Di man pansinin sa pagyoyosibrik

DI MAN PANSININ SA PAGYOYOSIBRIK

pansin ko, walang pumapansin sa aking kampanya
laban sa upos ng yosi, dahil kakaiba ba?
bakit ako ang gumagawa, bakit di ang iba?
bakit ginagawa ko ito, para ba sa masa?

subalit kahit na ganoong walang pumapansin
patuloy pa rin ako sa niyakap na layunin
kaysa makitang bayan ay sa upos lulunurin
lalo na't isda sa laot, upos na'y kinakain

kailangang kumilos at magbigay halimbawa
isang pagbabakasakali tumulong din ang madla
na kalinisan din ng paligid ay maunawa
na di tapon dito, tapon doon ang ginagawa

baka sadyang mahina lang ako sa pagtaguyod
na upos sa kalikasan ay di nakalulugod
na baka isda sa laot sa upos na'y malunod
na walang kapupuntahan ay nagpapakapagod

hayaan n'yo na ako sa ginagawa kong ito
na sa bote'y magtipon ng upos ng sigarilyo
kapara ng ekobrik ay yosibrik ang gawa ko
adhikaing ito sa kapwa'y di naman perwisyo

- gregoriovbituinjr.
08.04.2021

Ang tula sa rali

ANG TULA SA RALI

minsan, may kredibilidad din ang nilikhang tula
pag kasama sa pakikibaka ng manggagawa
pag nakikipamuhay sa magsasaka't dalita
at sa Mendiola'y binibigkas ang tulang kinatha

madalas, may handa na akong tulang bibigkasin
isang araw bago ang rali, paksa'y aalamin
anong linya't tindig sa isyu, iyon ang sulatin
bagamat bawat tula ko'y may tugma't sukat pa rin

di ko pupurihin sa tula ang kapitalista
kundi ilantad ang kanilang pagsasamantala
di ko pupurihin ang tula sa kapitalista
kundi ilahad ang nasang panlipunang hustisya

iyan ang papel kong mahalagang ginagampanan
nasa rali man, nasa komunidad o saanman
ako'y makatang adhika'y makataong lipunan
at pagtula ko sa rali'y pagsisilbi sa bayan

- gregoriovbituinjr.

Pagbabasa

PAGBABASA

kayraming dapat basahing aklat-pampanitikan
na binili ko buwan o taon nang nakaraan
sayang kung di nababasa't naaalikabukan
at ngayong may lockdown, ito'y atupagin naman

naipong aklat ay di lang simpleng collector's item
nakatago o pandispley sa aklatang kaydilim
libro'y may buhay ding nakadarama ng panimdim
di tulad kong di agad pansin ang datal ng lagim

sa aklat ay kayraming kwentong makakasagupa
habang tayo'y minumulat ng mga manggagawa
may hinggil din sa kasaysayan ng lahi't adhika
at pagsakop ng mga makapangyarihang bansa

may klasikong akda hinggil sa bayani't pag-ibig
may mga pagtalakay din sa mga iyong hilig
pati kasaysayan ng digmaan at kapanalig
at paanong mga kalaban ay pinag-usig

may akda hinggil sa sipnayan o matematika
may sulatin sa sikolohiya't pilosopiya
may mga kwento hinggil sa nakikibakang masa
anupa't bigyan din ng panahon ang pagbabasa

- gregoriovbituinjr.
08.03.2021

Lockdown ay panahon din ng pagrerebyu

LOCKDOWN AY PANAHON DIN NG PAGREREBYU

lockdown ay panahong mabalikan ang dating gawa
panahon ng pagrerebyu ng paboritong paksa
sipnayan o matematika, di na lamang tula
na kurso sa kolehiyo'y rebyuhin muling kusa

mga teorya'y itula, gawan din ng sanaysay
number theory, game theory, ating pagaaning husay
trigonometriya, dyeyometriya'y isalaysay
lalo't bahagi na ng pang-araw-araw na buhay

bumili man sa tindahan o sumakay man ng dyip
pagbibilang ng bayad at sukli na'y mahahagip
kahit sastre'y may metro nang damit ay di masikip
sa istraktura ng gusali'y inhinyerong isip

ikwento ang mga anekdota ng sipnayanon
o mathematician, anong ginawa nila noon
anong gamit sa pyramid, sukat na sukat iyon
light years ng mga buntala'y natukoy na rin ngayon

isa pang niyakap na misyon para sa daigdig
na sipnayan ay pagaanin lalo't ito'y hilig
nang sa hinaharap, estudyante'y may makakabig
at mga problema'y malutas nang di mabibikig

laksang numero at pormula, nakalulula ba
pag padron na'y naunawaan, nakahahalina
lalo na't matematika'y kapara ng mahika
sa isipang pag nalirip ay di na magtataka

