HULING HIRIT NI MACARIO SAKAY
ni Gregorio V. Bituin Jr.
13 pantig bawat taludtod
sa bibitayan, inihiyaw ng bayani
sa harap ng bayan ay mariing sinabi:
"Tao'y mamamatay sa madali't malaon
kay Bathala'y haharap akong mahinahon.
Subalit aking nais sabihin sa inyo
di kami mga magnanakaw o bandido
na ibinintang ng mga Amerikano.
Bagkus kami'y tunay na rebolusyonaryo
na pinagtanggol ang mahal na bansang ito
ang Pilipinas, mahal nating Inang Bayan.
Mabuhay ang Republika! Nawa'y isilang
muli sa hinaharap itong kalayaan!
Mabuhay ang ating Inang Bayan! Paalam!"
Walang komento:
Mag-post ng isang Komento