Ang magandang si Jean ng aming publikasyon

ANG MAGANDANG SI JEAN NG AMING PUBLIKASYON
ni Gregorio V. Bituin Jr.
13 pantig

una kong nakita si Jean sa publikasyon
doon siya'y nagsilbing aking inspirasyon
tatlong pagsintang tula'y inabot ko noon
sa kanya bilang paghanga't magandang layon

baguhan pa lang ako noong mangangatha
sa dyaryong pang-estudyante'y nagmamakata
katulad ko siyang staffwriter, umaakda
ng anumang assignment na pinapagawa

una kong librong bigay sa kanya'y "Lakbay-Diwa"
si Bella Angeles-Abangan ang may-akda
nagustuhan daw niya ito't natutuwa
ako nama'y ganun din, may pag-asa kaya

medyo payat siya't singkitin yaong mata
maputi ang kutis, mukha'y sadyang kayganda
pag nagkwento naman siya'y may pagkakwela
kaninuman ang puso'y matatangay niya

taon ang nagdaan, naging editor ako
niyong pang-estudyanteng magasin at dyaryo
wala na siya doon noong panahon ko
ngunit nakatago siya sa pusong ito

buntis siya noon nang huling kong mamasdan
sabi sa isip, sayang, ako'y naunahan
saan man siya ngayon, huwag pabayaan
ang kanyang pamilya, anak, puso't isipan

- circa 1995-96

Tula sa tagay 2

TULA SA TAGAY 2
ni greg bituin jr
14 pantig bawat taludtod

Ang bote'y di kayang butasin baka masugat
Dahil ang kanyang daliri'y baka magkalamat
Habang siya'y tumatagay, nagpapakabundat
Siya lang ang maestro nito, hindi ang lahat

- sinulat habang nakikipag-inuman sa BFHAI, Angono, Rizal

Tula sa tagay 1

TULA SA TAGAY 1
ni greg bituin jr
10 pantig bawat taludtod

Ginebra San Miguel ay kaysarap
Sabi ng kasamang nangangarap
Habang siya'y may inaapuhap
Ang nadampot niya ay apahap

- sinulat habang nakikipag-inuman sa BFHAI, Angono, Rizal

Sa Reunion ng mga Tibak

SA REUNION NG MGA TIBAK
ni Gregorio V. Bituin Jr.
13 pantig

Sa reyunyon ay muling nagkasama-sama
Mga aktibista ng dekada otsenta
Ilan ay nasa mataas na posisyon na
Sa pamahalaan nitong si Aling Gloria
Habang nasa oposisyon naman ang iba.

Programa'y nagsimula ng may pang-unawa
Para sa mga aktibistang namayapa
Nagbigay ng parangal sila sa simula
Gunita ng nakaraang may luha't tuwa
Na tumagos naman sa aking puso't diwa.

Pagkatapos noo'y naglitratuhan sila
Bumigkas ng tula'y kongresista't makata
Nagkainan, inuman at nagkantahan pa
"Ganito tayo noon" ang pamagat nila
"Paano ngayon" ang nais kong idugtong pa.

Tibak na naroo'y di lang mula otsenta
Naroroon din mula dekada sitenta
Na mahuhulaan sa puting buhok nila
Ako'y tibak nito lang dekada nobenta
Ngunit masaya ako't ako'y nakasama.

Tila ako'y nalango sa pitong serbesa
Habang nakikinig sa tulang binabasa
Ngunit pakiramdam ko ako'y lumakas pa.
Nang kami na'y lumisan ng mga kasama
Ang baon ko'y kayraming mga alaala.

Sa reyunyong iyon ay akin nang nakita
Paninindigan ko'y lalong napatibay pa
Matigas kong prinsipyo'y lalong tumigas pa
Kaya kung hanggang ngayon ako'y aktibista
Pagkat may mga aral mula sa nauna.

(Nilikha sa reyunyon ng mga aktibista na pinamagatang "Ganito Tayo Noon... 1980-1986, Kapanapanabik na reunion ng mga kalahok sa mass movement" sa Antipolo City, Disyembre 13, 2008, 10am-3pm. Ang makata'y dekada 90 naging tibak.)

ChaCha ni Gloria, Ibasura

CHACHA NI GLORIA, IBASURA
ni Gregorio V. Bituin Jr.
9 pantig, soneto

ChaCha ni Gloria, Ibasura
Sa ChaCha'y di tayo iindak
At di rin tayo pasisindak
Sa mga pakana ni pandak

Pamamahala na nga'y palpak
Ang rating na nga niya'y bagsak
Bayan pa'y dadalhin sa burak
At pinagagapang sa lusak.

ChaCha ni Gloria, Ibasura
Sa ChaCha'y di tayo sasayaw
Halina't tayo nang gumalaw
Laban sa ChaCha ng halimaw.

Halina't ChaCha'y ibasura
Ibasura na rin si Gloria!

Ang Pisong Dyaryo

ANG PISONG DYARYO
KAYANG-KAYA MO
ni Gregorio V. Bituin Jr.
7 pantig

munting dyaryo ng masa
kumuha ka ng kopya
piso lang ang pagbili
mababasa'y marami
ang pisong inambag mo
kaylaking tulong nito
nang makagawa muli
ng dyaryo kahit munti

(paalalang nakasulat sa pahayagang Taas-Kamao na pimamamatnugutan ng makata)

Lahat ng Tao'y may Karapatan

LAHAT NG TAO'Y MAY KARAPATAN

ni Gregorio V. Bituin Jr.

13 pantig bawat taludtod

tayo’y hindi dapat magpaapi na lamang

sa sinumang taong pawang mga gahaman

dapat matuto ngang sa kanila’y lumaban

pagkat mga tulad nila’y pawang iilan

lahat ng tao sa mundo’y may karapatan

na mabuhay sa mundo ng may kalayaan

‘di niya karapatang maapi ninuman

at ‘di rin karapatang mapagsamantalahan

ngunit karapatan niyang makipaglaban

at huwag mabuhay sa takot kaninuman

kaya nga maraming bayaning nagsulputan

para sa paglaya’y nakikipagpatayan

sa sama-sama’y may lakas tayo, kabayan

ipakita natin ang ating kalakasan

ating babaguhin ang bulok na lipunan

at ating dudurugin ang ating kalaban

Karapatan Natin, Ipaglaban!

KARAPATAN NATIN, IPAGLABAN!
ni Gregorio V. Bituin Jr.
13 pantig bawat taludtod

bakit dapat ipaglaban ang karapatan
gayong karapatan na iyan pagkasilang
pagkat maraming taong sumusupil diyan
ang karapatan natin ay niyuyurakan

kaya hindi tayo dapat patulog-tulog
kung ayaw nating panunupil ay tumayog
karapatan ng tao'y di dapat lumubog
pagkat karapatang ito'y dapat lumusog

karapatang magpahayag ng bawat isa
karapatang magkabahay ng bawat masa
karapatan sa trabaho ng manggagawa
karapatan sa pagkain ng maralita

malinis na hangin ay ating karapatan
malinis na tubig sa bawat mamamayan
karapatan nating huwag mapahirapan
at maging kaagapay din kaunlaran

karapatan din natin ang mag-organisa
ng mga unyon at samahang aktibista
karapatan din natin ang hanging sariwa
upang di magkasakit ang masa't manggagawa

nakaukit sa pandaigdigang pahayag
na karapatan nati'y di dapat malabag
nakaukit sa ating buto ang kalidad
nakaukit sa ating puso ang dignidad

kaya pag sinaling ang ating karapatan
tayo na mismo ang kanilang sinasaktan
pagkatao't dignidad ang niyuyurakan
kaya karapatan natin ay ipaglaban

Kapayapaan at Kaibigan

KAPAYAPAAN AT KAIBIGAN
ni Gregorio V. Bituin Jr.
11 pantig

O, maaari bang kapayapaan
Ang ating ialay sa kaibigan
Sapagkat siya ang ating sandigan
Sa mga problema'y ating hingahan.

Ang payapang puso't payapang isip
Ay isa lang ba nating panaginip?
O, kaibigan kong di ko malirip
Sa problema mo'y ano ang sasagip?

Sa ating buhay at pakikibaka
Pag kaibiga'y ating nakasama
Ay gagaan ang anumang problema
Sapagkat naririyan lamang siya.

Kahit dumaan ang anumang sigwa
Kahit ang danasin pa'y dusa't luha
Ang kanyang handog ay ligaya't tuwa
Ang kanyang alay ay diwang payapa.

O, maraming salamat, kaibigan
Sapagkat ikaw'y palaging nariyan
Di ka na mawawalay sa isipan
Hininga ko ma'y mapugtong tuluyan.

Dagok sa Mukha

DAGOK SA MUKHA
(Sa Muling Pagkapanalo ng Pambansang Kamao)
ni Gregorio V. Bituin Jr.
13 pantig

Sa muling pagsabak ng pambansang kamao
Sa ibabaw ng lona't sa pagkapanalo
Ay muli na namang tampok ang Pilipino
Sa iba't ibang bayan at sa buong mundo.

Kalaban niya'y natuliro't nataranta
Nang matamaan ang matibay raw na panga
Kalaba'y nayanig sa bawat suntok niya
Puso'y lumalaban pa, katawa'y suko na.

Kaya't agad nagbunyi itong buong bayan
Nang umayaw na itong kanyang nakalaban
Umangat ring bigla ang ka-Pilipinuhan
Sa mata ng mundo at ng mga dayuhan.

Ngunit pagbubunyi'y pansamantala lamang
Kasiyaha'y tila ba droga sa katawan
Na kailangan ng bayang nahihirapan
Upang kahit saglit lang hirap ay maibsan.

Habang suntok niya'y dumadapo sa panga
Nagpapatuloy pa rin ang hirap ng masa
Walang trabaho, at gutom pa ang pamilya
Presyo ng bilihin ay sadyang kaytaas pa

Habang sa suntok niya'y panay ang hiyawan
Sa gobyerno'y patuloy din ang kurakutan
Negosyo na pati serbisyo't karapatan
Ito'y kaytinding dagok sa mukha ng bayan.

- Disyembre 7, 2008
pagkatapos manalo ni Pacquiao laban kay Dela Hoya

Sa Mga Babasa Nito

SA MGA BABASA NITO

ni Gregorio V. Bituin Jr.
12 pantig bawat taludtod

(Introduksyon sa aklat na "Bigas, Hindi Bala, 56 Tula,
Alay Para sa Kapayapaan sa Mindanao",
na inilathala ng Aklatang Obrero noong 2008)

O, kayraming buhay na ang nangawala
Dahil sa naganap na maraming digma.
Napakarami na ng mga lumuha
Mga nangamatay, mga naulila.
Kaya ang katipunang ito ng tula
Alay ng makata sa mundong may digma
Nawa'y makamit na ang mundong payapa.

Bagamat may angking dugo, luha, tuwa
Sa bawat titik ng nariritong katha
Ang mga salita'y di nakahihiwa
Di nakasusugat ng balat ang wika
Ang wika ma'y nakagigiba ng diwa
Ito'y lalo nang gamit sa pang-unawa
Upang isip at puso'y maging payapa.

Maraming salamat sa inyo, O, madla
Sa pagtangkilik sa mga tulang katha
Nawa'y basahin ninyo't namnaming pawa
Ang naritong mga naukit na tula
Na pinaghahabi ng makatang gala.
Tanging pakiusap ko lamang sa madla
Ay huwag baguhin ang berso kong likha.

Patula ng UDHR

PATULA NG PANDAIGDIGANG
PAHAYAG NG KARAPATANG PANTAO
ni Gregorio V. Bituin Jr.
12 pantig

PAMBUNGAD

Sa ikasampu ng Disyembre ng taon
Labingsiyam, apatnapu't walo noon

Nang yaong pangkalahatang asambliya
Ng Nagkakaisang Bansa'y magkaisa

Nang pinagtibay nila't ipinahayag
Ang inakdang Pandaigdigang Pahayag

Ng Karapatang Pantao sa daigdig
Upang tao'y di basta-basta malupig.

Kasunod ng makasaysayang pahayag
Sa mga kasaping bansa'y tumatawag

Na ilathala ang nilalaman nito
At mapabasa sa mas maraming tao

Makita, maipaliwanag din naman
Sa eskwelahan at iba pang aralan

Nang walang distingsyon batay sa estado
Pulitikal ng bansa o teritoryo.

Mga kababayan, halina't tunghayan
Ang pagkakasalin ko't ang panulaan

Hinggil sa Pandaigdigang Karapatan
Ng bawat tao sa alinmang lipunan.

PREAMBULO

Yayamang pagkilala sa karangalan
Pantay, di maikait na karapatan

Ng lahat ng pamilya ng tao't bayan
Ang siyang saligan nitong kalayaan

Sa pagkamit ng lahat ng katarungan
At sa kaganapan sa sandaigdigan.

Yayamang yaong pagwawalang-bahala
Pag-aalipusta't pagbabalewala

Sa karapatang pantao'y nagbunga man
Ng gawang malupit na lumapastangan

Sa budhi ng bayan at sangkatauhan
At ang pagtatamasa ng kalayaan

Sa pagpahayag at paniwala nila
At kalayaan din mula sa pangamba

At pagnanasa ay ipinahayag na
Bilang matayog na hangarin ng masa.

