ANG MAGLINGKOD SA BAYAN
"The most fulfilling life is the life in service of others." ~ Edgar Jopson
mabuhay ka, Edgar Jopson, sa iyong sawikain
na sa pakiwari ko sa bayan ay tagubilin
magandang prinsipyong nararapat lamang yakapin
pagkat di makasarili, maganda ang layunin
iyan din ang panuto sa nagisnang paaralan
mula elementarya, hayskul hanggang pamantasan
maglingkod, di sa sarili, kundi sa kapwa't bayan
di magpayaman, kundi maglingkod sa sambayanan
sa Kartilya ng Katipunan, aral nito'y ambag
sa unang taludtod pa lang nito'y mapapapitlag
buhay na di ginugol sa layuning anong rilag
ay kahoy na walang lilim o damong makamandag
hanggang ngayon, aral na iyan ay magandang gabay
nang magkaroon ng kabuluhan ang iwing buhay
kaya ayokong nakatunganga o nakatambay
magsikhay, di sa sarili, kundi layuning lantay
"Iisa ang pagkatao ng lahat," itong sabi
ni Gat Emilio Jacinto, bunyi nating bayani
kaya sa buhay na ito sa bayan ay magsilbi
buhay na may layunin, di maging makasarili
- gregbituinjr.
03.20.2020
Walang komento:
Mag-post ng isang Komento