WASAKIN ANG TANIKALA
ni Gregorio V. Bituin Jr.
10 pantig
Araw-araw kayong gumagawa
Ngunit bakit kayo pa'y kawawa
Laging di binabayarang tama
Yaong presyo ng lakas-paggawa.
Kayong sa ekonomya'y lumikha
Itong batbat ng hirap at luha
Ngunit turing sa inyo'y dakila
Pagkat kayo ang mapagpalaya.
Ngayon, kapitalismo'y may banta
Kaharap na krisis ay lalala
Tiyak tatamaan kayong lubha
Pipigaing lalo ang paggawa.
O kaya'y trabaho nyo'y mawala
Sa krisis na sila ang maysala
Labanan ang anumang pakana
Bago hirap sa inyo'y bumaha.
Manggagawa sa lahat ng bansa
Katubusa'y nasa kamay nyo nga
Magkaisa kayo't kumawala
Sa pagkagapos sa tanikala.
O, masisipag na manggagawa
Sa mundong itong nagdaralita
Wasakin na yaong tanikala
Upang uri'y tuluyang lumaya.
Walang komento:
Mag-post ng isang Komento