Yayamang kung wala nang pagpipilian
At kailangan bilang huling takbuhan

Ang maghimagsik laban sa pang-aapi
Kaysa naman magsisi sa bandang huli

Upang tuluyan nang maipagsanggalang
Ang ating angking pantaong karapatan.

Yayamang dapat at kinakailangang
Itaguyod ang pagsulong ng ugnayang

Pakikipagkaibigan sa pagitan
Ng iba't ibang bansa't ng mamamayan.

Yayamang mamamayan ng bawat bansa
Ay nagkasundo't may pagsampalataya

Sa pangunahing karapatang pantao
Sa dangal at halaga ng bawat tao

At sa pagkakapantay ng karapatan
Ng kalalakihan at kababaihan

Nagpasyang itaguyod ang panlipunang
Pag-unlad at mas magandang pamantayan

Ng buhay sa mundong sadyang mas malaya
Sa lahat ng tao sa lahat ng bansa.

Mga kasaping Estado'y namanata
Na tutulong sa Nagkakaisang Bansa

Itaguyod ang daigdigang paggalang,
Karapatan, at batayang kalayaan.

Yayamang itong pagkakaunawaan
Ng lahat ng karapatan, kalayaan

Ay may napakalaking kahalagahan
Upang panata'y maisakatuparan

At itong Pangkalahatang Kapulungan
Ay nagpapahayag ng Pandaigdigang

Pahayag nitong Pantaong Karapatan
Bilang isa nang ganap na pamantayan

Ng lahat na ng kahanga-hangang bagay
Para sa tao't bayang nagkakaugnay

Na sa huli, ang bawat tao't lipunan
Na pinananatili sa kaisipan

Ang Pahayag na ito ay magsumikap
Sa pagtuturo't pag-aaral ng ganap

Upang itaguyod itong karapatan
Pati kalayaan sa pamamagitan

Ng maunlad na hakbang, sa pambansa man
Maging ito rin nama'y pandaigdigan

At kilalanin ng kasaping Estado
At ng tao sa kanilang teritoryo

Itong lahat ng karapatang pantao
Na dapat tamasahin ng buong mundo.

ARTIKULO 1

Lahat ng tao'y malayang isinilang
Na may pantay na dangal at karapatan

Pinagkalooban ng budhi't katwiran
Nang makitungo sa diwang kapatiran

ARTIKULO 2

Lahat ng angkop sa Pahayag na ito
Ng walang kaibhan sa anumang tipo

Lahi, kasarian, relihiyon, wika
Kulay ng balat o ibang pang-unawa

Pambansa o panlipunang pinagmulan
Pag-aari o anumang kalagayan

Walang pagkakaibang dapat malikha
Sa pulitikal, kalagayan ng bansa

O sa kinabibilangang teritoryo
O ng anumang pagtatakda ng tao.

ARTIKULO 3

Ang lahat ng tao ay may karapatan
Sa buhay, kalayaan at kaligtasan.

ARTIKULO 4

Walang sinumang dapat ipailalim
Sa pambubusabos at pang-aalipin

Ang pang-aalipin at pangangalakal
Ng alipin ay dapat nang ipagbawal

Sa lahat ng anupamang anyo nito
Pagkat sila'y mga kapwa natin tao

ARTIKULO 5

Sinuma'y di dapat dumanas ng hirap
O ng kalupitang di katanggap-tanggap

O ng anupamang mapang-aping trato
At pagpaparusang hindi makatao.

ARTIKULO 6

Sa harap ng batas ay dapat kilanlin
Lahat bilang tao saanman nanggaling.

ARTIKULO 7

Ang lahat ay pantay sa harap ng batas
Merong karapatan at lahat ay patas

Ng walang anupamang diskriminasyon
At sa batas ay may pantay na proteksyon.

ARTIKULO 8

Karapat-dapat na pambansang hukuman
Ay dapat tumulong sa pangkabuuan

Sa batayang karapatang ibinigay
Ng konstitusyon o ng batas na taglay

Laban sa mga kilos na lumalabag
Sa mga karapatang di dapat hungkag

ARTIKULO 9

Di dapat pailalim ang sinupaman
Sa mga pagdakip na di makatwiran

At sa pagkakulong o pagkakapiit
Na sa makaranas ay sadyang masakit.

ARTIKULO 10

Ang lahat ay may karapatang madinig
Ang kanyang sasabihin at kanyang panig

At matalakay anumang kanyang tindig
Sa isang patas at hayagang pagdinig

Nitong isang independyenteng hukuman
Na tinitingnang walang kinikilingan

Sa pagpapasya sa mga karapatan
At tungkuling sa balikat pinapasan

Ng taumbayan o kaya'y ng sinumang
May kasong kriminal na sa kanya'y laban.

ARTIKULO 11

Dapat ituring na walang kasalanan
Ang maysala umano at kinasuhan

Hanggang ang sala niya’y mapatunayan
Sa batas at paglilitis na hayagan

Kung saan ang kailangang garantiya
Ay nasa kanya na para sa depensa.

Walang sinuman yaong may kasalanan
Sa pagkakasalang mapaparusahan

Kung ang pagkakasala nila’y nagawa
Noong ang batas para doon ay wala

O ipatupad parusang mas matindi
Kaysa nang magawa ang salang nasabi.

ARTIKULO 12

Di dapat ipailalim ang sinuman
Sa hindi makatwirang pakikialam

Sa kanyang pribadong buhay, sa tahanan
Sa pamilya, sa pakikipaglihaman

Maging sa pagbatikos sa karangalan
Lalo na sa iniingatang pangalan.

Sa proteksyon ng batas, may karapatan
Lahat laban sa mga pakikialam.

ARTIKULO 13

Ang sinumang tao ay may karapatan
Anumang bansa ang kinaroroonan

Sa malayang pagkilos at pananahan
Sa loob ng hangganan ng bawat bayan.

Maging sa paglisan sa anumang bansa
Umalis, bumalik sa sariling bansa.

ARTIKULO 14

Ang lahat din naman ay may karapatan
Maghanap, magtamasa sa ibang bayan

At sa iba pang bahagi ng daigdig
Na magpaampon mula sa pag-uusig.

Ngunit di maipapakiusap ito
Kung ang pag-uusig ay hinggil sa kaso

Ng mga krimeng di-pulitikal mula
O sa mga gawaing salungat kaya

Sa marangal na simulaing dakila
At hangarin ng Nagkakaisang Bansa.

ARTIKULO 15

Ang nasyonalidad din ay karapatan
Ng sinumang tao sa lahat ng bayan

At walang sinumang di makatarungang
Kanyang nasyonalidad ay tatanggalan

O kaya'y pagkaitan ng karapatang
Nasyonalidad niya'y kanyang palitan.

ARTIKULO 16

Lalaki't babaeng may sapat na gulang
Ang kaibhan man nila'y di dapat hadlang

Ay may karapatang makapag-asawa
At magkaroon ng sariling pamilya

Naaangkop sa pantay na karapatan
Ang kanilang mga pag-aasawahan

Habang sila'y may relasyong mag-asawa
O kaya'y hanggang paghihiwalay nila.

Dapat lang pasukin ang pag-aasawa
Kung may malaya't ganap na pagpapasya

At pagsang-ayon ng mapapangasawa
Sa pagsasama't pagbuo ng pamilya.

Likas at batayang pangkat ng lipunan
Ang pamilya kaya dapat protektahan.

ARTIKULO 17

May karapatang mag-ari ang sinuman
Para sa sarili't kasama'y iba man.

Walang sinuman ang di-makatarungang
Aalisan ng kanyang ari-arian.

ARTIKULO 18

May karapatan lahat sa kalayaang
Mag-isip, sa budhi, o relihiyon man

Kahit sa pagpapalit ng relihiyon
O anumang paniwala niya't layon

Kalayaang ito'y maging sarili lang
Maging pampubliko o pampribado man

Relihiyon ay malayang ipahayag
Sa turo, buhay, pagsamba't pagdiriwang.

ARTIKULO 19

Malayang pananaw at pagpapahayag
Ay karapatan ng bawat mamamayan

Kasama anumang pananaw na tangan
Ng walang sinuman ang nakikialam

Maghanap, tumanggap at magbahagi man
Ng mga impormasyon at kaisipan

Sa anumang media, at wala rin namang
Mga hangganang isasaalang-alang.

ARTIKULO 20

May karapatan lahat sa kalayaan
Sa mapayapang asambliya't samahan

Di nararapat pilitin ang sinuman
Na maging kasapi ng isang samahan.

ARTIKULO 21

May karapatan lahat maging bahagi
Sa pamahalaan, direkta ma't hindi

Sa kaparaanang malayang pagpili
Ng kinatawan, anupaman ang lahi.

Lahat sa kanyang bansa'y may karapatan
Pampublikong serbisyo'y pantay na kamtan

Kalooban ng tao'y dapat batayan
Ng kapangyarihan ng pamahalaan

Na dapat maipahayag ng tuluyan
Sa pana-panahon, tunay na halalan

Na sa pamamagitan ng daigdigan
Pantay na karapatang maghalal naman

Sa kaparaanang lihim na pagboto
O sa kaparehong patakaran nito.

ARTIKULO 22

Dapat na may seguridad panlipunan
Na naaangkop na isakatuparan

Sa pamamagitan ng pag-uugnayan
Pambansa man ito o pandaigdigan

Ayon sa organisasyon at rekurso
Na siyang kaya nitong bawat Estado

Karapatan mang ito'y pang-ekonomya
Maging panlipunan man o pangkultura

Na kailangan sa dangal nitong tao
At sa pag-unlad ng kanyang pagkatao.

ARTIKULO 23

Sa trabaho, lahat ay may karapatan
Sa pagpili ng kanyang tatrabahuhan

Makatarungan, maiging kalagayan
Proteksyon kung sa trabaho'y may kawalan

Mga nagtatrabaho'y may karapatan
Sa makatarungan nilang kabayaran

Pantay na sweldo sa pantay na trabaho
At trabahong pantay sa dangal ng tao

Karapatan nilang magbuo ng unyon
Para ang interes nila'y may proteksyon.

ARTIKULO 24

Dapat may pahinga't oras na malaya
Makatwirang takda ng oras-paggawa

May karapatan din na pana-panahon
Ay magkaroon ng bayád na bakasyon.

ARTIKULO 25

May karapatan sa isang pamantayan
Ng pamumuhay na sagot sa sinuman

Para sa kalusugan at kagalingan
Ng isang tao't ng kanyang pamilya man

Kasama ang pagkain at pananamit
Paninirahan at di pagkakasakit

Kasama rin ang panlipunang serbisyo
Seguridad sa nawalan ng trabaho

Nagkasakit, nabalo't may kapansanan
Pagtanda't nagkulang sa pangkabuhayan

Pagkat ito'y pawang mga kalagayang
Di nila hawak, di nila mapigilan.

Karapatan ng mga ina at bata
Ang di-pangkaraniwang pangangalaga

Lahat ng bata'y dapat nang matamasa
Nararapat na proteksyon sa kanila

Mga batang iyon man ay iniluwal
Sa loob at maging sa labas ng kasal.

ARTIKULO 26

Edukasyon ay karapatan ng lahat
At nararapat na ito'y walang bayad

Kahit man lang ito'y sa elementarya
At maging sa pangunahing antas nila

Elementarya'y dapat kunin ng lahat
Ito'y edukasyong dapat prayoridad

Edukasyong teknikal at propesyunal
Ay dapat kunin ng mga nag-aaral

Maging ng sinuman sa pangkalahatan
Edukasyo'y dapat pantay na makamtan

Ang edukasyon ay dapat umaakay
Sa ganap na pag-unlad ng pagkamalay

At sa pagpapatibay din ng paggalang
Sa karapata't batayang kalayaan.

Itaguyod ang pagkakaunawaan
Pagpapaubaya, pagkakaibigan

Anupaman ang kanilang pinagmulan
Upang manatili ang kapayapaan.

Ang magulang ang may karapatang una
Sa edukasyong nais sa anak nila.

ARTIKULO 27

Ang buhay pangkultura sa pamayanan
Ay malayang lahukan ng taumbayan

Mga sining ay matamasang tuluyan
Maging bahagi ng pagsulong ng agham

May proteksyon din sa kapakanang moral
Pati na sa pakinabang na materyal.

Na ibinunga'y anumang kanyang akda
Sa agham, sining o panitikang likha.

ARTIKULO 28

Tao'y may karapatan sa panlipunan
Maging sa pandaigdigang kaayusan

Na mga karapatan at kalayaang
Nasaad dito'y naisakatuparan.

ARTIKULO 29

Lahat ay may tungkulin sa pamayanan
Na pag-unlad ng tao'y may kaganapan

Anumang karapatan at kalayaan
Ay may limitasyong sumasakop naman

Nang matiyak ang kaukulang paggalang
At pagkilala sa mga karapatan.

