang tila awit ng anghel sa langit

awit nya sa Bodyguard, "Inday Wil Olweys Lab Yu"

tagos nga sa puso habang nanonood ako

habang ang tinig nya'y nanunuot hanggang buto

sa kanyang "Greatest Love of All" nga ako'y saludo

kaya maraming tagasubaybay ang nabigla

dahil sa pagpanaw nya, biglaang pagkawala

gayunman mahal siya ng mga tagahanga

kaya di mamamatay ang awit nya't gunita

Tuloy ang Laban ni Ka Popoy

TULOY ANG LABAN NI KA POPOY
ni Gregorio V. Bituin Jr.

14 pantig bawat taludtod

labing-isang taong singkad na yaong dumaan

ng mapaslang ng kung sino si Ka Popoy Lagman

ngunit hanggang ngayon wala pa ring katarungan

di pa rin nahuhuli yaong may kagagawan

gayunman, tuloy pa rin ang ipinaglalaban

at simulain niyang baguhin ang lipunan

sosyalismo ang landas sa bawat nating hakbang

sosyalismong pangarap para sa sambayanan

sa ilan sa kanyang mga iniwang sulatin

ay ating matutunghayan yaong kanyang bilin

kamalayang makauri'y dapat patagusin

sa sinumang manggagawang ating aabutin

halina't pagkaisahin ang mga obrero

huwag magwatak-watak, maging organisado

ang misyon ni Ka Popoy ay misyon mo't misyon ko

tuloy ang laban ni Ka Popoy hanggang sa dulo

BMP office

Pebrero 6, 2012

Hibik ng Dilag: Huwag Manggahasa

HIBIK NG DILAG: HUWAG MANGGAHASA

ni Gregorio V. Bituin Jr.

12 pantig bawat taludtod

"Don't tell me how to dress. Tell them not to rape." - mula sa plakard na dala ng isang seksing babae

seksi ang babae, maiksi ang palda
litaw ang balikat, kaygandang kurbada
bakit iba'y tila agad nagnanasa
parang bagang sila'y hindi makahinga

nakita lang yaong mapuputing hita
nalilibugan na ang mga binata?
tinitigasan na ang mga timawa?
at nagnanasa na ang mga kuhila?

dahil daw maigsi'y tabingan ng kumot?
sinambit ng dilag sa puso'y kumurot:
"huwag makialam sa’ming isusuot
ay, magtiis kayo riyang mamaluktot"

dagdag pa, "anuman ang aming suutin
kumportable kami’t huwag babastusin
matakam man kayo sa alindog namin
ay huwag nyo lamang kaming sasalingin"

ang mga babae'y ating irespeto
silang larawan ng ina at lola mo
huwag manggahasa, magtinong totoo
dahil kung di'y tiyak ikaw'y kalaboso

purihin mo na lang ang kanilang ganda
ngunit huwag mo nang pagnasaan sila
pagkat sila’y ating katuwang, kaisa
sa pagbabago ng bulok na sistema

Babae ang Mapagpasya

BABAE ANG MAPAGPASYA

ni Gregorio V. Bituin Jr.
14 pantig bawat taludtod

babae ang mapagpasya sa katawan niya
kung nais makialam, magpaalam ka muna
huwag siyang pwersahin, baka makasuhan ka
habambuhay, kundi bitay, ang iyong sentensya
pag napatunayang ikaw nga'y nanamantala

kung nais ang babae, siya muna'y suyuin
maningalang pugad ka't siya'y pakaibigin
pagkat di kusang ibibigay ang puring angkin
ito'y laan lang sa kanyang pakamamahalin
pagkat yaman itong ang kapara'y toreng garing

katas man nila'y sariwa't pawis ay kaybango
mahirap makialam sa kanilang pribado
baka kaladkarin ka riyang kapara'y aso
kung di ka mapatay, tiyak ikaw'y kalaboso
kaya pasya ng babae'y ating irespeto