- gregoriovbituinjr.
08.03.2021

Magla-lockdown na naman

MAGLA-LOCKDOWN NA NAMAN

magla-lockdown na naman, obrero'y muling dadaing

mawawalan ng trabaho't gutom muli'y kapiling

habang kapitalista'y ngingisi-ngising balimbing

pandemya'y ginawa pang palusot sa union busting

labinglimang araw pa ang lockdown ngayong Agosto

dahil daw sa Delta variant na kaytinding totoo

tatamaan na naman nito ang mga obrero

lalo't kapitalista'y nagmamaniobrang todo

matapos ang lockdown, mga unyon na'y umaangal

pagkat union busting na'y unti-unting pinairal

papapasukin ang mga manggagawang kontraktwal

habang nganga naman ang mga obrerong regular

kalagayan sa pinapasukan ay lumulubha

pandemya ang nakitang butas ng namamahala

upang gipitin ang unyon, ang sigaw nilang sadya:

ayuda, proteksyon at trabaho sa manggagawa!

kapitalista'y huwag bigyan ng pagkakataon

na magpatuloy sa mga C.B.A. violation

dapat pang magkaisa't magpakatatag ng unyon

upang maipanalo ang kanilang laban ngayon

- gregoriovbituinjr.

* litratong kuha ng makatang gala sa pagkilos ng manggagawa sa harap ng tanggapan ng DOLE sa Intramuros, Maynila noong Hulyo 23, 2021

* balitang magpapatupad muli ng lockdown sa Metro Manila mula Agosto 6-20, 2021 

Sanggunian:

https://www.rappler.com/nation/metro-manila-placed-under-ecq-august-6-to-20-2021

https://news.abs-cbn.com/news/07/30/21/metro-manila-ecq-from-august-2021

Katapat na panawagan sa lupit ng estado

KATAPAT NA PANAWAGAN SA LUPIT NG ESTADO

sigaw ng mamamayan, ibasura ang Terror Law

katapat na panawagan sa lupit ng estado

ang dating tatlong araw sa malala nang asunto

ngayon ay labing-apat na araw, wala pang kaso

ang Terror Law ay di lamang laban sa terorista

kundi sa mamamayang may daing, nakikibaka

silang di bulag na tagasunod o sumasamba

sa isang anitong palamura at palamara

sa nasabing batas ay kayrami ngang nagpetisyon

nasa higit tatlumpung bilang ng organisasyon

samahang pangkarapatan pa ang mayorya doon

patunay na nakakatakot ang batas na iyon

puntirya'y mga pumupuna sa pamahalaan

na pangarap ay kamtin ang hustisyang panlipunan

para sa lahat, karapatang pantao'y igalang

at ipinaglalaban ang dignidad ng sinuman

"Ibasura ang Terror Law!" yaong kanilang hiyaw

pagkat sa karapatan ay nakaambang balaraw

sana'y dinggin ang sigaw nilang umaalingawngaw

dahil Terror Law ay talagang umaalingasaw

- gregoriovbituinjr.

* litratong kuha ng makatang gala sa pagkilos sa Mendiola noong Hulyo 19, 2021 bilang paggunita sa unang anibersaryo ng Terror Law sa bansa

Pagbabalik sa buhay-Spartan

PAGBABALIK SA BUHAY-SPARTAN

matapos ang halos dalawang linggong magkasama

umuwi muli sa misis sa kanilang probinsya

balik sa buhay-Spartan ang abang aktibista

tuloy sa pakikipamuhay kapiling ang masa

at nagpapakatatag pa rin sa prinsipyong taglay

na puspusang pakikibaka't simpleng pamumuhay

umuwi rin sa munting lungga't doon nagninilay

habang sa tungkuling tangan ay sadyang nagsisikhay 

laging simpleng almusal, tanghalian at hapunan

kaning sinabawan ng noodles at tuyo na naman

murang pagkaing kaya lang ng bulsa, patatagan

ah, ganyan ang pamumuhay ng makatang Spartan

ngunit masarap ang ulam pag kasama si misis

ayokong sa kahirapan ko siya'y magtitiis

nais kong masarap ang buhay niya't walang mintis

sapagkat ayokong marinig ang kanyang pagtangis

subalit sa lalawigan nila'y muling umuwi

doon ang trabaho niya't doon nananatili 

habang ako'y patuloy sa paglilingkod at mithi

nang asam na lipunang makatao'y ipagwagi

- gregoriovbituinjr.