At kalayaan ng iba hanggang kamtan
Ang nararapat na pangangailangan

Sa moral at pampublikong kaayusan
At pati pangkalahatang kagalingan.

Kung salungat sa layunin at prinsipyo
Ng Nagkakaisang Bansa ang gawa nyo

Di dapat gamitin, nasasaad dito
Na karapatan at kalayaang ito.

ARTIKULO 30

Walang anumang sa Pahayag na ito
Dapat magkaroon ng kaibang kuro

O pahiwatig sa anumang Estado
Pati anumang mga pangkat o tao

Ng anumang karapatang magsagawa
Ng anumang pagkilos na maggigiba

Sa karapata't kalayaang narito
At nakaukit sa Pahayag na ito.

Tubig ay Serbisyo

TUBIG AY SERBISYO
ni Gregorio V. Bituin Jr.
7 pantig

Tubig na'y kinalakal
Pinagtubuang mahal
Nitong gahamang hangal
Na sa masa'y sumakal.

Tubig ay mahal na nga
Presyo'y nakakakuba
Kaya dapat ibaba
Pagkat maraming kawawa.

Ang tubig ay serbisyo
Huwag gawing negosyo
Ito'ng panawagan ko
At ng maraming tao.

Tubig ay karapatan
Ng bawat mamamayan
Huwag pagkakitaan
Ng sa tubo'y gahaman.

Presyo nito'y ibaba
Kundi'y dapat mawala
Silang kumakawawa
Sa nagdadaralita.

Di tayo palulupig
Sa may-ari ng tubig
Dapat silang makinig
Sa ating mga tinig.

- Disyembre 4, 2008
Seameo Innotech
Commonwealth Ave., Diliman, QC
(Dito ginanap ang konsultasyon ng Maynilad para sa kanilang pagtataas ng presyo ng tubig sa Enero 1, 2009)

Judy Ann Chan

JUDY ANN CHAN
ni Gregorio V. Bituin Jr.
12 pantig

magandang tibak na aking hinangaan
ang aking kasamang ngala'y Judy Ann Chan

kay-aliwalas ng kanyang mga ngiti
tsinita, dalaga, malambing, maputi

handa kong ialay ang iwi kong buhay
masimsim lang yaong ganda niyang taglay

siya sa akin ay isang inspirasyon
upang magpatuloy na magrebolusyon

Judy Ann Chan, aking kapwa aktibista
para sa obrero, kami'y nakibaka

pinagsamahan ang grupong Kamalayan
opisyales kami nitong kabataan

siya ang sa mundo'y aking pinangarap
na makakasama sa ligaya't hirap

ngunit kung sakaling di kaming dalawa
ako'y di mapalad, sinwerte ang iba

siya'y iingatan, ang tangi kong hiling
siyang sa puso ko'y iningatang lihim

pagbati sa iyo, Judy Ann kong sinta
kahit sandali lang, nakasama kita

- Featinean, circa 1995

Pagsumikapang Maisandig

PAGSUMIKAPANG MAISANDIG
ni Gregorio V. Bituin Jr.
11 pantig

Kung sa ating puso'y walang pag-ibig
Kapayapaan ay di mananaig
Pagsumikapan nating maisandig
Kapayapaan sa buong daigdig.

- maraming nagraraling Muslim ang sumalubong sa amin sa Brgy. Matampay, Balabagan, Lanao del Sur, Nobyembre 28, 2008
(ang tulang ito'y bahagi ng Peace Caravan ng Duyog Mindanao mula Baguio City hanggang Cotabato City, Nobyembre 21-28, 2008)

Pag Naplat ang Gulong ng Kapayapaan

PAG NAPLAT ANG GULONG NG KAPAYAPAAN
ni Gregorio V. Bituin Jr.
12 pantig

Pag naplat ang gulong ng kapayapaan
Ititigil na ba ang mga usapan
Ang magreresolba ba nito'y digmaan
O baka pwede nang magtigil-putukan?

- naplatan ng gulong ang sinasakyan namin sa Km1611, C12, sa Lanao del Sur
Nobyembre 28, 2008
(ang tulang ito'y bahagi ng Peace Caravan ng Duyog Mindanao mula Baguio City hanggang Cotabato City, Nobyembre 21-28, 2008)

Ang Lawa ng Lanao

ANG LAWA NG LANAO
ni Gregorio V. Bituin Jr.
12 pantig

Kaylinaw ng tubig sa Lawa ng Lanao
Na sa aking uhaw ay makatitighaw
Ito'y lawang nais kong makaulayaw
Na sa puso't diwa'y sadyang nakapukaw.

Payapang payapa ang Lawa ng Lanao
Marahil sapagkat siya'y humihiyaw:
"Sa kapayapaan, ako'y nauuhaw
Tanging sa uhaw ko'y ito ang titighaw."

Kung adhika nati'y ganito kalinaw
Maaakay natin ang sinumang uhaw
Sa kapayapaang sa puso'y durungaw
Lalo't tapat tayo't hindi paimbabaw.

Tila ang mensahe ng Lawa ng Lanao
Ito ma'y kaylalim ay sadyang kaylinaw:
"Ang buhay sa mundo'y hindi na papanglaw
Kung kapayapaan ang dito'y tatanglaw."

- habang tumatahak sa hiway papuntang Cotabato City mula Marawi
Nobyembre 28, 2008
(ang tulang ito'y bahagi ng Peace Caravan ng Duyog Mindanao mula Baguio City hanggang Cotabato City, Nobyembre 21-28, 2008)

Kapayapaan ay Sumainyo

KAPAYAPAAN AY SUMAINYO
ni Gregorio V. Bituin Jr.
10 pantig

Kapayapaan ay sumainyo
Sapagkat magkakapatid tayo
Alitan ay pag-usapan ninyo
Huwag sa gulo't init ng ulo
Daanin ang pagresolba nito
Ito ang aming pagsusumamo
Na tayo'y dapat magpakatao
At laging makipagkapwa-tao
Upang payapang diwa sa mundo
Ay lumaganap na ngang totoo.

- Dimaporo Gym, Mindanao State University, Marawi City
Nobyembre 27, 2008
(ang tulang ito'y bahagi ng Peace Caravan ng Duyog Mindanao mula Baguio City hanggang Cotabato City, Nobyembre 21-28, 2008)

Pag Bayan Na Ang Nanginig

PAG BAYAN NA ANG NANGINIG
ni Gregorio V. Bituin Jr.
tulang dalit

Pag bayan na ang nanginig
Halina't buhusan ng tubig
Itong magkabilang panig
Upang init ay lumamig.

- habang sumasamang bumili ng gamot sa botikang Alamina Pharmacy sa Marawi City
Nobyembre 27, 2008
(ang tulang ito'y bahagi ng Peace Caravan ng Duyog Mindanao mula Baguio City hanggang Cotabato City, Nobyembre 21-28, 2008)

Kayraming Tao sa Evacuation Center

KAYRAMING TAO SA EVACUATION CENTER
ni Gregorio V. Bituin Jr.
9 pantig

Sadyang tadhana ba'y kaylupit
Pagkat napakaraming bakwit
Na doon ay namilipit
Pagkat sa bayan sila'y gipit.

Doon sila nagsisiksikan
Silang umiwas sa digmaan
Pami-pamilya ang nawalan
Ng kani-kanilang tahanan.

Ang bahay nila'y nasunog na
Pagkat tinamaan ng bomba
Kaya't ito'y iniwanan na
Nang makaiwas sa disgrasya.

Mga bakwit ay nangangarap
Magwawakas pa ba ang hirap
Kailan daw mahahagilap
Ang kapayapaan ng ganap.

- sa isang Madrasa na ginawang evacuation center papuntang Piagapo, Lanao del Sur
Nobyembre 27, 2008
(ang tulang ito'y bahagi ng Peace Caravan ng Duyog Mindanao mula Baguio City hanggang Cotabato City, Nobyembre 21-28, 2008)

Tayo'y mga Tagaakay sa Kapayapaan

TAYO'Y MGA TAGAAKAY SA KAPAYAPAAN
ni Gregorio V. Bituin Jr.
8 pantig

Tayo'y mga tagaakay
Tungo sa kapayapaan
Upang lahat ay mabuhay
Ng nagkakaunawaan.

Di tayo basta hihimlay
Sa harapan ng digmaan
Pagkat ating iaalay
Pagkalinga't unawaan.

Ang tangan nating prinsipyo:
Bawat isa'y nangangarap
Kapayapaan sa mundo
Sa buhay natin ay maganap

Pati karaniwang tao
Na ito rin ang malasap
Mga tagaakay tayo
Tungo sa bayang pangarap.

- Mindanao State University, Marawi City
Nobyembre 27, 2008
(ang tulang ito'y bahagi ng Peace Caravan ng Duyog Mindanao mula Baguio City hanggang Cotabato City, Nobyembre 21-28, 2008)

Kapayapaan ay Batay sa Hustisya

KAPAYAPAAN AY BATAY SA HUSTISYA
ni Gregorio V. Bituin Jr.
11 pantig

Ang kahulugan ng kapayapaan
Ay di lang pagkawala ng digmaan
Kundi pagkakaroon ng katarungan
Sa puso at diwa ng sambayanan

Karapatang kumain at mabuhay
Edukasyon, trabaho at pabahay
Kalusugan, paniwala, magnilay
Ay dapat matamasa nilang tunay

Pag ang mga putok ba'y nawala na
Pag di narinig ang mga bomba
Pag nawala na ang banta ng gyera
Mga ito ba'y kapayapaan na?

May kapayapaan kung may hustisya
Sa bawat komunidad at sa kapwa.

- College of Education Mini-Theater, MSU-IIT,
Tibanga, Iligan City, Nobyembre 27, 2008
(ang tulang ito'y bahagi ng Peace Caravan ng Duyog Mindanao mula Baguio City hanggang Cotabato City, Nobyembre 21-28, 2008)

Maraming Salamat, Duyog Mindanao

MARAMING SALAMAT, DUYOG MINDANAO
ni Gregorio V. Bituin Jr.
12 pantig

Maraming salamat sa Duyog Mindanao
Pagkat nakasama ako't nakadalaw
Sa maraming lugar na isinisigaw
Ay kapayapaan sa buong Mindanao.

Maraming salamat, ako'y nakasama
Sa lakbayang itong layon ay kayganda
Nawa'y magpatuloy ang mga sumama
Sa tungkuling itong hatid ay ligaya.

Ligaya sa puso ng mga kaduyog
Saya sa damdamin ang umiindayog
Ang pangarap natin bagamat matayog
Ito'y isang misyong dapat mailuhog.

O, maraming salamat, Duyog Mindanao
Lilisan man ako sa iyong ibabaw
Pakatandaan pong isip ko'y napukaw
Sa Mindanao nawa'y muling makadalaw.

Ako'y babalik na doon sa Maynila
Taglay ang pag-asang may luha at tuwa
Nawa'y maihatid ang diwang payapa
At mensaheng ito sa mga dalita.

Napakarami pa ng mga digmaan
Na dulot ng bulok na pamahalaan
Nawa'y baguhin na pati ang lipunan
Upang magkaroon ng kapayapaan.

Kailangang sadya nitong pagbabago
At tiyakin nating magamit ang pondo
Di sa bala't kanyon, gyerang agresibo
Kundi sa pagbuti ng lagay ng tao.

Nagpapatuloy pa ang mga digmaan
Sa iba pang panig ng sandaigdigan
Ihatid din natin ang mensaheng iyan
Sa kanilang nais ng kapayapaan.

- sinimulan sa Davao International Airport, tinapos sa eroplano ng Cebu Pacific
Nobyembre 30, 2008

(Bagamat natapos ang Peace Caravan ng Duyog Mindanao mula Baguio City hanggang Cotabato City, Nobyembre 21-28, 2008. Patuloy pa ring lumikha ang makata ng tulang pangkapayapaan bagamat nag-iisa na lang siyang umuwi papuntang Maynila.)

Kapayapaan ay Ginagawa

KAPAYAPAAN AY GINAGAWA
ni Gregorio V. Bituin Jr.
9 pantig

Ang salitang "kapayapaan"
Ay sadyang napakasimple lang
Kayganda kung ito'y pakinggan
Ngunit sadyang kay-ilap naman.

Nawa'y hindi hanggang salita
Itong kapayapaang pita
Nawa'y maisulong sa gawa
At hindi lamang winiwika.

- sa aming tinuluyan pansamantala sa Phase I, Ecoland Subdivision, Davao City
Nobyembre 30, 2008
(Bagamat natapos ang Peace Caravan ng Duyog Mindanao mula Baguio City hanggang Cotabato City, Nobyembre 21-28, 2008, patuloy pa ring lumikha ang makata ng tulang pangkapayapaan habang kasama ang ilang lumahok sa Peace Caravan.)

Sa Kasamang Nagkasakit

SA KASAMANG NAGKASAKIT
ni Gregorio V. Bituin Jr.
10 pantig

Sa kapatid naming nagkasakit
Na naglakbay ding kasama namin
Nawa ikaw agad ay gumaling
At marami pa tayong gagawin
Upang atin pang palaganapin
Ang kapayapaang mensahe rin
Ng nangyaring Peace Caravan natin
Sakit mo nawa'y di na maulit.