Apat na batas sa ekolohiya ni Barry Commoner

APAT NA BATAS SA EKOLOHIYA NI BARRY COMMONER
ni Gregorio V. Bituin Jr.
15 pantig bawat taludtod

may apat na batas sa ekolohiyang pamana
si Barry Commoner na kilalang ekolohista
paglimiang mabuti ang mga sinabi niya
tiyak unawa mong ang buhay sa mundo'y kayganda

una, lahat ng bagay sa mundo'y magkakaugnay
may hininga, kumakain, umiinom, may buhay
ang sakit ng kalingkingan, dama ng buong kamay
ang bawat saribúhay ay pangalagaang tunay

ikalawa, bawat bagay ay pupunta kung saan
walang nawawala, kundi natatransporma lamang
mula yelo'y naging tubig, ulap ay naging ulan
binhi'y naging puno, nang sinibak, naging tahanan

ikatlo, alam ng kalikasan anong mabuti
upang buhay ng bawat isa sa mundo'y umigi
ibon ay malaya, animo’y walang kakandili
ngunit buhay, kalikasan ang sa kanya’y nagsilbi

walang libreng pananghalian yaong ikaapat
kaya di mabuting tayo’y mag-aksaya’t magkalat
lahat ay may dahilan kung bakit nariyan lahat
mabuti’y gawin kung nais magkaroon ng sapat

Ang Tulay

ANG TULAY

ni Gregorio V. Bituin Jr.

10 pantig bawat taludtod

noon, nagsisilbi akong tulay

ng kaibigang nais manligaw

may napupusuan siyang tunay

ang dilag na nais niya'y ikaw

masakit man, pinamigay kita

sa kaibigang iniibig ka

at ako sa iyo'y dumistansya

ako'y nagpakalayu-layo na

alang-alang sa kaibigan ko

na sa iyo nga'y nagkakagusto

ngunit anong nabalitaan ko

sa kanya ako'y hinahanap mo

mahal ka ng aking kaibigan

kaya siya'y aking tinulungan

ngayon, ramdam niya'y kabiguan

iba raw ang iyong nagustuhan

at nagkausap kitang dalawa

habang puso ko'y kakaba-kaba

napakaganda mo pa rin, sinta

tanong mo'y pinamigay ba kita

di ako nakahuma't bantulot

ang pagkawala mo'y aking lungkot

pinamigay ka'y di ko masagot

pagkat totoo kahit makirot

iyon ay para sa kaibigan

na nakiusap ikaw'y lapitan

ipakilala kitang mataman

pagkat kanya kang napupusuan

ngunit di mo pala siya ibig

at ito'y kaysarap sa pandinig

tanong ko: "sino ang iyong ibig?"

tugon mo: "ikaw!", ako'y natulig

masaya ako, agad dugtong mo:

"pamimigay mo ba uli ako?"

"hindi na, aking mahal!" tugon ko

"ikaw na'y akin, ako na'y iyo!"

Muli, sa Sinisinta

MULI, SA SINISINTA

ni Gregorio V. Bituin Jr.

14 pantig bawat taludtod

Jen, di lang sa ngiti mo ako nahahalina

di lang sa iyong mukhang kaysarap laging masdan

nais ko'y mismong ikaw, kabuuang kayganda

na aking ibinaon sa puso ko't isipan

adhika ko sa buhay ang makasama kita

sa hirap at ginhawa, sa payap't digmaan

di ko mapapangakong sa iyo'y ikwintas pa

yaong tala sa langit, pati araw at buwan

ang makakaya lamang na magawa ko, sinta

ay pagsisikapan kong ikaw'y pangalagaan

at ating bubuuin ay pamilyang kaysaya

sa gitna man ng krisis at laksang kahirapan

masaya ang puso kong makita kang masaya

walang kasingsaya kung tayo'y nag-iibigan

sa puso nati't isip, tayong dalawa'y isa

gagawin ko ang lahat tayo'y magdugtong lamang

magiging karugtong ka nitong aking bituka

ako nama'y durugtong sa iyong katauhan

magigi kang kabiyak ng bawat kong pag-asa

at damhin mo ang aking mga kapangahasan

Panata sa Uring Manggagawa

PANATA SA URING MANGGAGAWA

ni Gregorio V. Bituin Jr.