08.02.2021

Ang maging magsasaka sa lungsod

ANG MAGING MAGSASAKA SA LUNGSOD

mabuti't nakapagpapatubo na rin sa paso

ng mga tanim na halamang kitang lumalago

di naman magsasaka ngunit nakapagpatubo

ng tanim sa lungsod na di pansin ang pagkahapo

ganyan ang iwing buhay sa nanalasang pandemya

kahit nasa kalunsuran ay maging magsasaka

magtanim ng gulay sa paso, munggo, talong, okra

at iba pa't pagsikapang alagaan tuwina

kahit ako'y lumaki man sa aspaltadong lungsod

nadama kong ang gawaing ito'y nakalulugod

tamang pagtatanim ay inaral at sinusunod

at gawaing ito sa madla'y itinataguyod

sa labas lang ng bakuran naglagay ng pananim

sa mga paso lang na mula gusali ang lilim

wala mang lupang malawak, may lupa'y pwede na rin

mahalaga'y makapagpatubo't may aanihin

di man sadya'y naging magsasaka sa kalunsuran

kahit paano'y makatulong sa pamilya't bayan

sa pandemyang ito nga'y kayrami kong natutunan:

maging malikhain at pag-aralan ang lipunan

anumang natutunan ay ibahagi sa madla

na bansa'y binusog ng magsasaka't manggagawa

na sa pawis, dugo't pagsisikap, may mapapala

sa mga kabataan, tayo'y maging halimbawa

- gregoriovbituinjr.

Gintong medalya sa larong sudoku

GINTONG MEDALYA SA LARONG SUDOKU

salamat, Hidilyn Diaz, isa kang inspirasyon

upang pagbutihin din ang aming adhika't layon

tulad ng sudoku na naka-gold medal din ngayon

di man sa Olympics, subalit dito lang sa cellphone

labinlimang sudoku puzzle ang dapat masagot

upang gintong medalya sa larong ito'y maabot

maliit man ang larangang ito'y masalimuot

tulad ng chess, sa anumang balakid nakalusot

gayunman, inspirasyon ang iyong gintong medalya

upang aming larangan ay pagbutihing talaga

noon, laksang librong sudoku'y binibili ko pa

hanggang sa paligsahan ng sudoku nga'y nanguna

iyon ay higit isang dekada nang nakaraan

sa Manila International Book Fair, paligsahan

sa sudoku ng isang aklatan at palimbagan

nang ako'y manguna't may premyo pang napanalunan

panalo ko'y dalawang daan limang libong piso

nagamit upang sa Clark airport syota'y masundo ko

na ngayon ay aking misis, salamat sa sudoku

na hanggang sa ngayon ay libangang nilalaro ko

napanalunan ma'y di ginto'y parang ginto na rin

pagkat nanguna ako sa paligsahang hangarin

salamat sa sudoku at sa iyo rin, Hidilyn

upang aming trabaho't layunin ay pagbutihin

- gregoriovbituinjr.

08.02.2021

Agosto Uno: Kamatayan ng Dalawang Pangulo

AGOSTO UNO: KAMATAYAN NG DALAWANG PANGULO 

kapwa sila unang araw ng Agosto nawala

kapwa pangulong pinamunuan ang ating bansa

kapwa makasaysayan ang panahon nilang sadya

at kapwa kinilala sa paglilingkod sa madla

panahon ng Ikalawang Daigdigang Digmaan

nang pinamunuan ni Pangulong Quezon ang bayan

habang si Cory Aquino'y naging pangulo naman

nang diktador ay pinatalsik na ng taumbayan

sila'y kinilala sa matapat na pagsisilbi

sa ating bansa't taumbayan na ang nagsasabi

namatay si Quezon sa tuberkulosis o tibi

colon cancer naman ang ikinamatay ni Cory

tuwing Agosto Uno ay inaalalang tunay

ang kanilang mga nagawa noong nabubuhay

at sa anibersaryo ng kanilang pagkamatay

tangi kong masasabi'y taas-noong pagpupugay

- gregoriovbituinjr.