- Ecoland, Davao City
Nobyembre 29, 2008
(Ito'y tula para sa isang kasamang naospital dahil marahil sa pagod sa Peace Caravan)

Kapayapaan at si John Lennon

KAPAYAPAAN AT SI JOHN LENNON
ni Gregorio V. Bituin Jr.
12 pantig

Ayon sa awit ng dakilang John Lennon
Bigyan ng tsansa, kapayapaan ngayon
"Give peace a chance" itong sigaw niya't misyon
Na sadyang kayganda ng taglay na layon.

- SM Davao City
Nobyembre 29, 2008
(Bagamat natapos ang Peace Caravan ng Duyog Mindanao mula Baguio City hanggang Cotabato City, Nobyembre 21-28, 2008, patuloy pa ring lumikha ang makata ng tulang pangkapayapaan habang kasama ang ilang lumahok sa Peace Caravan.)

Kahit Mapagod sa Kapayapaan

KAHIT MAPAGOD SA KAPAYAPAAN
ni Gregorio V. Bituin Jr.
12 pantig

Kahit mapagod pa sa pangangampanya
Ng kapayapaan sa maraming erya
Ay okey lang basta’t maraming sumaya
Dahil payapa na at wala nang gyera.

- sa bahay ng nag-organisa ng Duyog Mindanao habang umiinom ng kape
Davao City
Nobyembre 29, 2008
(Bagamat natapos ang Peace Caravan ng Duyog Mindanao mula Baguio City hanggang Cotabato City, Nobyembre 21-28, 2008, patuloy pa ring lumikha ang makata ng tulang pangkapayapaan habang kasama ang ilang lumahok sa Peace Caravan.)

Kaysarap ng Kapayapaan

KAYSARAP NG KAPAYAPAAN
ni Gregorio V. Bituin Jr.
10 pantig

O, kaysarap ng kapayapaan
Kung ito'y ating malalasahan
Kaytamis nitong parang pukyutan
Habang parang apdo ang digmaan.

Kung diwa nati'y mababahiran
Ng kapayapaang kaylinamnam
Ang puso nati'y masasarapan
Parang langit na ang napuntahan.

Isabay pa'y alak at pulutan
Habang tayo'y nagtatagayan
Atin talagang mararanasang
Nabusog itong puso't isipan.

Kaya magkaisa't ating tikman
Ang tamis nitong kapayapaan.

- Liza's Carinderia at Ihaw-Ihaw
Davao City
Nobyembre 29, 2008
(Bagamat natapos ang Peace Caravan ng Duyog Mindanao mula Baguio City hanggang Cotabato City, Nobyembre 21-28, 2008, patuloy pa ring lumikha ang makata ng tulang pangkapayapaan habang kasama ang ilang lumahok sa Peace Caravan.)

Kapayapaan ay Musika

KAPAYAPAAN AY MUSIKA
ni Gregorio V. Bituin Jr.
tulang siyampituhan

Ang dapat tumugtog sa masa
Ay di lang pagtigil ng gyera
Kundi kapayapaang nasa
Na may halina ng musika.
Mga nota nito'y kayganda
At sadyang nakahahalina
Ng musikang ito sa masa.

- Ecoland, Davao City
Nobyembre 29, 2008
(Bagamat natapos ang Peace Caravan ng Duyog Mindanao mula Baguio City hanggang Cotabato City, Nobyembre 21-28, 2008, patuloy pa ring lumikha ang makata ng tulang pangkapayapaan habang kasama ang ilang lumahok sa Peace Caravan.)

Sa Pagsilang ng Kapayapaan

SA PAGSILANG NG KAPAYAPAAN
ni Gregorio V. Bituin Jr.
12 pantig

Ipinagbubuntis na ng Peace Caravan
At ipinaglilihi ng buong bayan
Ang isinisigaw na kapayapaan
Isang araw nawa'y ating masilayan
Ang kapayapaan sa kanyang pagsilang.

- McArthur Highway, Matina, Davao City
Nobyembre 29, 2008
(Bagamat natapos ang Peace Caravan ng Duyog Mindanao mula Baguio City hanggang Cotabato City, Nobyembre 21-28, 2008, patuloy pa ring lumikha ang makata ng tulang pangkapayapaan habang kasama ang ilang lumahok sa Peace Caravan.)

Pagmamahal at Hustisya

PAGMAMAHAL AT HUSTISYA
ni Gregorio V. Bituin Jr.
9 pantig

Kung mapapalaganap natin
Ang pagmamahalan sa atin
At hustisya'y paiiralin
Kapayapaan ay kakamtin

- Toril, Davao City
Nobyembre 29, 2008
(Bagamat natapos ang Peace Caravan ng Duyog Mindanao mula Baguio City hanggang Cotabato City, Nobyembre 21-28, 2008, patuloy pa ring lumikha ang makata ng tulang pangkapayapaan habang kasama ang ilang lumahok sa Peace Caravan.)

Kapayapaan ay Di Dapat Humimlay

KAPAYAPAAN AY DI DAPAT HUMIMLAY
ni Gregorio V. Bituin Jr.
13 pantig

Ang kapayapaan ay di dapat humimlay
At di rin ito dapat magmistulang bangkay
Sa mga aklatan at kasunduang gabay
Kundi ito'y dapat nating mabigyang-buhay.

- Dolly's House of Seafoods
Talisay, Davao del Sur
Nobyembre 29, 2008
(Bagamat natapos ang Peace Caravan ng Duyog Mindanao mula Baguio City hanggang Cotabato City, Nobyembre 21-28, 2008, patuloy pa ring lumikha ang makata ng tulang pangkapayapaan habang kasama ang ilang lumahok sa Peace Caravan.)

Dapat Magsimula sa Atin

DAPAT MAGSIMULA SA ATIN
ni Gregorio V. Bituin Jr.
9 pantig

Dapat magsimula sa atin
Ang kapayapaang diringgin
Ng kapwa mamamayan natin.
Ito ang unang dapat gawin
At mahalaga ring tungkulin
Na nararapat nating tupdin.

- Brgy. Cogon, Digos City, Davao del Sur
Nobyembre 29, 2008
(Bagamat natapos ang Peace Caravan ng Duyog Mindanao mula Baguio City hanggang Cotabato City, Nobyembre 21-28, 2008, patuloy pa ring lumikha ang makata ng tulang pangkapayapaan habang kasama ang ilang lumahok sa Peace Caravan.)

Masama't Mabuti

MASAMA'T MABUTI
ni Gregorio V. Bituin Jr.
10 pantig

O, dapat nating pakatandaan
Walang masamang kapayapaan
At wala ring mabuting digmaan
Para sa ating bansa't lipunan.

- Bansalan, Davao del Sur
Nobyembre 29, 2008
(Bagamat natapos ang Peace Caravan ng Duyog Mindanao mula Baguio City hanggang Cotabato City, Nobyembre 21-28, 2008, patuloy pa ring lumikha ang makata ng tulang pangkapayapaan habang kasama ang ilang lumahok sa Peace Caravan.)

Di Sapilitan

DI SAPILITAN
ni Gregorio V. Bituin Jr.
11 pantig

Kapayapaan ay di sapilitan
Makakamit ito sa unawaan
Ito'y dapat nating mapag-alaman
At ibahagi sa pangkalahatan.

- Poblacion, Makilala, Cotabato
Nobyembre 29, 2008
(Bagamat natapos ang Peace Caravan ng Duyog Mindanao mula Baguio City hanggang Cotabato City, Nobyembre 21-28, 2008, patuloy pa ring lumikha ang makata ng tulang pangkapayapaan habang kasama ang ilang lumahok sa Peace Caravan.)

Makipag-usap sa Kaaway

MAKIPAG-USAP SA KAAWAY
ni Gregorio V. Bituin Jr.
9 pantig, soneto

Kung nais ng kapayapaan
Huwag lang ating kaibigan
Ang dapat nating pakikinggan
Kundi pati na ang kalaban.

Tayo'y makipagtalakayan
Kung anong pinaglalabanan
Kung bakit may mga alitan
Upang agad maresolbahan.

Kaya naman nag-aawayan
Dahil di nagkaintindihan
Ngunit kung mag-uusap lamang
May magandang patutunguhan.

Ito'y dapat maunawaan
Kung nais ng kapayapaan.

- Pagalungan, Maguindanao
Nobyembre 29, 2008
(Bagamat natapos ang Peace Caravan ng Duyog Mindanao mula Baguio City hanggang Cotabato City, Nobyembre 21-28, 2008, patuloy pa ring lumikha ang makata ng tulang pangkapayapaan habang kasama ang ilang lumahok sa Peace Caravan.)

Nakabibinging Katahimikan

NAKABIBINGING KATAHIMIKAN
ni Gregorio V. Bituin Jr.
11 pantig, soneto

Kung kahulugan ng kapayapaan
Ay ang kawalan lamang ng digmaan
Ito'y walang anumang kahulugan
Sa mga gutom at may karamdaman.

Kung kahulugan ng kapayapaan
Ay pagkaroon ng katahimikan
Dahil armas ay di na nagputukan
Ito'y sadyang nakabibingi lamang.

Magkakaroon ng kapayapaan
Di dahil tahimik na ang digmaan
Kahit kumukulo ang kalooban
Kung makakamtan na ang katarungan.

Ang nakabibinging katahimikan
Ay di pa talaga kapayapaan.

- habang tumatahak sa Buliok Rd., Pikit, North Cotabato
Nobyembre 29, 2008
(Bagamat natapos ang Peace Caravan ng Duyog Mindanao mula Baguio City hanggang Cotabato City, Nobyembre 21-28, 2008, patuloy pa ring lumikha ang makata ng tulang pangkapayapaan habang kasama ang ilang lumahok sa Peace Caravan.)

Alam Ba Natin?

ALAM BA NATIN?
ni Gregorio V. Bituin Jr.
10 pantig

Alam natin at ng karamihan
Paano ilunsad ang digmaan
Ngunit atin na bang nalalaman
Kung paano ilulunsad naman
Itong sigaw ng kapayapaan?

- naisulat sa isang stop-over malapit sa simbahan ng Ladtingan, Pikit, North Cotabato
Nobyembre 29, 2008
(Bagamat natapos ang Peace Caravan ng Duyog Mindanao mula Baguio City hanggang Cotabato City, Nobyembre 21-28, 2008, patuloy pa ring lumikha ang makata ng tulang pangkapayapaan habang kasama ang ilang lumahok sa Peace Caravan.)

Isang Salita Lamang

ISANG SALITA LAMANG
ni Gregorio V. Bituin Jr.
11 pantig

Mas mabuti'y isang salita lamang
Na panawagan ay kapayapaan
Kaysa napakarami ng salita
Na kaguluhan itong winiwika.

- Pikit, North Cotabato
Nobyembre 29, 2008
(Bagamat natapos ang Peace Caravan ng Duyog Mindanao mula Baguio City hanggang Cotabato City, Nobyembre 21-28, 2008, patuloy pa ring lumikha ang makata ng tulang pangkapayapaan habang kasama ang ilang lumahok sa Peace Caravan.)

Ang Kahalagahan ng Bawat Isa

ANG KAHALAGAHAN NG BAWAT ISA
ni Gregorio V. Bituin Jr.
10 pantig

kapayapaan ay mahalaga
kung ang bawat tao'y nakilala
itong ugnayan sa isa't isa

naunawaan ang kaisahan
nila sa lahat ng mamamayan
sa mga bayan at katarungan

at kung nadama ng bawat isa
sa buod ng puso't kaluluwa
na mahalaga ang bawat kapwa

sila'y makikitungong tuluyan
ng may respeto sa katauhan
sa kakayahan at karangalan

- Midsayap, North Cotabato
Nobyembre 29, 2008
(Bagamat natapos ang Peace Caravan ng Duyog Mindanao mula Baguio City hanggang Cotabato City, Nobyembre 21-28, 2008, patuloy pa ring lumikha ang makata ng tulang pangkapayapaan habang kasama ang ilang lumahok sa Peace Caravan.)

Kapwa'y Huwag Talikdan

KAPWA'Y HUWAG TALIKDAN
ni Gregorio V. Bituin Jr.
9 pantig, soneto

Kapwa'y huwag nating talikdan
Sila'y anumang pinagmulan
Ilunsad nati'y kapatiran
Sa ating kapwa at sa bayan.

Huwag nating lagyan ng bakod
Ang ating kapwa't tumalikod
Ang bintana'y lagyan ng tukod
Nang dumungaw ang bawat lingkod.

Sa kapwa'y huwag magkukubli
At isipin lang ay sarili.
Kapwa natin ay ikandili
Na kapayapaan ang saksi.

Kapwa natin ay huwag talikdan
At ihatid ang kapayapaan!