13 pantig bawat taludtod

(batay sa hiling ng isang kasama na gawan ko ng tula)

Batid ko ang hirap ng bawat manggagawa

Nilikha nila ang ekonomya ng bansa

Pagkain at produkto, silaang maylikha

Di mabubuhay ang mundo kung sila'y wala

Manggagawa, buod ka ng aking panata

Pagkakaisahin ko ang mga obrero

Habang tangan itong sosyalistang prinsipyo

Gagampanan ang pagiging selupturero

Ng mapang-aping sistemang kapitalismo

Ito nga, mga kapatid, ang panata ko

Di nararapat mabuhay sa dusa't luha

Ang manggagawang sinakbibi ng dalita

Silang tanging pag-aari'y lakas-paggawa

Na dapat magsamang putlin ang tanikala

Nang madurog ang kapitalismong kuhila

Sa lahat ng pinuno't kasaping obrero

Ng Bukluran ng Manggagawang Pilipino

Durugin man ng kaaway ang aking buto

Pitpitin ang katawan, basagin ang ulo

Sosyalismo'y ipaglalaban hanggang dulo.

Mahal kong Jen

MAHAL KONG JEN
ni greg
11 pantig bawat taludtod

Jen, sana'y madala kita sa bahay
upang maipakilala kay nanay

ito ang hiling ng ina kong mahal
katuparang hinintay ng kaytagal

ayokong sa harap niya'y mapako
ang matagal ko nang ipinangako

ayoko nang tatanda't mamamatay
nang hindi kita nakasamang tunay

uuwi lang ako doon sa amin
ngunit uuwing kasama kita, Jen

Korte ni Noynoy at Gloria, Walang Pinag-iba

KORTE NI NOYNOY AT GLORIA, WALANG PINAG-IBA 

ni Gregorio V. Bituin Jr.

13 pantig bawat taludtod

ang pagtatalaga ng punong mahistrado

ay tanggalin dapat sa kamay ng pangulo

upang ang bayan ay di magkagulo-gulo

ang pagtatalagang ito'y dapat mabago

kay Noynoy man o Gloria ang Korte Suprema

tiyak namang dito'y wala silang pinag-iba

bangayan lamang ng kampong Noynoy at Gloria

bayan pa rin ay patuloy na nagdurusa

pare-pareho silang iisa ang uri

pag ang suspek ay mayaman, minamadali

pag dukha ang suspek, pakialamang dili

kinikililingan ang kalansing ng salapi

kaya sa Korte, palakad ay baguhin na

dukha man o mayaman, dapat ang pasiya

di batay sa inog ng sistema ng pera

di batay sa uri kundi sa ebidensya

kaya ang nagaganap na impeachment ngayon

ay isang telenobela lang sa maghapon

bangayan ng isang uri ang tagpo doon

di makabusog sa dukhang konti ang lamon

kaya lahat ng natalagang mahistrado

ay dapat nang umalis sa kanilang pwesto

upang bigyang daan ang repormang totoo

na magtatalaga'y tao, di ang pangulo

Laya ng Kalapati

LAYA NG KALAPATI
ni Gregorio V. Bituin Jr.
13 pantig bawat taludtod

mga kalapati ba'y piniit sa hawla
o malaya rin sila sa tahanan nila

kalapati'y simbolo ng kapayapaan
kaya kayhirap kung sila'y nakakulong lang

pag may kasalan lang sila nakalalaya
o may panawagang mundo'y gawing payapa

ngunit ang simbolo'y di makapagprotesta
kahit paulit-ulit ipiit sa hawla

Oda kay Aesop

ODA KAY AESOP

ni Gregorio V. Bituin Jr.

13 pantig bawat taludtod

habang binabasa ko ang mga pabula

sa maraming aral ako nga'y napapatda

pagkat si Aesop ay sadyang kahanga-hanga

sinaunang manunulat, paham ang akda

sinilang na may kapansanan sa pandinig

kuba, alipin, ngunit malamyos ang tinig

dahil kung hindi'y sino na ang makikinig

sa mga aral niyang alay sa daigdig

sa kanyang sipag ay pinalaya ng amo

hanggang maglakbay siyang paroo't parito

nakipagtalastasan sa maraming tao

dito lumabas ang pambihirang talino

palibhasa'y dating alipin nang isilang

kaya dama niya yaring pulso ng bayan

lalo't mga dukhang puspos karalitaan

kaya't inaapi nitong mga gahaman

nilikha ang pabula't sa tao'y kinwento

upang maling ugali'y mapuna't mawasto

ginamit ang hayop, pinagkunwaring tao

matabil, mabangis, nag-iisip, at tuso

mga hayop na bida'y sadyang kayrurunong

nariyan ang kwento ng langgam at tipaklong

pabula ng lobo't leyon, matsing at pagong
meron kayang kwento ng balyena't galunggong