08.01.2021

* Mga litrato mula sa google

Pangulong Manuel L. Quezon (Agosto 19, 1878 - Agosto 1, 1944)

Pangulong Corazon C. Aquino (Enero 25, 1933 - Agosto 1, 2009)

Sa sama-samang pagkilos

SA SAMA-SAMANG PAGKILOS

pasasalamat sa suporta n'yo, mga kasama
lalo na sa aking pagtalumpati noong SONA
bilang sekretaryo heneral ng ating samahan
naririto pa tayong matitibay pa rin naman

mabuhay kayo, isang taas-noong pagpupugay
sadyang kasangga kayo saanmang labanang tunay
dito man ay nakatalungko ako't nagmumuni
nasa diwa pa ri'y paanong sa bayan magsilbi

tuloy ang laban mula sa piitan hanggang laya
habang nakikiisa sa laban ng mga dukha
kumikilos para sa panlipunang katarungan
maitayo ang asam na makataong lipunan

gaano pa man kalayo ang ating tatahakin
at gaano man kaputik ang ating lalandasin
ay makakamtan din ang inaasam na tagumpay
dahil sa ating pagkakaisa at pagsisikhay

- gregoriovbituinjr.

* litratong kuha ng isang kasama nang lumahok sa pagkilos sa SONA ang Ex-Political Detainees Initiative (XDI)

Mensahe sa bituin

MENSAHE SA BITUIN

madalas kitang tinitingala sa kalangitan
upang magnilay at pagmasdan ang iyong kariktan
nais kitang abutin ngunit kaylayo mo naman
noon pa man, nais kitang ikwintas sa katipan

inaabangan kong lagi ang pagdatal ng gabi
nang masilayan ka habang nakaupo sa tabi
nang sa iyo'y ipanatang sa bayan magsisilbi
bituin kang paraluman sa aking guniguni

sadyang inspirasyon kayong ikinwintas sa langit
habang mga pangarap ko sa diwa'y laging bitbit
maaari bang diyan ako'y iyo ring isabit
tulad ng pangunguha ko ng bunga ng kalumpit

sa gabi-gabing pagkikita'y maraming salamat
maliban pag may unos na nagtatago kang sukat
pagmamasdan kita sa dilim kahit may habagat
habang di pa nagpapahinga ang diwa kong puyat

- gregoriovbituinjr.

* litrato mula sa google

Kagabi

KAGABI

kagabi, nasaksihan ko ang aking kamatayan
datapwat kanina lang, muli akong isinilang
nagmulat ng mata paglabas sa sinapupunan
upang umaga'y salubungin ng buong kariktan

kagabi'y isang di ko malilimutang sandali
nagkagulo na dahil sa maraming mali-mali
para bang sinuman ay talagang nagmamadali
hanggang mga tuhod at buto'y nagkabali-bali

oo, tandang-tanda ko pa yaong mga naganap
habang sa dilim, panangga'y aking inaapuhap
nahan na ang inaasahang agarang paglingap
nang pagdingasin pa ang ilawang aandap-andap

gagawin ko lahat upang mapang-api'y magapi
at katarungang panlipunan ay maipagwagi

- gregoriovbituinjr.

Pagod man ay nakikibaka

PAGOD MAN AY NAKIKIBAKA

nakita ko lamang siya sa raling dinaluhan
tila pagod sa trabaho't napaupo na lamang
habang iniharang sa init ang plakard na tangan
galing man sa trabaho, rali pa ri'y dinaluhan

sadyang nais ipakita ng nasabing obrero
ang pakikiisa sa laban, isyu at prinsipyo
na pinaglalaban ay nais nilang ipanalo
laban sa mapang-api't sistemang kapitalismo

taas-kamao sa manggagawang ito, mabuhay!
na patuloy pa ring nakikibaka, pagpupugay!
inspirasyon siya sa dedikasyon niyang lantay
nang laban ng kapwa obrero'y ipagwaging tunay

pagod man ang manggagawa'y sumusuong sa laban
upang kanyang uri'y di na mapagsamantalahan

- gregoriovbituinjr.