- St. Joseph Retreat House, Cotabato City
Nobyembre 28, 2008
(ang tulang ito'y bahagi ng Peace Caravan ng Duyog Mindanao mula Baguio City hanggang Cotabato City, Nobyembre 21-28, 2008)

Kapayapaan ang Isalubong

KAPAYAPAAN ANG ISALUBONG
ni Gregorio V. Bituin Jr.
tulang siyampituhan

Kung anumang gulo't alitan
Ay sa digmaan na humantong
Dapat bang makipagpatayan?
Karuwagan ba ang pag-urong?
Dalhin natin sa magkalaban
Kapayapaa'y isalubong
Sa kanilang gulo't alitan!

- Datu Omar Sinsuat, Cotabato City
Nobyembre 28, 2008
(ang tulang ito'y bahagi ng Peace Caravan ng Duyog Mindanao mula Baguio City hanggang Cotabato City, Nobyembre 21-28, 2008)

Bawat Sigalot ay may Tugon

BAWAT SIGALOT AY MAY TUGON
ni Gregorio V. Bituin Jr.
10 pantig

Gyera ba'y dahil sa relihiyon?
Mangwasak ba ang kanilang misyon?
Manggulo ba ang kanilang layon?
O dahil kulang sa nilalamon?

Pakiusap sa magkakalaban
Itigil na ang mga patayan
Sigalot ay dapat pag-usapan
At linangin na ang unawaan.

Ang bawat sigalot ay may tugon
Kapayapaan nawa'y magbangon
At huwag sana itong ibaon
Ng napakatagal na panahon.

Kapayapaan nawa'y mahanap
At siya'y atin nang maapuhap
Upang siya na ang lumaganap
Dito sa mundong dapat ilingap.

Kapayapaan nawa'y maglambing
Sa mamamayang himbing at gising
At sa ilulunsad niyang piging
Ay ipahayag ang kanyang sining.

O, nasaan ka, kapayapaan?
Nawa'y magpakita ka sa bayan
Dalawin mo ang sangkatauhan
At yakapin mo kaming tuluyan!

- Kadtuntaya Foundation Inc. (KFI)
Cotabato City
Nobyembre 28, 2008
(ang tulang ito'y bahagi ng Peace Caravan ng Duyog Mindanao mula Baguio City hanggang Cotabato City, Nobyembre 21-28, 2008)

Bayang Lasog

BAYANG LASOG
ni Gregorio V. Bituin Jr.
tulang siyampituhan

Pangarap natin ay kaytayog
Ngunit marapat lang iluhog
Sa bayang nagkalasog-lasog
Dahil digmaan ang dumurog.
Pangarap nati'y idudulog
Nang buong bayan ang dumumog
Sa kapayapaang kaytayog.

- Notre Dame University
Cotabato City
Nobyembre 28, 2008
(ang tulang ito'y bahagi ng Peace Caravan ng Duyog Mindanao mula Baguio City hanggang Cotabato City, Nobyembre 21-28, 2008)

Nang Igalang ang Karapatan

NANG IGALANG ANG KARAPATAN
ni Gregorio V. Bituin Jr.
tulang siyampituhan

Ipaglaban ang karapatan
Ng karaniwang mamamayan
Edukasyon, paninirahan
Relihiyon, pangkabuhayan
At iba pa'y dapat tutukan
At patuloy na ipaglaban
Nang igalang ang karapatan.

- Poblacion I, Cotabato City
Nobyembre 28, 2008
(ang tulang ito'y bahagi ng Peace Caravan ng Duyog Mindanao mula Baguio City hanggang Cotabato City, Nobyembre 21-28, 2008)

Pagrespeto sa Kapwa

PAGRESPETO SA KAPWA
ni Gregorio V. Bituin Jr.
tulang siyampituhan

Huwag gawin sa iyong kapwa
Ang sa sarili ay masama
Upang pamilya'y di lumuha
Kundi'y mapuno ng kalinga.
Huwag mong daanin sa digma
Ang pwedeng pag-usapang pawa
Bilang pagrespeto sa kapwa.

- Brgy. Salimba, Sultan Kudarat, Maguindanao
Nobyembre 28, 2008
(ang tulang ito'y bahagi ng Peace Caravan ng Duyog Mindanao mula Baguio City hanggang Cotabato City, Nobyembre 21-28, 2008)

Parang Gintong Di Mahanap

PARANG GINTONG DI MAHANAP
ni Gregorio V. Bituin Jr.
tulang siyampituhan

Kapayapaan ay kay-ilap
Parang gintong hindi mahanap
Parang pagkaing di malasap
Parang batang di nililingap.
Ngunit ito'y pinapangarap
Ng marami nang naghihirap
Gaano man ito kailap.

- Trading Post, Sultan Kudarat, Maguindanao
Nobyembre 28, 2008
(Dito nagsalubong ang mga karabanang nanggaling sa Davao at sa Iligan, na nakibahagi sa Peace Caravan ng Duyog Mindanao mula Baguio City hanggang Cotabato City, Nobyembre 21-28, 2008)

Nawa'y Di Hanggang Laway

NAWA'Y DI HANGGANG LAWAY
ni Gregorio V. Bituin Jr.
tulang siyampituhan

Nawa'y di lamang hanggang laway
Ang panawagan nating tunay
Matagal man ang paghihintay
Dapat handa tayong maglamay.
Patuloy pa tayong magsikhay
Nang makamit ang ating pakay
Pagkat ito'y di hanggang laway.

- Parang, Maguindanao,
Nobyembre 28, 2008
(ang tulang ito'y bahagi ng Peace Caravan ng Duyog Mindanao mula Baguio City hanggang Cotabato City, Nobyembre 21-28, 2008)

Paano Matutugunan?

PAANO MATUTUGUNAN?
ni Gregorio V. Bituin Jr.
tulang siyampituhan

Paano ba matutugunan
Ng dalawang naglalabanan
Ang kanilang mga alitan
At di pagkakaunawaan.
Ah, dapat nilang pag-usapan
Ang problema nila't alitan
Nang ito'y agad matugunan.

- Matanog, Maguindanao, malapit sa Matanog National High School, Nobyembre 28, 2008
(ang tulang ito'y bahagi ng Peace Caravan ng Duyog Mindanao mula Baguio City hanggang Cotabato City, Nobyembre 21-28, 2008)

Kayraming Tsekpoint

KAYRAMING TSEKPOINT
ni Gregorio V. Bituin Jr.
10 pantig

Kayraming teskpoint itong nadaanan
Habang patungo sa paroroonan
Sa bawat sulok, bawat lansangan
Tila patuloy ang sagupaan
At di pa nagtitigil-putukan.

- habang dumaraan sa hiway, Lanao del Sur, Nobyembre 28, 2008
(ang tulang ito'y bahagi ng Peace Caravan ng Duyog Mindanao mula Baguio City hanggang Cotabato City, Nobyembre 21-28, 2008)

Tambol ang Sinalubong

TAMBOL ANG SINALUBONG
ni Gregorio V. Bituin Jr.
tulang siyampituhan

Mga tambol ang sinalubong
Sa aming dinaanan doon
Na kapayapaan ang layon
Sa mahabang lakbay na iyon.
Kahit noon ay umaambon
Kita sa plakard ang pag-ayon
Kaya tambol ang sinalubong

- Brgy. Daguan, Kapatagan, Lanao del Sur
Nobymbre 28, 2008
(ang tulang ito'y bahagi ng Peace Caravan ng Duyog Mindanao mula Baguio City hanggang Cotabato City, Nobyembre 21-28, 2008)

Pagpapahalaga sa Salita

PAGPAPAHALAGA SA SALITA
ni Gregorio V. Bituin Jr.
11 pantig, soneto

Kung nais mo ng buhay na payapa
Tuparin mo ang pangako't salita
Pagkat salita mo ang iyong mukha
At ang pangako mo ang iyong sumpa.

Kaya dapat lamang pahalagahan
Yaong may mabubuting kalooban.
Sapagkat sila'y tapat sa usapan
Salita'y binibigyang katuparan.

Kung minamahalaga ang salita
Ikaw ay tiyak na kahanga-hanga
Ang dumaan man ay anumang sigwa
Tiyak na tulad mo'y di magigiba.

Payapang mundo'y ating makakamtan
Kung salita'y pinahahalagahan.

- Iligan City
Nobyembre 27, 2008
(ang tulang ito'y nilikha ng makata habang nakikibahagi sa Peace Caravan ng Duyog Mindanao mula Baguio City hanggang Cotabato City, Nobyembre 21-28, 2008)

Mekanismo ng Usapan

MEKANISMO NG USAPAN
ni Gregorio V. Bituin Jr.
14 pantig, soneto

Ang sabi ng gobernador, sa aking hinagap
Upang makamit ang kapayapaang pangarap
Dapat may bagong mekanismo sa pag-uusap
Ito ang dapat ayusin at mangyaring ganap.

Kung ang mga rebelde'y agad na papayagang
Bumalik na sa usapang pangkapayapaan
At magpalakas sila habang tigil-putukan
Ito'y pagbalewala sa mga namatayan.

Katarungan ang hanap ng mga apektado
Sino ang dapat sisihin sa digmaang ito
Ito ang dapat sagutin sa maraming tao
Pagkat nawasak na ang buhay nila sa gulo.

Pag-uusap dapat ay may bagong mekanismo
Pagkat ang dati raw ay di na uubra rito.

- Provincial Capitol, Lanao del Norte
Nobyembre 26, 2008
(ang tulang ito'y nilikha ng makata habang nakikibahagi sa Peace Caravan ng Duyog Mindanao mula Baguio City hanggang Cotabato City, Nobyembre 21-28, 2008)

Lumuluha ang Maraming Ina

LUMULUHA ANG MARAMING INA
ni Gregorio V. Bituin Jr.
10 pantig, soneto

Lumuluha ang maraming ina
Pagkat pati mga anak nila
Ay nadamay at naging biktima
At sa gyerang ito'y nagdurusa.

Nasira ang maraming taniman
Nasunog ang kanilang tahanan
Nawala pati ang kabuhayan
At pati pamilya'y namatayan.

Ang digmaan ay tila berdugo
Na sumira sa kayraming tao
Lumaganap ang maraming gulo
Gyera'y sadyang nakatutuliro.

Mga ina'y patuloy ang luha
Hibik nila'y wakasan ang digma.

- Kauswagan, Lanao del Norte
Nobyembre 26, 2008
(ang tulang ito'y nilikha ng makata habang nakikibahagi sa Peace Caravan ng Duyog Mindanao mula Baguio City hanggang Cotabato City, Nobyembre 21-28, 2008)

Alitan ay Wakasan

ALITAN AY WAKASAN
ni Gregorio V. Bituin Jr.
11 pantig, soneto

Kung sa ating puso't kaibuturan
Nagmumula yaong kapayapaan
Dapat palang masimulang linisan
Ang ating diwa, pati kalooban.

Kung malinis ang ating kalooban
Haharapin nati'y kapayapaan
Kaya kung may namumuong alitan
Gagawan ng paraang pag-usapan.

Ang isang daan sa kapayapaan
Ay paggamit ng payapang paraan
Ang anumang alitan ay wakasan
Pag-usapan ang mapagkasunduan.

Kaya't lagi nating pagsisikapan
Na bawat isa'y magkaunawaan.

- sinulat sa isang open awditoryum kasama ang mga estudyante at kabataan sa Kolambugan, Lanao del Norte, Nobyembre 26, 2008

Dapat Buhay ay Payapa

DAPAT BUHAY AY PAYAPA
ni Gregorio V. Bituin Jr.
11 pantig, soneto

Dapat sa buhay nati'y walang banta
Walang anumang alitan at digma
Dapat tamasa rin natin ang laya
Mula sa krimen, alitan at luha.

Kung anuman ang dumating na sigwa
Ay patuloy tayong magpakumbaba
Ito'y napakatamis na adhika
Upang mamuhay tayo ng payapa.

Pangarapin nating wala nang digma
Na gugulo sa ating puso't diwa
Pangarapin nating wala nang luha
Na dadaloy dahil di umunawa.

Kung kapayapaan lagi ang wika
Tao sa mundong ito'y mapayapa.

- Iligan City
Nobyembre 26, 2008
(ang tulang ito'y nilikha ng makata habang nakikibahagi sa Peace Caravan ng Duyog Mindanao mula Baguio City hanggang Cotabato City, Nobyembre 21-28, 2008)

Dili Mi Peste

DILI MI PESTE
ni Gregorio V. Bituin Jr.
11 pantig, soneto

Mula sa barko sa aming pagdating
Agad naglakbay hanggang sa mapansin
Rali sa korte sa ami'y gumising
Ang sigaw nila, "Hindi kami saging."

"Di kami pesteng dapat maispreyan
Pagkat kami'y taong may karangalan
Na dapat lang naman nilang igalang
Kami'y di mga peste sa sagingan."

Ang karabana'y agad sumuporta
Sa panawagan nila ng hustisya
Para sa mga nagkakasakit na
At sa patuloy nilang pagdurusa.

Ang mga tao'y dapat nang pakinggan
At hustisya'y igawad ng hukuman.

- sinulat ng makata sa harap ng gusali ng korte ng Cagayan de Oro habang nagrarali ang mga lumalaban sa aerial spraying sa Davao, habang ang mga ito'y nakasuot ng pulang tela sa ulo na nakasulat "Dili mi peste" na may bungo sa gitna, Nobyembre 26, 2008.

