SALAMAT SA T-SHIRT
iisang tshirt, magkaibang kulay sa litrato
ang pagitan ng pagpitik sa kamera'y segundo
pinalitan ko lamang naman ang hawak na libro
di ko naman iniba ang aking tayô o pwesto
marahil nagkaiba ang liwanag sa kamera
naging mapusyaw ang isa't matingkad ang isa pa
ang t-shirt nga't kisame'y di nagbago ang itsura
subalit iyong masdan, magkaiba ng resulta
gayunman, maraming salamat sa t-shirt na bigay
lalo na't magandang islogan pa ang nakalagay
talagang karapatan mo'y ipaglalabang tunay
kaysa kamkamin ng kurakot, di ka mapalagay
kasama sa pakikibaka ang nagbigay nito
maraming salamat, mga kasama ko't katoto
patuloy pa ang pagharap sa kayrami pang isyu
para sa masa, hustisya't karapatang pantao
- gregoriovbituinjr.
02.22.2026
* aklat sa unang litrato: Tula't Tuligsa Laban sa Korapsyon
* aklat sa ikalawang litrato: Tula't Panawagan Para sa Hustisyang Panlipunan
Walang komento:
Mag-post ng isang Komento