PANULAT SA LABAS NG MUNDO
ni Greg Bituin Jr.
(“US scientists from NASA spend untold sums to develop a pen that could write in weightlessness in space. Russian solution: use pencil.” Ito ang sinipi ko mula sa isang magasin at itinala ko sa aking lumang notbuk, na nahalungkat kong muli, at ngayo’y ginawan ko ng tula.)
Minsan sa magasin ay aking nabasa:
Nagpilit lumikha ng ‘sang klaseng pluma
Itong mga Amerikanong syentista
Na pawang nagtatrabaho dun sa NASA.
Gumugol ng napakalaking halaga
Sa misyong ito ang bansang Amerika
Pagkat nais nilang maimbentong pluma
Makasulat sa labas ng atmospera.
Sa daigdig ay malakas ang grabidad
Anumang ipukol agad bumabagsak
Sa labas ng mundo’y kayhina ng hatak
Kaya ang pluma’y di agad makasulat.
Sa suliranin ang Ruso’y nanorpresa
Agad nilutas ang nasabing problema
Paggamit ng lapis ang solusyon nila
Maraming natuwa sa pagkaresolba.
Sa lapis ay di na problema ang tinta
Di gaya ng ninanais nilang pluma
Payo pag sila’y nasa kalawakan na
Ay tiyakin laging maydalang pantasa.
Pangyayaring ito pag pinagnilayan
May mabuting aral na pinatunguhan
Komplikadong problema’y malulunasan
Basta’t mataman nating pag-iisipan.
Sampaloc, Maynila
Hulyo 4, 2008
Walang komento:
Mag-post ng isang Komento