(ang tulang ito'y nilikha ng makata habang nakikibahagi sa Peace Caravan ng Duyog Mindanao mula Baguio City hanggang Cotabato City, Nobyembre 21-28, 2008)

Ang Hiling ni Muchtar

ANG HILING NI MUCHTAR
ni Gregorio V. Bituin Jr.
11 pantig

(Si Muchtar ay 13-anyos na batang lalaki at isang bakwit, taga-Pagangan, Maguindanao. Kasama siya sa Peace Caravan mula Baguio City hanggang Cotabato City, Nobyembre 21-28, 2008)

Sa lugar nila nang magkadigmaan
Pati mga bata'y naapektuhan
Marami ang nawalan ng tahanan
At nakaranas din ng kagutuman.

Kabilang dito ang batang si Muchtar
Na napaalis sa kanilang lugar
Natigil na siya sa pag-aaral
Pamilya pa niya'y gutom at pagal.

Kaya si Muchtar nang kanyang malaman
Na may ilulunsad na Peace Caravan
Siya'y sumama upang manawagan
Na wakasan ang nangyaring digmaan.

At mula doon sa lugar ng digma
Sumama sa karabanang mahaba
At naging isang tagapagsalita
Na kapayapaan ang winiwika.

Ang Peace Caravan saanman magpunta
Hinihiling niyang matigil sana
Yaong digmaang nagbigay ng dusa
Nang pag-aaral ay matapos niya.

Simpleng kahilingan ng isang bata
Nais niyang matigil na ang digma
Tulad din ng hiling ng matatanda
Upang bayan nila'y maging payapa.

Hiling ni Muchtar ay ating pakinggan
Nang makapag-aral siyang tuluyan
Kasama ang iba pang kabataan
Pagkat sila itong bukas ng bayan.

- sinulat sa barko ng Negros Navigation at tinapos sa Cagayan de Oro, Nobyembre 26, 2008.

Kapayapaan, Ipaglaban!

KAPAYAPAAN, IPAGLABAN
ni Gregorio V. Bituin Jr.
10 pantig

Maraming kay-agang namayapa
Di nakilala ang mga mukha
Pagkat naging biktima ng digma
Habang naiwan ay lumuluha.

Paano kung ang luha’y maubos
At mapalitan ito ng poot
Tiyak digmaa’y di matatapos
Pagkat gantihan itong susulpot.

Ilan sa naiwan ay kakasa
At hahawak na rin ng sandata
Nang maipaghiganti ang ama
Ang ina at ang buong pamilya.

Ngunit kung gantihan ang maganap
Ang kapayapaan na’y kay-ilap
Marami ang lalong maghihirap
Kaya nararapat nang mag-usap.

Gyerang ito’y anong pinagmulan
Digmaan ba yaong kasagutan?
O gawin dapat ay pag-usapan
Yaong sa problema’y kalutasan?

Kaytindi man yaong sakripisyo
Basta’t kapayapaan ay matamo
Sadyang napakahalaga nito
Sa ating buhay at pagkatao.

Nasa’y di simpleng katahimikan
Kundi kamtin ang kapayapaan
Sa ating buhay, puso’t isipan
Kaya atin itong ipaglaban!

- sinimulan sa Bacolod City, tinapos sa barko ng Negros Navigation
papuntang Cagayan de Oro City
Nobyembre 25-26, 2008
(ang tulang ito'y nilikha ng makata habang nakikibahagi sa Peace Caravan ng Duyog Mindanao mula Baguio City hanggang Cotabato City, Nobyembre 21-28, 2008)

Minahal na Kita, Kapayapaan

MINAHAL NA KITA, KAPAYAPAAN
ni Gregorio V. Bituin Jr.
11 pantig

Minahal na kita, kapayapaan
Tulad ng kapatid mong kalayaan
Nawa ikaw ay agad matagpuan
Ng nalulumbay kong puso’t isipan.

Nang makita kita’y tila nanginig
Ang puso kong itong nangangaligkig
O, ikaw ang nais kong makaniig
Pagkat kapayapaan ay pag-ibig.

Kapayapaan, ikaw na’y maglambing
Halika na rito sa aking piling
Pag nadama na kita ng taimtim
Ang pagtulog ko’y tiyak na mahimbing.

Ipagtatanggol kita kahit saan
Buhay ko’y alay hanggang kamatayan
Hiling ko lamang ako’y iyong hagkan
Pagkat mahal kita, kapayapaan.

- Bacolod City
Nobyembre 25, 2008
(ang tulang ito'y nilikha ng makata habang nakikibahagi sa Peace Caravan ng Duyog Mindanao mula Baguio City hanggang Cotabato City, Nobyembre 21-28, 2008)

Kayganda ng Kapayapaan

KAYGANDA NG KAPAYAPAAN
ni Gregorio V. Bituin Jr.
9 pantig, soneto

Kayganda ng kapayapaan
Habang kita’y tinititigan
Ngiti mo’y isang kasiyahan
Sa aking puso at isipan.

Ngunit kung dahil na sa digma
Magandang ngiti mo’y mawala
Puso ko’y tiyak na luluha
At isip ko’y di na payapa.

Kapayapaan ay kayganda
Pag ang problema’y naresolba
Ngiti mo’y muling makikita
At mundong ito’y liligaya.

Ngayon, ako ay nalalango
Sa ngiting tumagos sa puso.

- Iloilo City
Nobyembre 24, 2008
(ang tulang ito'y nilikha ng makata habang nakikibahagi sa Peace Caravan ng Duyog Mindanao mula Baguio City hanggang Cotabato City, Nobyembre 21-28, 2008)

Kalapati'y Kailan Dadapo?

KALAPATI’Y KAILAN DADAPO?
ni Gregorio V. Bituin Jr.
10 pantig, soneto

Kalapati’y kailan dadapo
Sa sanga ng ating diwa’t puso?
Kailan pa kaya maglalaho
Ang digmaang nakakatuliro?

Kung may di pagkakaunawaan
Ay mag-usap muna ng harapan
Ayusin ang problemang anuman
At huwag daanin sa patayan.

Kalapati’y dapat makiniig
Sa pagtatagpo ng bawat panig
At ang huning sa kanya’y marinig
Ay kapayapaan sa daigdig.

Kalapati’y dapat nang dumapo
Sa sanga ng bawat diwa’t puso.

- Iloilo City
Nobyembre 24, 2008
(ang tulang ito'y nilikha ng makata habang nakikibahagi sa Peace Caravan ng Duyog Mindanao mula Baguio City hanggang Cotabato City, Nobyembre 21-28, 2008)

Sa Bawat Digmaan

SA BAWAT DIGMAAN
ni Gregorio V. Bituin Jr.
10 pantig

Pinupulbos ng digmaang ito
Ang ating buhay at pagkatao
Na parang nagngingitngit na bagyo
At sibilyan ang dinidelubyo.

Ang digmaa’y simbigat ng bundok
Na di lahat ay kayang lumunok
Marami na ang dito’y nalugmok
Tila dumapo’y sanlibong dagok.

Ang bawat digmaan ay kay-alat
Para kang nilulunod sa dagat
Tila ka rin isdang ginagayat
Buhay natin ay puno ng sugat.

Dagat ng dugo ang sinisisid
Nitong digmaang sadyang balakid
Sa ating kapwa magkakapatid.
Digmaa’y paano mapapatid?

Bawat panig ay magtalakayan
At tiyaking magtigil-putukan
Na ang kanilang pag-uusapan
Ay usaping pangkapayapaan.

Pigilan ang anumang pagsiil
Nang mawala ang mga hilahil
Ang digmaan ay dapat matigil
Upang tagas ng dugo’y mapigil.

- Calapan, Oriental Mindoro
Nobyembre 23, 2008
(ang tulang ito'y nilikha ng makata habang nakikibahagi sa Peace Caravan ng Duyog Mindanao mula Baguio City hanggang Cotabato City, Nobyembre 21-28, 2008)

Sa Digmaan, Sibilyan ang Kawawa

SA DIGMAAN, SIBILYAN ANG KAWAWA
ni Gregorio V. Bituin Jr.
12 pantig

Nagulo na naman ang lupang pangako
At muling pumatak ang kayraming dugo
Marami na namang buhay na naglaho
Bilang ng namatay ay hindi na biro.

Di ba’t may usapang pangkapayapaan?
Sinong nagsimula at may kagagawan
Nitong nagaganap na bagong digmaan
Mga rebelde ba o pamahalaan?

Ang mga sibilyan ang siyang kawawa
Pag nagpatuloy pa itong mga digma
Nagulo ang buhay nitong matatanda
Pati pag-aaral nitong mga bata.

Kayrami na ngayon ng naghihikahos
At kanilang buhay ay kalunos-lunos.
Ang digmaang ito’y kaylan matatapos
Upang buhay nila’y kanilang maayos?

- sinimulan sa Batangas pier at tinapos sa barko patungong Calapan, Oriental Mindoro,
Nobyembre 22, 2008
(ang tulang ito'y nilikha ng makata habang nakikibahagi sa Peace Caravan ng Duyog Mindanao mula Baguio City hanggang Cotabato City, Nobyembre 21-28, 2008)

Bakit Magdidigmaan Tayo, Kapatid?

BAKIT MAGDIDIGMAAN TAYO, KAPATID?
ni Gregorio V. Bituin Jr.
13 pantig, soneto

Bakit ba tayo magdidigmaan, kapatid?
Kung buhay naman natin itong mapapatid
Pag-usapan natin ang problema’t balakid
Upang kapayapaan itong maihatid.

Bakit magdidigmaan kung mareresolba
Sa pag-uusap anumang ating problema
Sa kulay ma’t relihiyon ay magkaiba
Magkakapatid tayong di dapat magdusa.

Di ba’t kaysakit kung kapatid ay mapatay
Kaya buong panahon tayong malulumbay
Ang digmaan ba ang sukatan ng tagumpay
O sa digmaan pala’y pawang paglalamay.

Kapatid ko, halina’t pag-usapan natin
Anumang mga susulpot na suliranin.

- Maharlika Village, Taguig, Metro Manila
Nobyembre 22, 2008
(ang tulang ito'y nilikha ng makata habang nakikibahagi sa Peace Caravan ng Duyog Mindanao mula Baguio City hanggang Cotabato City, Nobyembre 21-28, 2008)

Di Normal ang Digmaan

DI NORMAL ANG DIGMAAN
ni Gregorio V. Bituin Jr.
14 pantig

Wala silang pakialam magkadigmaan man
Ang mga rebelde at itong pamahalaan
Dahil ito’y normal naman daw na kalagayan
Kahit ang nagbabalita’y pinagsasawaan.

Di normal ang digmaang laging nauulinig
Mortar, baril at bomba sa magkabilang panig
Kung sa gabi't araw ito'y laging naririnig
Apektado ang mga sibilyang nanginginig.

Nanginginig pagkat baka tamaan ng bomba
Ang kanilang bahay, kabuhayan at pamilya
Kaya bago mamatay ay nagsisilikas na
Pagkat naiipit na ng magkalabang pwersa.

Hindi normal ang digmaan pagkat nagugulo
Ang buhay ng sibilyan, ng karaniwang tao
Edukasyon at kabuhayan ay apektado
Napupunta sa bala ang pondo ng gobyerno.

Gyera’y normal ba dahil laging napapakinggan
Sa araw at gabi ang bombahan at ratratan?
Hindi maaaring maging normal ang digmaan
Dahil ang nakataya’y buhay ng mamamayan.

- Quezon Memorial Circle
Nobyembre 22, 2008
(ang tulang ito'y nilikha ng makata habang nakikibahagi sa Peace Caravan ng Duyog Mindanao mula Baguio City hanggang Cotabato City, Nobyembre 21-28, 2008)

Bigas, Hindi Bala

BIGAS, HINDI BALA
ni Gregorio V. Bituin Jr.
6 pantig

Bigas, hindi bala
Pagkain, di gyera
Mundong mapayapa
Hindi pandirigma.

Trabaho at lupa
Di dusa at luha
Kalinga’t unawa
Di banta ng digma.

- Malolos, Bulacan
Nobyembre 21, 2008
(ang tulang ito'y nilikha ng makata habang nakikibahagi sa Peace Caravan ng Duyog Mindanao mula Baguio City hanggang Cotabato City, Nobyembre 21-28, 2008)

Hindi Dugo ang Dapat Bumaha

HINDI DUGO ANG DAPAT BUMAHA
ni Gregorio V. Bituin Jr.
10 pantig, soneto

Hindi dugo ang dapat bumaha
Kundi itong ating pagkalinga
Hindi punglo sa parang ng digma
Kundi kapayapaan sa madla.

Hindi digmaan at pagbabanta
Kundi payapang puso at diwa
Hindi pagdaloy ng mga luha
Kundi pag-agos ng pang-unawa.

Hindi bala ang dapat tumagos
Sa katawan ng mga hikahos
Hindi dugo ang dapat umagos
Kundi pag-ibig sa pusong kapos.

Di ba’t mundo’y kay-ganda’t kay-ayos
Kung kapayapaa’y malulubos.