* litratong kuha ng makatang gala sa rali ng manggagawa sa tanggapan ng DOLE, 07.23.2021

Tulog na ng alas-siyete ng gabi

TULOG NA NG ALAS-SIYETE NG GABI

madalas, tulog na ng alas-siyete ng gabi

kailangan nang magpahinga, di tulad ng dati

nang bata pa'y ginagabing nakatambay sa kalye

ngayon nakikipagpingkian na sa guniguni

tulog na ng alas-siyete ng gabi sa papag

ipapahinga ang patang katawan sa magdamag

ngunit madaling araw gising na't napapapitlag

upang magnilay-nilay at magsulat, magpahayag

gising na ang diwa habang karimlan pa'y pusikit

nais ibangon ang katawan kahit nakapikit

sa mga taludtod at saknong na'y may hinihirit

gawa'y patibong sa akdang kalaban ng malupit

kay-agang matulog ngunit kay-aga ring bumangon

upang kunin ang talinghaga sa loob ng balon

at ngangatain upang tuluyan itong malulon

habang iginuguhit sa palad ang mga alon

- gregoriovbituinjr.

Pangunguha ng tao, ayon sa krosword

Sa 22 Pababa ng krosword na ito, akala ko DUKOT ang "pangunguha ng tao". Dahil na rin sa isyu ng mga desaparecido. Ang sagot pala ay KALAP.

Dapat yata ang tanong ay "pangunguha ng kasapi" at hindi "pangunguha ng tao". Ano sa palagay n'yo? Dahil dito, paksang ito'y ginawan ko ng tula:

PANGUNGUHA NG TAO

sa isang krosword ay tila iba ang katanungan

kaya iba rin ang naunawa nitong isipan

dahil kaya iba ang mga naging karanasan

kaya samutsari ang natatamong kahulugan

sa krosword, katanungan ay "pangunguha ng tao"

tingin ko agad ay tungkol sa desaparecido

o dinukot sa panahon ng dahas at martial law

limang titik ang sagot, DUKOT ang isusulat ko

subalit sinagot ko muna ang mga katabi

hindi DUKOT kundi KALAP pala ang sagot dini

mukhang mali ang tanong, nasabi ko sa sarili

"pangunguha ng kasapi" ang wasto, mas mabuti

kaya sa palaisipan, mag-ingat sa pagsagot

lalo't iba ang kahulugan ng KALAP sa DUKOT

bagamat hasaan ng isip ay masalimuot

na isang pang-aliw ay may aral ding mapupulot

- gregoriovbituinjr

Tumindig at manindigan

TUMINDIG AT MANINDIGAN

kaytinding sining sa facebook ni Tarantadong Kalbo
na mga dating sumasamba sa maling idolo
ngayon ay talagang nagsisitayuang totoo
upang ipakitang tumitindig sila sa wasto

nagkaisa upang labanan ang maling sistema
na siyang rason upang inosente'y madisgrasya
dahil sila'y pinagpapaslang sa utos ng Ama
ng Tokhang, na nakita ring tila tuta ng Tsina

wala ngang martial law ngunit kung umasta'y diktador
sa West Philippine Sea nga, animo siya'y bentador
lumobo ang utang ng bansa na siya'y promotor
at babagsak daw ang ekonomya kung utang pa more!

kabaluktutan ng sistema'y di dapat manaig
nagwawasak ng karapatang pantao'y mausig
pasasalamat sa lahat ng mga tumitindig
upang bayang ito'y sagipin, nagkakapitbisig

- gregoriovbituinjr.

* ctto, litrato mula sa fb

Sa bawat patak ng ulan

SA BAWAT PATAK NG ULAN

uamaga, makulimlim na naman ang kalangitan
nagbabadya na naman ng malakas na pag-ulan
naalimpungatan ako sa patak sa bubungan
na animo'y musikang dinggin mo't nagtatambulan

kagabi, umuwi ako kay misis, basang-basa
nakapayong man, sige lang, sumuong akong kusa
di nakapunta ng palengke't bibili ng isda
pagkat maraming bahagi ng lungsod ang binaha

sa facebook lamang naaantabayanan ang ulat
ayon sa balita'y tumitindi raw ang habagat
nananalasa na si Fabian sa bundok at dagat
dinaanan din niya ang mga lungsod at gubat

lumindol nitong nakaraan, ngayon nama'y bagyo
ingat lagi, mga kapatid, kasama, katoto
hayo, malalagpasan din natin ang mga ito
habang mga basang gamit ay pinatutuyo ko

- gregoriovbituinjr.

