ANG DILAG
ni Gregorio V. Bituin Jr.
10 pantig bawat taludtod
lagi ko na siyang nakikita
ngunit di kami magkakilala
labis ang paghanga ko sa kanya
sa puso'y itinitibok siya
rosas siyang kaysarap diligin
bango niya'y kaysarap simsimin
paano ko kaya maaangkin
ang dilag na kaysarap mahalin
siya'y hanap ko't pinapangarap
kaya ako'y laging nagsisikap
ngunit bakit pagsinta'y kay-ilap
pagdiga sa kanya'y anong hirap
dahil ba siya'y isa nang ginang
na di na iibig kaninuman
maliban sa bana niyang hirang?
oo, akong ito'y naunahan
Walang komento:
Mag-post ng isang Komento