- Calumpit, Bulacan
Nobyembre 21, 2008
(ang tulang ito'y nilikha ng makata habang nakikibahagi sa Peace Caravan ng Duyog Mindanao mula Baguio City hanggang Cotabato City, Nobyembre 21-28, 2008)

Kapayapaan sa Bakwit

KAPAYAPAAN SA BAKWIT
ni Gregorio V. Bituin Jr.
tulang siyampituhan

Ang kapayapaan sa bakwit
Ay kailan kaya sasapit?
Ang buhay nila’y nasa bingit
Dahil sa digmaang kaylupit.
O, aming mahabaging langit
Hiling naming nawa’y sumapit
Ang kapayapaan sa bakwit.

- San Fernando, Pampanga
Nobyembre 21, 2008
(ang tulang ito'y nilikha ng makata habang nakikibahagi sa Peace Caravan ng Duyog Mindanao mula Baguio City hanggang Cotabato City, Nobyembre 21-28, 2008)

Halika Rito, Kapayapaan

HALIKA RITO, KAPAYAPAAN
ni Gregorio V. Bituin Jr.
10 pantig, soneto

Nais namin ng kapayapaan
Doon sa lupang ka-Mindanawan
Pagkat iyon ang makatarungan
Sa lahat doong naninirahan.

Hustisya’y nais ng mamamayan
At pagkain sa hapag-kainan
Kapayapaan, hindi digmaan,
Ang sagot at hindi karahasan.

O, nasaan ka, kapayapaan?
Tila kay-ilap mo’t di abutan
O ikaw ba’y naririyan lamang?
At abot-kamay ng mamamayan.

Halika rito, kapayapaan
At yakapin mo ang sambayanan.

- Baguio City, Nobyembre 20, 2008
(ang tulang ito'y nilikha ng makata habang nakikibahagi sa Peace Caravan ng Duyog Mindanao mula Baguio City hanggang Cotabato City, Nobyembre 21-28, 2008)

Anak ng Lumbay

ANAK NG LUMBAY

ni Gregorio V. Bituin Jr.

tulang siyampituhan

Tayong mga anak ng lumbay
Sa mundong itong binibistay
Ng maluluhong lumulustay
Ng yaman ng bayang hinalay.
Halina’t tayo nga’y magnilay
Paano gaganda ang buhay
Nating mga anak ng lumbay.

Habilin

HABILIN
tulang siyampituhan
ni Greg Bituin Jr.

Nawa'y itanim itong labi
Kaypait man buhay kong iwi
Upang diwa ko'y manatili
Sa mga kapatid sa uri.
Mamamatay akong may puri
Pagbigyan ang hiling kong iwi
Na itanim ang aking labi.

Usapang Isda

USAPANG ISDA
tulang siyampituhan
ni Greg Bituin Jr.

Usapan ng isda sa dagat
Dapat daw sila na'y mamulat
Magpapahuli ba sa lambat?
O sa mga pain kakagat?
Pating ba ang dapat mabundat?
O taong sa buhay ay salat?
Ito ang usapan sa dagat.

Aking Lunggati

AKING LUNGGATI
tulang siyampituhan
ni Greg Bituin Jr.

May bahid ng diwa ng uri
Ang inihahasik na binhi
Sa tumanang linang ng lahi
Laban sa diwang naghahari.
Payak lang ang aking lunggati
Ang iparamdam itong hapdi
Sa diwa nitong naghahari.

Di Mapapaslang ang Prinsipyo

DI MAPAPASLANG ANG PRINSIPYO
tulang siyampituhan
ni Greg Bituin Jr.

Kung ang aktibistang tulad ko
Ay papaslangin ng berdugo
Katawan lang at di prinsipyo
Ang madudurog na totoo.
Habang sakbibi ang mundo
Ng luho ng kapitalismo
Aktibista'y darami dito.

Aktibista'y Matatag

AKTIBISTA'Y MATATAG
tulang siyampituhan
ni Greg Bituin Jr.

Aktibista kaming matatag
Kami man ay nasa lagalag
Sa prinsipyo'y di lumalabag
At di basta nababagabag.
Kung ang gobyerno nati'y bulag
Dapat palitan na't ilaglag
Ng aktibistang matatatag.

Salimuot ng Buhay

SALIMUOT NG BUHAY
tulang siyampituhan
ni Greg Bituin Jr.

Buhay nati'y masalimuot
Na kaylalim tulad ng laot
May kasiyahan at may gusot
May mapagbigay, may madamot.
Saan pa ba tayo susuot
Kung tayo pa'y palambot-lambot
Sa buhay na masalimuot.

Parehas Bang Lumaban?

PAREHAS BANG LUMABAN?
tulang siyampituhan
ni Greg Bituin Jr.

Ang di raw parehas lumaban
Ay duwag ngunit tuso naman
Wala raw ibang nalalaman
Kundi ang iba't malamangan.
At dapat niyang pagpasyahan
Kung lalamangan ang kalaban
O paparehas pa sa laban?

Ang Pahamak

ANG PAHAMAK
tulang siyampituhan
ni Greg Bituin Jr.

Kung sa kahinaan ng iba
Ikaw ay mapagsamantala
Talagang kasumpa-sumpa ka
Sa mundong itong pulos dusa.
Ang tulad mo'y nakamaskara
Nakangiti nga'y pahamak pa
Sa pinanghihinaang iba.

Dahilan at Paraan

DAHILAN AT PARAAN
tulang siyampituhan
ni Gregorio V. Bituin Jr.

Kayraming paraa’t dahilan
Ng gawaing ginagampanan
Pati sa mga katungkulan
Natin sa kapwa at sa bayan.
Ang palasak na kasabihan:
Pag ayaw, kayraming dahilan
Pag gusto, kayraming paraan.

Sugat sa Kalamnan

SUGAT SA KALAMNAN
tulang siyampituhan
ni Gregorio V. Bituin Jr.

May sugat ang ating kalamnan
Sa buod ng ating katawan
Ito raw ang sakit ng bayan
Nagwawasak sa katauhan.
Tangi raw nitong kalunasan
Ay pagbabago ng lipunan
Upang gumaling ang kalamnan.

Piging ng Isang Sandali

PIGING NG ISANG SANDALI
tulang siyampituhan
ni Gregorio V. Bituin Jr.

Ako'y siyang-siya sa piging
Nang sandali kang makapiling
Puso ko'y tila nagniningning
Anong ngalan mo, miss malambing?
At nang umalis ka sa piling
Puso ko'y parang inilibing
At tila napaslang sa piging.

Ugnayan ng Salapi

UGNAYAN NG SALAPI

ni Gregorio V. Bituin Jr.

11 pantig

Tawag sa takbo't ugnayan ng kwarta

Kung susuriin ay magkakaiba

"Pamasahe" sa dyip na pamasada

"Sukli" naman sa salaping sumobra

"Sweldo" ang bayad ng kapitalista

"Bale" ang sahod na hiniram muna

"Utang" naman pag nanghiram ng pera

"Renta" ang bayad sa nagpapaupa

"Tip" naman sa magandang serbidora

Sa estudyante nama'y "matrikula"

Kinita naman ng naglako'y "benta"

O kaya'y simpleng "bayad" sa tindera.

"Pantaya" naman doon sa karera

Sa balasador ay "tong" sa baraha

Sa kanto nama'y "atik" at "datung" pa

"Lagay" pag sa ilalim na ng mesa.

Ganito ang takbo ng ating pera

Palipat-lipat sa kamay ng iba

Magkano man ang halaga ng kwarta

Mahalaga'y tama ang iyong kwenta.

Mga Salitang Kurakot

MGA SALITANG KURAKOT
ni Gregorio V. Bituin Jr.
11 pantig

Ayon sa "Corruptionary" na libro
Maraming ambag sa bokabularyo
Ito umanong gobyernong Arroyo
Atin ngang alamin ang ilan dito:

"Lagay" upang maayos ang aberya
At ang nag-aayos nito'y "eskoba"
Kay Balagtas, sila ang palamara
Bibilhin kahit ang puri ng kapwa.

Ang tawag sa perang suhol ay "gobya"
O kaya'y "tong", tulad ng sa baraha
"Kalabit-hingi" ang tawag sa iba
At "Ninoy" ang paboritong hingin pa

Abogado mo'y ang nakalarawan
Sa perang nasa pitaka mong tangan
Si Roxas yaong nasa isangdaan
Si Macapagal sa dalawangdaan

At ang salapi namang kalakihan
Ay si Ninoy naman sa limandaan
Ngunit may mas matitindi pa riyan
Ito'y kung milyones na ang usapan.

Kurakutan ay di lang barya-barya
Dinarambong ay milyones na pala
Kaya kung bokabularyo'y kulang pa
Ay tanungin mo rin si Jun Lozada.

(Ang librong "Corruptionary" ay inilunsad noong Abril 7, 2008.)

Sambahin ang Pera Mo

SAMBAHIN ANG PERA MO
ni Gregorio V. Bituin Jr.
11 pantig

Sadyang makapangyarihan at hari
Itong tinatawag nating salapi
Kayang alipinin anumang lahi
At kawawain ang kalabang uri.

Bungkos lamang ito ng papel, di ba?
Ngunit naging makapangyarihan na
Mabibili man kahit kaluluwa
May bayad kahit puri ang ibenta.

Di ba't kawalan nito ang dahilan
Ng maraming sadlak sa kahirapan?
At kung walang salapi ang sinuman
Ay tiyak na aapihing tuluyan!

Kaya ito ngayon ang sinasamba
Ng mga pinuno, maging ng masa
Diyos ba ito ng kapitalista
At bathala ng mapagsamantala?

Dahilan din nitong kayraming gulo
Ay ang salaping diyos na sa mundo
Na bumubuhay sa kapitalismo
Pati sa mga tusong pulitiko.

Dahil sa salapi'y nagpapatayan
Magkapatid o magkamag-anak man
Basta't merong salapi'y tumatapang
Kongreso't husgado'y binabayaran.

Kung sakaling mabago na ang mundo
Kasama nating papawiin dito
Ay ang perang diyos-diyosang ito
Na mapang-api sa kayraming tao.

Kaibhan ng Bansa't Lipunan

KAIBHAN NG BANSA'T LIPUNAN
ni Gregorio V. Bituin Jr.
9 pantig

Magkatumbas at iisa lang
Ito raw bansa at lipunan
Pareho raw ng kahulugan
Pagkat turo sa paaralan.

Ngunit ang ganitong akala
Kung susurii'y mali pala
Silang dalawa'y magkaiba
Mali ang turo sa eskwela.

Kung pakasusuriin lamang
Matatalos mo ang kaibhan
Di pareho ang katangian
Nitong bansa't nitong lipunan.

Lipunan pag iyong nilimi
Bumuo'y iba-ibang uri
Habang ang bansa pag sinuri
Binubuo ng isang lahi.

Ang pagiging magkababayan
Ay sadyang walang kinalaman
Sa sistema nitong lipunan
At sa loob ng pagawaan.

Di matawag ang bansang ito
Na lipunang kapitalismo
Kundi bansa ng Pilipino
Ang siyang tawag natin dito.

Herodes 38:45

HERODES 38:45
(Mula sa isang pelikula ni Eddie Garcia)
tula ni Gregorio V. Bituin Jr.
10 pantig

Nang nakatutok sa kanyang ulo
Ang hawak na baril ng berdugo
Libro ang kinuha ng maestro
Upang basahin ang isang berso.

Sa libro ni Herodes umano
Ay nasusulat ang isang berso
Nasa kapitulo trenta'y otso
At bersikulo kwarenta'y singko

"Pag hinanap mo ang kamatayan
Ito'y tiyak mong matatagpuan."
Sabay bunot ng nakapalaman
Sa aklat kaya nagkaputukan.

Sa libro ay nakalagay pala
Ang kwarenta'y singkong baril niya
Iyon ay binunot pagkabasa
At ang berdugo'y agad tumumba.

Ang bersong iyon ay di nawala
Di nawaglit sa aking gunita
Kaya sa panahon ng paglikha
Ay ginawan ko iyon ng tula.

Pinepeste ng Mahal na Kuryente

PINEPESTE NG MAHAL NA KURYENTE
ni Gregorio V. Bituin Jr.
10 pantig

Tubo ang laging nasa kukote
Ng namamahala sa kuryente
Iniisip lang nila'y sarili
At sa taumbaya'y walang paki.

Sa Meralco'y dapat nang masabi
Salamat at may ilaw sa gabi
At araw-araw ay may kuryente
Ngunit presyo nito'y sadyang grabe!

Ano kaya kung isabotahe?
Lider nito'y lagyan ng boltahe?
Di kaya magmura ang kuryente?
O tayo muna'y maghunos-dili?

Ang masa'y talagang pinepeste
Ng taas ng presyo ng kuryente.

Pamurahin ang Kuryente

PAMURAHIN ANG KURYENTE
ni Gregorio V. Bituin Jr.
10 pantig

O, sobrang mahal na ng kuryente
At kaming dukha ang nadadale
Gobyerno'y dapat tumulong dine
Pagkat tayo'y kanilang botante.