Hiyaw ng paggawa

HIYAW NG PAGGAWA

ayuda, trabaho at proteksyon sa manggagawa
sa pagkilos na ito'y panawagan at adhika
dahil sa pandemya, kayraming trabahong nawala
kinakaharap na ng pamilya'y gutom at luha

kakaibang panahon sa kakaibang labanan
at pagkakataon ng kapitalistang gahaman
upang manggagawa'y tuluyang pagsamantalahan
panahon ng pandemya'y pinauso ang tanggalan

minadaling pinatupad ang kontraktwalisasyon
gayong ang marapat ay seguridad at proteksyon
mga manggagawa'y tuluyan nilang binabaon
tulad ng pako sa kawalan, dusa'y pinalulon

likod ng manggagawa'y tinarakan ng balaraw
dahil karapatan nila'y pilit na inaagaw
"Ayuda sa manggagawa!" ito ang aming sigaw
"Trabaho, Di Tanggalan!" ito pa ang aming hiyaw

"Proteksyunan ang manggagawa!" sigaw naming sadya
lalo't sa ekonomya'y manggagawa ang lumikha
silang nakararami sa daigdig nati't bansa
ah, sana'y dinggin din naman ang tinig ng paggawa

- gregoriovbituinjr.

*  Binasa ng makatang gala sa rali ng mga manggagawa sa harap ng DOLE sa Intramuros, 07.23.2021

Nakayuko man ang maralita

NAKAYUKO MAN ANG MARALITA

ang ngitngit man nila kahit pilit itinatago

ay agad mong madarama kahit sila'y yumuko

ngunit alam mong sa laban ay di sila susuko

habang lumalaban sa maling sistema't hunyango

pagkat nahaharap sila sa banta ng ebiksyon

habang nakatira sa nilipatang relokasyon

lumang batas ang sa kanila'y ibig ipalamon

ng isang ahensya subalit di nila malulon

nagbigay ng liham, sa loob ng tatlumpung araw

dapat magbayad ang maralita sa pananahan

dahil kung hindi'y palalayasin na't itataboy

na sa lumang batas, ahensya'y may kapangyarihan

sa Departamento ng Pabahay nga'y napasugod

ang mga maralitang sa liham ay di nalugod

na basta palalayasin pag di sila sumunod

sa atas ng ahensyang sa kanila'y pipilantod

wala na ngang trabaho'y ganyan pa ang sasapitin

kahit may pandemya'y ganyan pa ang kakaharapin

ahensya ba'y walang puso't ganyan ang paplanuhin

habang dukha'y pagtatanggol ng bahay ang gagawin

- gregoriovbituinjr.

Panawagan ng maralita

PANAWAGAN NG MARALITA

matindi ang labanang kung minsan nakakapagod
subalit patuloy ang laban, di maninikluhod
kaya sigaw natin sa ahensya nang magsisugod:
"Karapatan sa pabahay ay ating itaguyod!"

"Kanselasyon ng kontrata at ebiksyon, itigil!"
maralitang sumisigaw ay di magpapapigil
lalo't sa isyu ng pabahay, sila'y nanggigigil
pagkat may bantang sila'y tanggalin, pulos hilahil

"Trabaho't Kabuhayan" ang kanilang sigaw doon
sa Departamento ng Pabahay, "Hindi Ebiksyon
sa Relokasyon!" matanggap sana'y magandang tugon
sa isyung kaharap at magwagi sa nilalayon

"Kanselasyon ng Kontrata, Hindi Makatao!"
ang pabahay ay huwag ibatay sa market value
pabahay ay karapatan, huwag gawing negosyo
panawagan ng maralita'y batay sa prinsipyo

anong tugon ng matatalino't nakapag-aral?
batay sa sistemang kapitalismong umiiral?
"Pabahay ay karapatan, huwag gawing kalakal!
ito'y panawagan ng maralitang nagpapagal

- gregoriovbituinjr.

Inuulan man sa rali

INUULAN MAN SA RALI

di rin napigilan ang maralita sa pagsuong
sa nakatakdang rali, maulan man ay nagpayong
pinakitang kahit may bagyo'y di sila umurong
upang dala nilang isyu'y kanilang maisulong

sanay sa hirap at dusa, kaharap man ay baha
tingin nila, mas mahirap kung bahay ang mawala
sumuong sa ulan upang ituloy ang adhika
na kinakaharap na isyu'y mapansin ng madla

kakanselahin daw ang kontrata sa relokasyon
sa panahon ng pandemya'y natanggap nilang hamon
aba'y bakit? wala bang puso ang ahensyang iyon?
karapatan sa pabahay ba'y balewala ngayon?

kaya nilusob ang Departamento sa Pabahay
habagat man ang sa dukha'y sumalubong na tunay
at doon pinahayag ang hinaing nila't pakay
sana'y pakinggan sila't may katugunang mahusay

- gregoriovbituinjr.

