ANG BATANG MAGALANG AT ANG GURO
salamat sa mga batang magalang
masunurin sa kanilang magulang
sa matatanda'y nagmamano naman
di nagdadabog kapag inutusan
sa paaralan sila natututo
dahil sa gurong dakilang totoo
nangangaral paano rumespeto
lalo na sa karapatang pantao
sa mga guro, maraming salamat
dahil sa inyo, bata'y namumulat
sa paligid ay huwag magkakalat
tinuruan ding magbasa't sumulat
sadyang dakila kayong mga guro
bata'y natuto sa inyong panuto
tiyak aral ninyo'y di maglalaho
pagkat naukit na sa diwa't puso
- gregoriovbituinjr.
* litratong kuha ng makatang gala sa loob ng ZOTO Learning Center nang minsan siyang dumalaw doon
Walang komento:
Mag-post ng isang Komento