Sa kongresista, mga alkalde
Sa senador at sa presidente
Kayo pa ba sa baya'y may silbi?
Aba'y pamurahin ang kuryente!

Sa kababaihan, anluwagi
Manggagawa, magsasaka, sastre
Lahat ng sektor, at estudyante
Magkaisa't nang ating masabi:

Kung hindi ninyo diringgin kami
Kayo pala'y sadyang walang silbi!

Wasakin ang Tanikala

WASAKIN ANG TANIKALA
ni Gregorio V. Bituin Jr.
10 pantig

Araw-araw kayong gumagawa
Ngunit bakit kayo pa'y kawawa
Laging di binabayarang tama
Yaong presyo ng lakas-paggawa.

Kayong sa ekonomya'y lumikha
Itong batbat ng hirap at luha
Ngunit turing sa inyo'y dakila
Pagkat kayo ang mapagpalaya.

Ngayon, kapitalismo'y may banta
Kaharap na krisis ay lalala
Tiyak tatamaan kayong lubha
Pipigaing lalo ang paggawa.

O kaya'y trabaho nyo'y mawala
Sa krisis na sila ang maysala
Labanan ang anumang pakana
Bago hirap sa inyo'y bumaha.

Manggagawa sa lahat ng bansa
Katubusa'y nasa kamay nyo nga
Magkaisa kayo't kumawala
Sa pagkagapos sa tanikala.

O, masisipag na manggagawa
Sa mundong itong nagdaralita
Wasakin na yaong tanikala
Upang uri'y tuluyang lumaya.

Ang Binibini sa Taksi

ANG BINIBINI SA TAKSI
ni Gregorio V. Bituin Jr.
soneto, 9 pantig

Kaybini't nakabibighani
Ng nakita kong binibini
Kaya ako'y biglang nawili
Na pagmasdan siyang maigi.

Siya'y nakasakay sa taksi
Habang lulan ako ng dyipni
Nang ngitian ko ang mabini
Aba'y ngiti rin yaong ganti!

At tumibok ang pusong ire
Sa kayganda kong binibini
Siya'y nais kong maging kasi
Ngunit nawala na ang taksi.

O, humibik ang pusong saksi
Magkikita pa kaya kami?

Libog at Torero

LIBOG AT TORERO
tulang siyampituhan
ni Gregorio V. Bituin Jr.

Nais ba ng babaeng ito
Sa birhaws na pinuntahan ko
Na siya'y nakikipagtoro
Sa kapareha niyang brusko?
Anong klaseng sistema ito
Na kalibugan ang negosyo
Na babae'y nais matoro?

Negosyo ng Ago-go

NEGOSYO NG AGO-GO
(sa magandang agogo-dancer)
tulang siyampituhan
ni Gregorio V. Bituin Jr.

Nais ba ng mga ago-go
Na pinanonood ng tao
Habang sumasayaw ng todo
Kahit munti ang saplot nito?
Katawan ba'y ninenegosyo
Pagkat hirap silang totoo
Kaya't pinasok mag-ago-go?

Labanan ang Pang-aabuso

LABANAN ANG PANG-AABUSO
tulang siyampituhan
ni Gregorio V. Bituin Jr.

Labanan ang pang-aabuso
Sa babae't sa kapwa tao
Ng bulok na sistemang ito
Na tubo ang laging motibo.
Pinagtutubuan ang tao
Sa mundong ginawang impyerno
Nitong mga mapang-abuso.

Anong Silbi ng Digmaan

ANONG SILBI NG DIGMAAN
tulang siyampituhan
ni Gregorio V. Bituin Jr.

Ano bang silbi ng digmaan
Kundi maramihang patayan
Karahasan ba'y kasagutan
Sa mga problema ng bayan?
Kayraming pamilyang nawalan
Ng mahal nila't nag-iyakan
Dahil sa salot na digmaan!

Serbisyo'y Huwag Gawing Negosyo

SERBISYO'Y HUWAG GAWING NEGOSYO
tulang siyampituhan
ni Gregorio V. Bituin Jr.

Ating karapatang pantao
Ang bawat batayang serbisyo
Kaya dapat igalang ito
At ibigay sa mga tao.
Hindi dapat gawing negosyo
Pagkat lahat ito'y serbisyo
At karapatan din ng tao.

Wakasan ang Kapitalismo

WAKASAN ANG KAPITALISMO
tulang siyampituhan
ni Gregorio V. Bituin Jr.

Di sistemang kapitalismo
Ang dapat manaig sa mundo
Ito'y lipunan lang ng tuso
At sa mandarayang negosyo.
Kung nais nati'y pagbabago
Halina't magsama-sama tayo
Wakasan ang kapitalismo!

Magkaibang Gusto

MAGKAIBANG GUSTO
tulang siyampituhan
ni Gregorio V. Bituin Jr.

Magkamal ng tubo ang gusto
Nitong kapitalistang tuso
Habang itong mga obrero
Nais ay sahod sa trabaho.
Silang magkatunggaling ito
Ay magkaiba ang motibo
Upang makamit yaong gusto.

Wala Pala Ako Kahit Katabi Mo

WALA PALA AKO KAHIT KATABI MO
ni Gregorio V. Bituin Jr.
8 pantig

Inamin mong ako'y wala
Kahit tayo'y magkasama
Sa aki'y walang mapala
Kundi pasakit at dusa.

Ikaw lamang ang adhika
Ng puso kong sumisinta
Kaya ako na'y lumuha
Katabi mo'y wala pala

Ramdam ko'y kaawa-awa
Walang silbi ang pagsinta
Puso't diwa ko'y nawala
Ako ngayo'y nasa dusa.

Ako'y wala nang magawa
Kung ang tingin mo'y ganyan na
Ikaw na'y pinalalaya
Nang may mapala ka, sinta.

O, ikaw man ay nawala
Tandaan mong mahal kita.

Sa Dibdib ng Lintik

SA DIBDIB NG LINTIK
tulang siyampituhan
ni Gregorio V. Bituin Jr.

Ako'y itinuring na lintik
Ng ama ng mutyang katalik
Ngunit sinta ko'y laging sabik
Siyang kaysarap ngang humalik.
Ngayon ngang gabing kaytahimik
Sa dibdib ko siya humilik
Nahimbing katabi ang lintik.

Tatlong Uri ng Napiit

TATLONG URI NG NAPIIT
tulang siyampituhan
ni Gregorio V. Bituin Jr.

Tatlong uri'y nasa piitan
Yaon daw walang kasalanan
Yaong may sala't hinatulan
At yaong takot mangatwiran.
Alin ka man sa tatlong iyan
Magpakabuti kang tuluyan
Nang makalaya sa piitan.

Diskriminasyon at Losyon

DISKRIMINASYON AT LOSYON
tulang siyampituhan
ni Gregorio V. Bituin Jr.

Kaytindi ng diskriminasyon
Kahit sa patalastas doon
Sa dyaryo, radyo't telebisyon
Upang pumuti ka'y mag-losyon.
Maputi'y gumanda ang layon
At kayumanggi'y pangit doon.
Di ba't iya'y diskriminasyon?

Puno at Bunga

PUNO AT BUNGA
tulang siyampituhan
ni Gregorio V. Bituin Jr.

Ang bunga'y ang iyong ginawa
At dahon lamang ang salita
Itong sanga yaong adhika
Habang ugat nama'y panata.
Ang buong puno'y siyang diwa
Kasama ng katas at dagta
Ng bungang nais mong mangata.

Sakit na Matindi

SAKIT NA MATINDI
tulang siyampituhan
ni Gregorio V. Bituin Jr.

May sakit pa kayang titindi
Kung mawawala ka sa tabi
Sabik ako sa iyong pisngi
At labing ayaw kong iwaksi.
Hiling ko't nais kong mangyari
Lagi kang nasa aking tabi
Nang sakit ko'y di na tumindi.

Dayukdok sa Usok

DAYUKDOK SA USOK
tulang siyampituhan
ni Gregorio V. Bituin Jr.

Bakit sa bisyo ninyong usok
Ay tila kayo'y nadayukdok
Kapara nito'y hanging bulok
O tambutsong sumusulasok.
Kung tila titigil ang tibok
Ng puso't sumakit ang batok
Aba'y tigilan ang pausok.

Pagluhog

PAGLUHOG
tulang siyampituhan
ni Gregorio V. Bituin Jr.

Ako ngayo'y yuko ang noo
Sa harap mo'y nagsusumamo
Naninikluhod na sa iyo
Hinaing ko nawa'y dinggin mo.
Hiling kong lingapin mo ako
Ikaw na sinta ng buhay ko
Nang ako'y muling taas-noo.

Sa Gulo Kikibo

SA GULO KIKIBO
tulang siyampituhan
ni Gregorio V. Bituin Jr.

Yaon daw taong walang kibo
Ay nasa loob lang ang kulo
Kaya kung ako'y dinuduro
Ako'y di papayag yumuko.
Dahil ako na'y napasubo
Papalag na nga't di susuko
Akong di naman palakibo.

Luha'y Dugo

LUHA'Y DUGO
tulang siyampituhan
ni Gregorio V. Bituin Jr.

Dapat paluhain ng dugo
Ang sa atin ay magkanulo.
Buong samahan ay guguho
Kung merong mga maglililo.
Kaya sinumang balatkayo
Na sa atin ay magkanulo
Ay dapat lumuha ng dugo.

Kung Pumanig Sa Atin

KUNG PUMANIG SA ATIN
tulang siyampituhan
ni Gregorio V. Bituin Jr.

Dapat sa anumang digmaan
Makilala yaong kalaban
Sila'y dapat nating alisan
Nitong kakayahang lumaban.
Kung sakaling makuha naman
Sa ating panig ang kalaban
Yao'y panalo sa digmaan.

Kailan ang Kasalan

KAILAN ANG KASALAN
tulang siyampituhan
ni Gregorio V. Bituin Jr.

Kailan na ba ang kasalan
O, minumutyang kasintahan
Nais kitang makatuluyan
At magtayo na ang tahanan.
Bunga natin ng pag-ibigan
Ay tunay na kaligayahan
Nating dapat makasal naman.

Mainam Pa Sa Salapi

MAINAM PA SA SALAPI
tulang siyampituhan
ni Gregorio V. Bituin Jr.

Ang kabutihan ng ugali
Mas mainam pa sa salapi
Tinitingnang kapuri-puri
Kung ugat sa buti ang lahi.
Ang lipi'y di ikamumuhi
Wala mang gaanong salapi
Basta't kaybuti ng ugali.

Hutukin Habang Bata

HUTUKIN HABANG BATAtulang siyampituhan
ni Gregorio V. Bituin Jr.

Ang kahoy habang ito'y bata
Ituwid mong parang kandila
Pag ito'y lumaki't tumanda
Tuwirin mo at masisira.
Tulad din ng iyong alaga
Ang puso, ugali niya't diwa
Ay hutukin mo habang bata.

Upang Magkaanino

UPANG MAGKAANINO
tulang siyampituhan
ni Gregorio V. Bituin Jr.

Parang taong walang anino
Yaong mga walang katoto
Parang rosas na walang bango
Yaong mga walang trabaho.
Kaibiga'y hahanapin ko
Maghahanap din ng trabaho
Nang sa gayo'y magkaanino.

Nang si Hudas ay Madulas

NANG SI HUDAS AY MADULAS
tula ni Gregorio V. Bituin Jr.
8 pantig bawat taludtod, 13 saknong

Ilang ulit nang nadulas
Ang taong ngalan ay Hudas
Na sa mukha'y laging bakas
Ang sakit na dinaranas.

Kayraming kwentong marahas
Sa kanyang pagkadupilas
Tila laging minamalas
Itong palad niya't bukas.

Nang si Hudas ay madulas
Pilit inakyat ang taas
Nitong puno ng bayabas
Para sa dahong panglanggas.

Nang si Hudas ay madulas
Ang ilong niya'y napingas
Ngipin di'y agad nalagas
Nang tumama sa matigas.

Nang si Hudas ay madulas
Ninanakaw yaong prutas
Sa tindera ng mansanas,
Singkamas, peras at ubas.

Nang si Hudas ay madulas
Pumitlag siyang kaylakas
Nakapulupot na ahas
Ang nakita sa mansanas.

Nang si Hudas ay madulas
Natawa ang mga ungas
Pagkat salawal ay butas
At sira pa ang tsinelas.

Nang si Hudas ay madulas
Siya'y agad pinaghampas
Ng mga manang sa labas
Na ninakawan ng peras.

Nang si Hudas ay madulas
May batas na inilabas
Ang gagamit ng bolitas
Ay malalagay sa rehas.

Nang si Hudas ay madulas
Muntik na niyang mautas
Ang kasama niyang pantas
Na nais niyang madugas.

Buti't nadulas si Hudas
Habang hawak ang matalas
Na kanya sanang pang-utas
Sa namuntikanang pantas.

Lagi siyang nadudulas
Kapag di pumaparehas
Lalo na't nambalasubas
Ng kasama at kabakas.

Kawawa naman si Hudas
Pagkat laging nadudulas
Mas kawawa ang hinudas
Ng tulad niyang marahas.