Pagtula sa lansangan

PAGTULA SA LANSANGAN

ang pagtula sa rali'y aking kinasasabikan
pagkat ito'y yakap kong tungkulin para sa bayan
kaya maraming salamat pag ako'y napagbigyan
upang magbasa ng tula sa rali sa lansangan

inaalam ko muna kung anong kanilang paksa
upang sa bawat pagtula ko'y di naman mawala
kundi nababagay sa tema o isyu ng madla
tulad ng panawagan ng kapatid nating dukha

oo, pagtula sa rali'y niyakap kong tungkulin
kapara ng mananalumpati o orador din
pinaghahandaan ang paksa't aking susulatin
naka-kompyuter o sulat-kamay ay babasahin

bumigkas ng tula sa rali'y aking pasalamat
pagkat kahit paano'y nakakatulong magmulat
tinitiyak ko lang sa isyu't tema'y di malingat
pinaghahandaan ang paksa lalo na't mabigat

- gregoriovbituinjr.

Kung manalasa muli ang unos

KUNG MANALASA MULI ANG UNOS

titigan mo ang langit, animo'y bagong umaga

ang kariktan ng paligid ay kahali-halina

puti ang mga ulap, ang panahon ay kayganda

ngunit maya-maya'y nangitim, handang manalasa

nagbabadya ang unos, matalim ang mga titig

ng langit, animo'y luluha, ramdam mo sa pintig

kung sakaling magbaha, tiyak ang pangangaligkig

kaya dapat maging alerto sa lagim at lamig

dapat lang paghandaan ang paparating na bagyo

baka ihahatid nito'y ang lagim ng delubyo

para bang digma, sa bagyo'y mapapalaban tayo

kaya pamilya'y unahing sagipin sa ganito

taon-taon na lang may nakakasagupang unos

na madalas na dinudulot ay kalunos-lunos

ang ngitngit ng kalikasan pag tuluyang nang-ulos

mga nasalanta'y parang kandilang nauupos

kaya paghandaan natin ang panibagong digma

maging malinaw ang isip, huwag matutulala

at kung kinakailangan, magtulungan ang madla

pinakamatatag na payo'y dapat maging handa

- gregoriovbituinjr.

Samutsaring balita

SAMUTSARING BALITA

samutsaring balita

ang pahatid sa madla

datapwat ano pa nga

minsan di makahuma

binabasa ang ulat

na kung saan nagbuhat

marami nga raw kalat

sa ating sapat't dagat

trapong nakipagtalo

sa kapwa pulitiko

baka kakandidato

kung ano'y binabato

mga balitang COVID

na ipinababatid

lunas ba'y ihahatid

na di dapat malingid

mga kwentong artista

at nagseseksihan pa

senador, kongresista

may nagawang batas ba

apektado ang madla

sa maraming balita

huwag lang matulala

kung sa ulat magitla

ang trapong laging palso

ay huwag nang iboto

kung maupo sa pwesto

kawawa ang bayan ko

balita'y nararapat

tunay ang isiwalat

na kumbaga sa sugat

may lunas na pang-ampat

- gregoriovbituinjr.

Kung tutula ang tulala

KUNG TUTULA ANG TULALA

pansin nila, lagi na lang akong tulala

at sa kalangitan laging nakatunganga

hinihintay bang mga mutya'y magsibaba

o inaabangan ang magandang diwata

ako'y manunulang wala sa toreng garing

na sa bawat oras animo'y nahihimbing

upang sulatin ang tulang tumataginting

kahit wala mang salaping kumakalansing

naghahabi ng mga saknong at taludtod

binibilang ang tugmang nagpapakapagod

upang magagandang layon ay itaguyod

at sa marikit na tula, masa'y malugod

bagamat itong abang makata'y tulala

ay di inaagiw ang isip na tutula

upang maihatid ang inspirasyon sa madla

tungo sa mabuting layunin at adhika

- gregoriovbituinjr.

