ANG GIYERA AY DI ISANG REBOLUSYON!
ni Greg Bituin Jr.
Ang giyera ay di isang rebolusyon
Pagkat dal’wang ito’y kaiba ng tugon
Sa kahirapan nga’y digma’y di solusyon
Kaya’t sa paghambing ay baka magumon.
Giyera’y paghawak ng baril at kanyon
Kaaway madurog ang pangunang layon
Girian ng lakas ang kanilang hamon
Pag utak mo’y digma isip mo’y nalason.
Rebolusyon’y hindi digma ang kapara
Kung lipuna’y layong mabago ang kara
Alisin ang lider kung ‘sang palamara
Nang ang pamayana’y madamdam ang gara.
Sagot sa problema’y di digmaang bayan
Kundi pagsusuri sa ating lipunan
Hindi baril kundi tayo’y magdamayan
Nang sistemang bulok ay ating palitan.
- nalathala sa publikasyong Taliba ng Maralita, opisyal na publikasyon ng Kongreso ng Pagkakaisa ng Maralitang Lungsod (KPML), Hulyo-Setyembre 2001, p.8.
Walang komento:
Mag-post ng isang Komento