nariyan ang pabula ng ubas at lobo
paligsahan nina kalabaw at kabayo
at sa ilog nalaglag ng aso ang buto
paano nakainom sa pitsel ang loro

tinipon mula sa panahong sinauna

nagpasalin-salin at sa mundo'y pamana
hanggang sa kasalukuyan ay mabisa pa
gintong aral sa mundo, sa kapwa't sa masa

mga pabula'y hibo ng katotohanan
kung anong nangyayari sa ating lipunan
mga pabula'y mahirap pabulaanan
pagkat salamin nitong ating kabihasnan

ang pabula ni Aesop ay libo nang taon
ngunit kailangan pa ito hanggang ngayon
ang mga walang buti'y baka magkaroon
at ang lipunang ito'y umigi paglaon

Huwag Mong Tuyain ang Tula sa Dukha

HUWAG MONG TUYAIN ANG TULA SA DUKHA

ni Gregorio V. Bituin Jr.
13 pantig bawat taludtod

may kakilalang akong panay ang dura
matapos niyang mabasa ang isang tula
kanyang binabasa raw ay di maunawa
pagkat masyado raw itong matalinghaga

"kung di mo maunawa'y bakit ka dumura?"
sa kanya'y tanong ko't tila ikinabigla
"buhay ng karaniwang tao iyang tula
at sa masa mula ang pananalinghaga"

"dumura ka dahil iyo ngang naunawa
ngunit di ka sang-ayon sa nariyang katha
tila turing mo sa masa'y sadyang kaybaba
at ang mga dukha'y iyo ngang tinutuya"

"huwag mong tuyain iyang tula sa dukha
na naglalarawan ng buhay-hampaslupa
tuyain mo'y iyang pulitikong kuhila
na siyang dahilan ng sistemang kaylala"

Organisahin ang mga Manggagawang Kontraktwal

ORGANISAHIN ANG MGA 
MANGGAGAWANG KONTRAKTWAL

ni Gregorio V. Bituin Jr.

14 pantig bawat taludtod

yaong ihip ng hangin ay tuluyang nagbago

kaya ngingisi-ngisi na ang mangangalakal

hinabagat nang tuluyan ng kapitalismo

ang obrerong regular na ngayon na'y kontraktwal

ang regular na manggagawa'y naging kay-ilap

napatahimik ba ang dagat ng pag-uunyon?

pulos kontraktwal na ang sa pabrika'y laganap

sanlaksa sila ngayong patuloy sa pag-alon

kaylawak ng dagat ng manggagawang kontraktwal

habang sapa na lang ang manggagawang regular

nagtagumpay ang iskema ng mangangapital

regular na obrero'y nawalan na ng lugar

nanalo man ngayon ang mga kapitalista

ito sa obrero'y pansamantala lang naman

pagkat maaari rin nating maorganisa

ang manggagawang kontraktwal sa ating lipunan

humihila na tayo ng bayawak sa lungga

sa layon nati't tungkuling pag-oorganisa

kaunti na lang ang regular na manggagawa

dahil kontraktwal na ang mayorya sa kanila

limang buwang singkad, patuloy sa pagpapagal 

ang manggagawang iniiwas sa pag-uunyon

aba'y mulatin na sa uri silang kontraktwal

silang mga api'y dapat ding magrebolusyon

Di ibig sabihin ng drug-free ay libre ang droga

DI IBIG SABIHIN NG DRUG-FREE AY LIBRE ANG DROGA
ni Gregorio V. Bituin Jr.
15 pantig bawat taludtod

di ibig sabihin ng drug-free ay libre ang droga
kundi walang mga drogang nagkalat sa kalsada
wala nang mga sugapang namumula ang mata
walang mga adik na dahilan ng luha’t dusa
walang suwail na nagpapadala sa problema

droga'y para sa may karamdaman, may dinaramdam
upang iniindang sakit ay tuluyang maparam
di para sa may kinabukasan pang inaasam
droga'y salot sa lipunan, dapat nating magunam
at sa mga nangyayari'y dapat tayong may alam

sugapa sa droga sa lipunan ay walang silbi
mga damong ligaw na sinisira ang sarili
mahal ang gamot lalo't dukha kang walang pambili
maging malusog tayo't sariwang hangin ay libre
kahit na di libre ang droga sa lipunang drug-free