Makasaysayang pagkakataon

MAKASAYSAYANG PAGKAKATAON

ang bawat pagtula ko sa rali'y pagkakataon

di ko dapat palagpasin, makasaysayan iyon

pagkat bihira lang ang pagtatanghal tulad niyon

dapat daluhan lalo't isa iyong imbitasyon

kaya pinaghahandaan ko ang gayong gawain

isang pambihirang pagkakataong matulain

makapagtatanghal, masasambit ang saloobin

anong nasasadiwa'y maibabahagi na rin

tutulain ang hinggil sa karapatang pantao

katarungang panlipunan, nasa diwa't prinsipyo

pagkakapitbisig ng dukha't ng uring obrero

pagbabago't pagtayo ng lipunang makatao

tulad ng isang orador na nagtatalumpati

ay bibigkasing patula ang isyu ng kauri

isyu ng manggagawa't dukhang dapat ipagwagi

tulang sistemang bulok ay di dapat manatili

taospuso kong pasasalamat sa nag-imbita

dahil abang makata'y pinagtiwalaan nila

kaya pinag-iigihan ang diwa't bawat letra

batay sa tema ng rali ang tulang mababasa

- gregoriovbituinjr.

Tsok at illustration board bilang plakard

TSOK AT ILLUSTRATION BOARD BILANG PLAKARD

tsok at illustration board lang yaong pinagsulatan

nitong panawagan ng maralita o islogan

hinggil sa karapatan nila sa paninirahan

upang karapatang ito'y talagang ipaglaban

buburahin na lang upang magamit pa sa iba

at sulatan ng ibang isyu't islogan ng masa

tulad ng pangunahing bilihin na kaytagal na

mumurahing plakard na sa dukha'y inisyatiba

dapat maging malikhain batay sa kakayahan

di madisenyo sa kompyuter dahil madalian

walang pambili ng pintura't kartolina man lang

may biglang pumutok na isyung agad raralihan

upang di mabasâ ng ulan, balutin ng plastik

nang mabasa pa rin ng masa ang islogang hibik

binahagi ang diwa ng prinsipyong sinatitik

nang maunawaan ng madla anong isyu't gibik

mumurahing plakard na gawa ng maralita

tsok at illustration board, daluyan ng diwa't luha

dahil sa hirap na dulot ng sistema't kuhila

dahil tindig ay dapat ipaunawa sa madla

- gregoriovbituinjr.

Mga aral mula sa maestro

MGA ARAL MULA SA MAESTRO

maraming aral akong natutunan sa maestro

pangunahin sa aking naging maestro'y tatay ko

kung saan natutunan kong tanganan ang prinsipyo

at kung kinakailangan ay ipaglaban ito

kayrami ko ring natutunan sa ina kong mahal

upang sa kinabukasan ay talagang magpagal

sa simpleng gawaing bahay ay di na umaangal

pagkat ito'y tungkuling bahagi ng mga aral 

gayon din sa mga naging maestro sa eskwela

tinuro'y konsepto ng pisika't matematika

paboritong dyeyometriya't trigonometriya

mga paksa't samutsaring teyorya sa siyensya

mga maestro rin ang mga bayaning kabalat

tulad ni Gat Andres na tunay ngang kagulat-gulat

"Liwanag at Dilim" ni Jacinto'y araling sukat

sabi niya, "Iisa ang pagkatao ng lahat!"

natutunan naman sa mga lider-manggagawa

ang lipunang makatao't diwang mapagpalaya

sa mga nauna sa aking lider-maralita

ay natutong bakahin ang mga tuso't kuhila

kay F.P.J. na artista nang aking kabataan

na bawat pelikula sa takilya'y sinusundan

tulad ng serye ng Panday kung anong katapangan

ay isabay sa pagpapakatao't kabutihan

sa aking mga maestro ng saknong at taludtod

at sa lahat ng aking maestrong nagpakapagod

taospusong pasasalamat po sa paglilingkod

mga turo ninyo'y dakila't itinataguyod

- gregoriovbituinjr.

Paghati ng isda

PAGHATI NG ISDA

kadalasan nga'y akin pang hinahati sa gitna

upang maging dalawa ang piprituhin kong isda

tila iyon ay nasa sampung pulgada ang haba

noon pa man ganito na ang aking ginagawa

ang unang hati, buntot man o ulo'y pang-agahan

sunod na hati naman ay para pananghalian

o kaya kung may kasama, hating kapatid naman

gayon na rin ang hatian pagdating ng hapunan

sasaluhan ko na lang ng kamatis at bagoong

o kaya'y ng okra, talbos ng kamote o kangkong

ika nga, ayos na ang buto-buto't nakaahon

na naman ang isang araw o ang buong maghapon

sadyang nakabubusog ang salu-salong kaysarap

lalo na't kaysaya pa ng kwentuhan sa kaharap

kung mag-isa'y nakabubusog din lalo't nalasap

ang simpleng pamumuhay at pagkaing pinangarap

- gregoriovbituinjr.